يا كويتيات .. والله الكويت تهببببببل ... بس كيف اضبط برنامجي حق بكرا ؟؟!!!

[سكووون]

اهليييييييييييييييييييين


بدش بالسالفة على طوووول

أنا اليوم ( الاثنين ) أول مرة بحياتي أزور الكويت .. و ياحلوهم يهبلوووووووووووون والله العظيم ..

ابتداءاً من الجمارك و اهم يهلون و يرحبون ..

وصلنا السالمية الساعة 5 و نص .. و على طول الفندق .. و ما اعرف حنا بأي شارع .. بس لما افتح النافذة اشوف ( ليلى غاليري ) بويهي..

ماطلعنا إلا الساعة 9 .. و وين نرووووح ؟؟!!!!

قلنا المارينا و هاك يا تخبط !! مع انه قريب مرررة .. بس ضيعنا لأنا اول مرة نجي ..

بس تعشينا و قعدنا في نتمشى .. و على طووول قعدنا ندور صيدلية لأن البرد عمل عمايله فيني ..

المهم يا طويلين العمر ..

ما ظل عندنا من الوقت الا الثلاثاء و عصر الاربعاء راجعين الديرة

وناويين نطلع الاماكن التالية ..

سوق شرق - سوق المباركية - سوق السالمية - المركز العلمي - المتحف الوطني - مطعم ميس الغانم - مطعم فريج صويلح - الابراج - مقهى تشوكليت بار في المارينا <=== و قولوا لي شنهو أحلى شي عنده - و ابغى فطور في زعتر و زيت بالمارينا و هم بعد ابغى اعرف بشنهو مميز - مجمع العربيد بالفروانية - ( آخر المطاف بيصير الفحيحيل لأنه قريب من المنفذ )


طيب ..

من هي اللي بتساعديني .. و بترتب لي هالاماكن حسب قربها ..

و لو في مكان مايسوى قولوا لي .. علشان نكسب وقت ..


و مشكورين و أعرفكم صاحبات نخوة .. ​

 

[~*~الملكة~*~]

اول شي حياج الله بالكويت

وبصراحه مو شاطره بالتخطيط

بس بحاول اساعدج

علشان تكسبون الوقت

روحي الصبح شوق شرق وتسوقي

وبعدين تغدوا في ميس الغانم

والعصر روحوا سوق السالميه

وبالليل روحوا المباركيه

او انكم تروحون سوق شرق الصبح

<<<<مصره انكم تروحون الصبح

وتتغدون بالابراج

بعدين تروحون المركز العلمي


اممم المتحف الوطني مافيه شي

لما تروحون المارينا تغدوا او تعشوا

في فريج صويلح لانهم قراب من بعض


هذا الي قدرت عليه سامحيني

 

[طويلة البال]

الحمدالله على سلامتكووم

ما قدر اقولج شيء


لان اللي يسمع كلامي يضيييع خخخخخ

 

[شوق والدمعه]

اول شي الصصبح قوومو تريقو بالابرااج لانه روعه وعب ماتخلصوون روحو شرق تسوقو فيه وعقبها تبون غدا روحو ميس الغانم وعقبها المباركيه

اما بالنسبه للاربعا ان شاء الله روحو زيتت وزعتر وعقبها المركز العلمي وعقبها سوق السالميه وعقبها فريج صويلح واذا بغيتي و حلون روحو جوكليت بار الي بالمارنيا وحلووو الحلو وبالعاافيه عليكم ووروحي العربيييد بالفروااااانيه وبس:>


يمكن تخطيطيط فااااشل بس ماحبيت اطلع من غير ماساعج

وحياج الله بديرتج ال ٢

 

[سحيله_الحلوه]

حياج الله
اعتقد المتحف الوطني وسوق السالميه مالهم داعي لانه ماكو وقت
الابراج وميس الغانم وسوق شرق والمباركيه تقريبن يم بعض
والمارينا وفريج صويلح مجابلين بعض والمركز العلمي مو بعيد عنهم
اتمنى اني فدتج

 

[سكووون]

مشكورييييييييييين .. و حتى اللي تقول ما تعرف .. فهي ساعدتنا كثيررررر

سوق السالمية و المتحف الوطني بنلغيهم و نخليهم للزيارة القادمة ان شاء الله

و الحين ان شاء الله طالعين ..

و بالنهاية بعطيكم التقرير ..

الا ما قلتوا لي .. وين احسن مكان يبيع درابيل ..!!!!

