هبطل الاغاني واكون انسان جديد

[doudou]

الموضوع ... بداية .... عاوزين نتفق على كذا حاجة ف بداية الموضوع :​

اختي.... .... ياللى بتسمعي اغانى

* معذرةً ... الموضوع فعلاً ممكن يبان انه طويل ... عشان كده انا قسمته على كذا مشاركة ... لكن بجد الموضوع خطير .... اسمع قول ربناً مثلاً فى سورة الاسراء : (( إِنَّ السَّمْعَ وَالْبَصَرَ وَالْفُؤَادَ كُلُّ أُوْلَئِكَ كَانَ عَنْهُ مَسْؤُوْلا )) ... حبيبى ... انت هتُسأل عن اللى استخدمت ودنك فيه ... انت هتتسأل يا ترى استخدمتها ف اللى يرضى ربنا عنك ولا ف حاجة تانية .... بالله عليك ... انت دلوقتى قادر على تلافى أخطاء ماضيك ... وتحسين حاضرك و مستقبلك ... الله أعلم بعد شوية ممكن هتقدر ولا حياتك هتكون انتهت ولسه متوبتش عن الاغانى ​

* بما انك دخلت الموضوع .... ف ده يدل على انك انسان طيب .... و يدل إنك فعلاً نفسك تبطل حاجة .... رغبةً ف القرب من ربنا .... رغم ان ممكن انت تكون متعلق بالاغانى ..... لكن إصرارك على الدخول .... دى أول سلمة على الطريق الصح ان شاء الله تعالى ​

* مشكلتك ايه ... هتقوللى مش قادر أعيش بدون أغانى .... هقوللك طب وانت ايه اللى يخليك تعيش بدون أغانى ... هتقوللى اصل انا عرفت انها حرام ومايجوزش انى أكمل فيها .... هقوللك طب خلاص فكك من الاغانى ... هتقوللى ما المشكلة انى حاولت بس مش قادر أعيش من غير أغانى ... هقوللك حاجة بسيطة ... ربنا أعلم بنفسك منك ولا لأ ... هتقولى طبعاً ... هقوللك .... لا يكلف الله نفساً الا وسعها .... ربنا لما يأمرنا اننا نعمل حاجة ... يبقى أكيد ربنا الخبير بأنفسنا أكتر مننا عالم اننا نقدر على الامر اللى امرنا بيه .... والا ماكنش أمرنا بيه ... هتقولى ماشى ... هقوللك ... يبقى لما يؤمرنى أو يؤمرك اننا نبطل اغانى .... ف هو يعلم تمام العلم ... انى انا وانت و هو و هى نقدر و نستطيع اننا نعيش من غير أغانى ... وربنا أمرنا بكده ... لحكمة يعلمها سبحانه وتعالى ... أكيد أكيد ... الاغانى دى فيها حاجة هتضررنا ... يمكن بعضنا مش قادر يدرك الضرر ده ... لاننا غلابة ... فهمنا و علمنا مايجوش شئ مع علم مالك الملوك سبحانه و تعالى ... عارف لما يبقى ف عيل صغير لسه طفل ... شاف سجارة وعاوز يشربها .... أكيد أبوه هايمنعه .... يمكن الطفل مايدركش ليه أبوه بيمنعوا من حاجة نفسه فيها ومش شايف فيها غلط ... لكن لان أبوه عارف انها غلط عليه .... وانه ماينفعش يشرب سجاير ... ولله المثل الاعلى ... برده ربنا عالم اننا ماينفعش نسمع أغانى ... واحنا علينا ب سمعنا و أطعنا .... احنا عبيدك يا رب ... هننفذ أى حاجة تؤمرنا بيها ... بتوفيقك لينا

هطلع فاصل ... عشان أرزع المشاركة التانية ... صللوا على النبى عليه الصلاة و السلام ...

 

[doudou]

أعراض الانسحاب
============​

* قبل ما نبدأ كلامنا مع بعض .... طالب منك طلب صغنن أوى .... على اساسه كمل الموضوع .... الطلب ده .... انك تشترط على نفسك .... انك هتبطل أغانى .... وانك بفضلك يا رب .... هتنضف ودنك من أى حاجة مترضيش ربنا عنك .... لازم يكون عندك عزيمة .... ماينفعش تستسلم للشيطان بسهولة كده ... الشيطان

اللى مايهموش مصلحتك .... اللى كل أمله ان انا و انت و اخوك و اختك يترموا معاه ف النار ... لكن باذنك يا رب .... كلنا هنحط ايدينا ف ايد بعض ... و نخلص على الشيطان بالقاضية فى معاركتنا معاه ف حلبة الاغانى

