نفسيتي تعبانه وابي افضفض ياريت تسمعوني :(

[لولو الخزاعي]

السلام عليكم ورحمة الله وبركاته
شلونكم عساكم بخير
انا نادر ماشارك بالمنتدى بس والله هالمشكله اللي عندي خلتني غصب اني انزل قصتي وابيكم تريحوني واشوف رايكم مابي اطول عليكم وبقول السالفه وسمعوها للاخير


انا السنه اللي طافت انخطبت وبعد فتره من الملجه صار خلاف ونفصلت وسبب الخلاف اني كنت مسويه عمليه بالامعاء الدقيقه من خمس سنوات كنت مضطره اني ادش العمليات مو بيدي عشان اتشافى وينقذون حياتي وتدرون عمليه وجراحه واكيد جرح يبين الاثر للخياطه المهم انا ماحسبت حساب انه هالعمليه بتكون سبب حق طلاقي توقعت الامر عادي لاني ماقلت لهم انه فيني اثر للجرح والمهم اهو ماتقبل الموضوع وعلى طول قالي مابيج بطلقج وعقب الطلاق تدرون الحاله النفسيه اللي مريت فيها والمعانات لمن تخطيتها ونسيت السالفه

المهم اللحين تقدم لي واحد بعيد مو من الاهل موظف ممرض وعمره مناسب وانا خايفه اقولهم انه فيني جرح في بطني وهذا سبب طلاقي ويهون لان مابي اعيد القصه اللي صارت لي ابي اكون صريحه احسن وانا خايفه اني اقولهم وهم يرفضوني وعايشه حاله نفسيه تعبانه واحاتي وافكر مع العلم اني رحت لدكاترة تجميل وايد واقالوا مابيتحسن الجرح الا بنسبه حيل بسيطه وانا مو عارفه شسوي شالحل

شوروا علي باقتراحاتكم
واسفه اني طولت عليكم

 

[اميره1980]

الله يوفقج يا رب
حبيبتي المفروض كنتو تصارحون زوجج الاول بالسالفة او لا سمح الله يكون فيج مرض معين احسن
اعرف وحدة توها مطلقة و السبب ان كانت متينة و ضعفت و سوت شد حق جسمها كله و مبين الخطاط بجسمها و ما قالت حق ريلها و بعد العرس ما تحمل شكل جسمها و طلقها و هي حامل

اذا كان من نصيبج صدقيني بتاخذينه هو او غيره و انتي انقرصتي من قبل بسبب هالموضوع و لازم الحين امج تقول حق اهله على السالفة و الخطيب عنده حرية الاختيار
موفقة حبيبتي

 

[بنوته ستايل]

حبيبتي انصحج تصاريحه عشان ماتعيدين تجربتج الاولئ..


ومثل ماقالت الاخت الي فوقي اذا الله كاتبه من نصيبج رااااح تاخذينه ..


وتقربي من الله وادعي ربج ان يرزقج بالزوج الصالح والمتفهم الي يقدر وضعج ويقبل فيج بكل مافيج..

ترا صدقيني في ناس تتزوج اهم شي عندهم الاخلاق مايهتمون للمظهر..وادعي ربج ان يكون الي خاطبج من هالنوع..

وكثررررري استغفار ربي يجعل لج من كل ضيق مخرجا انشالله..


الله يكتب لج الي فيه الخير والصالح انشالله ياقلبي..

 

[سكوتي بذوقي]

صارحيهم أحسن

الله يوفقك ويكتب لك اللي فيه الخير يارب

 

[بولندية]

اثر الجرح كبيير يعني علشان يطلق ؟؟

صارحيهم و الله يوفقج

 

[Patcholli]

صارحيه احسن ماتتطلقين مره ثانيه
وان شاء الله يطلع ريال شهم بمعنى الكلمه وماتهمه هالامور التافهه ..!!

 

[عشق حائل]

واذا فيه جرررح وين المشكله هو بيدك المرض شنو عقله بالله

يعني الواحد ماينمرض يعني مايسوي عمليه وش هالتفكير

ي قلبووو عليك انتي صارحيه وادعي ان ربك يكتبه من نصيبك

ولالالالالالالالالالاتنسسسسسسسسسسسسسسين الاستغفار

موفقه وطمنينا خيتووو

 

[حلوه بس هبله]

حبيبتي اصابعج مو سوا طليقج نوعه شكلي يحب الشكل اكثر من الشخصيه والجرح مو شي يعوق الزواج
وانتي كنج البخت بسم الله عليج
واذا على الي خطبج قولي لاهلج يقولون له بسبب عمليه سويتيها
هو لو عاقل ومتفهم مابيرفض

الله يوفقج فديتج

 

[بنت النوخذا]

ربي يسعدج يا رب و يوفقج يا الغاليه

الصراحه راحه
و شئ اكيد اول سؤال بيقولون شنو سبب الطلاق
و ما تدرين الخير وينه
صارحيهم و ان شاء الله ما كو الا العافيه يا رب
و اذا قدرتي سوي جراحة تجميليه
او جلسات علاجيه للاثر و الندوب

ربي يوفقج يا الغاليه

نصيبج يصيبج لا تشيلين هم

 

[ليه الجفآ]

الله يعوضج

بس استغفرالله مووسبب مقنع للطلاق ..؟! وشنوو عاد اذا فيج اثر جرح عادي ..!

