ندمانه والله ماعيدها

[الحـــــالمه]

بسم الله الرحمن الرحيم
شلون ابتدي والله مستحيه وندمانه
تطلقت من زوجي قبل اسبوع
قبل الطلاق تخانقنا على سالفه سخيفه وانا عاندت واهو بعد
ورحت شكيت لابوي قالي شنو تبين قلت الطلاق ودق ابوي عليه
وغلط زوجي على ابوي وسبه واحتريت واصريت على الطلاق
وبعد شهر ونص دق ابوي عليه وقاله شتنطر ياله طلق قال لا ماني مطلق
ابي زوجتي وعيالي وعاندت انا لانه خلال الشهر اللي طاف مادق علي ولا كلمني
وحسيت انه ما يبيني
ويوم راح ابوي للمحكمة قال زوجي ترا انا مابي الطلاق وتوني احس بغلاها
قال ابوي انت لو انك تحبها ماوصلت الامور الى جذي وكلام واجد
ويوم عطاني ابوي ورقت طلاقي حسيت جنه طراق على وجهي
صحاني من كل شي قلت انا شسويت عندي عيال والموضوع مايستاهل
احبه وابيه وانا الحين بالعده وما كلمته ولا اهو كلمني حتى مادق علي يسألني اذا مابيه
ـــــــــــــــــــــــــــــــ
الحين افكر اني ارفع عليه قضية النفقه وبدل ايجار وخدامه وسايق وسياره والخ
واهو معاشة شويه يعني المحكمه راح تسحب معاشه كله وبهالطريقه راح يردني عشان فلوسه
بس اخاف يكرهني زياده ويعاند ومايردني
انا اعترف اني غلطت وندمانه والله ماراح اعيدها
قولولي شسوي
ارفع عليه قضية والا ادق عليه
بس مابي ادق عليه لاني انا اللي طالبه الطلاق وبعدين ارجع بيقول ((نلعب))
وبطيح من عين ابوي
تكفون دلوني شسوي عندي 4 اطفال

 

[sawaranza]

الله يهديج بس ليش استعيلتي ... حاولي تكلمين امج قوليلها برجع حق ريلي
وترى من حقج واتوقع اهوه ما راح يكون عنده مانع لانه من الاول ما بغى
يطلق ... والله يكتب لج اللي فيه الخير :yaaaaaarb:​

 

[النووف]

رد : ندمانه والله ماعيدها

الله يكون بعونج ..

بس ماراح الومج لان الموضوع انتهى لو ماعاندتي من البدايه احسن

انا اقول بما انج فالعده حاولي ترجعين له عشان عيالج بس

اذا ماتبين تتصلين خلي الكبير من عيالج يكلمه ,, او شوفي واحد غير ابوج يكلمه عمج او خالج

وان شاء الله خيير

 

[Fe6aMi]

رد : ندمانه والله ماعيدها

امبيه الله يعينج :eh_s(2):

 

[ناتشوو]

رد : ندمانه والله ماعيدها

الله يهديج
وموشرط لو طلبت النفقة بيردج علشان الفلوس
يمكن ياخذها مسألة كرامة
واضح زوجج كان شاريج ويبي عياله
ولاسف دور اهلج سلبي بتشجيعج

الحل
انت اخبر بشخصية زوجج
لو كلمتيه بيطخ وبيسامح؟
وترى مافيها شي لو اعترفت بغلطتج عنده او عالاقل انج مشتاقتله
ترى حتى هو عنده كرامة وكان شاريج لاخر لحظة
واذا كلش في مجال تكلمين احد من اهله
او احد من اهلج يكلمه؟

 

[قرنفله 99]

الله يسامحج توج تفكرين بعيالج ابليس ركب راسج علي اشياء تافهه ياريت في سبب مقنع وبعدين كل المتزوجين يتهاوشون ويتزاعلون بس ماتوصل لي العناد هذا واذا مادق عليج لانج غلطانه وكبرتي الامور واهي ماتستاهل لو مخليته فتره ومالزمتي علي الطلاق جان جاج وراضاج وباس راسج وراس ابوج بعد انتي بسالفت الطلاق يمكن خليتيه يكرهج واذا كملتيها ورفعتي عليه قضيه بيكرهج زياده وحتي لو يفلس ماراح يذل نفسه لج انا من رايي تعوذي من ابليس وحاولي ترديله بالمعروف عشان عيالج مو عشان شي ثاني

 

[ام فواازي]

الله يكون بعونج يعني بينكم عشره وعيال ليش العجله بصراحه انتي باصرارج خليتيه يظن انه رخيص عندج وبايعته حتى لو ردج وانا اتمنالج هالشي بتصير بخاطره الله يهدي النفوس ويردج لزوجج ونصيحه لاترفعين عليه قضيه الحين اذا ودج يردج لو رفعتيها بتصير صج معاند وكرامته ماراح تسمح له يردج والله يوفقج ويهدي سرج

 

[MiSs_6a7LooSHA]

حرام عليج

أدري ان اللي صار صار


لكن تلاحقي ع عمرج وبيتج وزوجج وعيالج ترى انتي بحاجة له وهو بحاجة لج ولعيالج

واللي معور قلبي الرجال يبيييييييييييييييييج حرام عليج

رديله مايبيلها كلام رديييييييله والله يوفقكم وهذا درس لج عشان ماتعاندين وتصبرين وتتحملين

ناس تصير عندها بلاوي وتتحمل ترى وانتي معترفة ع سالفة تافهه !! شي يقهر

رديله يابنت والله يوفقكم ..

