هالمره انا بحط مشكله

[MS.VIP]

السلام عليكم
مساكم الله بالخير....
انا متابعتكم من رمضان اللي طاف يعني تقريبا من 10 شهور ومعاكم اللي ازعل مع سالفتها واللي انقهر من ردها واحس من صج المنتدى هذا كنه اسره وحده محد يبخل بأستشارة او طلب او اي شي الله يجمعنا بالجنه مع الرسول صلى الله عليه وسلم...

المهم صار الوقت الا انضم لكم واقولكم عن مشكلتنا..

اللي هي مرت اخوي طبعا مع العشره اكتشفنا الميزات ...اول ماخذناها عساس انها طيبه وعلى نياتها وماعندها لقافه ...

الحين بدت تطلع العيوب طبعا اول عيب انها نكاره جميل بشكل لايصدق اخوي مايقصر معاها لابطلعه وكل اللي تبيه يشتريه لها عليها بألف عافيه وهذا واجبه لاكن مو من اقل شي تقول هو عمرة ماجاب لي شي غير ان بيتها على قولت اخوي ((عزكم الله)حماااااام وانا رحت لها مره زرقه سريعه الا البيت حضانه حشى العاب مطشرة مناديل مقططه بكل مكان مزبله .....
هذا غير احيانا عيالها تحسين انهم مدبقين ليه حرام عليج هذول اطفال الله بيسألج عنهم وطبعا هذا غير لما تجي عندنا البيت تخيلوا تلعب بالليت تشغله وتطفيه عشان يضحك ولدها الليت لعبه هو تحاول تخرب اي شي تحوس البيت حووووووس علينا وتطلع تغير للعيال على سريري او سرير اختي وتقط الحفاظه بالارض وتروح ...
ومره تخيلوا بالله احد يرضى يصير له كذا طلعت من الحمام مغسله ايدينها وتمسك نقاب اختي عساس تلعب فيه وهي قاعد تنشف ادينها شنو ماكوا مناديل .....

ملينا منها لدرجه ان صرنا نتزمل اذا جت .....
اللي بتقول شعليج منها وانتي شكوا ...اقول لكم انا مابي شي منها بس تراعي عيالها وبيتها ويوم انها مو قد هالمسؤليه ليش تزوجت ...
وانا ماقلت لكم على طبعا التناقضات اللي تسويها واغيرتها من اختي لان هذا مو همي همي انها تراعي بيتها وعيالها وزوجها ...اللي من خذاها وهو مبتلش ....
شوروا علي؟؟؟؟​

 

[G!RLooNa]

مادري هذا شي بينها و بين و اخوج اهوا اللي المفروض يكلمها يقولها تعدلي رتبي البيت نظفيه و لا امها و خواتها لكن مو حلوه تطلع منكم و اذا تلعب بالليتات و تنشف بنقاب اختج و تقط الحفاظات عالارض عندكم هني تقدرون تكلمونها اختج تقولها لو سمحتي ملابسي مو فوطه تنشفين فيها .. قطت الحفاظات بالارض قولولها فلانه في اختراع اسمه زباله بس الشغلات اللي ف بيتها ماعليكم منها

 

[MS.VIP]

مشكورره حبيبتي على نصايحج المشكله ان امها لاتنصحها ولاتحاجيها ابد ابد ...واخوي تشوفينه متضايق بس مايبي يتكلم وانا قلت لمي هذي حياته احنا مالنا دخل بس هم يعورج قلب اذا شفتي اخوج جذيه ...
ألف شكر لمرورج

 

[عبير العنزي]

اذا اخوج تحجى عن تقصير زوجته واهمالها فـ بيتها وعيالها وزوجها

خلي امج تكلمـــه طبعا مافي ام تستحي من لدهاا ..خلي امج تقوله يكلم زوجته عدل وينبهها على اغلاطها..ويقول لها ابيج تهتمين بعيالج وفيني وفـ بيتج أكثر

خل يقول لها انا مليت منج ومن تقصيرج..خل يكون قاسي شوي من الناحيه

ان شاء الله تحس وتتغير
وحبيبتي لاتزعلين الغلط الاول والاخير من أخــوج..لو كان من البدايه ماسكت لها عن تقصيرها جان ماتمادت لهدرجه في حق بيتها وعيالها

الله يهدي الجميـــع

 

[صآعده تحت}..]

شقتها مالكم حق تكلمون مع ان وضع المزبله مقزز

لكن بيتكم ردو عليها بنفس وقتها علشان لاتتمادى مو بعد فتره تفجرون كل شي

يمكن ماتدري ان هالشيء يضايقكم وتعودت عالبهذله الله يهديها

 

[الغلا كله لبوي]

الله يهديها

 

[•Brown•Sugar•]

اذا زوجها ما يمون عليها ويقولها عيل منو بيفتح معاها الموضوع؟؟
لازم اهو يسنعها

 

[*THBANH*]

الحمدلله والشكر هاذي من صجهآ !

