نداء لكل من تريد ان تكسب الاجر

[فتووم]

ارجووكم سااعدونااا طالبات تربيه عمليه
وربي حدنا عليميات في الرووضه

انا درسي عن عدد 2 يتعرف على العدد 2 رمزا ومدلولا
يشارك الاطفال في المسابقات
يقفز الطفل قفزتان

الله يوفقها ويسعدها اللي تحط لي خطة الدرس

دايمن يقولون لي اذا تبين درسج حلو اخذي يا كلمة يا عدد
وانا ما اعرف اسوي مسابقات اتنح ابي افكار للعدد 2
احس اني مو مبدعه نفس خلق الله

ومشكورين خواااتي

 

[فتووم]

افاااا

عالعموووم الله يعافيكم

 

[ألمـاااس]

رد : نداء لكل من تريد ان تكسب الاجر

هلا اختي والله توني اشوف موضوعج

وبصراحه جيت ركض ابي اسجلج رد عشان طمعانه بدعوة حلوة منج لي ولعيالي وزوجي وبيتي

بسم الله نبتدي..

بما انج العدد 2 اتوقع انتي مستوى اول يعني خبرتكم روضتي..

تبتدين بمثير بعطيج جم فكره واختاري منها الي تبين...

اولا .. تقدرين تحطين سله فيها ملابس روضه (( اثنين ملابس بنوتات يعني نفنوف وواحد ملابس ولد مثل الشورت)) وتحطين لبس ولد ثاني باحد اركان الفصل

تجيبين شخصيه اي شخصيه دميه عندج او لعبه عروسه

تقصين على الاطفال قصه سارا البنت الي سجلها ابوها بالروضه وقاعده تستعد للدوام وتسالين الاطفال شنو تحتاج ساره حتى تروح للروضه؟؟؟

لحد ماتوصلين لمريول الروضه

تقولين اشرايكم اطفال نروح لركن البيت ونبحث عن ملابس الروضه لساره

تروحون وتجيبون السله وترجعون للحلقه وتبتدين تطلبين من الاطفال اخراج الملابس ومناقشتهم بملابس البنت والولد وهذا من يلبسه وذاك من يلبسه؟؟؟

بعدها تجيبين طوقين وتطلبين من الاطفال وضع ملابس الولد (( الي هو واحد )) في الطوق الاول

ويحطون لج بالطوق الثاني ملابس البنت (( الي هو اثنين ))

بعدها يالله يا اطفال نعد المجموعه الاولى

تعدونها وتطلبين من الاطفال وضع رمز العدد واحد جدام المجموعه

تجين للمجموعه الثانيه وتعدينها انتي بنفسج وتعرضين العدد 2 لهم وطبعا قرائتها فردي وجماعي

بعدين يالله يا اطفال نبحث عن العدد 2 عشان نحطه جدام المجموعه

بعدها تبلشين بالمسابقات..

مثلا..

تنثرين كور بالفصل وتعطين كل طفل صحن البلاستيك حق المطعم (( لما تروحون للمطعم اطلبي من اطفالج يجمعون لج الصحون البلاستيك عشان تستخدمينهم بالحلقه ))

وتطلبين من كل طفل وضع كورتين بصحنه ومن ثم يرجع مكانه

بجذيه تكونين حركتي كل اطفال صفج

مسابقه ثانيه...

تحطين على السبوره المغناطيسيه دائره وتضعين تحت الدائره مجموعه ارقام من بينهم الرقم 2

وطبعا داخل الدائره تحطين عنصرين اي شي حتى لو مغناطيس السبوره

وتطلبين من الطفل وضع الرمز المناسب تحت المجموعه

ووو عندج مسابقه ثالثه مثل تحطين تحت كل كرسي طفل او خلف ظهره ورقه فيها تطبيق للعدد 2يعني مجموعه صور عناصر مثل مجوعه فيها وردتين وومجموعه فيها ثلاث بطات ومجموعه فيها فراشه وحده وتطلبين من الاطفال تحويط المجموعه الي تمثل مدلول العدد 2

وعندج بعد مسابقه رابعه

تروحين مع اطفالج لركن الفنيه وتكونين مجهزة الطين على عدد اطفالج وتطلبين من كل طفل تشكيل العدد 2 بالطين وطبعا تكونين حاطه لهم رمز العدد 2 على ستاند قدامهم بنص الدائره عشان يشوفونه ويسوون مثله

بعدها تجمعين اطفالج على مكان الحلقه ومع الموسيقى يالله نقفز قفزتين

وبالاخير..

انثري على الارض مجموعه بطاقات للاعداد ومع الموسيقى يدورون الاطفال حول الاعداد ولما توقف الموسيقى لازم كل طفل يوقف على العدد 2

وسلامتج

 

[فتووم]

الله يوفقج ويسعدج دنيا واخره ويسر لج امورج
ويخلي لج عيالج وتسشوفينهم يكبرون ويعرسون قدام عينج وانتي بصحه وعافيه يا ربي

انا مستوى ثانيه مو اولى بس وربي اخذت منها افكار حق خبرة انا الانسان
خااصه مسابقات العدد

ليت الكل يصير نفسج ويحس بالثاني

 

[راقية باخلاقي]

ما قصرت الماس