هل تفكيري صح ؟

[Red Lip]

السلام عليكم والرحمه

احم احم ماعرف بالمقدمااات , , المهم

بنات انا بقالي سنه واخلص دراسه ان شاء الله

اول شي احب اقولكم ان تفكيري دايما بالحياه المستقره بعد الزواج

قصدي اني ماابى اشتغل يعني اخلص دراستي واخذ الشهاده الثانويه واتزوج وخلاآص

اعيش فـ بيتي . . واقوم الصبح لعيالي واتابعهم

يعني مالي شغف بالدراسه أبد , , عرفت ان هالشي غلط

وان البنت لازم بشهادتها الجامعيه والوحده ماتضمن نفسهـآآ هالايام

بس ماقدررت ماعندي حماااس كل اللي احلم فيه اني اكون عايله وبييت وبس :eh_s(22):

يعني مابي اشتغل و اتوظف ..

قبل كم يوم وحده تقربلي قالت انها بتخطبني حق ولدها مثل مايقولون اتجس النبض

وانا قلت لأمي واحس ان في اقبال بالفكره

بس الحين موب عارفه كيف افتح الموضوع ويأمي واقولها عن تفكيري هاذا ؟؟؟

بانتظآآر ارآآئكم حبيباتي ^__^

والسموحه ع الاطاله

 

[فقـدتـك حيــل !]

رد : هل تفكيري صح ؟

دام الوالده موافقه ليش تقولين لها تفكيرج ؟
ماراح يقدم بشي ولا يأخر ..

بس نصيحة الشهادة أهم شي والله ،
ماكو شي بيبقالج وينفعج غير نفسج ،
كملي دراستج أحسن لج والله حتى لو تزوجتي ..

وموفقه ..

 

[ORKDI]

اذا ما تبين الجامعه معهد على الاقل

والوظيفه مهم ترا ما في رجال ما يبي زوجه تشتغل

ترا المعاش ينفعج

ما تقدرين تعيشون على معاش واحد والدنيا مولعه

اقصد بكل شي الاكل والملابس واذا راح تسكنين اجار

 

[ترانيم القصيم]

رد : هل تفكيري صح ؟

الله يوفقك أختي الكريمة

و يعطيك على قد نيتك يا الغاليـة

و تفكيرك ما فيه شي غلط , بالعكس ,,

الثقافة و التعامل الطيب عمرهـ ما انقاس بشهادة جامعيّة أو مستوى تعليمي

يا ما ناس مراكز و تعليم و شهادات , لكن الأخلاق و السلوك و الأسلوب في التعامل ( صفر )

يعني إذا أنتِ شايلة هم من هالناحية فما عليك ,, قراءة الكتب و الإطلاع تحقق لك بإذن الواحد الثقاقة و سعة المعرفة

المهم نركز على المادة آللي نقراها و نطلع عليها و إنها تخدم الدين ,,

بارك الله فيك و أحسن إليك

موفقة يا الغلا بزوج صالح نفسه طيبة و ذرية صالحة ترتقين به إلى العلا و الصلاح ,,

احترامي و تقديري

ترانيم القصيم

 

[ريمي اميري]

رد : هل تفكيري صح ؟

حبووووووبه الشفه الحرااااااء ,,,, وين مثيلاااتك بهذا الزمن قليلات ... الله يوفقك وين ماتروحين ويرزقك على قد نيتكـ

مو غلط ابدا حبوووبه بس الزمن صراحه صااااار يخوف ما ابي احبطك .. تفائلو بالخير تجدوووه صححح ,, بس فيه شغله انتي ماتضمنين انو زوجك مثلا مايبغى وحده مثقفه عامله ,, انتي ضامنه انو بتعيشين مرتاحه ماتحتاجين احد لا زوجك ولا اهلك مثلا ÷÷ الله يكفينا الشررررر بس الواحد يعمل قد مايقدر عشان يحمي نفسه على الاقل حبوووووبه خلي الشهادتك جامعيه لو بالمراسله المهم لا تكتفين بالثنويه الي متخرجين بشاهدات عليااااا يالله لاقين وضائف "" خوفك بكره صار ماصار ولا انتي قد حالكـ ومنتي ميته لاحد ’’ وما احد غااااصبك على الشغل خليك بس تتزوجين ان شاء الله وربي يوفقك ويارب يجيبين عيال وبنات بكامل صحتهم حلوين ههههه وتربينهم وتكونيني معهم دايما ولمن تحتاجين نفسك ولا انتي جاااااهزه وماناقصك شيء,,,, خيتوو الله يوفقك ويسر امركـ امين

