موضوع تأخر الانجاب وعمي .... اه يا قلبي

[ومضات]

شلونكم بنات وأمهات المستقبل انشالله ...
أنا كنت أتصفح القسم هذا شبه يومي والحين حابه أشارك وافضفض لكم يمكن ارتاح ....

أنا متزوجة صار لي سنتين ونص بدون عيال
العيب زوجي عنده ضعف بالعدد وانا الحمد الله تحاليلي سليمة والفحوصات

أنا وزوجي راضين بقضاء الله وقدره ومستمرين بالعلاج في مشاكل بيننا لكن مثل اي زوجين ...

المشكله اكتبها وانا جداً متضايقه مؤ من زوجي ولا أهلي ولا خالتي امه
لا .... من عمي أبوه

عمي ريال جبير وربي يشهد شكثر احبه واحترمه واطوف علشان زوجي ولانه بحسبت أبوي لكن الموضوع بدا ياخذ شكل ثاني

من اول يوم زواج لي اليوم وعمي يحن ويسأل عن العيال وكان زوجي مؤ مصارح أهله بمشكلته لكن كلمهم :eh_s(2):

فجأة عمي بدا يحط السبب واللوم علي بنات قام يتكلم عني ويحط علل أمراض فيني ويقول حق ولده تزوج ثانيه!!!!! انت العله من زوجتك !!!!!!!!! الله اكبر هذي يزاتي لو انتوا بمكاني أمانه شنو موقفكم

بلعت الموس وسكت .....

تمنيت من داخلي لو زوجي مانقل لي عمي يقال عني .... تألمت جداً ودعيت ربي ولا تكلمت وشكيت
أدعو لي خواتي أنا وكل بنت عسي الله يرزقنا من أزواجنا ذرية صالحة



ربي لا تذرني فردا وانت خير الوارثين

شورو علي خواتي!!

 

[ابدا يالغالي مانساك]

حياااتي وليش ماتفهمين خالتج انج مسويه تحاليلج وكل شي سليم الحمدلله وفهميها ليش عمي بيزوج ولده والسبب منه والضعف والقله هذي مو سبب يبيله علاج شهر بالكثير ان شالله وربي بيرزقكم ولاتضيقي خلقج وتوكللي علي الله اهم شي زوجج صريح وياج وقالج اللي حصل ربي يرزقكم الذريه الصالحه ان شالله

 

[عـسـلـهـمـ..]

الله يرزقج يااااارب

 

[ايشوريا]

مرحباً حبيبتي انت نفس مشكلتي بالضبط انصحتنيً الدكتورة أنة نسوي تلقيحً صناعي والحمدالله رضيً زوجي بس بعد ماعلً قلبي والحمدالله حملت. والافال لج يا رب انت والبنات ولا تنسين كل تأخيرةً فيها خيرة لج ولة وكثري الاستغفار والدعاء ولج رب كبير ويحبجً حيل لاتياسينً من رحمة الله

 

[ومضات]

أختي أبدا : خالتي أنا ماكلمتها خفت من ردت فعلها

أختي عسلهم : امين مشكورة

أختي آشوريا: انتي سويت تلقيح ؟ ممكن تفيديني عن حالة ريلج وعلاجه وعند منو عالجتي لانه دكتور قال حق زوجي العدد ضعيف وصعبه يتسحن وايد وكل شيء بيد الله طبعا سبحانه ونصحنا أنابيب علي طول واكثر من دكتور استشرناه علي طول قال أنابيب

 

[رووح ابووها]

ريال كبير وغالبيتهم جذي تفكيرهم
حاول تطوفين واكثري من الاستغفار

والله يرزقج

 

[ومضات]

مشكورة ياروح امين ويرزقج ويرزق كل محرومة

 

[الاهله]

الله يرزقج يارب ويرزقنا كلنا

 

[الزيـــــ^^ـــــن]

حبيبتي ومضااات نصيييحه روووحي للدكتور مصطفى تومسووو بدار الشفاء
زوجي الحمدالله من الله ومن هالدكتور قاعد تتحسن حااالته وماشاءالله رفيجاتي نجح التلقيح
اللي السووه عند الدكتووور وحملوو عسئ ربي يتمم عليهم ،،،
والفال لج يارب ،،، اسعووو انتوو وان شاءالله ربي يسعى معاكم

 

[خاله كندا]

الله يرزقك حبيبتي وانا معك وكل محروم انا زوجي عنده الحركه ضعيفه والله يعين وربي صلاة الليل راحه وتنسيكي كل شئ وزي ماقالت الاخت رجال كبير ومايعرف ذي المواضيع بس نصيحه اذا بديتو باي علاج لاتقولي لحد حتى اهلتس والله ان ربي غير يرزقك بس توكل عليه وخلي زوجك يستغفر معتس وقبل الجماع صلي ركعتين انتي وياه وادعي دعاء الحاجه >>

 

[ومضات]

الاهله؛ مشكورة وايد

الزين : مشكورة حبيبتي علي النصيحة بس ممكن اعرف منج جم نسبة ريلج أنا تصدقين لي الحين ماعرف اي رقم يمكن نسميه ضعف شديد او ممكن علاجه؟ وانتي سويتي تلقيح؟ وشلونه مصطفي كتعامل وتشخيص؟

 

[ومضات]

خاله كندا: جزاج الله خير مشكورة

 

[sosowaty]

البنات ماقصرو و انتي ما عليج منه

اهم شي ان ريلج يبيج

لو ريلج يبيج صدقني مستحيل راح يتزوج عليج و خاصتا و اهو عارف ان المشكله منه و ربي يشافيه و يرزقكم

 

[خيشة شكر@]

اللهم ياربي يرقچ عاااااجلا غير آجل ويقر عيونچ بضناچ ياربي لاتيئسين من رحمة الله والخيرة فيما اختارها الله

 

[درة أهل الطولات]

لج رب ما ينساج

 

[ومضات]

خواتي أحبكم في الله

 

[غلا عيوني]

الله يرزقج ان شالله وانتي واشتكي لله عزوجل يفرجلج ان شالله

 

[ومضات]

ونعم بالله

 

[سوزي الشرقية]

المشكلة حتى لورحتي وجلستي مع عمتش وفهمتيها شنو مشكلة ولدها اتوقع مابتصدق ان العيب من ولدها .......
يعني روحوكذا طبيب شوفوشنويقولواليكم اذا التلقيح الصناعي او اطفال الانابيب معدل نجاحها عالي تؤكلواعلى الله

 

[صادقة بكلمتي]

حبيبتي سوي باصلج وصبري باجر لا دروا بيتحسفون عن كل حرف ضايقوج فيه وادعي الله انه يرزقكم وترا العلم تطور انا رفيجتي اربع سنين ما تييب عيال من ريلها عنده ضعف سووا تلقيح والحمدلله كاهي الحين حامل اربع اشهر بثلاث يهال الله يتمم عليها وتقول ياليت سويت التلقيح من اول سنه ولا صبرت اربع سنين لكن اللي كاتبه الله بيكون والله يتمم عليج ويفرح قلبج