منو صارلها هالموقف مع عيالها بالحضانه؟

[Q6RYA]

مسا النور بنات ​

انا ولدي عمره سنه ونص وقررنا انا وزوجي من فتره ندخله الحضانه لان ماشالله احسه اجتماعي وذكي ودوامه لين 12 بعدين يرد البيت يتغدا ويرتاح المهم ان توكلنا على الله واليوم كان أول يوم دوام له وانا اوردي موديته مره قبل الحضانه يتعرف عالمكان ويشوف الابله واليهال طبعا قعد عشر دقايق واستانس عالمكان والالعاب ومادرا عني وانا اقول ماما يالله بنروح باي باي ولا التفت صوبي ​

اليوم رحنا الصبح ونفس الشي كان مستحي شوي بالاول عقب على طول دش ولهى بالالعاب ورحت واتصلت بعد ساعه اتطمن عليه قالوله ماشالله عليه مستانس ويلعب الحمدلله.طبعا اهم اول اسبوع الياهل يداوم لين 10 بس عشان يتافلم ولما رحت اخذه توقعت اول مايشوفني يستانس ويظحك اول ماجاف ويهي من بعيد قلتله ماما بجى!​

ورحت حظنته ولميته جان يسكت غسلت ويهه وشربته ماي بعدين تم ماسك يدي حيل ووداني صوب الصف عند اليهال الي يلعبون يبي يلعب معاهم بس ماسكين حيل وكان تعبانه والمدرسه قالتلي مارضى يشرب رضعته ولا ينام ​

بالنسبه للنوم والاكل توقعت من اول الياهل بيكون المكان غريب عليه والوجوه غريبه وقلت يمكن كان تعبان ويوعان واصل حده بس استغربت ان لما جافني بجي من قلبه ولما سالت المدرسه قالتلي لا تحاتين هذا عادي ردة فعل طبيعيه نشوفها من وايد يهال فتره بسيطه وخلاص ​

ابي اعرف اذا في وحده صار معاها جذي ان لما تروح تاخذ عيالها يبجون يعني بالطلعه مو بالدخله. وانا خايفه باجر يكون عارف السالفه ويلزق فيني ومايخليني اطلع مادري شرايكم؟ ادري طولت عليكم بس ودي اعرف اذا هذا صج شي طبيعي؟؟ وافكر احطله باجر روب او شي جذي لان الرضعه يمكن مايتقبلها من اي شخص بس الاكل اذا يوكلونه ممكن ولايتم على يوعه شرايكم​

 

[Safire]

عادي ... وانشااله راح يتعود انا بنتي حيييل خجولة ولازقة فيني ولما وديتها الحضانة ما بجت بس حاطه بقلبها ولما كنت اخذها كانت تبجي . بس الحمدالله الحين تعودت على المكان .

 

[om 7amoodi]

عادي وولدج صغير شوفيه عقب شهرين راح يحب الحضانه وما يبي يطلع منها

 

[Q6RYA]

انشالله والله يسمع منكم الحين صارله اسبوع جذي سواء انا اخذه او ابوه والمدرسه تقولي ان سلوكه طبيعي ووايد يهال جي ويتم فتره بعدين يصير عادي انا احسه حاب الحضانه ويستانس فيها بس على اخر يومين احسه فهم السالفه اني اروح واهده ويكون مركز حيل الصبح على تحركاتي واني ماهده ههه اهم شي ان لحد الحين مايبجي الصبح ومن اجوفه ينشغل احاول اطلع

 

[-فلانة-]

عااااااااااااااادي و طبيعي..أصلاً اللي مو طبيعي إنه يتوالم على طول، كونه يستاحش و يبجي معناها إنه ولدج مدرك إن البيئة هذي غريبة عليه و هذولي ناس غرباء و هذيلي من علامات تطور الإدراك و الذكاء عند الطفل..أما الطفل اللي بهالعمر و تقطينه بين غرب و ما تشوفين منه ردة فعل هذا يكون عنده مشكلة بالإستيعاب.
انا دخلت بنتي الحضانة يوم إنها كبر ولدج، و انا بنتي حيل لازقة فيني لأنها طول الوقت مجابلتني حتى خدامة ما عندي يعني كللللللش ما تتقبل وجود غرباء، أول شهر كانت تبجي بجي يقطع القلب بس ما كنت أتجاوب معاها و كنت أخليها و أمشي و أركب السيارة و أبجي انا بعد ههههههههه و لما أرد آخذها من تشوفني تبجي بجوة واحد مقهور حبييييبتي.
بعد شهر تقريباً صار الوضع طبيعي، واندمجت معاهم و بالعكس تحسفت إني ما دخلتها بسن أصغر وايد وايد وايد استفادت من الحضانة و شخصيتها وايد تغيرت للأفضل و صارت إجتماعية أكثر و أبشرج الحين حتى بالويكند تقعد الصبح تقولي بيبي يعني وديني الحضانة ههههههههه
أهم شي شدي على عمرج و قوي قلبج فترة و تعدي و عقبها بتشوفين النتايج الحلوة ان شاء الله، عسى الله يحفظلج وليدج و عقبال ما تفرحين فيه متخرج من الجامعة ان شاء الله.

