ولدي بالروضه مكسوره ايده شرايكم يا ابلات اخليه يداوم؟؟

[سبائك]

السلام عليكم


الله يسلمكم وليدي بثانيه روضه طاح الاسبوع الي فات وانكسرت ايده


واكيد الجبس بيظل 3 اسابيع عالاقل

واعتقد هالمده وايد طويله مو معقوله يغيب طول هالمده:080402ask_prv:


اليوم دقيت على الروضه وقالت لي خليه يداوم يوم واحد تجربه واحنا نقولج اذا يسمع الكلام ومايلعب ويلوي وايد قلت اوكي


بس بغيت اعرف منكم انتو يالابلات اذا مرت عليكم حالات كسر شلون تتصرفون مع الياهل؟؟

تحرصون عليه وتراقبونه ولا عادي يلعب مع اليهال مثل قبل؟؟

 

[المرام]

انا عن نفسي ما استقبل طفل مكسور
انا يالله احرص على السليمين ,,اشلون المكسور
لو صار عليه شي ,,مثل انبلت ايده او انكسر الجبس او طاح عند ابلة احتياط ,,منو مسؤوليته
والمثل يقول ما يحك اظهيري مثل ظفيري <<انتي اولي بالحرص على ولدج وانتي افهم له
والاداره ما يهمها شي ما دام ماراح تباشره ,,والمسؤوليه راح تكون على الابله
هذا راي وتقبليه بصدر رحب

 

[Eva-SS]

يعتمد على أبلته حريصه او لا

بس انا افضل تخلينه ليما تنجبر ايده .. لو حرصت عليه ابلته بالاوقات اللي تكون موجوده معاه هم ما تضمنين وقت الفرصة مع حركة الجهال ولعبهم يعورونه

وترا الغياب ما يأثر كله خرابيط

 

[زلابيا]

مايشوف شر انشاءالله ..

لا اتخلينه يداوم اقصاها روضه .. سلامته اهم من الدوام ..

عندي العام ولد طاح بالفرصه على ريوله وانكسرت واهله ما خلوه يداوم ..

ومثل ما قالوا البنات الابله ما راح اتدير بالها عليه طول الوقت عندها غيره بالصف .. ويمكن في احد بالفرصه يدزه ولا يعوره ماتدرين بعد اليهال وشطانتهم ..

 

[انفاسي]

يقضب ارضه احسن له ولابلته

 

[بنت-أمها]

خليه بالبيت الابله مهما حطت بالها سبحان الله يصير شي يطيح على ايده

وهذا ياهل مو معقول بتحرمه من اللعب ولا اهو بيقعد انا اشوف تقعدينه بالبيت وايد ابرك

 

[عهود الحب]

اختي انتي من صجج ؟؟ ولا تتغشمرين

ترى روضة مافيها لا امتحانات ولا شهايد والاطفال كلهم ناجحين لاتحاتين

والادارة شعليهم من الطفل اكيد بيقولون خل يداوم ومادروا عنه !

وليدج خليه بالبيت ان راعته الابلة يوم ماراح تقدر تتابعه كل يوم

والابلة لو حرصت مالها اربع عيون وعندها اطفال غيره وفي اطفال شياطين بيتسلطون عليه


خيتو ربي يشافيه لج ويخليه ويقومه بالسلامة

 

[غرشة عطر]

والله اهم شي صحة ولدج حشا جامعه مو روضه الله يهداج حبيبتي باجر لادوام محد دري عنه الابلات شيلحقن عليه جهال يلعبون ويركضون وكل واحد يطق الثاني

خليه بالبيت مجابلج احسن وجدام عيونج


مايشوف شر وكثري له الحلبه

 

[سبائك]

الله يسلمكم من الشر بنات

لا والله انا ما اتغشمر واقول لكم ليش ودي يداوم

انا اداوم واهو يقعد بالبيت مع اخوه الي اصغر منه والله يحفظه مايسمع الكلام طبعا الخدامه ماتقدر عليه يصعد فوق القنفات ويطب من فوق
فقاعده اقول يمكن اذا راح الروضه يطخ هناك مع الابلات

ولا مو كل هذا حرص على الروضه على قولتكم مو جامعه

 

[عبق الورد]

اهم شيء صحته .. لاتخلينه يداوم
.حتى الابله لو بتحرص عليه راح يتضايق مو حلو قاعد والاطفال يلعبون راح تحز بخاطره
عندنا ولد جذي نقعده بالحركيه يبجي .. ماتسوى عليه يدوام
الله يشافيه لج يارب.

 

[*أم*خالد*]

خليه بالبيت وايد احسن

الروضة الابله عيونها طايره وماتددري وين الله قاطها من البلاوي اللي على راسها لووول

ومايشوف شر ولدج يا سبوكه

 

[nero]

ما يشوف شر الكتكوت

جنه الاطفال منازلهم

 

[السنعة2]

نصيحه خليه بالبيت احسن له
لان العظم لين الحين فاج فاي طيحة او حركه قويه ممكن تحوله الى كسر مضاعف الله لايقوله

خليه يرتاح وغيري نومته خل يطخ الصبح وفضي الخدامه من اي شغل بس تجابله
وعسى الله يشافيه ويرفع عنه ونشوف ضحكته تنور ويهه عن قريب

 

[سبائك]

الله يجيركم من الشر يااااااااااارب

السنعه المشكله ان امي تقولي لاتحاتين عليه جبس ماراح يضره شي وملزمه علي اوديه تقول ماعليه الا العافيه ان شاءالله

لا خلاص هونت بخليه بالبيت والله يهديه ان شاءالله مشكوره ماقصرتي

 

[^مرايم^]

سلامته يالغاليه ما تشوفون شر

حبيبي اسم الله عليه لا تخلينه عند الخدامه بالبيت مع اخوه اخاف اينن الخدامه و ما يندرى شلون تتصرف..

خليه يروح و يلهى بالروضه و أنتي مأمنه عليه أحسن مما يقعد بالبيت و يخرب ..

و مثل ما قالولج الأبلات .. يمكن يندمج عادي

ما تشوفون شر يالغاليه كسر خاطري صغير عالكسور حبيبي

 

[أساور]

الله يشافيه لج يارب.

 

[تباريــح]

الروضة مو حل بديل عن البيت .. بالعكس راح يكون معرض للخطر بدرجة أكبر ..

الاطفال مهما كانت المعلمه حريصه بس هم يتغافلونها ويتحرشون ببعض ..

 

[(كويتيه عسل)]

أنا رايي من رايي الابلات خليه بالبيت احسن

واذا على سالفة الخدامه والتنطط فوق القنفات

كلميه وقنعيه مايتشيطن قوليله اذا نطيت فوق القنفات ممكن تطيح وتتعور زياده

وماتطيب بسرعه بعدين ماتقدر تلعب وتستانس ويمكن تنحرم من اللعب

 

[Om-FahooDy]

خليه يرتاح احسن
ترى بالروضه تصير اشياء ما تقدر تسيطر عليها الابله
و اليهال اسم الله عليهم حركيين