ممكن مسا,,,عده من ابلات الروضه لوسمحتم ,,,مستعجله ابى رد الله يرضى عليكم

[مدام سارا]

تكفوون يا احلى ابلات ,,
انا بلجامعه وماخذه ماده وسائل تعليميه ودكتورتى تبى اكتب كل الوسائل الى استخدمهم فى خبره الحيوانات والنباتات بورقه لحالهم بس الوسائل بليـــــــــــــــــــــــــــــز الله يرزق كل الى ترد على بكل ماتمنى بدنيا والاخره بس ابى منكم تكتبون لى من المنبه الى اخر وسيله من وسائلكم حق خبره الحيوانات والنباتات وجزاااكم الله الف خيـــــــــــــــــــــــــر,,,,​

 

[عهود الحب]

الوسائل
جهاز العرض العلوي
جهاز الحاسوب
مجسم غابة ومزرعة
مسجل
شفافيات تراكمية
وسيلة جيوب



اتمنى يكون في اجابتي فايدة لج

 

[مدام سارا]

حبيبتى عهود الحب جزاج الله الف الف خيـــــــــــــــر الله يريح قلبج بردج والله ريحتينى بس ابى منج حياتى بعد المنبه شنو نشاط ولا اركان ابى تحضيرج لهل يوم الان على حسب خطواتج بوزع وسائلى
انتم ماعندكم حصص نظام شنو مو فاهمه يعنى فترتين ولا اكثر ابى تحضيرج ليوم كامل ياعمرى ومشكوره​

:33_1185028183::33_1185028183:

 

[*أبلة*]

شوفي مدام سارا
النشاط الصباحي عادي بس اليوم اللي يكون فيه مسابقات تكونين يايبه مسابقة صفج معاج .. سواء كانت تركيب منظر او لعبة دومينو او غيرها من المسابقات .
بعدين تييج فترة العمل الجماعي اللي نسميه الحلقه ومدته 20 دقيقه , المنبه مثلا اكمال رسم باستخدام البور بوينت ويتعرف الاطفال على وجه اسد .
وخلال الدرس ممكن تعرضين مكان اقامة الاسد وطعامه ونوعه كونه من الحيوانات المفترسة , وهكذا ..
وممكن بآخر الدرس تسوين مسابقة بين الاطفال مثلا تعرضين مجموعه من الاطعمة والطفل يتسخرج من بينهم طعام الاسد .
وبعد الفتره هذي تيي فترة المطعم وبعدها الفرصة , وبعدهم تيي فترة الاركان ومدتها تقريبا ساعه كاملة يتوزعون الاطفال على الاركان التسعه وهي : ركن الفنية وتكونين موفرة فيه خامات فنية لاستخدام الطفل الى جانب نموذج مشروع يقلده الطفل ويكون مرتبط بالعمل الجماعي اللي قدمتيه الصبح .. مثلا نموذج مجسم أسد .. وتكون فيه تطبيقات ورقية يلونها الطفل, وفيه صلصال اللي اهو الطين والوان مختلفة الانواع الى جانب مفرغات بلاستيكية وطباعات والى اخره من الادوات الفنية .
ركن الرمل والماء وهذا فيه طبعا ماء ورمل باحواض معينه يلعب فيه الطفل باستخدام ادوات الرمل والماء .
ركن المكعبات وفيه مكعبات اسفنجية وخشبية وبلوكات البناء وسلة تحتوي على ادوات تختص بالخبرة مثل الحيوانات المختلفة .
ركن الحاسوب وفيه اجهزة الحاسوب اللي متوفرة بالرياض كلها ونستخدم فيها برمجيات التعلم اللي مزودتنا فيها الوزارة .
ركن العلوم ويتضمن تجربه علمية مثلا تجربة الملمس وتحطين انواع مختلفه من الخامات اللي الطفل يميز في ملمسها ما بين الجلد والشعر والفرو وهكذا , وطبعا يكون موجود اسد وغيره من الحيوانات وطعام الاسد ومنزله ان امكن ....
ركن المطبخ ومتوفر فيه اواني المطبخ .. الخ .. الى جانب بعض الاشياء اللي توفرينها انتي مثل قنينة ماء وتانك بودر للخلط , فاكهه للعصر أو خضار للتقطيع ..
ركن المنزل وفيه مجموعه من ملابس الحيوانات والاقنعة الى جانب المواد المواجده على طول مثل اثاث المنزل والملابس والاحذيه .. الخ ..
ركن المكتبة ويكون موجود بالمكتبه قصص تخدم الخبره وهيدفون للاستماع للقصه والبوم للخبره ويحتوي على مصورات تناسب الخبرة .. وممكن يكون موجود مسرح عرايس والحين طبعا وفرت الوزارة مسرح عرايس للفصول . طبعا لازم عرايس اليدوية للتمثيل او الاطفال يمثلون بنفسهم ..
واخيرا ركن الألعاب التربوية ويكون موجود فيه بعض الالعاب الدائمة مثل الحل والركيب او المعداد وغيرها وبعض الألعاب اللي تخدم العمل الجماعي لليوم نفسه .. مثلا : تركيب صورة اسد او لعبة متاهه أسد يوصل لطعامة .. او تركيب منظر غابه ..
وبعد الاركان في فترة اسمها النشاط اللاصفي وهني يكون اما ثابت مثل الحركية و المكتبة و الموسيقى واماكنهم معروفة بالروضة .. او يكون من ابتكار المعلمة واهي اللي تختار مكان عرض الدرس ولازم يخدم النشاط نفسه والوسائل المستخدمه تكون على حسب النشاط ان كان قصة او عددي او تهذيبي او مسابقات او غيرها ..
وفي نهاية اليوم فترة الانصراف وهذي ما تحتاج الى وسائل او تقنيات .
اتمنى تلقين في ردي شي يفيدج اختي الكريمة
وتحياتي لج​

 

[مدام سارا]

مشكوره حبيبتى ابله يمال العافيه الله يجزااج الف خير,,,,,,,,​