يا هلا و غلا بأهل السلطنة.. و مشكووورة على ثقتج بذوق بنات عروس الخليج..
و مبروووك على البيت و منزل مبارك ياااارب...
شووفي بشكل عام الأذواق تختلف من شخص لثاني.. بس في قواعد عامه المفروض اتباعها..
ذكرتي انج تبين بيتج مودرن.. ف رااح نتفق على بعض الأساسيات..
بالنسبة للألوان لابد يدخل فيها الميتاليك و السلفر أو/و الذهبي في الاكسسوارات و اللوحات و الشمعدانات و المفارش
(الثروز) و الكوشيات على شان يكسرون لج أي لون أساسي راح تختارينه..
اعتمدي على قطع الأثاث البسيطة في قصتها.. و ابتعدي قدر الامكان عن الأشياء اللي فيها حفر و زخارف..
و لا تاخذين خشب بيج .. أفضل الأثاث اللي لونه أبيض أو بني محروق خاصة لغرف النوم.. و على فكرة ترا الجلد موووودرن و دااارج.. خلي تاج السرير و بيبان الكبت تتنجد بالجلد.. فخم و يديد و غريب بنفس الوقت..
الألوان الأساسية تعتمد على ذوقج.. بس أقترح الرمادي بدرجاته.. البنفسجي.. الفوشي.. البرتقالي.. الأحمر.. الأزرق..
مثلا: غرف الأولاد بدرجات الأزرق و الرمادي و الأبيض
و غرف البنات بين الفوشي و البنفسجي و الأبيض
الماستر روم اللي لج أحمر و أبيض أو إذا ما تتقبلين هالألوان اعتمدي على الألوان الكلاسيك بس الأثاث مودرن..
يعني خلي الأثاث بسيط بس لونه بني محروق.. و السيراميك بيج.. الستاره و المفارش و الكوفر و الاكسسوارات و الشموع مكس بين الذهبي و البرونزي و القمرديني أو البرتقالي المحومر..
الصالات خليها مصبوغة بالفوااتح مثل درجات البيج و الذهبي و الصدفي.. و حتى الأرضيات.. عشان ما تحتارين بالأثاث.. عموما درجات البيج يلبق لها الماروني و العنابي و الكرزي و البني و الأزرق و الأخضر الزيتي و الفستقي و البنفسجي..
الأصفر لون مميز و مودرن ويكسر الجموووود بس استخدميه بذكاء بوضع لمسات بسيطه جدا تلفت النظر.. لااا تكثرين منه..
البساطة هي رمز الأناقة.. اختاري ثيم معين و امشي عليه.. مثلا داماسك أو زهور أو خطوط أو نقط ,, لا تسوووين لوويه و خبه
بالنهاية لما تاخذين لج جولة بأسواق و محلات الأثاث اللي عندكم,, راح تكونين فكرة عامة و شاملة للموضوع..
*نصيحة: لا تفرشين زل.. السيراميك أحلا و أنظف.. و ممكن تحطين قطع موكيت أسهل لج بالغسل و التنظيف..
و إذا حبيتي تغيرين لون الغرفه بكل سهوووولة تشترين كوفر ديباج و موكيت صغير و ستارة و يصير عندج نيووولووووك مع إضافة شموع و ورد مجفف..
