مو من حقهم يااااخذون فونـــــــــــي !!

[عايشه حياتي]

قـــــــــوه كويتات :eh_s(7):

بدخل بدووون مقدمات, الله يسلمكم انا تلفوني النقال فواتير وباسم ابوووي وامس ابوي دق على الشركه (من دون ذكر الاسم ) قاله انه الفاتورة واصله 40 دينار وابووي عصب وقال انتي الاسبوع الي طاف قلتلي 16 مسرع باسبوع صار 40 وقاعد يزفني يقولي 40 دينار مع منو تكلمين فيه (بدأ الشك) وانا والله كانت مع رفايجي ومسجات وجذي والمهم امي خذت فووني :eh_s(2): وقالت افكر افكر اعطيج اياه نهاية السنه وانا منقهــــــــــــره حيل وقاعدت اعاندهم قلت ماااشي والله لا اسقط عشان تشوفون منو اعند انا ولا انتوا قلتها بعصبيه

المهم بنات انا حدي منقهره وزعلانه ابي فووووني ليش يحسسوني جني ياااهل عندهم قولولي شسوي مع اهلي بطووا جبدي كل يوم قاعد يبعدوني عنهم اكثر واكثر تكفووووووووووون شوروا علي شسوي معاهم ؟!

 

[amoona89]

&&مااعليه لاتضيقين خلقج
اوول شي لاتهدمين مستقبلج علشاان سبب تافه شنو تستقطين وتهددينهم؟؟
لاتعااندين اذا عاندتي يزيدوون
انطري على ماتهدأ الاوضااع ورووحي بنفسج اقنعي ابووج وقولي له انه يحوول جهازج كرووت احسن
انا نفسج كان جهازي فواتيرر وكان بأسم ابووي اتووهق كل شهر يطلع علي 30 وانا ما اتكلم للهدرجه
وكل شهر احااتي حتى يووم كنت اسوولف مع رفيجااتي احااتي انه خااف يزيد
وما ارتحت الا يووم حوولته كرووت احسسسن بكثثير من الفواتير
انطري جم يووم وكلميه واهم لو مايحبوونج وخايفين على مصلحتج جان ماعاقبووج

 

[مضيعة برقعها]

عادي شيلي فكره النقال من بالج
لا تقولين مقدر
بذمتج جاوبي بصراحه
بتموتين من دونه؟؟؟؟
انا قبلج لما كنت بالثانويه خريجه ثانويه عامه ٢٠٠٥
تلفوون حياتي كلها رفايجي وارقامي ومسجاتي
المهم مقدر استغنى عنه بالمره لوووو شنو
والله ان شهر ٤ شفته ببساطه وكسرته بيدي الثنتين وانا ماااااسكه صرختي
ومسكت نفسي شهر ٤- و ٥ و٦ الامتحانات ولما تخرجت
صااار الوضع عندي عادي لانقال ولا شئ وبهدلت الفواتير والكروت التعبئه

 

[احبس دموعي]

انتي ماتعاندينهم تعاندين نفسج هذا مستقبلج مو مستقبلهم انتي اللي بتعيدين السنه وتردين تدرسين وتكتبين وتحلين
كلها شهرين وتخلص السالفه

 

[Noor AlQ8]

اهلج يبون مصلحتج


السالفة مو سالفة شك لو انهم يشكون فيج جان ماعطوج تلفون بس انتي توج صغيرة على بالج اهلج يعادونج صدقيني محد بيخاف عليج كثرهم


انتي الحين ركزي بدراستج وجيبي نسبة زينة وماراح يردون لج طلب .. اذا سقطتي انتي الخسرانه محد بيتأثر غيرج

ونصيحة خلي رفيجاتج يكلمونج من تلفون بيت عشان ما يصرف

 

[حطموكَ يآقلـبيَ]

البنات كفوا ووفوا والله يوفقك

 

[ميشووو]

الله يهديج ويهديهم



انتظري لين تهدا الامور وقولي لهم ابحوله كروت

 

[الملكة كوكو]

عادي حبيبتي , ذكرتيني فيني لمن كنت ابــ ثانية ثانوي , كنت اسولف ويا رفيجاتي بالموبايل وايد جنة ما عندنا تلفون بيت و آخر الشهر طلعت الفواتير 60 د.ك و ابوي زفني و هزأني جدام أمي و اخواني و خذا مني الموبايل, وانا سكت ما قلت ولا كلمة و لا اعترضت لان ادري اني غلطانة و تماديت , و رفيجاتي اشوفهم بالمدرسة كل يوم و اذا ابي شي منهم او ابي اسولف في تلفون البيت ماله داعي موبايل بالساعات , و بصراحة كان احسن عشان لا يشغلني و اتعبث فيه و مسجات و ياخذ من وقتي , انتي لا تهتمين صدقيني بعدين راح تشوفين ان هذا شي سخيف وما يستاهل ولا تزعلين عشانه و اهلج ما يبون الا مصلحتج و فكري في دراستج أولى و لاحقة على الموبايل و السوالف..​