 

[Q6RYA]

عااااااااااااااادي و طبيعي..أصلاً اللي مو طبيعي إنه يتوالم على طول، كونه يستاحش و يبجي معناها إنه ولدج مدرك إن البيئة هذي غريبة عليه و هذولي ناس غرباء و هذيلي من علامات تطور الإدراك و الذكاء عند الطفل..أما الطفل اللي بهالعمر و تقطينه بين غرب و ما تشوفين منه ردة فعل هذا يكون عنده مشكلة بالإستيعاب.
انا دخلت بنتي الحضانة يوم إنها كبر ولدج، و انا بنتي حيل لازقة فيني لأنها طول الوقت مجابلتني حتى خدامة ما عندي يعني كللللللش ما تتقبل وجود غرباء، أول شهر كانت تبجي بجي يقطع القلب بس ما كنت أتجاوب معاها و كنت أخليها و أمشي و أركب السيارة و أبجي انا بعد ههههههههه و لما أرد آخذها من تشوفني تبجي بجوة واحد مقهور حبييييبتي.
بعد شهر تقريباً صار الوضع طبيعي، واندمجت معاهم و بالعكس تحسفت إني ما دخلتها بسن أصغر وايد وايد وايد استفادت من الحضانة و شخصيتها وايد تغيرت للأفضل و صارت إجتماعية أكثر و أبشرج الحين حتى بالويكند تقعد الصبح تقولي بيبي يعني وديني الحضانة ههههههههه
أهم شي شدي على عمرج و قوي قلبج فترة و تعدي و عقبها بتشوفين النتايج الحلوة ان شاء الله، عسى الله يحفظلج وليدج و عقبال ما تفرحين فيه متخرج من الجامعة ان شاء الله.

حبيبتي تسلمين عالرد وعسى الله يحفظ بنوتج القمر ومشكوره عالكلام الي صج يريح وانشالله صج يبدا يتأقلم ويستفيد لأان انا هذا هدفي من اني مدخلته الحظانه ان شخصيته تتطور ويستانس ويتعلم شلون يتفاعل مع اليهال لان بعيالتنا مافي يهال كلش وعلى قولتج اول مايجوفني يظحك وعلى طول يقلب بجي وعيونه تقول ليش خليتني بروحي :eh_s(2): ههههههه

 

[-فلانة-]

بإذن الله راح تشوفين تغييرات إيجابية عليه وانا مثلج بنتي وحيدة و مافي يهال كبرها و ما تتخيلين شكثر تطورت شخصيتها بالحضانة..
عسى الله يهدي سرّج و يريح بالج و يطمن قلبج عليه.

 

[-فلانة-]

بإذن الله راح تشوفين تغييرات إيجابية عليه وانا مثلج بنتي وحيدة و مافي يهال كبرها و ما تتخيلين شكثر تطورت شخصيتها بالحضانة..
عسى الله يهدي سرّج و يريح بالج و يطمن قلبج عليه.

 

[Aloe Vera]

هههه المثل يقول شفت امي شفت همي
الياهل مستانس و لاهي بس يشوف امه يتذكرها و يصير يبيها
طبيعي جداً تصرف ولدج

 

[Q6RYA]

بإذن الله راح تشوفين تغييرات إيجابية عليه وانا مثلج بنتي وحيدة و مافي يهال كبرها و ما تتخيلين شكثر تطورت شخصيتها بالحضانة..
عسى الله يهدي سرّج و يريح بالج و يطمن قلبج عليه.

حبيبتي مشكوره الله يسمع منج انشالله ويبلغج ببنتج امين.:eh_s(7):

الوفيرا ظحكتيني ومشكوره عالرد

الحين الموجه انقلبت وفهم شالسالفه لما اروح اخذه يستانس وقام يصيح الصبح لما اهده واي قلبي يعورني بس اقوي قلبي واسويله باباي واطلع :eh_s(2): يقولونلي بس اطلع شوي ويسكت مادري متى بيتعود الله يعين الامهات

 

[كويتيه مذهله 87]

حبيبتي عادي ردت فعله طبيعيه لان متشره عليج اول مره تهدينه جذيه وتمشين عنه
باجر يتأقلم لو ولدج اكبر جان قتلج بقولج ماما كل يوم وديني الحضانه ومايبي يرد البيت