نقطه تحول بس مو مع سعود الدوسري معي انا بنت المنصور

[بنت المنصور]

كل واحد فينا يخطط لمستقبله وحتى لو كان مايخطط عنده هدف ولا عايش عشان شي معين وحتى لو

ماكان لا يخطط ولا عنده هدف ولا عايش لشي معين اسمه عايش بالتالي عنده نمط حياة معين عنده روتين

عنده ناس معينه يشوفهم كل يوم ناس معينه يقعد معهم ناس معينه يتصل معهم عنده نظره للحياة بغض

النظر عن ايجابيه ولا سلبيه النظرة هاذي بغض النظر عن نمط العيش نفسه هل هو متفائل ولا متشائم

حاب الدينا ولا كارهه ...



كل وحده فينا تقوم الصبح وفي اشيا ببالها يمكنن تتحقق ويمكن لا وفي بعض منها تحقق والبعض لا


نفرح نزعل نتضايق ونخسر وهذا احنا عايشين نتعرف على ناس جديده وتروح ناس عشنا معها


وتترك فراغ كبير بس نظل عايشين نخسر ناس بكلمه ونكسب ناس بكلمه وهذا احنا عايشين



وفجأة ومن غير سابق انذار على قولتهم تجييييييج صدمه بحياتج ولا موقف يهزج هز

تحسين انج كنتي عايشه بشي والواقع شي ثاني يحسسسج انك كنتي تمشين عكس التيار

يحسسج انج كنتي جنوب وصرتي شمال ، كنتي شي ابيض وصار اسود والعكس ،



وتبتدي نظرتج للدنيا تتغير يمكن كنتي متشائمه وصرتي متفائله ويمكن كنتي متفائله وصرتي


متشائمه ، يمكن الشي الي كل وحده فينا تقوم عشانه كل اليوم الصبح يتغير والاهداف تتبدل


والخطط تتلخبط وتعيدين ترسمينها ، الناس الي كنتي تشوفيهم يتبدلون ، والناس الي خسرتيهم

بكلمه يرجعون ويمكن ويمكن ويمكن ويمكن وبالاخير ............ هذا احنا عايشين



ابي اعرف الموقف الي هز كل وحده فينا وغير حياتج بشكل جذري ممكن للاحسن وممكن للأسواء






ناطرة ردودكم ......

 

[روحها لكويت]

هلا بنت المنصور وان شاء الله أكون أول وحده ترد على سؤالج

عن نفسي مواقفي كثيره اللي تهز حياتي ومو بس حياتي كل اللي حولي بعد المهم زواجي الأولي وطيبتي اللي هدمت حياة سعيده وفضلت حياة زوجي وعايلته على حسابي وعديتهم حقوقهم كلها ونسيت حقي وقررت بعد انفصالي أغير الطيبه شوي
بس عمك أصمخ مرت سنتين عشان نفس الشيء أربتط مطلق وبقدرة قادر انقلبت حياتي السعيده لمدة سنه مشاكل والسبب طيبتي يعني عندي قناعه دام لي حقوق عند هالريال عياله وطليقته هم لها حقوق أنا اخاف من الظلم وايد ولكن انعكس كل شيء ضدي وبهذي اللحظه خلاص قررت أكسر كل شيء من حواليني يتصل لطيبه وقمت من سباتي قلت بدال ما يهدمون حياتي خل أنحاش بزوجي وفعلن مع الدعاء والتضر والقرآن الكريم انتصرت على أعدائي وطلعتهم من بيتي بس بدون طرد لا بالحكمه والتعقل . ولله الحمد ارتحت مؤقتاً .

هذا شيء من الأشياء اللي مرت بحياتي

 

[بنت المنصور]

روحها الكويت: يا قلبي والله عاد بهالزمن الطيبه حررراااااام يعني لها حد وخلاص والمفروض كنتي ماتسكتين من زواجج الاولي

عموما اهم شي انج تعلمتي الحين وغيرتي من طبعج والطيبه خليها بوقت معين وبس الله يهدي بالج يا قلبي ويعطيج الي

ببالج وان شاء الله دوم تعيشين مرتاحه يا قلبي والله شاكره لج مرورج

 

[روحها لكويت]

اي والله صدقتي الطيبه لها حدود بس الخوف من الظلم يسيطر على الواحد بعد شيسوي فيه وراه رب يحاسبه بس الحمد لله وهذي إحدى قناعاتي

اللي قلت لج عنها من قبل والله يعطيني كل ما أبي والحين ناطره عطيته الكبيره الحمل السليم المعافى من السكر .

