نخيتكم يالطيبات يا بنات الكويت الحبيبة

[احبك يا كويتنا]

السلام عليكم ورحمة الله وبركاته

حبايبي بنات الكويت الغاليات .. من جدة احييكم وحابة تساعدوني

انا ان شاء الله باروح الكويت بعد شهر تقريبا ترانزيت وبتكون الاقامة بالكويت 3 ايام فقط
حاولت ازود المدة بس مالقيت حجز..
وهذي اول زيارة لي للكويت رغم اني من زماان خاطري اروحها لكن ان شاء الله الجايات اكثر

فطبعا ودي ازور المميز يعني الي المفروض اشوفه .. لكن مشكلتي وين .. بترتيبها لأن انا مو عارفة الا اسماء الأماكن بس لكن قربهم من بعض هالشي بيكون عليكم انتم:eh_s(22):

في بالي من المولات الافينوز و360 و المارينا مول والمارينا كرست قباله والكوت وسوق شرق
والفنار اذا معي وقت.. والأسواق الشعبية المباركية اكييد لاني حبيته والكل يمدحه واذا فيه وقت رامز... هذا بالنسبة للمولات ودي اقسمها على هالثلاث ايام ، ايه نسيت بعد بوقت روحتي بيكون فيه معرض منتجات استهلاكية بارض المعارض يستاهل العنوة ولا لا

واماكن الترفيه محدودة ابي بس المركز او المتحف العلمي وابراج الكويت (مترددة فيها شورو علي) والكورنيش وفيه على مااضن قدام سوق شرق تاجير قوارب باسعار معقووولة جدا للساعة الوحدة ياليت تاكدولي هالكلام .. والنافورة الموسيقية

ونجي عالمطاعم .. فيه مجموعة كافيهات ومطاعم سجلتها عندي وباختار منها حسب القرب للمنطقة الي باكون رايحتلها

مطعم الستينات - مطعم فريج صويلح - كافيه بزا - ريوق - مطعم برج الحمام - ميس الغانم - فطور في فندق ميسوني (عجبني) - استديو فينيس في مجمع الفنار -

هذا الي في بالي الحين .. وان شاء الله بادور سكن بالسالمية لأنها الأقرب لكل شيء
وبما انه بنكون عالتكاسي فابي ارتب جدول بمساعدتكم بالايام هذي كل مجموعة قريبة اخليها بيوم واحد وباحاول ان شاء الله اصحى بدري عشان استفيد من اليوم باكمله
يعني ودي بالجدول يكون اخر اليوم مول عشان اشوف فيه فيلم بالسينما وعقبها نرجع للفندق

وسمعت انه فيه تاكسي حسب الطلب هل بيكون سعره اغلى من التكاسي الي ننزل الشارع ونستقلها.. وكم رقم تاكسي تحت الطلب ويجي بوقت ممتاز ولا ياخرنا

واخر شي يالطيبات .. اكيييد ماتحلى الكويت الا لما اجيب معي للسعودية من حلوياتها الشرقية فابي نصيحة من احلى مكان اروح له باخر يوم واشتري من هالحلويات لنا وهدايا بعد

متشووووقة اشوف ردودكم فلا تخيبون ضني بليييز:yaaaaaarb:

:eh_s(17): للي بترد

 

[احبك يا كويتنا]

افااااا :eh_s(2): مكنشي العشم والله

 

[ميثا الغريب]

ما شاء الله عليج ما خليتي شي


الحلويات اللي تبينها كاكاو والا بخصم وكعك


اذا تبين كاكاو روحي شارع تونس بحولي تلقين المحلات ملوت الكاكاو

واذا البخصم وتوابعه سوق الكويت. احلى. شي


بش وين بتسكنين علشان اقولج المحلات القريبه منج



وحياح الله بالكويت

 

[احبك يا كويتنا]

هههههههههه الله يخليلنا النت ماخلا شي

مشكووورة يا قلبي ميثا عالرد

انا يالغالية ان شاء الله باسكن بالسالمية للحين مترددة بين 4 فنادق بسيطة ..

مارينا رويال سويتس ، ايبس السالمية ، هاوثورن هوتيل ( هذا مو متاكدة بالسالمية ولا لا ) ، والأخير ريتز السالمية

والله يكتب لي احسنهم

سوق الكويت وين مكانه وياليت تحطينه لي مع اقرب مكان اروحله عشان اوفر وقت

يالله انتضرك انت والطيبات .. رغم اني ماشوف احد عبرني غيرك

بس فيك الخير حبيبتي

 

[ميثا الغريب]

شوفي اختي اذا سكنت بالسالميه تكونين وفرتي على نفسج المسافه. لكل شي سياحي


لان المارينا وسوق شرق والرحلات البحريه كلها قريبه يمج تقدرين تخلصينها بيوم واحد


وليت تكلميني على الخاص لاني مو دايم ادخل هالباب


بس لاجل بنت جده.