و اشوف مركز سلطان قريب يمنا .. شسالفته ؟؟!!!

 

[وجدان الكويت]

هلا وغلا

وحيااج الله بديرتج الثاانية

حبيبتي مركز سلطان سوبرماركت ومطعم وهم في فوق محلات بس ماذكر شنو جنة محل ملابس رياضية ومادري شنو وياه

 

[Bamya]

يا هلا ومسهلاااا

البنات قالوا اللي كنت بقوله

بس بغيت أرشّح لج أماكن زيادة اذا في مجال تمرّين عليها

مطعم ماكي (ياباني) ومكانه صاير على بحر المرينا marina waves وتحت المطعم في كوفي شوب قعدته روووعه اسمه living room وبعدها ممكن تتمشون وتدشون مجمع المرينا

 

[الدااانه]

اولا حياج الله
انا اعتقد ان قعدتج قليلة فعشان جذي كنسلي بعض الأشياء احسن لج
بس اهم شي لا تروحين السعودية بدون ما تزورين الآتي..
جوكلت بار..وطلبي(مولتن كيك..وفوندو اهم شي بالمطعم)ويصلح حق عصاري
ماكي..اكلة غريب وغالي شوي بس الكويتيين يموتون فية(طلبي..مرينا سالاد وعيسى ماكي والشيخ سالم ووزاني2)
وهم مطعم نينو عجييييييييييب واكلة ناطع(كرمد مازوريلا وميني برجر وسيزر سالاد والباستات لذيذ عندهم مشروم عجيييب بالمقبلات)
وترا ميس الغانم وزعتر وزيت مستواهم عادي هالمطاعم اللي قلتهم فوق احلى واغرب بوااااايد
واذا حابة اتريقين تريقي بشوكلت بار عنهم السندويشات حلوة وحلي فية بع
واهم شي..لا تنسن اذا رحتي فحيحيل تاكلون بميجانا اللي بالكوت
وان شاءالله يارب تستانسين بالكويت
سؤال داش بالعرض..انتي من وين بالسعودية؟؟:33_1185028183:

 

[الدااانه]

احن مكان ابيع درابيل
بسوق المباركية
عندج الشمالي والوطن

 

[الدانة-81]

حياااج الله بديرتج الثانية


ترى نسيتي أهم شي برحلتج--الا و هو



الأفنيووووووووووووووزززززز



لازم لااااازم لاااازم تمرينه--ترى اهو ما يضيع
امسكو الدائري الخامس باتجاه الجهرا و تلقين لافتات على يمينج (الافنيوز)
بس ترى هذا يبيله يوم كاااااامل

و لازم تلبسين حذاء مريح لأنه بتمشييييين مشييييي


أما بالنسبة للدرابيل عندج الوطن و الشمال في المباركية--قوليله أبي خصوصي (او شغل بيت)
و هم جربي رهش الوطن (اللي تقولون عنه طحينة)
و عنهم سوالف قرص عقيلي و كيك صغير يتغمس بالحليييب
حلو حق الصوايغ

 

[الدانة-81]

و بالنسبة للشارع اللي انتو تطلون عليه اسمه شارع سالم المبارك

تقدرون تفترون فيه باليل وقت ما تخف الزحمه عشان تثبتون على المحلات

كملي عقب المارينا في اشارة --روحي جدام بتلقين محلات بعد--ليما يخلص الشارع--تلفين فوق حدر و تردين

 

[مســـــافره]

حسافه انتي باجر راده؟؟؟

طافج الافنيوز اينن

يالله خيرها بغيرها وحيااااااااااج الله بالكويت نورتي

 

[mi corazon]

سكوووووووووووون

توني أشوف الموضوع

بس حسافة ماكو وقت وايد

ليش ماكو؟؟ أكو وأكو بعد

عندج لي العصر

إذا انتي متغطية( منقبة) .. وتبين تاخذين راحتج وتبين أكل تمام

انصحج تروحين مطعم ساتشي ( اكو منه بالديرة واكو بالفحيحيل)

خصوصية ونظيف .. أكل ايطالي ياباني .. كويتي.. أمريكي.. يعني كلشي تبين بتحصلين

يفضل عالغدا


لا تطوفين عليج منظر البحر الصبح عجيباخذي فرشة عنونه أو بدون فرش

وروحي البحر

ولو تبين خصوصية مع ريلج دشي الجزيرة الخضرا

ماكو احد .. الناس دوامات والصبح تصفر

اخذو ريوق من سهران او ولهان في شارع المطاعم ... وسوولكم مطارة قهوة .. وتمتعوا بمنظر البحر والهوا العليل