 

[RoWaIsHeDyA]

امممم ماابي اوزج على الغلط وجذي بس ليش ماادخلين العيال بالصوره خلي واحد من عيالج يتصل عليه يقوله نبي نطلع معاك وجذي ويمكن يحن شوي .. الله يهديج بس ويرجعكم لبعض

 

[بنت النفيعي]

خلي ولدج الكبير يكلمه بطريقة يرئية :eh_s(2):

ودزي عيالج له يمكن يحن :eh_s(2):

 

[ديانا سبنسر]

من صجج ليش سويتي جذي غلط بغلط اللي سويتيه وماراح ياكل اللي سويتيه الاعيالج وللاسف للحين مصرة تمشين بالغلط تبين تذلينه علشان يردج ديربالج ترفعين قضية وهذا انا اقولج انسيييييييييييييييه اذا رفعتي عليه قضايا الريال ماينلوي ذراعه وبعدين تعالي اقولج ليش تكابرين هو زوجج وانتي تبينه ومادامج بالعدة امسكي تيلفونج وقولي ريلي وابوعيالي انا مالي بالدنيا غيرك ندمانة علي صار وقولي كل اللي تحسينه الريال تملكينه بالحنان والكلمة الطيبة موبالعوابة صدقيني وادعي ربج وتوسيله ان يهدي سركم ويردكم ويحفظكم من كل شر

 

[ملاك العنزي]

اولاا
صلي صلاة الاستخاره
وادعي ربك
وثانيا دخلي احد بينكم يكون حمامه سلام
حتى ولو كان العيال



وربي يسر لك امرك

 

[جوري الزبير]

الله يهديج حبوبه
رررررررررردي كلمي امج .. ودقي على ريلج قولي له عيالك يبونك مالهم غنى عنك وانا اشتقت لك دام انه يبيج ما راج يعتبر هالشي عيب ولا في ذل لج ..
اهو ما تضايق من قال ابيها بالمحكمه ومابي اطلق فلا تضايقين انتي الحين ..
دقي على ريلج ورجعي بيتج اربع يهال موووووووو سهل يتربون وابوهم بعيد عنهم
توكلي على الله حبوبه وبشرينه برجعتج حق بيتج:yaaaaaarb:

 

[تبطي عظم!]

والله ما ادري شقولج

الله يكون بعونج حبيبتي ~

بس مالج غير انه اكبر عيالج يكلم ابوه يمكن زوجج يحن قلبه عليهم ويردج

خلي عيالج يدقون عليه ~

او بادريه بمسج واعتذري منه ~

حرام شنو ذنب عيالكم!!!

 

[Model Look]

حياتي خلي اليهال يدقون علا ابوهم خليهم يقولون بابا مشتاقينلك متى نرد البيت ونقعد كلنا مع بعض

خلي يحن شوي علا عياله

يمكن يفكر يدق عليج واستغفري ربج وادعي انه يردج

والله يجمعكم ان شالله

 

[مسؤولة تعيين]

والله ماادري شقولج
بس عسى الله يححن قلوبكم علة بعض ويسخركم لبعض وتردون
حرام تضيعون اليهال بسبب شغلات تافهه:yaaaaaarb:

 

[q8tyah]

دقى عليه ورديله عشان خاطر هاليهال اللى بينكم

تدرين عيالج لي كبروا ودروا انج تطلقتى على سبب تافه بيكرهونج

حرام عشان خاطر هاليهال شذنبهم يعيشون مشتتين لابيت ولا استقرار ونظره المجتمع لهم بسبه التفكك الاسري

دوسي على كرامتج وخلى عيالج بين عيونج ودقى عليه

 

[كويتيه قطوه]

لالا لا تكلمين اهلج دزيله مسج قوليله لعيال مشتاقيلك يبونك وحسو بفراقك وكلنا نبيك يعني نغره ابيك واكيد بيفهم واذا ما فهم دزيله مسج اعتذار ورديله ردييييله اختي عندج 4 عيال رديله لي فات الفوت ما ينفع الصوت رديله والله كريم:yaaaaaarb:

 

[Tutti-Frutti]

رد : ندمانه والله ماعيدها



الله يهديج العيله من الشيطان

الحين اللي صار صار وااذا صج ندمانه دزيله مسج قوليله هالشي
عشان عيالج مساكين شذنبهم

او اذا ما تقدرين تكلمينه خلي احد يدش بالسالفه ويكلمه

 

[انيقه جداً]

انتي تحبينه وهو قال فالمحكمه انه يحس بغلاج

خلاص دقي خلي عيالج يكلمونه

وبعدين لو حسيتي اانه يبيج كلميه اخذي التلفون وكلميه عادي

بيردج اذا يحبج

ياااااااارب يردج حبيبتي