 

[ام - وهابي]

الا مستقبلج حبيبتي الله يهديج

 

[الغاليه ام احمد]

عفيه على الشاطره احسن شي بتسوينه انج تعاندين اهلج وتسقطين

لان محد راح يتحسف ويندم الا انتي لما تشوفين صديقاتج ناجحات ومتخرجات من الثانويه وانتي ساقطه

الحين لانهم اخذوا تلفونج بتسقطين ليش شنو فيه هالتلفون اللي بتبيعين مستقبلج عشانه تهقين يستاهل هالتضحيه

وزين ان امج بترده لج بعد الامتحانات

وشنو 40 دينار فواتير اكيد مالت شهر ليش اكيد انتي عندج اي فون والمسجات ببلاش فليش هالصرف

وبعدين انتي كاتبه مشكلتج قبل اشوي مع اخوج ولبسج وانه دايما يخانقج

والحين مشكلتج مع امج وابوج والتلفون

لا حبيبتي العيب مو فيهم العيب فيج انتي اكيد وانا ما اقول العيب اخلاقي لا حشا ما احط شي بذمتي وانا ما اعرفج

العيب اللي اقصده اهو تصرفاتج المراهقه اللي مو عاجبه اهلج

حبيبتي انتبهي لنفسج واهتمي بدراستج وطيعي اهلج وخلي عنج هالخرابيط

ولا تزعلين من كلامي انا عادتج مثل بنتي ومثل ما ابيلها الخير ابيه لج

والمثل يقول رفيجي اللي يبجيني ويبجي علي مو اللي يضحكني ويضحك الناس علي

وياليتج تفهمين هالمثل

 

[Babies setter]

شوفي حبيبتي اسلوب العناد هذا تدرين شلون يصير؟؟!!
تبين تعاندينهم من حقج صح تلفونج وعانديهم لكن قبل لاتعاندين سوي هالمعادلة
دراستي +فوني=نسبة موشي
اعاند اهلي+عنادي لنفسي=لعب الشيطان بمخج
العناد انج بتعاندين نفسج بشي هي تكره وشوفي حبيبتي انج تسقطين هذا شي يفشل وربي يفشل
طريقة كلامج مع اهلج لازم تهذبينها لانج باجر بتزوجين وبيصير عندج عيال فكري بترضين بنتج تقولكم هالكلام؟؟
ديري بالج على دراستج وخلي منج مكملات الحياة هذي..وشنو يعني فون ؟ رفيجاتج بتشوفينهم بالمدرسة كل يوم ونصيحتي لج كاخت تغانمي وقتج لان اللي راح راح ومو باجي شي عالاختبارات
بالتوفيق انشااالله

 

[LuLiTa]

حبوبة انا بعدج حسبت اختي الصغيرة ,,,

انتي مرا مو ياهل فـ خلي تصرفاتج يكون فيها مسؤلية شوي ,,,اذا رفيجاتج اتشوفينهم كل يووم بـ المدرسة فـ شنو السوالف اللي بـ تطوفج ؟ ما تبعدين عنهم الا وقت الويك اند و بهـ الوقت تقدرين اتحاجيهم من تلفون البيت شنو المشكلة ؟

باسبوعين الولد صرف 40 دينار بس حق فواتير تلفونج انتي ,,, هـ الـ 40 مو حرام اطير على فواتير فوون ؟؟ مو انتي و اخوانج اولى بهـ الفلوس ؟ و بعدين لو انتي فواتيرج هـ الكثر شلون بـ خواتج و خوانج الثانيين؟ مو حرام الوالد يدفع هـ الكثر بس على الفونات ؟ ,,, هـ الـ 40 كان ممكن يكونون مصروف لج تتطلعين و تتمشين و تتسوقين ,,,

السنه مو باقي عليها شي ,,, شهر و كسور و لا شهرين بالكثير و يردلج فونج ما خربت الدنيا ,,, صبري هـ المدة و عقبها الفون راح يرد لج كامل مكمل ,,, اذا نزلت درجاتج و لا سقطتي محد راح يتضرر غيرج انتي لانه الشهادة لج مو حق اهلج و لا رفيجاتج ,,, فـ لا اتعاندين على حساب مصلحتج ,,,,


