jasmine_flower
New member
- إنضم
- 4 سبتمبر 2006
- المشاركات
- 2,053
- مستوى التفاعل
- 0
- النقاط
- 0
مشاورات سمو رئيس الوزراء ورحلة بحثه عن الستة عشر وزير
تبدأ بتكليف سمو الرئيس مكتبه للاتصال بقائمة اسماء مقترحة لمعرفة استعدادها لدخول الوزارة وخدمة البلد من هذا الكرسي
مكتب رئيس الوزراء : الو السلام عليكم
بيت مرشح لمنصب وزير : وعليكم السلام والرحمة
مكتب رئيس الوزراء : بوعبدالله موجود
بيت مرشح لمنصب وزير : منو نقوله له ؟
.
مكتب رئيس الوزراء : قولوا له مكتب رئيس مجلس الوزراء
المرشح نفسه : قولوا له موهني موهني
بيت المرشح : يقول موهني قصدي يأشر موهني قصدي ما يبي يكلمكم اووووووووه يبا مو موجود مو موجود
اتصال آخر
مكتب الرئيس : الو السلام عليكم
ابن المرشح لمنصب وزير الصغير : الو منو انتااااا ؟
مكتب الرئيس : حبيبي ناد ابوك
ابن المرشح : انتاااااااا منو ؟
مكتب الرئيس : اقول لك ناد ابوك يلا عاد
ابن المرشح : انت شنو تبي ؟
مكتب الرئيس : اوف روح بابا روح ناد ابوك بنسويه وزير يلا بسرعة حبيبي روح ناده
ابن المرشح : وزير ويع وزير كخ مابي بابا يصير وزير
جك
اتصال آخر
مكتب الرئيس : الو السلام عليكم
ام المرشح : وعليكم السلام ورحمة الله
مكتب الرئيس : يما ممكن نكلم بوخالد
ام المرشح : حاضر يا وليدي بس منو حضرتك ؟
مكتب الرئيس : احنا مكتب سمو رئيس الوزراء
ام المرشح : واشتبون بوليدي ؟
مكتب الرئيس : خالتي السر عندج بالامان بنسويه وزير وزيــــــــــــر اشرايج ؟
ام المرشح : وه فال الله ولا فالك
مكتب الرئيس : ليش خالتي ؟
ام المرشح : ويه يا يما يا حبيبي يبون بيبهذلونك ويمسحون فيك القاع ويستجوبونك لا لا يا وليدي لا مانبي مانبي
مكتب الرئيس : يما خل الريال يقرر ولدج ريال مشورب اشكبره خل نكلمه ونسمع رايه
ام المرشح : حتى القطو مشورب يا وليدي لا لا
اذا وليدي ما يعرف مصلحته انا امه واخاف عليه لا يا نظر عيني انا ما عندي عيال يصيرون وزراء
انا الي ايييب واربي واتعب واكبر وتاليتها اتيون انتوا باردة مبردة تمسحون فيه القاع وتكدشونه ويصير بيزة ما يسوى حق الي يسوى والي ما يسوى
مكتب الرئيس : خالتي بتنادينه ولا ادق عليه موبايل
ام المرشح : موبايله عندي يا وليدي وان دقيت بسمعك حجي ما يسر يلا يا حبيبي تسهل دام النفس راضية عليك
اتصال آخر
مكتب الرئيس : الو السلام عليكم
خدامة المرشح : سلام بابا
مكتب الرئيس : وين بابا ؟
خدامة المرشح : بابا نايم
مكتب الرئيس : روحي قعديه
خدامة المرشح : لا بابا انا ما يقعد بابا
مكتب الرئيس : ليش ؟
خدامة المرشح : بابا ما يقوم الا حق باجا يجيب من مدرسة
مكتب الرئيس : روحي قعديه ضروروي انا لازم يكلم بابا الحين
خدامة المرشح : طق طق طق
خدامة المرشح : طق طق طق
خدامة المرشح : طق طق طق
