منو فيها تكيس عالمبيض وحملت مع الكلوميد والابره التفجيريه

[MALHoOoFA]

السلام عليكم​

خواتي بغيت أسال منو فيها تكيس عالمبيض وحملت مع الكلوميد والابره التفجيريه، لاني الحين فيني تكيس وثاني شهر اكل حبوب وأبر تكبر البويضات وابر تفجيريه اول مره ماصار حمل والحين ناطره ومتوكله على الله ، ومشكورين​

 

[مدوخه حيل]

اختي انا نفس حالتج وعلى العلاج وانتظر نهايت الاسبوع ويبين انا حامل ولا لا وعقبها بقول لج

 

[MALHoOoFA]

الله كريم انشالله، وإنشالله تبشريني بكل خير، وانا بعد هالسبوع يبين​

 

[هبة النسناس 82]

أنا فيني تكيس بس الصراحة مانفعتني لحبوب ولا الإبر أنا مانفعتني الا عملية كي المبايض عقبها على طول حملت والحين الحمدالله عندي بنت عمرها ست اشهور عسى انشالله يرزقكم بالذرية الصالحة

 

[القطانيه]

حياتي انا فيني تكيس وحملت بس ماصار ننصيب مات البيبي ابطني يارب يرزقنا جمييعا يارب

 

[MALHoOoFA]

هبة النسناس 82
الله يخليلج بنت انشالله ويبلغج فيها بس حبيبتي بغيت اسالج شنو عملية الكي؟؟ اهيه نفسها المنظار؟؟

القطانيه
آنا بعد صارلي نفسج من قبل 8 شهور ولي الحين مو قاعد يصير حمل ودكتورتي تقولي من التكيس بس قاعده تحاول معاي بالعلاج واذا ماصار حمل هالشهر قلتلها بسوي العمليه لان التكيس ذابحني​

 

[القطانيه]

يااااااااااااااااااااارب يفرج همنا وتزوول التكيس مناا وتريح قلبا بارب وتقر عيوونا بشوفت ياهل يملي عليينا وحدتنا يارب

 

[MALHoOoFA]

القطانيه​

إنشالله يارب، بس حبيبتي دكتورتج ماقالتلج شنو سبب توقف نبض الجنين؟ وماقالتلج سوي عملية المنظار حق التكيس؟؟​

 

[عمر السنين]

انا فيني تكيس و خذيت كلوميد و مفروض اسوي سونار الاثنين اللي فات بس ماقدرت اروح افحص صار عندي ظروف و مادري الحين شنو نتيجه العلاج متوهقه

 

[حياتي الكويت]

حتى أنا فينى تكيس وألحين بادي معاى في العلاج حبوب وبعد 12 يوم يشوف المبيض يحتاج أبر ولا لا انشالله يفرجها علي وعليكم بحق لاأله ألا الله وشنو خايف بس الواحد ماله ألا الدعاء والستغفار

 

[MALHoOoFA]

عمر السنين

إنشالله مافيج إلا كل خير

حياتي الكويت

الحمدلله على كل حال والله يرزق كل محرومه يارب، انا الشهر اللي طاف كليت الحبوب وباليوم 12 سويت سونار وطلعت حجم البويضه 28 يعني وايد زينه وخذيت الابره التفجيريه وماصار حمل وهالشهر خذيت نفس الحبوب وباليوم 14 سويت السونار ولا البويضات اكبر وحده حجمها 11 امبيه وايد صغيره عاد خذيت ابرتين عشان يكبرون البويضات عاد عقب الابر بيوم سويت سونار ولا حجم اكبر وحده 18 عاد غزيت الابره التفجيريه والحين ناطره النتيجه، انا وايد خايفه اسوي عملية المنظار، يارب ارزقني بدون عمليات​

 

[ألوي الكويت]

انا اعرف لازم تعالجين تشيلين الكيس اما بالأدويه واذا مانفع يسحب الكيس بعمليه صغيره

بعدين يبدي كورس العلاج لأن الكيس مع المنشطات راح يكبر

وهذا الحجي من تجربه

 

[^^ام ميمي^^]

بنات انا اللي اعرفه ان بالاول يعالجون التكيس وعقب يعطون علاج للحمل ما يصير يعطون مقويات وابر وانتو فيكم تكيس ؟؟

انا كان فيني تكيس بسيط عطتني الدكتورة حبوب منع حمل لمدة شهر بس والشهر اللي بعده راح التكيس وبدت معاي بالعلاج الابر والمقويات والحمدلله صار حمل .
واللحين انا بالرابع والحمدلله يارب.