 

[دلوعة عمري]

رد : هل تفكيري صح ؟

مبروك مقدما ما فيها شي انج ما تكملين دراسة ادا كان زوجج يقدر يوفرلج طلباتج بس الاكيد مو وايد و مثل ما قالو اخوات الوظيفة تنفعج و تساعدين رايلج و تشترين اللي تبينه انا ما اشتغل اتزوجت و قعدت في البيت و الحمد لله مرتاحة و ادير بالي على زوجي و اولادي و بيتي الله يديم ان شاء الله

 

[فوقهن و تسواهن]

رد : هل تفكيري صح ؟

مبروك مقدما يا قلبي والله الوحدة مهما درست و اشغلت ماردها بيت رجلها و هذي سنة الحياة لكن الشهادة في حال لا سمح الله كان الزوج ماله امان عشان يكون لج كيان و تقدرين تعتمدين على نفسج بس ممكن تدرسين وانتي متزوجة واذا رجلج مارظى مو الا تفائلوا بالخير تجدوه انشاله زوجج يكون ستر و غطا لج و يملي حياتج اهو مع عيالكم انشاله

 

[• الْـڪَـونّتيسَـہٌ «]

رد : هل تفكيري صح ؟

صح كلام البناآآت

 

[catwi]

رد : هل تفكيري صح ؟

انا اعارضج بهالراي
الزمن زمن شهاده
على الاقل تاخذين الشهاده الجامعيه وتقعدين بس تكون عندج شهاده
عيالج بتجابلينهم جم سنه بعدين يكبرون وكل واحد يلهى بنفسه وبدراسته بهالوقت شبتسوين
ثانيه لا تمدين ايدج حق الريال كل شوي تقوليله عطني فلوس ابي وابي ويقعد يذلج على 100 دينار يعطيج اياها اشتغلي واخذي معاشج وعزي نفسج ويمعيلج جم بيزه تنفعج حبيبتي محد يساعد احد الحين واللي يعطيج يقعد يمن عليج
وبعدين الدراسه مو بس شهاده تحسين عقلج يكبر وتصيرين واعيه وفاهمه ومثقفه في مجالج
وبعدين قوليلي منو الحين ياخذ وحده ما عندها شهاده ؟
هذا راي واتمنى تتقبلينه

 

[Tom ♥ Jerry]

.


شوفي حيآتي ..
آذآ الريال الي بتاخذينه مستعد يصرف عليج من طأطأ ليه السلآم عليكمـ
> يعني متأكده أنه مآ رآح يقصر معآج و لا مع عيآلج
و اهوه راضي أنه مآ تشتغلين > اغلب الشباب الحين يبون البنت المتوظفه ! :/
بس اذا زوجج رآضي و نآوي يصرف عليج و على عيالج و على البيت
أوكي مآ فيها شي دآآم هاذي رغبتج و رغبته :*

بس اذا آنتي حسيتي أنه معاشه مثلا مآ يكفي !
فكري بالمستقبل شوي يعني ورآكمـ عيال 5 أو 4 أو 6 أو 10
و غير مصرفج آنتي و مصرف البيت !

الدوآم مو بس مجرد معآش :/ !
بالعكس بنفس الوقت أهوه تسليه و تقضيه وقت !
بس اذا انتي تبين جذي على رآحتج :*

 

[يبيلك قلب مايتعب]

رد : هل تفكيري صح ؟

اول شي عسى الله يتمم لج على خير يارب
ثاني شي نصيحة اخت ترى الوظيفه بهالزمن والله والله شي مهم اول شي الدنيا غلت و تعزج عن منة الناس اوكي انا اقولج الرياييل مايقصرون بس الوظيفه غيرررر اذا ماتبين الحين عالاقل بس اخذي شهاده الجامعه او المعهد او الكليه وقعدي بالبيت وشوفي

