ولدي دور ثاني متوهقة شسوي!

[شمعة*البيت]

السلام عليكم ولدي دور ثاني بالصف السادس بالعربي والانجليزي وماني عارفة ابتدي معاه مدرسين ومعهد من الحين ولا انطر؟
وامتى احسن وقت عشان ما ينسى(لان المعلومات تخر عنده )؟
وشنو احسن معهد ؟
وشلون حسبت الدرجات يعني الامتحان من 100 ولا المتبقي (باقيله للنجاح بالعربي 7 درجات - وبالانجليزي 11 درجه )ولا شلون ؟
اول واحد من عيالي يصير عنده دور ثاني وحدي منصدمه وضايق خلقي:0bee2e8d89:
فبغيت رايكم ابلاتي العزيزات بحكم خبرتكم ؟ودعاءكم عشان ينجح ان شاء الله
جزاكم الله خير

 

[شمعة*البيت]

الي عندها احد من عيالها صار له دور ثاني تساعدني برايها وشسوت والنجاح صعب بالدور الثاني ولا سهالات
وايد صاكه فيني الدنيا بموت من الحره والقهر

 

[شمعة*البيت]

وينكم ؟

 

[II'3anomaII]

الله يعينج و يوفقه ان شالله
ما حبيت اطلع بدون رد
ان شالله البنات يفيدونج
بس انا بنت خالتي مره خذت دور ثاني بس بدو معاها و يابو لها مدرسين من اول شهر 9
يعني تقريبا كان جدامها 3 اسابيع قبل الامتحان
بس البنت تفرق عن الولد
الله يسهل

 

[*أم*خالد*]

الله يسهل يارب عليكم

انا والله ماعندي علم ولا معرفه .. بس اتوقع لو يبدي يسوي له مذكرات دراسه وتلاخيص
اكو كتب بمكتبه العجيري حق الدكتور نجيب الرفاعي شلون الواحد يدرس حلوة لو تستفيدين منها دام عندكم عطله الصيف يعني يمدي تاخذون راحتكم فيها

والله يوفقة يارب وتكون اول مره وااااخر مره

 

[شمعة*البيت]

جزاكم الله خير II'3anomaII
وام خالد
ما تتخيلون امس بجيت ونمت متكدرة وولدي بعد عمري اجتهد بس قدر الله وما شاء كان الله كريم ان شاء الله ينجح دعواتكم

 

[rehana]

الله يعينج لا يضيق خلقج قدر الله وما شاء فعل والله انا ولدي العام صار له دور ثاني بسادس وانصدمنا صدمه مو طبيعيه للأنه اول مرة بالعايله يصير عندنا دور ثاني بس كان ولدي مريض ودايم غايب المهم كان عنده دور ثاي بالرياضيات والله سافرنا امريكا وقعدنا ندرسه كل يوم ورجعنا مبجر للأختبار والحمدالله وايد كانوا مراعين الطلبه وسهالات فلا تحاتين والله يعوضكم الخيروصدقيني مافي سقوط

 

[أماني الورد]

أنا من راي

لاتضغطين عليه الحين

تو خالص عطيه فجه يرتاح من الدراسه

وعلى اخر شهر 8 بلشي وياه

وانتي بعد هدي ولاتحسسينه عشان ماينحبط

والله يوفقة ان شاءالله وترى امتحانات الدور الثاني سهالات

 

[هواجيس الفجر]

ياحياااتي

حرام حتى خالتي اول ولد لها ب خامس صار عليه دوور ثاني و مسكينة تبجي بجيييييي كسرت خااطري

انشالله يعوضووونها ياااااااااااااااااااااارب

و انا بعد من راااي لا تضغطين عليه خليه الحين و على اخر العطلة ابدي درسيه

وانشالله تفرحين فيه ياااااااااااارب و بنجاحه

 

[ام عزيزان3]

حبيبتي لايضيق خلقج انشاءالله ينجح
انا بنتي بسابع العام صار لها دور ثاني ونجحت سهالات بأذن الله...بس بسألج اهو بالاشهر كان يرسب ولاناجح بالاشهر والحين دور ثاني
اذا جذيه لاتحاتين يكون عنده معدل
وبالنسبه لدراسته دخليه معهد المعلمين اهم يسوون بالعطله ويصير تابع الجمعيه تابعي الاعلانات بالجرايد
وهم بعد حطيله مدرس بالاسبوع مره يي وقبل الامتحانات يصير مكثفونصيحه لاتضغطين علي الولد وتلومينه وايد الي فيه مسكين مكفيه
ودايما قولي ميخالف انت مواول واحد دور ثاني,,وانشاءالله تنجح بس لازم تجتهد شوي
وهم بعد تابعي معاه مراجعات انجليزي اول باول الكلمات والست بوك عشان ماينمسح من ذاكرته

 

[مشاعل]

الله يعينج

وان شاء الله ينجح

انا مجربه الدور الثانى مع ولدى الكبير

بس ان شاء الله سهالات ابدى معاه من شهر 8 خليه يرتاح

والله يوفقه ان شاء الله

 

[زيـטּ عَبْس]

خليه يرتاح الحين

ويستانس

ماعليه تعب طوول السنه


لابد انه يرتاح شوي


وابدي معاه من شهر 8

والله يوفقهم جميع