هل فعلا لشعر المرأه عمر.. ينتهي !!

[Meg rayan]

تحيه كبيررره .. لخواتي كويتيات..
انا اختكم ميغ رايان من السعوديه
متابعه قديمة للمنتدى,, وصراحه مواضيعكم وردوكم
تونس
وفعلاا البنت تستفيد وهي تقرا بمنتداكم

ولاعمري فكرت اسجل بمنتدى نسائي.. الا هالمره
لاني فعلا حاسه اني.. سأجد ضالتي لديكم
<< متعوده تكتب بالفصحى لوول

المهم.. بقولكم السالفه وباختصار
انا قبل ثلاث اشهر تقريبا.. قصيت شعري قصه تشبه نوعا ما قصة شوجي.. الا هي قصيره من جهه ومن الجهه الثانيه تكون اطول
وحبيبتي المغربيه الي تقص لي دايماا.. تحمست ذاك اليوم وقالت خلني اشفر اطرافه( التشفير مادري وش تسمونه)
المهم قصتهاا اخر شي بعد ماسشورت وانتهت
وكان بالبدايه حلو مرره..
من شهر.. بدا يحت ويطيح بشكل مو طبيعي
وصار طاير ومتقسف ومافيه حياة ابد !!
وانا عمري 26 ومو متزوجه.. وشعري بالاساس كثيررر وطويل لكن من صار عمري 20 وهو بادي يتساقط بس مافكرت بالموضوع قلت احسن يخف
لكنه فعلا استمر يطيح.. وبزوود بعد القصه الاخيره
سمعت من دكتور يقول كل شعر له دورة حياة.. يبدا ينتهي ويطيح وممكن بعدين يرجع يطلع مثل الاول هاذا اذا هو شعر غزير بالاساس
خلوني من موضوع دورة الحياه
بس الي جربت التشفير وصار لها مثلي
ابي اعرف وش سوت. وهل رجع مثل قبل؟؟
واذا في أي شي.. سواء جراحه او علاج يفيد.. بأي مكان بالعالم.. خبروني عنه

لاني جد نفسيتي تعبانه من الموضوع..
ومادري عالعيد كيف بيكون شكله
ادري طولت عليكم بس والله مجبوره

 

[نسايم عود]

رد : هل فعلا لشعر المرأه عمر.. ينتهي !!

اهلا

اول شى عنوان موضوعج صح
وعشان جذيه دشيت ورديت عليج
بالفعل
الشعر له عمر حتى انا لاحظت ان الشعر يبدا يتغير بسن الثلاثينات حتى لو ما صبغتى او قصيتى الشعره نفسها تتغير
يتغير نموها يبدا يضعف
ويتغير درجة نعومته
وتطلع فيه شوارع
هههههههه مادرى شنو اسميها مفرق شعر مادرى يمكن من تغير الهرمونات سبحان الله حتى من الحمل والولاده يتغير ما يعود مثل اول كثافته ولمعانه

بس التشفيرامممممم ما فهمته يمكن قصدك الموس

عموما حياتى روحى فحصى نسبة الدم باى وقت بس لازم صايمه وفحصى الهرمونات 3 او 5 ايام الدوره جذيه بيبان عليج اذا اكو شى

 

[Grass]

رد: رد : هل فعلا لشعر المرأه عمر.. ينتهي !!

اكيد صح حبيبتي ... كل شي بجسم المرأه يتداعى مع الزمن وممكن ترميم اي شي الا الشيب والشعر ... يعني اي شي خاص بالشعر ماتقدرين ترميينه ... واغلب الحريم ينعرف عمرها من شعرها....الله يعينه على الزمن

 

[Meg rayan]

رد : هل فعلا لشعر المرأه عمر.. ينتهي !!

يعطيكم العافيه خواتي

لكن عندي سؤال.. الحقيقه هو سؤال من امي الغاليه
تقول اسئلي الكويتيات, وش سر شعورهم الحلوه ( ماشالله تبارك الله )
وهل لاكل السمك , بما انه في يود هو السبب؟

لانوه حنا بعيدين عن الساحل ومانحب السمك كثير يعني يمكن بالشهر مره ناكله

انا والله اسئل وحابه اسمع شي مفيد.. يعني انا لسه بنت لاحمل ولا غيره ومع ذلك شعري رااح
الله يعين بكره وش يصير فيني.

والحنه اشرايكم فيهاا؟ انا احطهاا من زمان ومن وقفتهاا شعري تلف بس وش اسوي عشان اقدر مرات اصبغ ولو اني ماغير كثير بلون شعري

والي اتعرف فيتامينات ياليت تعطيني اسمهاا بس اهم شي ماتسمن

 

[كويتيه إنما أيه]

رد : هل فعلا لشعر المرأه عمر.. ينتهي !!