​

* أخويا

... عاوز تبطل تسمع أغانى ... هتقولى آه ... هقوللك كلااااااااام ... هتقوللى ايه يا عم انت هتقفش عليا ولا ايه ... هقوللك مش حاسسك .... هتقوللى هو ايه اللى مش حاسسنى والله انا عاوز ابطل أغانى .... هقوللك طب إثبتلى .... هتقوللى وأثبتلك إزاى يعنى ... هقوللك بسيطة ... إفتح ماى كومبيوتر ... أنا حاسس ان الهارد عندك مليان أوى .... خشلى كده على البارتشن بتاع السونجس .... يااااااااااه ايه يابنى المعرض ده .... كل دى أغانى عندك ... ممممممم .... شايف الفولد اللى بيدخلك ع الاغانى .... أيوة هو ده .... علملى عليه كده .... بعدين ... ف ذرار ف الكيبورد عندك كده ... اسمه ديليت ... عارفه ؟؟؟؟ ... أيوة هو ده ... دوس عليه كده .... أوباااااااااااااااا

.... ده انت دليت كل الاغانى اللى عندك .... سامعك وانت بتقوللى ... حرام عليك ... ده شقى عمرى .... ده انا بحوش فيهم بقالى يجى 7 سنين

... هقوللك ... يامعلم ... انت قلتلى انك عاوز تبطل الاغانى ... و حلفت ... انت بالدليت دى طلعت يجى 5 سلالم على سلم التبطيل .... صدقنى ... ألف مبروك .... شايفك حزين بس ساكت

.... متزعلش يا حبيبى ... هتقوللى طب انا مكنتش هسمع ... بس صحابى دايماً بيطلبوا منى اغانى و انا الموسوعة بتاعتهم ... كده هايجوا يطلبوا مش هيلاقوا ... هقوللك يا عم ايه جو تجار المخدرات اللى انت معيش نفسك فيه ده .... فكك يا عم من الاغانى دى ... واللى يطلب منك حاجة زى كده تانى ... قلله انا مبطل

... وفكك منه .... ومتحاولش تفتح معاهم نقاش حولين الاغانى ف الفترة الاولانية دى .... كفايا الضغوط اللى بيمارسها عليك الشيطان ... انت مش هتستحمل ضغوط من ناس تانية صدقنى

​

* بعد كده ... ورينى موبايلك ده .... ماشاء الله ... شكله جميل اوى .... عليه أغانى .... هتقولى ممممم لا ... هقوللك ورينى .... هتقوللى لا ... هقوللك بالله عليك ورينى .... أوبااااااا

ده ف أغانى أهه ... شييييييييل يا عم الحج .... شيييييييييل ... بلا وجع دماغ .... ​

* سبحان الله يا أخى .... فعلاً الاغانى دى إدمان .... انا وانا بستعرض الحوار اللى بينى وبينك ده ... إفتكرت فيلم بتاع واحد مدمن .... ورايح مصحة ... وبيحاولوا يسحبوا منه المخدر .... بيحاولوا ميخلوش معاه اى حاجة من المخدرات .... أنا فعلاً حاسس بيك ... حاسس انك زعلان .... شئ طبيعى ... الشيطان كان بيحلى الاغانى ف ودنك .... طبيعى انك لما تشيل كل الاغانى اللى عندك انك تبقى زعلان ... بس عارف المفروض تكون زعلان على ايه ... مش على كل أغنية عملتلها ديليت .... لكن على كل لحظة شغلت ودنك فيها ... وانت بتسمع حاجة بتغضب ربنا سبحانه وتعالى ... بتغضب حبيبك منك ... مش انت بتحب ربنا ... هتقوللى آه طبعاً ... طب ومعقولة حد يعمل اللى بيغضب اللى بيحبه .... عيش عبادتك لربنا .... عبادة المحب .... مش عبادة اللى بينفذ أوامر وخلاص .... طب أقولللك على حاجة ... تفتكر ... ايه اللى يفصل ف مقام العبودية ... انك متعملش الحاجة عشان مش بتحبها ... ولا انك متعملش الحاجة رغم انك بتحبها عشان ترضى حبيبك ربك ... أكيد التانية لانها الاصعب ... صدقنى ... ربنا هايعوضك على كل دقيقة اتعذبت فيها و مخدر الاغانى بيخرج من ودنك ​

* بكده يا بطل .... انت أنجزت نُص العلاج

... هنكمل النُص التانى .... بس ف المشاركة التانية ... صللى على النبى عليه الصلاة و السلام ... وانزل ع المشاركة اللى بعد كده ​

 

[doudou]

مشاركة العزيمة
===========

* ه يا معلم ... ايه الاخبار دلوقتى ... أتمنى انك تكون تفهمت كلامى معاك ... نخش ع المرحلة التانية ... المعالجة .... أنا حاسس ان نفسك دلوقتى مكسورة .