لاسمح الله اخذ وحده ومافيه حتى خدش وحملت وسوت قيصريه اثار الولاده او حتى شكل البط بيتغير .. شدعوه عليه

حده تاافه ..

وصارحي الثاني احسن لج من الحين .. شكل الخياط عادي شدعووه ..

الله يوفقج يارب




..​

 

[ديانا سبنسر]

صارحيه واللي الله كاتبه بيصير

 

[ماتغير شي]

انصحج قبل ماتصارحينه تستخيرين

من استخار ماخاااب


والله يكتبلج اللي فيه الخيرررررر ويعوضج

 

[أماني عمري]

ادعي طول الوقت بهالدعاء يا رب اذا كان فيه خير لي "المعرس" قربه و اذا ما كان فيه خير لي ابعدني عنه و قولي لهم سالفة اثر الجرح و الحمدلله انج افتكيني من واحد تافه و الله يعوضج باللي أحسن منه

 

[نونه المنكوشه]

تاكدى انه خيره لج والمرض وكل شى بيد الله انتى مالج ذنب فيه لكن مشكله اللى تفكيره سطحى عادى انا مسويه المراره وفينى اثر المنظار وهم نفسج لوالله كتبلى نصيب اكيد بقوله واذا ماعجبه مايشوف شر والله يوفقج ويكتبلج الخيره صارحيه علشان لايتحجج ويطلق خليج واضحه من البدايه ماتدرين يمكن يطلع انسان فاهم وماتهمه هالشغله وموفقه

 

[Uou0Uo]

الرجل او البنت لازم بالخطبة تكون صراحة علشان ماتتكون مشاكل من البداية او يكون من الغش صديقتي مثلك عمرها كبير وماخافت اذا بيرفض او لا بس تقول ابي حياة جديدة وسعيدة مو مشاكل ع شي تافهه وقالت لهم انها مسوية عملية وفيها اثر ووافقوا قالوا ماعندنا مشكلة

 

[جوري 2007]

حبوبة انا اظن انه طليقج الاولي ماطلق بسبب الجرح ،، يمكن طاري العمليه اهوة اللي خرعه انج تكونين مريضه ،، والا شنو يعني جرح

واذا الله كتبلج حمال وولدتي قيصريه هم بيكون فيه جرح ،، اصلا حتى بالحمال المرة تطلع لها خرايط عالبطن هذا غير الكرشة اللي شكلها

استغفرالله العن من الجرح

صارحو الريال واللي الله كاتبه بيصير

 

[لمى الهاجري]

دامه ممرض راح يتقبلج الله عوضج توكلي على الله وقولي له وعلى فكرة انتي ممكن بالظلام ومع الاضواء الملونة يخفي الجرح عادي في بعضهم يسوون قيصري وكاهم عايشين

 

[أعشقه]

من حقه يعرف ويقرر بعدهاا
ادعي ربك يسهل امرك ..
والي ربك كاتبه بتاخذيه ..
لاتخافين ولا تتوترين
بالتوفيق

 

[دنيا جديدة]

وسعي صدرج
اسمعي هذا
http://www.youtube.com/watch?v=lynTJgTogKk


قدر الله وماشاء فعل سبحان الله مو مكتوب لج هذاك والله كاتب لج تمرين بتجربة يمكن اشان تعرفين قدر زوجك
الله يسر امورج

سمعي هذا
http://www.youtube.com/watch?v=usQYi0nqIxY

الله يجعلك مع كل ضييق مخرج

 

[al-musk]

طبعا لاتخشين وانتي مو مسوية عيب ولا سالفه بايخه هذا مرض وممكن اي أحد فينا باي فترة بحياته يتعرض حق هالشي
وخلي عندج ثقه برب العالمين وان مامنع عنج الموضوع الأول وماتممه الا لخير لج ومعنه هم انتو كنتو غلطانين لما ماقلتولهم
عالعموم السبب تافه ترا ومو كل الناس تافهين جذي وانتي ريحي نفسج وتوكلي على رب العالمين وخلج واضحه واذا لج نصيب بشي فراح تاخذينه

الله يوفقج ويتمم عليج كل خير