ان شاء الله

 

[بنت المنصور]

امييييين ياربي الله يعطييييييك ياربي وامانه بشرييييينييييي

 

[louraa]

الدرس اللي تعلمته
اتق شر من احسنت اليه
وان ما انصدم من اللي جدامي لو مهما كان ملاك

كانت علاقتناانا ببنات وااايد زينه والحمدالله نفعناهم و ساندناهم بوايد اشياء طبعا اللي اقصده الناحيه المعنويه وبعدين كلهم استغنوا و فجيينا شوي و بيين كل واحد ونيته ..
الحمدالله احنا ليلحين مع بعض لــــكن للأسف احساس محد يأتمن عالثاني من كثر ما العين مبطله هذا شعندها وماعندها ..
للأسف يغاروون
حمدالله والشكر اللي تغار من الجمال واللي تغار من الوظيفه واللي تغار من السفر واللي من السياره كل وحده تغار من النقص اللي عندها

ويركضون ورا مصلحتهم يعني اهم شي نفسي يعني باخنصار اناااانية معن ماورنا إلا كل خير

1-اللي تعلمته انا ماقووول الاشياء الخاصه إلا حق خواتي وامي لان مابينا مصالح
2-واحمد ربي ان مونفس تفكيرهم وعقليتهم يعني حسيت بقيمه نفسي اكثر
3-وحب الخير حق الاخرين عشان الله يرزقني على قد نيتي
تعلمت ان احط حدوود حق كل شخص
واتجنب السلبين منهم :0bee2e8d89:

وسلاااامتج جني وايد قرقت:dddds:

 

[بنت المنصور]

لورا: لا يا قلبي بالعكس كلامج وردج بمحله وكل الاشياء الي قلتيها صحيحه ميه بالميه الله يبعدج عن الحساد ويخلي لج

اهلج وخواتج والله يوفقج يا قلبي وشاكره لج مرورج

 

[روحها لكويت]

ينت المنصور : صباح الخير ويسعد مساج

ان شاء الله اذا صار بقولج أول وحده ان شاء الله احس قبلج دافي تقبليني صديقه لج

 

[بنت المنصور]

روحها الكويت : توني اشوف ردج حبيبتي سوري على التاخير توني شابكه ويا بعد قلبي والله تسلمين هذا من ذوقج


واقبلج!!!! انا قابلتج وخالصه يا قلبي انتي عزيزه علي واهتم لردودج داااايم لانها تعجبني اي امانه طمنيني وخبريني وفرحيني

 

[ღ بنت المسيله ღ]

والناس الي خسرتيهم

بكلمه يرجعون ويمكن ويمكن ويمكن ويمكن وبالاخير ............ هذا احنا عايشين



ابي اعرف الموقف الي هز كل وحده فينا وغير حياتج بشكل جذري ممكن للاحسن وممكن للأسواء


..

انا مستغربه من شغله ولي اليوم مالقيت السبب " ابوي " كان ويانا يهبل وعسل ويموت فينا ماعمره صرخ علينا ولا على امي وفجأه قرر يبعد عنا ولا يسأل عنا لدرجه غير رقم تليفونه وامي مصدوووومه لي اليوم محد يدري شلي غيره و اذا بالعيد دقينا على عمي عشان نكلم ابوي يزفنا يقول انسوني !! وهالكلام من 11 سنين ولي اليوم نحاول نسأل عنه ونقعد سنتين يالله نحصل خبر عنه لان قطلع علاقته فينا و قبل 11سنين اول ماراح عنا فجاه رحت خذيت دفتر ارقام ربعه كان كاتبهم بدفتر صغير بكبته رحت خذيت ارقامهم ودقيت عليهم واحد واحد كلهم يقولون مانعرف شي عنه وواحد قالي بسأل اشوف وقمت شكلت عليه مكالمات وابجي قال والله ماقدر اقولج شي لدرجه حتى ملابسه للحين بكبتي وقعدنا انا واختي اللي اصغر مني بسنه اربع سنين مانلف مخداتنا بالكفر مال المخده لأ نلف المخدات في بلوزة ابوي اللي مانغسلت ونشم ريحة الزقاير واسمع صوته والله العظيم يناديني وقعد فتره ولي اليوم معلقه دشداشته بالكبت وكلنكسه بالمخبا مالت الدشداشه ماشلته و قمت ادرس واشد حيلي ابيه يقرا اسمي بالمميزات بالجرايد و شديت حيلي بالمتوسط وكرمونا بحفله اسمها اوائل الطلبه المميزين وحطوني بالوطن والراي العام وحطوا حفلتنا وانا طالعه واضحه بس مالقيت له خبر و الحين تخرجت من الجامعه بتقدير جيدجدا مرتفع ودقيت على ولد عمي قلت ابي رقم ابوي قال اوكي عطاني رقم ابوي ودقيت عليه قلت له يبا تخرجت واشتقت لك سكره بوجهي و تميت ادق ادق ادق مغلق ومن باجر طلع الخط الذي تطلبه مفصول عن الخدمه يالله ورحت كلمت خالي مطوع قلت له تكفى طلبتك شفيه ابوي علينا قال بما انج كبرتي انا راح اجي بيتكم وافهمج لما جاني البيت قال انا ماقدر افتي لكن ابوج اظاهر مسحور قلت له روح عالجه حاول تكفى طلبتك ارجوك قال حاولت ويتهرب مني مايبي احد من طرفكم وخالي قال اظن اظن اظن اظن اظن سحر وللحين ماندري شفيه وكل عيد انطر اطل من الدريشه انطره ابيه ابيييييييييييييه ما قدر اعييييييش بدونه احبه احبه احبه احبه احبه بس الغريب ان دز لنا مع عمي بطاقات بنك لي ولاختي يوم كنا بالثانويه ويدز لنا فلوس بالهبل يعني وربي فلوس فلوس ويوم دخلت 18 شرالي سياره x5 و دز المفتاح مع عمي واختي وراي بسنه شرا لها سياره مرسيدس يعني ماقصر اهوا عباله الفلوس تغنينا عنه ورب الكون ان الفلوس ماتهمني وتقعد بالبنك ولا استخدمها انا ابيه اهوا مابي الفلوس مستعده ابيع عمري كله بس اشوفه يوم واحد لا مو يوم ساعه وحده بس مابي يوم بس ساعه بشوفه مراح اعاتبه بس بقوله احبك والمه عقب امووووووووووت