... صح ... هتقوللى وانا حاسس بكده برده .... هقوللك يا سلاااااااام عليا ... فنان بفهمها وهى طايرة .... هتقوللى انت هتحور .... منتا تلاقيك برده لما بطلت أغانى كانت نفسك كده ف أكيد عارف ايه اللى بيحصل لواحد لما يبدأ يبطل ... هقوللك شاطر انت اللى فهمتها وهى طايرة .... بص بقى ... هنديك كده شوية فيتامينات متينة كده ... عشان تنتعش كده و تعمل رفريش لنفسك ... بدل مانت عامل كده زى الكومبيوتر المهنج ... هتقوللى إدينى :

* إنت ايه آخر مرة قرأت فيها قرآن .... هتقوللى ممممممم أنا الحمد لله بقرأ قرآن باستمرار ... هقوللك برافو عليك يا معلم ... ربنا يكتر من أمثالك يا رب ... حاجة جميلة ان رغم انك كنت بتسمع أغانى الا انك برده مكنتش بتهجر القرآن .... بجد انت حد جميل أوى ... طب قوللى بتحب تسمع القرآن بصوت ميين ... هتقوللى فلان و فلان و فلان ... فــــــــل ... حضرتك طبعاً الهارد دلوقتى بقى عندك خاوى على عروشه .... حضرتك بقى هتجيب المصحف الكامل للقراء دول .... وطول ما انت قاعد .... شغل السور اللى بتحبها بصوتهم ... أكيد انت ف سور معينة كده بتحبها بصوت شيخ معين ... أهى دى كلما الحالة تطلب معاك أغانى .... تشغل السور دى بالاصوات دى .... و تدعى ربنا انه يثبتك أكتر و أكتر

* أنا حاسس انك الجو هاتكون ممكن مش آلفه أوى .... لانه فعلاً جو جديد عليك ... بص ... ف عندك أناشيد دينية جميـــــــــلة أوى .... بأصوات حلوة أوى .... ايه رأيك تسمعها .... هتلاقيها موجودة ع النت ما شاء الله بكترة .... يعنى يمكن الايام دى الخير ف الامة الحمد لله .... قبل كده ممكن مكنتش تقدر تلاقى الكم ده من الاناشيد بسهولة و بالكم ده .... أهى دى برده تنزل الاناشيد اللى هتعجبك .... وما بين الحين والاخر كده تشغلها ...

* بتعرف ترتل قرآن ؟؟؟؟ هتقولى يعنى ايه .... ربنا بيقوللنا ف القرآن (( وَرَتِّلِ الْقُرْآنَ تَرْتِيلاً )) ...والترتيل هو انك تقرأه براحة بتأنى تنطق الحروف بصورة صحيحة و واضحة .... طب تعرف تتغنى بالقرآن ؟؟؟ هتقوللى يعنى ايه ... هقوللك سيدنا محمد عليه الصلاة و السلام بيقوللنا (( مَن لَّمْ يَتَغَنَّ بِالْقُرْآنِ فَلَيْسَ مِنَّا )) يعنى تقرأ الكلام بطريقة تظهر فيها حلاوة الصوت .... تعرف تعمل الحاجات دى ... هى علوم لازم تحاول انك تحصل عليها .... صدقنى هتفرق معاك اوى ... هتخليك تفكك م الاغانى دى .... انت عارف المغنين بيعدوا يقلولك انا خدت كورسات صوت مش عارف فين و دخلت المعهد الفلانى عشان احسن صوتى ... واتدربت كتير .... وده برده اللى انا طالبه منك تعمله ف القرآن ... هتلاقى بجد العلوم دى جميلة أوى .... وهتخلى قلبك متعلق بطريقة كبيرة بالقرآن ... زى اللى بتخلى المطرب متعلق أوى بالموسيقى و الاغانى .... لكن احنا عاوزين نتعلق باللى يقربنا من ربنا مش اللى يبعدنا عنه

هنطلع فاصل دلوقتى ... عشان أرزع أخر مشاركة ... واللى هى ممكن تكون خاصة بالمنتدى هنا شوية أو بأى منتدى عامةً ... صللى على النبى عليه الصلاة و السلام و أشوفك ف المشاركة الجاية

 

[doudou]

