هديه لزوجي ؟؟

[الراسيـ؟ـه]

قوه بنات

انا و زوجي مرينا بفتره كلها هواش بهواش

و عيد ميلاده بعد اسبوعين مو عارفه شسويله ولا شييب له هديه


بليز بنات عطوني افكار :klhfl:

بإنتظاركم​

 

[AFRoDiT]

على حسب ميوله .. هو شنو يحب؟؟

اشتري شي يجمعكم .. عشان فترة الصلح تكون حلوه

مثلاً ساعتين لج و له نفس الموديل بس نسائي و رجالي ..
شي يكون مثل هدايا المعاريس عشان تجددين حياتكم شوي ويحس ان الحب بعده موجود ..

ركزي ع القيمه المعنويه أكثر من الماديه


والله لايجيب الزعل انشالله

 

[ام فجور 2008]

اشتري كامير وصوري وجيبي كيكة سوي جو

 

[ام فجور 2008]

وانتي لبسي شي جديد مو شرط تشنرين شوفي شنو الي عندج وركبي مع بعض مثل شورت وتي شيرت وسوي ستريت ااستشوار حق غيري من ستايلج

 

[AFRoDiT]

في لانجري حلووو تبيعه تاجره معانا في المنتدى
على شكل شريطه كأنه انتي هديه مغلفه .. وااايد حلوو

وغلفي نفسج والهديه بنفس الشكل

 

[الراسيـ؟ـه]

ميرسي بنات بس انا ما اشتغل و اذا طلبت منه يعني مثلا 500 حق ساعتين


راح يشك بالوضع اذا شي حلو و رخيص اقدر عليه

 

[حبيبه بدر]

شوفي انا عندي فكره مجربتها تااثيرها روعه

دقي على المطعم واحجزي وطلبي من المطعم يجيب لج بوكيه ورد وكيكه

وخليه يكلمه بنفس اليوم ويقول له ام فلان عازمتك واذا ماعندك مانع قول لنا اي وقت بتجون
واذا شاف زوجج عنده استعداد يجي يعطيج خبر وانتي جهزي هديه بسيطه بالبيت
وروحو المطعم ونسيت اتفقي مع المطعم انه اذا وصل وساله عن الطاوله المحجوزه اللي بسمكم يعطيه بوكيه الورد وتعشو وبعد العشى اتفقي مع المطعم يجيب كيكه واول ماترجعون البيت اذا دخل زوجج يبدل بالغرفه افتحي باب شقتكم بهدوء وحطي الهديه وطقي الرس وطك الباب بدون صوت اذا فتحه وشاف الهديه بيتفاجا وبيقول منو يابها بس لاتنسين الكرت داخلها

واله يهدي سركم ويبهدكم عن الهوشات

 

[blue sky]

اقترح عليج روحي المهلب فوق في مكان اسمه من تايم للمساج وجذي حجزيله الي تبينه وراح يستانس لانه الرياييل مايروحون هالسوالف فراح يكون شي يديد عليه ...

 

[العنود22]

الريال بس تحسسينه انك اهتميت فيه رح يستانس والله حتى لو قلتي له كلمه حلوه وغير جذي مثل ماقالت الاخت حبيبة بدر روحي تعشي معاه بمطعم او جيبي اكل بالبيت وبالاخر كيكة على اسمج واسمه رح يستانس والله لايفرق بينكم ويسعدكم ويسعد جميع الحاضرين

 

[الراسيـ؟ـه]

انا يازلتي الفكره اني اروح معاه مطعم

بس ابي مطعم هادي و عنده كيك حلو ويكون رومانسي

و ياليت اعرف اسعاره يعني غالي و لا زين

 

[chocolate - BH]

انا اقترح ان اتودينه له بوكيه ورد و في جزء منه داخل شوكولاته و حطي بطاقه و فيها كلام حلو و خلي المحل مال الورد يوصلونه له بمكان شغله و مثلا كتبي في البطاقة انج اليوم تنطرينه على احر من الجمر او كم كلمه اتشوقينه