اممم مو دايما اعتقد على حسب طبيعة الشعره نفسها

لأني اشوف حريم وصلوا لسن الاربعين وشعورهم مشالله حتى احلى من شعور بناتهم

وبالنسبه لمشكلتج لازم اول تعرفين سبب هالتساقط و على اساسها تعالجينه

 

[Engenera]

رد : هل فعلا لشعر المرأه عمر.. ينتهي !!

شوفي حبيبتي

قص الشعر يقتل الشعره من عرجها ويخليها ضعيفه
انا في دكتور جلديه بأمريكا سألته ووايد زيد قالي من اقوى اسباب تساقط الشعر وانه يصير ضعيف اهو القص

فما بالج بأنج قاصته حيييل ومشفره أجزاء!! عالعموم اتوقع انتي تقصدين الموس والموس يسبب القشره بالشعر
هذا حسب كلام اخواني ان كل ما قصروا شعرهم بموس يصير فيه قشره

حبيبتي القشره ممكن ماتكون جذي واضحه يمكن تكون متكتله بفروه الراس نفسه
لان القشره والفروه الدهنيه اطيح الشعر بنسبه 90٪

ف انتي تأكدي و طبعا مثل ماقالوا

المرأء والريال شعرهم جذي وكلهم بالنهايه شعرهم يصير خفيف وبعضهم يصلع بس بسن كبير مو نفس سنج حبيبتي لاتخافين

ومن الممكن يكون فيج نقص فيتامين وحديد وهذا الي انا شاكه فيه

ف احسن لج علشان تقطعين الشك باليقين سوي تحليل فيتامينز وشوفي الفيتامينات الناقصه عندج اشتريهم واكليهم

ولو مو حابه تسوين تحليل اشتري فيتامينات واكليهم وبتشوفين فرق ان شاء الله

 

[Ray.Bana =$]

رد: رد : هل فعلا لشعر المرأه عمر.. ينتهي !!

ايي قصدج تخص أطرافهـ بالموس آنا آخر مرهـ قصيت شعري حششتهـ كلهـ بالموس وصآر يطييح مو نفس قبل وأحس صآر فيهـ فراغات بس مآسويت شي على اللهـ

 

[نسايم عود]

رد : رد: رد : هل فعلا لشعر المرأه عمر.. ينتهي !!

اكيد اكل السمك يزين الشعر وزين للقلب

وانا اعرف وحده معاى بالدوام تقولى نتغدى سمك 4 مرات بالاسبوع ما نقدر ما ناكله
والله من فججت شعرها عشان بتورينا القصه
الا تبارك الرحمن كثافه مو طبيعيه شفتى البوستيجات جذى صاير
الله يهنيها

والبيض همن روعه للشعر اقصد تناوله انا خداماتى الفلبن يوم وترك بيض ايموتون عليه
تعالى شوفى شعورهم اييونى كاريه ويروحون بعد سنتين واصل حد هذيج
والله بلا مبالغه
جم قروب خدم مر على جذيه

 

[Meg rayan]

رد : هل فعلا لشعر المرأه عمر.. ينتهي !!

اي والله صادقه
من قصينا الشعورر وحنا ماحنااا بخيررر مع الاسف

انا الي ذبحني احب الموضه والصرعه احب كل شي غريب ومجنون والحين تندمت لكن بعد ايش؟؟
بعد خراب مالطه

فعلا انا لاحظت في حكه غريبه براسي وفي قشرره مع انه ماشوف شي ينززل !!

لكن انشالله بسوي تحاليل ,, مع اني سويت قبل وقالوا مافي اي سبب لكن يجوز في شي وماحد اكتشفه

شاكره تفاعلكم الطيب وهاذي الهقوه ببنات الكويت

 

[Meg rayan]

رد : هل فعلا لشعر المرأه عمر.. ينتهي !!

عاد تصدقين انا البيض والسمك ناادرا مااكلهم الله يسمي عالنعمه

اكلهم بس عشان خاطر امي .. عموما حتى اللحوم الحمراا مو ذاك الزود
بغير طريقة اكلي وبشوف ....... المشكله اني انتقائيه لابعد حد بكل شي مو بس الاكل

انا بصراحه شاكه ان عندي الغده لكن المستشفى يقولون مافي شي
مع ان كل اعراضها عندي واخاف هي سبب التساقط عندي

والله متحطمه لابعد درجه .. ماتخيلون كيف