وانا الحمدالله بشهادة الكل قمة بالجمال ويخطبوني شكثر بس ارفض ارفض ارفض لان فشله شقولهم ابوي مايبينا ومانعرف شي عنه وولد خالتي عارف كل شي قال انا ابيج وميت فيني بس انا رافضه لان مهما كان حلات الابو موجود وكبريائي مايسمح اوافق عليه مهما سوا!

والشي الحلو بحياتي تخرجت ودقوا علي شركات اطلبوني اتوظف عندهم والحين ان شاءالله وافقت على وظيفه وراح اشتغل فيها ومعاشي حلو الحمدالله واختي تخرجت من الجامعه بعد متفوقه الحمدالله والله يخلينا لامي اسفه طولت بس حسيت اني مرتاحه يوم فضفضت اعذريني خربت موضوعج

 

[بنت المنصور]

اختي بنت المسيله : اممممممم موضوعج ولا قصتج غرررررييييييبببببه بدون اسباب يبعد ومايبي شي منكم ولما تدقين

يسكر بويهج ولا يبي يسمع عنكم شي بس بنفس الوقت مو مقصر ماديا وكل هذا بدون سبب!!!! صج امره غريب يمكن صج


مسحور ولا في شي انتو ماتدرون عنه المهم انج تخرجرتي والف مبروك على الوظيفه وان شاء الله منها لي اعلى يارب

والله يوفق اختج ولا تقطعين مهما كان هذا ابوج حتى لو طردتج ردي له هذا ابوج بين فترة وفترة طلي عليه لا تدقين

روحي له شوفيه هو وين وروحي له والله يرجعه مثل ماكان يا قلبي ولا بالعكس لا ماخربتي موضوعي ولا شي

واهم شي انج ارتحتي وبالعكس انا هذا الشي يفرحني انو موضوعي خلاج تتكلمين وترتاحين وبالاخير انا ريحت

شخص بموضوعي حتى لو ما اعرفه ولا ادري من هو دام انه شخص واحد بهالدنيا ارتاح من شي انا سويته انا حقي

وصلني وما ابي اكثر ومن جد فرحت الله يوفقج يا قلبي وشاكره لج مشاركتج

 

[ليتني مـآ كبرت]

نقطة التحول بالنسبة لي عقب ما توفت جدي ... بعدها مات الامل اللي كنت أبنيله من سنين (الله يرحمها)

 

[بنت المنصور]

لا يا عمري لا تقولين هالحجي الامل موجود طول ما انتي عايشه الله يرحمها يارب

 

[Pascal ~]

~.. SaLaM

الله وناسة خوش موضوع .. بس جني رادة عليه من قبل! او رادة على موضوع يشابه موضوعج .. مادري ما اذكر هههههههههه .. المهم مالج بالطوالة
شوفي يا طويلة العمر .. انا في حياتي اكثر من نقطة تحول .. بقولهم لج بالترتيب:

