ممكن مساعده

[حيزبونه 2000]

السلام عليكم حبيباتي
قررت أنا وعيالي تكون لنا ساعة قرائه نصفها حفظ آيتين من القران و الباقي قرائه عامه
المشكله أنا ما ني قادرة أحدد الوقت الأفضل و لا نوعية الكتب المناسبة لفئتهم العمريه
عندي بنتي الكبيرة الله يحفظها 13 و وولدي 12 و بنتي 10
حاولت أعرف ميولهم المعرفية للأسف الألكترونيات مسيطره تماما فياليت تساعدوني بارك الله فيكم .

 

[بنوتة طموحة]

عيالج أكيد الصبح بالمدرسة

والعصر دراسة

شوفي وقت مناسب لهم بعد دراستهم

بعد المغرب جذي

وعيالج بهالعمر أحس حلوة لهم قصص الشخصيات الناجحة بالتاريخ خاصة الإسلامي

علشان تعززين هويتهم تلاقين كتب أسلوبهم بسيط وميسر

ولاتقولين عيالي صغار ع هالسوالف الطفل عقله كبير ويفهم بشكل كبير

بس حنا كله انعاملهم على أنهم محدودين الفهم

وصراحة حركة حلوة تدل على انج أم ناجحة

والله يخليهم لج ويخليج لهم

 

[عهود الحب]

حبيت ادعي لج الله يخليهم لج ويبلغج فيهم
حطي الكتب جدام عينهم رف بمكتبة التلفزيون
وخلي لهم جوائز للي يخلص كتاب ويجي يقص لج او يشرح لج كل شي قراه
دايما شجعيهم وخليها تنافس بينج وبينهم
لازم يشوفونج تقرين جدامهم عشان انتي قدوتهم
خلي في اوقات التلفزيون مسكر
حددي لهم برنامج برنامجين بس يتابعونهم وباقي الوقت التلفزيون مسكر
اما باقي الالكترونيات مقدور عليها

 

[حيزبونه 2000]

بنوته طموحة
جزاك الله ألف خير و خليلك كل حبايبك بعد قلبي .

 

[حيزبونه 2000]

عهود الحب
جزاك الله خير و خليك لعين ترجيك
تصدقين كانوا يسون الفنك بس أقول في جائزه الحين ولا كأني أقول في رمضان سويت مسابقة التفسير و بدون جوائز فقط مين يجمع نقاط أكثر فكنت أقول الآيه وأشوف مين يعطيني الإجابة الصحيحة أسم الله عليهم أبدعوا لكن الحين مالهم خلق كلش فحبيت أحدد ساعه قبل النوم نصها حفظ آيتين و كذا راح يحفظون القران خلال ثمان سنين قولي تسعه ونصها الثاني قراءه بس أنا محتاره بالكتب لأنهم راح يقرونها بوحدهم ما كون وياهم فلازم يكونون سهلين وممتعين فياليت أحد يساعدني بأختيار الكتب

 

[عهود الحب]

لاتحددين لهم كتب !
ادخلي معاهم المكتبة وخل يروحون يتمشون بين الكتب ويختارون
عطيهم حرية الاختيار
اذا كان الاختيار سيئ ناقشيهم وفهميهم ليش بنظرج ما يناسبهم
في ركن لكتب الاطفال
وفي اماكن للجلوس بالمكتبة تقعدين وتطلعين انتي واياهم عالكتاب ومحتواهم
لأنه احيانا العنوان يكون براق والمحتوى فارغ لاشيء ينفع الطفل وينمي فكره


بالنسبة لأعمار اطفالج البنت ام 13 اتركي لها حرية الاختيار نصيحة لأنها اكبر من ان تختارين لها ولكن لج حرية النصح والتوجيه
واكيد راح تسمع كلامج ونصيحتج
الولد ابو 12 سنة اكيد مراهق وكله نشاط وحيوية وطيخ وطاخ خل يختار الكتب الي يبيهم
وانتي اشتري له قصص عن حياة الانبياء والرسل والسابقين حتى يكونون قدوة له
في نوعية كتب مشروحة للطفل باسلوب سلس ومبسط

الطفلة ام 10 سنين ياحلاتها ربي يخليها لج
اكيد بتميل للكتب الي فيها اختراعات واكتشافات بحكم انه دراستهم الحين كلها جذي


انتي خلي دورج توجيهي وعطيهم حرية الاختيار

انا اطفالي لي سن 4 سنوات قاعدة اعطيها حرية الاختيار بالكتب
وتجيب الكتاب تخيلي وتناقشني فيه والحمدلله تسمع كلامي وانا مرات ارضخ واسمع كلامها

وان شاء الله عيالج يحفظون القرآن ويحبون القراءة
في كتاب عن كيفية تحفيظ القرآن حلو
توه نازل جديد
احاول اجيب لج صورته

 

[Bon vivant]

كتب بالعربي ولا بالانجليزي ؟؟

 

[عهود الحب]

هذا الكتاب

 

[Little_Queen]

اخذيهم و خليهم اهما يروحون ينقون الكتب الي يبونها

بنتج في هالعمر اعتقد رح تحب كتب الخيال العلمي او كتب القصص القصيرة البسيطة
و ممكن تحب كتب مثل موسوعه جينيس و الكتب الي يكون فيها قصص غريبه و خوارق و عادات و تقاليد شعوب ثانية

اما الاولاد فالله يعينج لان صعب تخلين ولد يقرأ بس مبدئيا هم اعتقد كتب الغرائب و العجائب رح تشدهم

و قصص الاطفال

اخذيهم المكتبه و خليهم يختارون و ينقون و خليهم يحسون بمتعه شراء الكتب


والله يخليهم لج يارب و يطرح فيهم البركة يارب

 

[حيزبونه 2000]

عهود الحب
نصائحك ذهبية بارك الله فيك ولا خلا ولا عدم

 

[حيزبونه 2000]

لتل كوين
أختياراتك رائعه من صج مشكوره وجزاك الله خير