بس عقب الثمان قبوا .. الشمس عندنا مو مضمونه ترى



اذا تحبين تتسوقين ( فرصتج المجمعات فاضية الصبح )

روحي الفنار يمكم .. المارينا بتعجبج المحلات

الافنيوز ما انصحج الحين لأنه بياخذ كل الوقت

يبيله يوم كامل

وانتي طالعه خلاص بتردون بالسلامه السعوديه .. مروا سوق المباركية واخذوا الدرابيل والحلو .. ومري على العطورات بتعجبج ان شالله

كان ودنا اتمين اكثر .. فرحانين فيج يالغالية

بس ان شالله تكونين خذيتي انطباع حلو

شهيتيني عالدرابيل بروح اييب باجر

وسلامتج ر"

 

[سكووون]

هلا و غلا بالكويتيات

شكــــــــــراً لكل اللي ردوا علي و ساعدوني ..

طبعا بقولكم .. إني قرأت الردود بس ماكان عندي وقت ارد ..


و الحين برد على اللي مارديت عليهم ..

Bamya

marina waves ترا ما انتبهت لاقسام مارينا الا لما رجعت :27d66a9c24b146327bf

ماعليش خيرها بغيرها :eh_s(17):



الدااانة

هلا بج يم سؤال عرض ههههههههه ( و آنــــــــــا شرقاوية يا الغلاااااا )

و عن مطعم ماكي .. ابو الشباب ما يحب الاكلات الغريبة عكسي تماما احب هالسوالف و اموت عليها .. بس حكم القوي ع الضعيف ..

و تجكوليت بار رحت له و ميجانا هم رحته و يجننننننننن

و بعد .. اشتريت من درابيل الشمالي بس رهش ما احبه .. علشان كذا ما اشتريت ..

الدانة 81

الله يوفقك ان شاء الله تراك ذكرتيني بقرص عقيلي .. لأني ما اعرفه و لا عمري اكلت منه .. و لما رحت الشمالي قلت له ابي اشوف قرص عقيلي لقيته مثل الكيك !! و اشتريت منه و عجبني اكثر من الدرابيل ..

و الافينوز اتعمدت ما اروحه لأني رايحة نقاهه مو لسووووق .. كنت ابي اتمشى و اتونس بعيد عن السوق .. و بيني و بينك علشان يصير في اماكن ما رحناها و تصير لي سفرة ثانية لووووووووول


مسافرة

عن جد حسافة .. بس تونست واااااااايد و الافينوز مخليته للسفرة الياية


mi corazon

يسلموووو يا قلبوووو

و عن مطعم ساتشي شفته بس ساعتها ما كنا جوعانيين علشان هيك ما رحنا .. و غير كذا لما قلتي كباين غيرت رأيي خخخخخخخخ مو كفاية الخنقة بالنقاب في السعودية و تبغين نسافر و نغطي بعد ... ياشييييييخة خلينا نتنفس هههههههههههههه

و عن قعدة الصبح .. ويني و ينها .. القمر خطيبي ما ينام الا لما تطلع الصبح ..<==== أول مرة يسافرون مع بعض لووووووووووول ههههههههههههههههههههه علشان كذا طلعتنا الصبح تبدأ من 10 و عن جد خايفة من الهني مووون اذا الحال بيصير كذا !!!!

و لما قرأت ردك .. يومها على طووول رحنا ندور الجزيرة الخضراء و لقيناها بس ما نزلنا لأن الوقت قريب يخلص

و عن العطور لفت انتباهي الشايع بس رحت له و عطاني كذا عطر بس ما عجبوني .. و ياليت كنت مستشيرتكم في احسن الانواع بس يالله خيرها بغيرها ان شاء الله




و متى بس متى ارجع الكويت لأني حبيتهــــــــــــــــــا و حبيت أهلهــــــــــــــــــــا

أحبكـــــــــــــــــــــم والله ​

 

[جنون العشق]

ياحياتي حياك الله بالكويت ديرتك الثانيه

 

[سكووون]

جنون العشق

الله يسلمك والله .. و ادعيلي ارجع الكويت بأقرب وقت ..

 

[فطووومة]

حياج الله اختي

وان شالله نشوفج دائما في الكويت

 

[سكووون]

مشكوووورة فطومة

و آمين و عسى الله يسمع منج يارب