- نقطة تحول من صديقتي بالثانوية: امبي هالرفيجة خلتني احس اني غبية لي اقصى درجة .. كرهت نفسي والله .. شوفي انا حيل طيبة وينكسر خاطري وافزع واساعد الي جدامي من كلللل قلبي .. فإهيا استغلت هالنقطه فيني .. شلون؟ رافجتني من أولى ثنوي .. طبعا كل يوم تطلب مني شي .. اشي واجبات واشي دفاتر واشي ملفات .. واخرة المتمه طلبت مني اسويلها بحث! وانا مثل الهبلة سويت لها البحث وانا مستاااانسة! موبس جذي .. حتى فلوس كانت تطلب مني (بحجة انه تشتري فيهم ادوية الفشل الكلوي) وانا زي الهبلة اعطيها على 20 و 25 من مصروفي شفتي الخبال .. والله اني موصاحية .. اذكر مرة دقت علي اختها جان تقول انا بمرج باخذ منج 5 دنانير عشان بشتري كرت! امبي انا موبنك ترى! قلت لها ماعندي ودقيت على رفيجتي وقلت لها سوري ما اقدر اسلفكم فلوس ماعندي (تو الناااس ماكان من الاول!!) .. المهم عقب كل هلي سويته لها وصلنا رابعه ثنوي (فخلصت مصلحتها مني) راحت رافجت اربع بنات (رايحين فيها كسالا وماعندهم معدلات وسوالفهم كله سوالف شباب مافي صبي بالمنطقة مارافجوه استغفر الله) المهم رافجتهم وقامت تطلع علي حجي! خلت كل الي بدفعتي يكرهوني! شرايج بهالصداقة بس .. والله اذكر نفسيتي صارت تحت الصفر برابعه ثنوي من هالسوالف
عقب هالطراق شستفدت؟ اني ما اكون صداقات قوية حيل كافي صداقات صطحية حدودها ما تتعدى حدود الشغل وبس .. وما اخلي كل الاوادم تعرف خصوصياتي لانه مومن حقهم .. الشي الي بقوله عني وعن نفسي شي عام اما باجي اسراري وخصوصياتي ما اطلعها لهم هالبنات موكفو .. وما اساعد اي احد مني والطريج ... اوكي اساعد بس بحدود علاقتي مع هالبنات غير جذي اعتذر واقول ما اقدر .. هالصداقة خلتني بالجامعه قوية اذا البنت شفتها لج عليها اعطيها طاف واذا سنعه ارافجها بحدود الكلية مو اكثر لاني موناقصة عوار راس من سخافات البنات

- نقطة تحول بالكلية: كنت ادرس بكلية صعبة وما ارتحت فيها .. قعدت سنة وعقب حولت كلية ثانية والحمد الله لقيت نفسي فيها
عقب هالشغلة شستفدت؟ اني ما اتليقف وادش مجال موسائلة عنه .. لازم اطلع على كل شي قبل لا اخطي اي خطوة .. يعني صرت حريصة حيل بإختياراتي

- نقطة تحول شخصية: في شغلة صارت لي من 6 سنين بس الحمد الله هالشي الي صار حيل حلو وراح يغير حياتي خلال نهاية هالسنة او ببداية السنة الجديدة ان شاء الله

وبس حبيبتي هذول نقاطي ههههههه بس اصعب نقطة كانت النقطة الاولى الي خلتني حذرة حيل بعلاقاتي مع البنات ومع مجتمع الحريم .. ماتصدقين لو بقولج علاقاتي بكل البنات الي اعرفهم صطحية (ما عدى اهلي وبنات خالاتي وجذي) اما بنات من برة العائلة نو وي اعمق علاقاتي فيهم حتى بالكلية تخيلي مع انه علاقتي صطحية فيهم ماسلمت منهم واي يما

مشكورة عسولة والله موضوعج شي شي يطلع المدفون ههههههه احس وانا اكتب اني محترة من الي اتذكرة من هالرفيجات والبنات .. امبي بس بس لو بتذكر بكتب زيادة ما اخلص لوووووول .. ادري قرقت وايد الله يعينج وانتي تقرين =) مواه على رويسج عليج مواضيع فللله

SeeYa ..~​

 

[بنت المنصور]

يااااااااااااااااااااعمري والله شهالرد الحلو المهم انج تعلمتي من اخطائج يا قلبي ولا تقولين قرقتي ما قرقتي انا بمواضيعي قولي

الي تبين يا قلبي وشاكره مرورج يا الغالية

 

[mamanoonaa]

انا اتغيرت حياتي في عام 2005لما دريت ان اخوي الغالي اصيب بمرض السرطان اهني حسيت بتفاهت الدنيا قمت اقول امبيه من صج كان هالشي يضايقني
ولا من صج هالاشياء كانت اتهمني ولا تشغلني قمت اشوف الدنيا من منطلق ثاني ومن وقتها وانا اتعلم وااايد اشياء منها الصبر وان الدنيا فيها اولويات مهم والاهم مو خلطبيطا
صار كلي يقين بالله سبحانه وباستجابته وتعلمت شلون احمد ربي عالنعمه الي في يوم من الايام كنت اشوفها شي عادي وصارت علاقتي بربي اقوى حسيت اني كبرت وااايد وتفكيري اتغير حيل

وسلامتكم