 

[qomerq8]

البنت سلاحها شهادتها لا ريل ولا عيال محد بينفعج حلو الريال يعطيج فلوس بس حلو انتي يكون لج كيان يكون عندج فلوس وبعدين شنو بيضمن لج الريال ما راح يتيغير علىج على الاقل لي تغير الا عندج شهادة ومعاش وساعاتها تضفين عيالج تحتج وما يهمج شي حبيبتي الزمن تغير اذا الاخو تخافين منه شلون الزوج !!! فكري ألف مره عشان لا تندمين لا العيال بينفوعونج ولا الريل مستقبلج أهم
أتمنى ما تزعلين من كلامي بس هذي وجهة نظري

 

[حياتي فراغ]

رد : هل تفكيري صح ؟

اخذيها نصيحة أنا سويت نفس كلامج و ندماااااااااااانه قد شعر راسي
توظفي مو عشان الفلوس
عشان يكون لج كيان و تختلطين بالناس و المجتمع ... ولا يصير عندج فراغ في حياتج
و الله تتعذبين و اسأليني

 

[brettey]

رد : هل تفكيري صح ؟

نصيحه بزمنا هذا ماراح ينفعج الا شهادتج على الاقل دبلوم دشي معهد
والله يوفقج وينولج مرادج

 

[نهايتنا قبر و موت]

والله انا مو وياج خلاص انتي قلتي انة اخر سنة يعني ب 12 الحين ..~

خلاص كملي تجاري اوو كلية والله احسسسن لج مو لازم توضفين بس عندج شهادة ..~

 

[Petite]

ماعندي فكره


الله يوفقج

 

[شوشو الشقيه]

اذا تفكيرج بالزواج انا اقولها لج تزوجي
لان الي يدرس لازم يشيل فكره الزواج من راسه
بس انا اقولها تفكيرج غلط
لان ا لواقع مر وحياة صعبه
ما ادري عنج اذا انتي تفكيرين انه زواج سعاده وفستان
انتي فكري زين بعدين 5قرر

 

[سمبتيكا ~]

آنا ضد تفكيرج ،
يمكن على وقت آمي وآمج يعتبر تفكير طبيعي وعاااادي
جيلهم كان يتقبل فكرة آن البنت تخلص ثانويه وتتزوج وتقعد بالبيت ..
بس جلينا هذا .. بالوقت هذا منو إللي ماتشتغل ؟ كل ربات البيوت الجيل الحالي
صاروا آمهات عاملات .. الوظيفه فيها خير لج ولبيتج وبالعكس بتساعدين زوجج
باجر وتعاونين في بنيان بيت العمر عالآقل تقدرين تحطين فلسج على فلسه
وتفتحون بيت لكم ولعيالكم ، عشان جذي آنا دايم آقول الوظيفه للمرأه
مو بس معاش وتصرف على عمرها ! الوظيفه للمرأه تثبت كيانها آولاً ، وتعاون زوجها ثانياً ..

وبالنهايه ،
الموضوع راجع لج شخصياً
وكل وحده فينا لها وجهة نظر بهالموضوع
والله يوفقج

​

 

[لؤلؤية]

رد : هل تفكيري صح ؟

حبيبتي
باجر لما تتزوجين وتشوفين حمواتج وحريم حمويينج عندهم شهادات جامعة ويشتغلون بتتغير فكرتج
ترا الزمن تغير
الحين الناس تسأل عن الشهادة والوظيفة
وحاليا صارت شهادة الجامعة شيء عادي عند الكل والتوجه صار للماستر والدكتوراه
واللي عنده شهادة جامعية الحين مثل اللي عنده الثانوية قبل 40 سنة

الدراسة مو معناته وظيفة وبس...
الدراسة معناها وجود لج وكيان وتفكير غير

واضح انج صغيرة
وانا واثقة مليوون بالامية انه فكرتج بتتغير بعد الزواج..وبتقبلين على الدراسة بحماس اكبر بعد ماتعايشين الوضع والواقع

 

[واقعية حـلـم !]

تفكيرج مو صح

كملي دراستج الجامعية بعدين لو ما تبين اتوظفين كيفج


الله يوفقج بالزوج الصالح الي يحقق امانيج يا رب