المرشح : هاااااااا الله ياخذكم ما تخلون الواحد يرتاح
خدامة المرشح من ورى الباب : بابا هذا في نفر يقول يبي انت ضروروي
المرشح : قولي له منو انت ؟
الخدامة : بابا يقول انت منو ؟
مكتب الرئيس : قولي له مكتب رئيس الوزراء
الخدامة : بابا يقول مكتب مال رئيس الكفلاء
مكتب الرئيس : الوزراء يا حظي الوزراااااء
الخدامة : مكتب مال رئيس خودرا
مكتب الرئيس : الوزراء يا الحين اقول
الخدامة : وزراء بابا وزراء
المرشح : قولي له شنو يبي ؟
مكتب الرئيس : قولي حق بابا يبي يصير وزير ؟
الخدامة : بابا رئيس وزراء يقول انت يبي يصير رئيس ؟
مكتب الرئيس : وزير مو رئيس انتي شفيج بتوهقينا ؟
الخدامة : وزير بابا وزير انت يبي يصير وزير ؟
المرشح : الحين انا مو قايل لج لا تقعدوني الا حق اليهال اييبهم من المدرسة ؟
الخدامة : بابا انا شنو يسوي هذا بابا يقول ضروري
المرشح : ضروري بعينج هذا ضروري الحين ؟
الخدامة : بابا انا شنو يقول حق مكتب مال وزراء ؟
المرشح : قولي له خل يدق العصر
الخدامة : بابا يقول سوي تلفون العصر
مكتب الرئيس : قولي له لا يكون نشتغل عن يدك
الخدامة : روه زين بابا هذا ايام منو يبي يسوي وزير سوي تلفون العصر يلا بابا انا يبي يروح يسوي مرق روبيان
مكتب الرئيس : بشيييييييييييييييه
اتصال آخر
مكتب رئيس الوزراء : الو السلام عليكم
زوجة المرشح : وعليكم السلام
مكتب الرئيس : ممكن نكلم بوفهد
زوجة المرشح : منو نقول له ؟
مكتب الرئيس : قولي له مكتب رئيس الوزراء
زوجة المرشح : خير عسى مو مهبب شي ريلي ؟
مكتب الرئيس : لا لا بالعكس نبي نكلمه بخصوص ترشيحه للوزارة
زوجة المرشح : كل هذا وتقول مو مهبب
مكتب الرئيس : الحين منصب وزير يعني مهبب ؟
زوجة المرشح : شوف عاد ريلي بروحه ما ينصاد ولا ينشاف واربع وعشرين ساعة بره البيت بحجة عندي شغل بعد يصير وزير لا يبا يفتح الله دوروا غيره
اتصال آخر
مكتب الرئيس : الو السلام عليكم
المرشح نفسه : وعليكم السلام والرحمة
مكتب الرئيس : ممكن اكلم بومحمد ؟
المرشح : منو يبيه ؟
المكتب : مكتب رئيس الوزراء
المرشح : ممكن اعرف ليش تبونه ؟
مكتب الرئيس : والله هو مرشح لمنصب وزير وبغينا نعرف رأيه
المرشح : النمرة غلط هذا تلفون بيتزاهت
مكتب الرئيس : صج ؟ زين خل نشوف شنو عندكم انا يوعان
المرشح : عندنا بيتزا شنو عندنا بالله باجه ؟
مكتب المرشح : ادري بيتزا بس شنو الانواع ؟
المرشح : عندنا بيتزا سوبر سبريم و بيبروني وبيتزا فيجيتابل
مكتب المرشح : انزين عطني بيتزا وسط نصها سوبر سبيرم نصها بيبروني
المرشح : وين العنوان ؟
مكتب الرئيس : طرشها على مكتب رئيس الوزراء
المرشح : بتدفعون كاش ؟
المكتب : لأ يبوا الفاتورة وخل نطرشها ديوان المحاسبة بالاول لا يسون لنا سالفة بعد
المرشح : ماشي مسافة السكة
الموضوووع منقوووول من مدونه فريج سعود