صرت مرشده سياحيه لعيونج *

 

[ارزاق مرزوق]

حبيبتي حياك الله في ديرتك الكويت
الافنيوز وايد كبير وفي سينمات فخليه له يوم كامل واذا خلصتيه روحي 360
اليوم الثاني روحي سوق شرق وتمشي واذا حابه قوارب أخذي من هناك وعقب روحي المباركية وأشتري الحلويات منها عندك محلات وايد تبيع الدر أبيل والبقصم والذي منه
اليوم الثالث تغطي في فريج صويلح وروحي المرينا والفنار وليلي غاليري وفي مجمعات وايد في السالمية
الكوت يبله يوم بروحه هو ومجمعات فح يحيل لان بعيد شوي بالنسبة لنا
ونورتي ديرتك

 

[احبك يا كويتنا]

تسلمين ميثا ماقصرتي يعطيك العافية

ارزاق يا قلبي الله يسعدك ما قصرتي .. باحاول ارتب لي جدول بالمناطق الي قربتيها من بعض .. بس انت ماذكرتي كل الأماكن الي كتبتها هل معناه الباقي ماله داعي مثل المركز العلمي والنافورة وباقي الكافيهات والمطاعم ابي المميز فيها

وابي رايكم وش الي ممكن احذفه فوق وش الي ممكن اضيفه + استفساراتي الي اضفتها بخصوص تاكسي تحت الطلب وبخصوص الابراج والمعرض الاستهلاكي

ومدام الافينوز كبير نبدا فيه بداية النهار ونشوف متى نخلصه عشان نروح لغيره

طمعانة اكثر بكرمكم تسوولي جدول بسيط من الافطار حتى العشاء والسينما لو فيه مسرح بعد تمام
واكيد مرح يمديني اشوف كل الي كاتبته بس باحاول اعمل جدول اشوف فيه الأهم فالمهم وانا اختار من الجدول الي يناسبني لكل يوم .. وهي للأسف 3 ايام بلياليها

 

[نـعـومـه]

اليوم الاول

روحي من الصبح الافنيوز تريقي وتمشي وشوفي المحلات وتغدي مثلا ساعه 3 خلصتي رديتي الفندق ريحتي وطلعتي مره ثانيه 6 روحي المركز العلمي شوفي الاكواريوم وقاعه الاستكشاف وتمشي برا صوب البحر اللي اهوه الكرنيش وعقبها شوفيلج مطعم بخاطرج بسالميه تعشي فيه


اليوم الثاني

روحي الصبح مجمع 360 مثلا من 9ونص ولا 10 قعدي تريقي
تمشي اذا حابه سينما دخلي شوفي الفلم اللي يعجبج وعقبها بخاطرج مدينه ملاهي روحي حديقه الشعب لعبو موقعها بالشعب اهيه صوب سالميه واذا موحابه مدينه ملاهي عيل روحي مجمعات المارينا مول بالسالميه وروحي سوق شرق بينه وبين المارينا ربع ساعه


اليوم الثالث

روحي تمشي بالفحيحيل مجمع الكوت فيه نافوره تريقي او تغدي وقباله سوق قديم متروس شغلات

وسوق المباركيه خليه بليل او العكس روحي المباركيه الصبح ومجمع الكوت بليل وتمشي بفحيحيل




رحله سعيده

عاد قوليلنا عقب سفره وين رحتي وشنو سويتي

 

[نـعـومـه]

الافنيوز كافي عليه نص يوم الا بحاله ماراح تتسوقين فيه

 

[نـعـومـه]

وتأجير اليخت فكررره حلوووووه بس ماعرف شلون

 

[احبك يا كويتنا]

نعومة يا قلبي عسى صباحك صباح الهنا يارب .. الله يعطيك العافية ما قصرتي والله

وان شاء الله ابشري بس ارجع ان شاء الله اكتب الموجز عن هالرحلة البسيطة والي شفته هناك والي عجبني

بس باقي استفساراتي لو فيها رزالة عشان ارتب اموري زين التاكسي والمعرض

طيب النافورة الراقصة مثل حقت دبي هي الي تقولين عليها بالكوت

 

[رتبه دبلوماسيه]

العضوات ماقصروو

 

[ميثا الغريب]

هلا يا بنت جده الكوت ومنطقة الفحيحيل خليها اول يوم لانها شوي بعيده يعني نص ساعه من السالميه وخلي التكسي ينزلج عند الكوت وتمشي بالكوت بعد صلاة العصر ليما المغرب وبعدين اطلعي تمشي بالسواق المفتوحه اسواق شعبيه ومجمعاات وايد. وبعدين تعشي المعاطم مجوده




وبالنسبه لنافورة الكوت ترى مو كبيره كافي تقعدين تشربين قهوه او شاي





وعليج بالعافيه

ترى الكيت حلوه. *

 

[**توفا**]

أختي الغالية .. دزيتلج بعض المعلومات عالخاص .