* هتلاقى ع المنتديات الاسلامية أو الاقسام الاسلامية عامةً ف المنتديات .... حالات كتير زيك .... ناس ربنا تاب عليهم الحمد لله زى ما تاب عليك من الاغانى .... تحاوروا مع بعض .... صاحبوا بعض ... قربوا من بعض ... صدقنى الصحبة اللى تحت مظلة عرش الرحمن مفيش أحلى منها ... بس خد بالك ... متتصاحبليش مع بنت .... و تقوللى عشان نقرب من ربنا .... لاااااا كده انت دخلت ف اتجاه تانى ... راعى ان دول اخواتك ف الاسلام .... ومتتجاوزش ف الكلام مع واحدة منهم .... لكن قرب أوى من أصحابك الولاد ... المهم عشان منخرجش عن اطار الموضوع .... هتلاقى اللى انت بتفكر فيه هم كمان بيفكروا فيه .... لان حالتك متختلفش كتير عن حالتهم ... ويمكن حتى الشطان مداخله ليكم ف مسألة الاغانى دى هتكون قريبة ... اعرضوا على بعض الافكار اللى بتجول ف خاطركم .... اعملوا زى ما اشبه بقعدة فضفضة و صراحة ... كل واحد يقول هو حاسس بايه ... ايه اللى حاسس الشيطان بدأ يحاول يخشله من الناحية دى .... هتلاقى غيرك برده الشيطان بدأ يخشلهم من الناحية دى ... هتحاولوا تفكروا مع بعض ف حلول للقضاء على الشيطان مرة تانية بالقاضية ف الجولة دى من حلبة الاغانى ... هتحس بقيمتك كانسان لما تشعر بمدى انتصارك على الشيطان .... هتتبسط لان اللى كنت عاجز عن انك تعمله زمان ... بقيت تقدر تعمله دلوقتى ... مش كده وبس ... ده انت كمان اتعرفت على صحبة خير تحت مظلة عرش الرحمن ... صدقنى شعور ممتع أوى


* على المنتديات الاسلامية أو الاقسام الاسلامية من المنتديات ... حاول تعمل انت و زمايلك .... موضوع تجمعوا فيه ألبومات من الاناشيد الحلوة ... وكل واحد عجبوا نشيد يحطوا ف الموضوع .... أولاً انت هتستفيد بانك هتلاقى area أكبر من الحاجات الهادفة .... هتعوضك شوية عن الأغانى اللى انت مرتبط بيها ... وف نفس الوقت لو ركزت ف كلام الاناشيد هتلاقى الكلام بيقربك من ربنا .... دى حاجة ... الحاجة التانية ... ان غيرك من اللى ربنا هيمن عليهم بالتوبة لما يبدأوا ف محاولة تبطيل الاغانى ... الالبومات دى هتساعدهم هم كمان ... وهتاخد حسنات ان شاء الله على كل واحد ربنا جعلك أداة خليته يقرب من ربنا أكتر

* نيجى بقى لنقطة يمكن من أغلس النقط ... وأكتر المناطق اللى عن نفسى حاول اشيطان معايا فيها ... الاهل و الاصدقاء .... يمكن بعض الناس مش شايفين ان الاغانى فيها حاجة ... و ان اللى مش بيسمعوا اغانى دول ناس خنيقة و متشددة و كئيبة .... وللاسف ده راجع للثقافة اللى تربى عليها الانسان ... غالباً بتأثر ف مفاهيمه للامور .... لو حد قاللك كلمة كده تريقة ولا حاجة .... عديها و ادعيله بالهداية .... و متزعلش منه ... بجد متزعلش منه ... رغم ان حاجات كتير من الللى بتتقال بيكون دمها تقيل على قلب الواحد ... بس معلش استحمل .... تعالى على نفسك و متضايقش منهم .... متبصش ليهم - يعنى للى بيسمعوا أغانى - انهم ناس وحشين تماماً و حياتهم غلط ... مش ف الاغانى و بس ... أى حد ف حياته بعض الاخطاء لازم ... احنا بشر ... كلنا بنغلط .... مايصحش انك تكره حد لمجرد انك شايف انه بيعمل حاجات غلط ... لكن عليك انك تكره الغلط اللى هو بيعمله ... وتدعيله هو بالهداية .... وتدعى لنفسك بالثبات كمان و كمان
​

* تخيل كده حياتك بعد حوالى شهر من التبطيل .... انت بقيت انسان تانى خاااااااالص ... شوف ممكن تبطيل الاغانى يغير ازاى حياتك للأحلى .... بالله عليك ... لو كنت وصلت للسطر ده من الموضوع حاول تنفذ الواجبات العملى اللى انا اقترحتها عليك ... و فكر معانا ف حاجات تانية تبعدنا عن الاغانى

* ف الآخر ... أنا آسف لو كان دمى تقيل عليكوا شوية ... وآسف أكتر لو كنت طولت ف كلامى بطريقة يمكن تبان لكتير من الناس انها مملة .... لكن والله الواحد لما بيكون حاسس بحاجة ... الكلام بياخده ... وبيكون عاوز يحكى على كل مرحلة عاشها .... لانه متأكد ان غيره هايعشها ... ربنا يقربننا منه أكتر واكتر

سبحانك اللهم وبحمدك ... أشهد أن لا إله إلا أنت ... أستغفرك واتوب إليك

مع سلامة


منقووووووووووول للافادة