اهلج لو مو خايفين على مصلحتج جان ما سوو جذي ,,, و لما ادشين الجامعه راح اتعرفين انه معاهم حق بـ اللي سووه ,,,,

 

[على الطيب تربيت]

سبحان الله العظيم عشان دلعوج وعطوووج وجه تعاندين

وشفيها لاخذوا فووونج ع قولتج خلاص انهدت الدنيااااااا

يابنتي كبري عقلج وخلي سوالف النقال عنج وبعنادج بتشككينهم فيج زود


اخلي همج رضا ربج وبر والديج


ياويلي زمن امحق واسحق الي البنات يتدلعون ويعاندووووون

الله يرحم ايامنا التزام وحشمه واحترام وان قصرنا شوي مع اهلنا استحينا وتفشلناااا

يارب رحمتك من زمان اقشر

زمان البنت تحكم امها وابوهاااااا

يابنتي انصحج ان ماعقلتي روحي انتحري عشاااان فووونج

 

[ام ناصر 80]

لو مافي تلفون بالدنيا شراح تسوين فكري بمستقبلج قبل كل شي بلا عناد

 

[المرتاحة]

حبيبتي ديري بالج على مستقبلج هذا اهم شي و باجي المشاكل صدقيني راح تنحل بس صبري اشوي المساله يبيلها صبر لا اكثر ولا اقل

ولا تعقدين المشكله بمشكله اكبر و هي انج تسقطين

لا ديري بالج تسوين هالشي لانه مستقبلج انتي مو مستقبل اهلج

صج راح يزعلون اهلج اشويه بس حياتهم ماشيه لكن انتي اللي راح تتوهقين و تتعبين اكثر وتعيدين السنه و تدرسين نفس المنهج و تحاولين تييبين نسبه مره ثانيه علشان ادشين الجامعه

انا ادري انج قلتي هالشي من ورا قلبج بس لانج كنتي محتره حزتها

خليج شاطره و شدي حيلج و ان شا الله تييبين نسبه زينه و كلها جم يوم ما تكلمين رفيجاتج يعني اخذيها من ناحيه ايجابيه هو انج راح تتفرعين علشان ادرسين عدل

والتلفون محلول أمره وصدقيني ان شافوج اهلج شاده حيلج بدراستج اهم بنفسهم راح يردون لج تلفونج

و نصيحه حولي خطج كرووت وايد احسن و ما تحاتين الفاتوره

و الله يوفقج يا رب و يسهل عليج دروسج و ينجحج و تييبين النسبه اللي انتي تبينها

 

[al3sooola]

ترى وايد باسبوع 40
ليش شصاير عليج
ادري ان رفيجاتج
بس اشدعوه
وبعدين ما عندكم تلفون بيت ؟

 

[جفا الأصحاب]

حبيبتي فكري بدراستج .. وانتي مو قاعده تعاندين أحد انتي قاعده تعاندين نفسج

وأمج وأبوج يبون مصلحتج ترى هم مو أعدء لج ..

وانا بعرف حشى 40 دينار والله لو انج مديرة أعمال ..

عاد بالذات الآي فون ما يصرف واايد

والله يهديج *

 

[nono93]

تسقطين عشان>>فوه<<

انتي مفرووض>>> تنتبهين لدراستججججججججججج
وكلها شهر وتخلص السنهههههههههههه


وراح يعطووونج اياه لاتخافينننننننننن


بس اذا خذيتيه حولي كرووووووووووووووت احسن لج

 

[ام مرمر]

اهلج يبون مصلحتج


السالفة مو سالفة شك لو انهم يشكون فيج جان ماعطوج تلفون بس انتي توج صغيرة على بالج اهلج يعادونج صدقيني محد بيخاف عليج كثرهم


انتي الحين ركزي بدراستج وجيبي نسبة زينة وماراح يردون لج طلب .. اذا سقطتي انتي الخسرانه محد بيتأثر غيرج

ونصيحة خلي رفيجاتج يكلمونج من تلفون بيت عشان ما يصرف

:rerrerek:معاها​

 

[نفـــائس]

لا تسوينها وتعاندين نفسج وتسقطين

ترى محد منظر كثرج هم جم يوم بينقهرون وتصير عادي بس انتي طوووووول السنه بتذكريتها وخاصة رفيجاتج سبقوج يعني كل يوم حره بجبدج انتي

ولله لو ماخايفين عليج ويبون مصلحتج جان ماسوو .جذيه تري......... 40 دينار وايد خاصه اللحين بيبي وايفون قللت الفواتير بيخسرون شركات الاتصالات بسببهم .....

اهنيج علي اهلج والتربيتهم الصحيحه