 

[احبك يا كويتنا]

رتبة دبلوماسية مشكوورة عالمرور حبيبتي

ميثا حبيبتي ما قصرتي والله .. ردك كثير افادني الله يعطيك العافية

توفا .. يا عمري تسلمين لي والله، حاولت ارسلك رد عالخاص بس مشاركاتي قليلة ماقدرت فباشكرك هنا

مشكووورة يا قلبي الله يعطيك العافية معلوماتك كثير كنت محتاجتها ومفيييدة حيل وكلها على راسي والله

بالنسبة ل360 تقولين مايستاهل العنوة .. طيب لو فكرت اشوفه بسرعة اسم اني دخلته وشفته وش الامكنة القريبة منه .. لان انت عطيتيني اسماء جديدة ماكانت على بالي وبارتبها بالجدول ان شاء الله.. وعلى فكرة انا مع زوجي فقط بدون العيال

الله لا يحرمني منكم .. يا أحلى كويتيات

 

[DaLa3 BeBe]

السلام عليكم

حياج الله اختي بتنورينا

مشاءالله عندج معلومات حلوه عن الاماكن والمولات

لكن اللي حابه اقوله ماعتقد انها بتاخذ منج وقت طويل بالمول الا اذا بتتسوقين

واما السينما ممكن تجربين ال vip كتغيير شي حلو وأغلى طبعا

والبعد بين المناطق ماياخذ وقت طويل بس حسب زحمة الطريق

الملاهي عندج حديقة الشعب والمدينة الترفيهية والالعاب المائية بالاكوابارك وفيه يوم مخصص للنساء .

والمطاعم عندج مطعم البلد جربيه للريوق اذا حابه بوفيه بأعلى البرج

والتكسي تحت الطلب متوفر كثير لكن ماعندي ارقامهم

وأي سؤال إحنا حاضرين .

 

[**توفا**]

هلا بالغالية .... و العفو ما سوينا شي .. هذا واجبنا و انتوا دايما أهل الفضل ..

بالنسبة لترتيب الأماكن على حسب القرب يكون كالتالي :

1- مول 360 / الأفنيوز .
2- الليوان مول / الكوت .
3- الفنار / سوق السالمية / المركز العلمي / المارينا .
4- سوق شرق / أبراج الكويت / مطاعم عبدالوهاب ولونوتر .

بهالصورة ممكن تستغنين عن الكوت و تعوضينه بالليوان أفضل عشان تستغلين الوقت أو تزورين مجمع كويت ماجيك في منطقة أبو حليفة قريبة من العقيلة اللي فيها الليوان مول ، و بما إن زيارتج بس انتي وزوجج فاسمحيلي أسوي لج جدول ممكن تغيرين بعض الأماكن فيه على راحتج :

اليوم الأول : الفطور في أبراج الكويت أو لونوتر ( نظام بوفيه )
الذهاب صباحا إلى منطقة العقيلة وزيارة مجمع الليوان ثم منطقة أبوحليفة وزيارة كويت ماجيك ومنه الانطلاق على نفس الشارع الساحلي في الكثير من المطاعم و أفضلها للغداء مطعم دعوات .
العودة للفندق .
الخروج في الرابعة إلى سوق شرق وقبل المغرب تأجير سفينه من السوق نفسه ومن ثم الانطلاق للمركز العلمي و زيارة الاكواريوم فيه مع اختيارالفيلم المناسب لمشاهدته ( أفلام علميه بنظام الايماكس )
ممكن بعد المركز العلمي يكون العشا في مطعم نارنج ( مشويات) وهذا المطعم قريب حيل عند المركز العلمي بمجمع أولمبيا .
إذا كان في وقت ممكن تقضين بعض الوقت بالفنار و دخول السينما .

 

[**توفا**]

اليوم الثاني : الفطور بمطعم قصر السرايا بجوار مجمع أولمبيا .
الانطلاق لسوق السالمية الجديد وشراء كل ما يخطر بالبال، وطبعا السوق مليان مطاعم بكل الأنواع للغدا .
الذهاب للفندق .
الخروج قبل الرابعة لمول 360 ( مثل ما انتي تحبين ) و التمشي فيه بس لا تطولين لأن وراج جولة العمر في الأفنيوز طبعا الأفنيوز ياخذ وقت عشان جذي لاتروحين السينما فيه خلي السينما إخر الليل بمجمعات السالمية .
العشا على حسب اختيارج .
اذا كان في وقت ممكن تروحين أي مقهى عالبحر .

 

[**توفا**]

اليوم الأخير : الفنار صباحا مع المارينا .
أسواق المباركية .

 

[**توفا**]

نسيت أقولج إذا صادفت زيارتج أي معرض بأرض المعارض فلا تطوفينه خاصة إذا كان معرض منتجات استهلاكية أو أسرة أو هدايا . أما المعارض المتخصصة فلا تعنين نفسج لها . و أرض المعارض دايما فيها أشياء مميزة و غريبة ما تلقينها بأي مكان .