والتكيس اللي صار معاي بسبب المقويات والابر وبالاخير ماكو نتيجة حمل فسبب تكيس

 

[كتكوت-حبي]

أنا فيني تكيس وخديت كلوميد وأبرت تفجير لمدة 6 أشهر، بس ما فاد معاي إلا لمن عطاني الدكتور إبر تكبر المبايض لمدة 5 أيام وبعدها إبرة تفجير وبعدين عقب إسبوعين حللت إلا أنا حامل

 

[غيـ الناس ـر]

احسن حل تشيلين المشكله من عرجها .. وعملية المنظار وايد سهله حبيبتي ولا تحسين بتعب الااول يومين ..


والله يرزقج حبيبتي

 

[MALHoOoFA]

ألوي الكويت

حبيبتي الأدويه ماراح تنفع لأن التكيس كبير، فقالت دكتورتي نجرب المنشطات لمدة شهرين اذا مافاد نسوي العمليه، صرنا حقل تجارب بإيد هالدكاتره

منتج كويتي100%

الله يتمم عليج حملج انشالله، الظاهر التكيس اللي كان فيج صغير فيروح بالعلاج بسرعه

كتكوت-حبي​

حبيبتي الله يتمم عليج حملج انشالله، آنا نفسج خذيت حبوب وابر تكبر البويضات وابره تفجيريه بس مانفع معاي، انا لمن حملت الحمدلله حملت بسرعه وبدون اي منشطات لكن الله ما اراد ان يتمم علي الحمل والحمدلله على كل حال، عقب ما سويت تنظيفات يعني صارلي 8 شهور مو قاعد يصير حمل والله اخاف ان لاعبين فيني

غيـ الناس ـر

الله يرزق الجميع انشالله وانشالله اسوي العمليه والقى نتيجه


مشكورين حبايبي عالمرور الطيب​

 

[غلا رووحي]

امبيـــــــه فقدت الامل

انا صارلي اللحين 5 شهور من زواجي واحس بعوار مو طبيعي رحت عند الدطتوره سكينه قالتلي فيج تكيس بالمبايض
وانا تني بادية معاها

بس لما قريت ردودكم فقدت الامل

 

[cuta_saroona]

بنات منو خذت ابره تفجيريه وحبوب العلاج المنشطه عند الدكتوره فوزية القطان؟؟

ابي اعرف اسعار الابره والمنشطات جم؟؟؟

 

[MALHoOoFA]

غلا رووحي

لاتفقدين الامل حبيبتي كل وحده غير عن الثانيه وماتدرين الله متى كاتبلج الحمل

cuta_saroona

بالنسبه لي حبيبتي آنا آخذ هالسوالف عند دكتوره بطيبه كلينيك والاسعار اتوقع كل مكان نفس الشي لان نشتريهم من الصيدليه​

 

[ألوي الكويت]

ألوي الكويت

حبيبتي الأدويه ماراح تنفع لأن التكيس كبير، فقالت دكتورتي نجرب المنشطات لمدة شهرين اذا مافاد نسوي العمليه، صرنا حقل تجارب بإيد هالدكاتره

منتج كويتي100%

الله يتمم عليج حملج انشالله، الظاهر التكيس اللي كان فيج صغير فيروح بالعلاج بسرعه​

حبيبتي انا مو حامل
انا كان فيني كيس كبير وقالتلي الدكتوره لازم نسحب الكيس ثاني يوم رحت عيادة ماجده اليتامي وسويت العمليه هيى اسمها يخرع بس ماكو عوار بس تحسين بوخز الابره وتقدرين تطلبين تخدير بس انا ماطلبت لأن نفس جهاز السونار الداخلي وبعدين عطتني حبوب والحمدالله راح التكيس

وانا جربت التكيس الصغير الللي يروح بالادويه

انشالله اكون فدتك​