موائـــــــــــد الخيـــــــــــــــــر ... الله يجزاها خير اللي تفيديني

[أبلة مس]

السلام عليكم ..

العام كان زوجي يجمع بعض العمال و اللي يشوفهم بالطريق و يعزمهم عالفطور عندنا ... بس بصراحة تعب على خالتي (( أم زوجي )) ... قررت آنا أطبخ لهم الفطور هالسنة .. بس ودي أعرف شنو ممكن أقدم لهم غير التمر و العيش و الشوربة ... و التقديم شلون ؟؟ عاادي إذا أحط لهم بلاستيك .. ؟؟ لأن ما أبي غسيل الموااعين يصير واايد عالخدامة ؟؟

اللي عندها خبرة بهالموضوع الله يجزاها الخير تفيدني ..

بانتظاركم ​

 

[GAP^^الكبيرة]

حبيبتي اول شي يزاج الله خير ويقدرج دايم على فعل الخير

حبيبتي اغلب العمال يبون شي يدهم بالطاقه ويشبع وانا اشوف العيش مع المرق او الدياي المشوي مناسب وايد

بالنسبه للتقديم عادي ... حطي لهم ببلاستيك او بقصدير احسن لهم بعد لانهم ساعات يشيلون لهم لي بعدين

 

[أحلى الجياكر]

ليش أختى ما تشترين مواعين القصدير المقسمة من داخل ؟؟
مكان للعيش و قطعة أيدام ... ومكان للتمر ..و توزعين بطول ماى صغيرة و لبن ..و نقوص تمر ببلاستيك على طول ما طول سفرة نايلون (الى ينقط ) و هم أكو مواعين قصدير على شكل قنادير ..هذول للشوربة ..و العمال يحبون الخضرة الورق ..تحطين ملتين فيهم خضرة مو مقصصة بس مغسولة و اذا تبين تدلعينهم حبتين تشترين من راعى الحلويات بلح الشام يموتون عليه ..و عسى الله يجازيكم الخير كله

احنا نسوى جذيه و نوزعه صوب الشويخ قبل الفطور ..ما نييبهم البيت ..

 

[جارة القمر]

نفس كلام غاب

أحسن صحن القصدير

أو النايلون

وجزاج الله كل خير


ومبارك عليج الشهر

 

[زري منثور]

انا بقولك امي شنو تسوي

أذا خلص الفطور وقبل الصلاه بعشر دقايق اتصلت على كل الهنود والعمال اللي نعرفهم

وخصوصا" خياطنا اللي دايم نخيط عنده هو وربعه

وهندي بقاله ورى بيتنا هو فيه سكر وامي تعطف عليه حيل

وهم ندز للمسجد بس أحنا نحط الأكل بسفري ويجون يأخذونه لبيتهم

لانه يبقى منه فيشيلون منه لبعد التراويح او الساعه 12 عااد أهم كيفهم

هذي طريقتنا

وبعدين عادي لو حطيتي لهم بسفري أنا اشوف انه عااادي

عااد ماادري كيفك انتي وأسألي زوجك قبل اذا بيرضى بصحون السفري او لا

وانا لاحظت ان العمال يحبون أكثر شي العيش والحلويات

 

[سفيرة العشق]

الله يجزاكم كل خير ويكثر من امثالكم

 

[أبلة مس]

الله يجزاكم الجنة و ما قصرتوا بردودكم ... و آراءكم حلوة مثلكم ...

أحلى الجياكر .. كلج حلا حبيبتي .. آنا باجر بعد الدواام بادور هالموااعين البلاستيك المقسمة .. فكرة حلوة واايد .. و أرتب لهم ...

مبــــــارك عليكم الشهـــــر جميعا

 

[DKNY]

الله يجزاكم الجنه

بس ليش بدال ماتتعبون وتطبخون بالبيت تتعاملون مع مطعم مو غالي يسوي لكم وجبات يوميا وبعدد انتو تحددونه وتوزعونه احسن لا تعب طبخ ولاتوزيع مواعين والاجر هو نفس الاجر والوقت اللي بينطبخ فيه الاكل تستغلونه بطبخ فطور البيت والعباده

وربي يجزاكم خيييييييير

 

[_The DoLL_]

جزاج الله خير ... والبنات ماقصروا كفو و وفوا

 

[أبلة مس]

DKNY و The doll مشكورين على مروركم ..

DKNY ... آنا زوجي و حمولتي كانوا راح يسوون جذي .. بس آنا حبيت أطبخ بنفسي زيادة أجر إن شاءالله .. و لا هو تعب بإذن الله ..

آنا حتى اليوم لما رديت من الدوام ما توقعت أرتاح و آنام .. بس سبحان الله نمت و قعدت عالعصر .. صليت و طبخت الأكل .. حتى بعد ماركبت الجدور ... ارتحت شوي و قعدت مع عيالي .. الحمدلله على كل شيء .. كان سهالات ..
حتى لما غرفنا الأكل .. كان بسرعة و قدرت أنزل بعدها لحمولتي و أفطر معاهم ..

الحمدلله .. و الله يجزاكم خير و تقبل الله صيامنا و صيامكم

 

[ملكة أسرتي]

الله يجزاج خير .. ويبارك لكم في مالكم وعيالكم .

 

[أم وهابي]

اخذى الفلين المقسم 1000 حبه من اسعار زمان مقابل سوق الشرق الاوسط

وسويلهم مرقوق وربيان ناشف مع مموش وجزاك الله كل خير