 

[عالمي انا غير]

هذي وحده ماعندها ذوق الحل اخوج يكلمها عيب شنو هذا

 

[المرتاحة]

خل اييب لها خدامه يمكن ما تقدر اتجابل البيت واليهال بروحها

 

[آتعــبني غـلآآك]

حبيبتي اذا اهلها ماعلموها السنع مشكلتها
بس بيتكم تحترم نفسها شنو هي جاهل تلعب بالليتات الحمدالله والشكر

 

[malte]

حبيبتي احس انها تتصرف على طبيعتها وتنسى نفسها وانتوا نبهوها باسلووب حلو لان احسها طيبه وايد
انتوا لاتصيرون جدامها تجاملونها ومن وراها متضايقين من تصرفاتها جذي مابتستفيدون من شي انتوا تنقثون واهي مادرت عنكم وعلى بالها توب:rerrerek:
مايصير تسكتون لو مو عشانها عشان اخوج وعيال اخوج باجر لي كبروا ورحوا مدارس بيبن عليهم قله الاهتمام قوليلها ملاحضتج بمزحه بدون تجريح وعقب انسي الموضوع ونسيها وياج عرفتي
وترى مرت اخوج موعوبه وماتشيش اخوج عليكم وكله عندكم وشكله ماخذه راحتها وياكم خلاص شتبين بعد
وبالنسبه لبيتها لمن اتشوفينه مونظييف قوليلها شحقه ماتييبين خدامه تساعدج ومن هالحجي منها تنتبه لبيتها ومنه تدير بالها من نفسها جدامكم وجدام اخوكم:eh_s(7):

 

[هاجر مطير]

الله يصلحها

 

[*الشيـــهـانـة*]

الله يهديها

 

[مسك حياتي]

الله يهديها ...

قعدي معاها بروحكم و سولفي عن واجبات الحريم بشكل غير مباشر ...

مع جم نصيحه يمكن تفهم ...

 

[* ملكني الخوف *]

الله يهديها

 

[جوانا2011]

معقوله ...طيب لما كانت بيت اهلها قبل لاتزوج اخوك كان بيت اهلها مثل بيتها الحين ..اللي اعرفه البنت تعلم السنع من امها ..زين في بداية زواجها من اخوك كانت كذا والا بعد ما جابت عيال ..لانه يمكن ما تقدر تقابل البيت والعيال والزوج

 

[برستيجي مآركة]

يؤيؤ شلوون كذا واااضح انها وصخة اذا على حركاتها في بيتكم كلموها ولاتسكتون حتى لو ميانة ش هالتصرفات لعب بالليتات تغير لعيالها على السراير وتمسح بنقاب اختك وين قاعدين والله اقولها ولاااسكت واذا على اخوك لما يقولكم قولوا له انت كلمها وانصحها انت اقرب الناس لها وراح تفهمك بس انتو اهل زوجها اكيد راح تتحسس منكم واذا ماافاد اهدي لها كتاب عن التنظيف والترتيب والله مو حالة شلون كذا حتى عيالها مو مهتمة فيهم وشوله متزوجة اجل اجلست في بيتهم على هالامر عذرا ع اطالتي حبيبتي..

 

[swanyway]

شقتها وبيتها ماعليكم منها زوجها هو يكلمها بنفسه لا تدخلون ابد ابد
واذا مرة مرة مضايقين قولي لخوج من ضمن السوالف عن الخدامات وجذي فلان ليه ماتجيب خدامة اريح لكم وعشان مرتك تصير ماعندها شئ تحاتية الا اليهال وهي مو موجودة طبعا وبس خلصت السالفة

الليت و الباقي تكلموا وقولوا رايكم

 

[MS.VIP]

والله كلامكم كله على عيني وعلى راسي ...
امي ماتقصر دايما لما نتجمع تسولف لنا عن نفسها قبل شلون كان عندها بيت دور واحد واطفال اثنين وقايمه بالبيت وبأبوي وبالحموله .....من باب انها تحس شوي وهي الطوف تفهم وهي لا هذا غير انها ماتتقبل نصيحه ابد وعنها هي ابو العريف اللي تعرف كل شي وتدرون اللي يبط الجبد اذا قلنا لها على خدامه تقول مايحتاج بيتي كله غرفتين وصاله وحمام اشوله اجيب خدامه بربع ساعه اخليه يلق ...طبعا اذا قالت جذي ودي اقط روحي من فوق من القهر ...
واللي قالوا اخوي اكلمها صاجين المفروض ما نهتم ان شاء يصير البيت زباله هم اللي عايشين فيه بس هم ننقهر على حال اخوي ...الله يصلح الحال
مشكووورين وايد اللي مرو وعطوني حلول