و في البيت زهبي مكان خاص و حركات و ورد امنثر و ريحه حلوة من شموع و خلج ناعمة و اذا شفتيه عادي قول ليه انج بتسوي له مساج او بدون ما اتقولين ليه على طول اتقربي منه واهمسي له بكلمتين حلوين و بلشي مساج

و حطي موسيقي هادئة رومانسية

 

[om mariam]

الله لا ييب الزعل بينكم
شوفي ياحبي اهو شنو يحب ييب له اياه
ماعندج ميزانيه
شوفي شنو يحب وسويله بالبيت لبسي كشخي تمكيجي
حتى لو بس تشتريله كيكه او ورده بالبيت
والله يهدي النفوس

 

[الراسيـ؟ـه]

:cxxxp: :0bee2e8d89:

ميرسي حبوبات و الله مادري :0bee2e8d89:

 

[أخت رضاب]

عطر حلو

 

[الجااازي]

قلم كشخة مع غتره وغلفيه عند بوابة الهدايا

 

[^kloOot^]

انتى اخذي كيكه مو شرط منهم اشتريها من بره


بس شوفى حبوبه فكره الاخت اللى قالت عن مساج المهلب عجيبه واايد من اهلنا مجربينها واسعارهم 20 و30 و40 على حسب واذا خلص من المساج يعطونه عصير فريش وخليهم يقدموله الهديه البسيطه منج شي حلو


او عندي فكره ثانيه

اذا اهو يحب سياره معينه حجزيها اقصد اجريها بيوم واحد وحطيها عند باب البيت وخل يقوم الصبح يروح دوامه ويلقاها بره البيت وحطيله هديته داخل سياره شيء حلو

 

[^kloOot^]

انا اقترح ان اتودينه له بوكيه ورد و في جزء منه داخل شوكولاته و حطي بطاقه و فيها كلام حلو و خلي المحل مال الورد يوصلونه له بمكان شغله و مثلا كتبي في البطاقة انج اليوم تنطرينه على احر من الجمر او كم كلمه اتشوقينه

و في البيت زهبي مكان خاص و حركات و ورد امنثر و ريحه حلوة من شموع و خلج ناعمة و اذا شفتيه عادي قول ليه انج بتسوي له مساج او بدون ما اتقولين ليه على طول اتقربي منه واهمسي له بكلمتين حلوين و بلشي مساج

و حطي موسيقي هادئة رومانسية

كلامج عدل بس ترى في رياايييل ما يحبون انج اتودين بوكيه ورد بدوامه يضايق جدام ربعه

بس فكره مساج حلوه

 

[الراسيـ؟ـه]

لا اهو ما يحب احد يلمسه غيري :|


بس فكرة قلم و غتره حلوه

اهو يحب قلم ديور و ما حصله اللي على جلد تمساح

بليز بنات ماكو وحده تعرف وين احصله

و الغتره شنو الانواع الزينه ؟؟

 

[الراسيـ؟ـه]

و عطر كله اجيب له عطورات شك انه لايعه جبدي من ريحته

ههههههههههه :|

 

[لمسات شمووخ]

الله لا يجيب الزعل ان شاء الله

انا اقترح عليج

تشترين له هديه على حسب حدود ميزانيتج وتغلفينها تغليف حلو وراقي ايا كانت وانا تعجبني فكره مساج المهلب
وكيكه حلوه صغيرونه
وتروحين مطعم لانوتغر اللي على البحر تحجزين طاوله فوق وتطل على البحر مطعم راقي وهادي وكلاسيك
وتخلين الهديه والكيكه عندهم
وتبلغينهم بعد العشا مباشره اييبون الكيكه والهديه ويسوون لكم جو (( يغنون هبي بيردي ))

خلصتو طلعتو
رديتو البيت

اتكونين مجهزه الغرفه بالشموع والزينه كل اللي عليج اتقعدينه بالصاله ربع ساعه مو تلطعينه
ادشين بسرعه اتشبين شموعج اتعطرين الغرفه زياده
تلبسين قميص يديد وفكرته يديده مو لابستها من قبل من كريمات وحركات ونكهات

وتقضون ليله سعيده بأذن الله

قولي لي رايج بفكرتي