ษ ส رحلتي المصورة لبلد الادمــاااان،،تايلنـدษ ส

[om MaRyooM]

الحمدلله على سلامتي






من فترة رديت من تايلند .. بلد الادماااااان صراحة انا اسميها

لأن لازم كل سنة نروحلها مع ان جوها رطوبة وخايس ..


بس هالسنة قررنا نروح مع خالي ومرته



المهم



رحلتنا كانت على القطرية التذكرة حجزناها قبل الرحلة بشهرين فطلعت علينا ب175دينار للشخص


حجزنا حق بوكت 5ايام .. شيانغ ماي 3 .. بانكوك 4ايام




هني وصلنا مطار بانكوك







مطل من فوق .. على تكاسيهم

شحلات الوانهم لوول









رحنا ناخذ الجناط عشان ندخلهم حق الطيران الثاني عشان نلحق على طيارة بوكــــت











واخيرا .. ركبنا الطيارة ومابقى من مشوارنا الطويل غير ساعة ونص من بانكوك الى بوكت






طبعا حق الداخلي انسب شي تحجزون من النـت على طيران airasia لأن ارخص شي

وطريقة الحجز وايد سهلة .. بس تدشون على موقعهم هذا http://booking.airasia.com/ وتختارون الاوقات والجهة .. والدفع لازم يكون عندج ماستر او فيزا وياخذون رسوم بعد ..

بس ارخص من السفريات بعد




نكمل ،،




وصلنا مطار بوكيت بخير وعاااااافية

ولقينا فان يودينا الفندق


الفندق كان ميلينيوم هذي ثالث مرة نقعد فيه

لأن قريب من المجمع والسوق والكافيهات


وهذا رابط الفندق على موقع بوكينج للي تحب تشوف اسعاره وصوره كلها

http://www.booking.com/hotel/th/millennium-resort-patong-phuket.en.html


وفي جهتين للفندق lake side و beach side ولان ماكان فيه غرف فاظية باللي احنا اخترناه حطونا بالمبنى الثاني


بس ثاني يوم نقلونا للغرفة اللي نبيها .. وصورتلكم الاثنينه



هذا الاول اللي ماكنا نبيه ،،

صورة اللوبي






الغرفة من داخل







الحمام اكرمكم الله








ولأن كنا يواااااااااااعه وماكان في شي مبطل فطلبنا عشان من الفندق

عبارة عن توست مع التونا وعصير ليمون .. بس كان الاكل الله يزيد النعمة لوول






تعشينا وكل واحد راح غرفته عشان نبدي اول يوم مع جزيرة الخياااال ... بوكـــت



............





good morning


قعدنا الصبح .. وانا كنت اول وحدة اقعد لقيت فراشة حلوة ببلكونتنا صورتها .

ريلي يقول مسكينة مو مصدقة لقت فراشة موشايفة خير لوووول







بعدين انتقلنا لمبنى الفندق اللي كنا حاجزيله واعتبره اكشخ واحلى .. والغرف تكون كلها غامجة


هذا اللوبي







وهذي الغرفة








صورة المسبح ..

واي مطل المسبح يهبببببببببل واحلى شي محد له شغل بالثاني .. كنا ننزل انا ومرت خالي بالمايوه الاسلامي بكل ثقة لوووول








والحين تابعوووووووني شوفو شنو سوينا ببوكيت ..

وبليييييييييييييييييييييز لحد يرد

 

[om MaRyooM]

ولكم باااااااك ..





ثاني يوم بدى جدولنا


لأن اول يوم طبعا كنا تعابى ووصلنا بالليل مامدانا نسوي شي غير الاكل لوول




...


عقب ماتريقنا تمشينا بالمجمع شوي اللي اهو gynccylon اشهر مجمع في بوكت وملاصق لفندقنا










وبعدين شرينا خطوط تايلندية تلاقونها في روبنسون الدور الثالث






خطوطهم رخيصة بس انصحكم تعبونها بمبلغ محترم لأن المكالمة للكويت مكلفة فاذا خلص كرتكم لاتتوهقون وتدورون تعبئة


عموما التعبئة تلاقونها في محلات 711 المعروفة



عقب .. رحنا نحجز حق رحلة بنفس اليوم تكون بالليل ..

بعد حنتي ورنتي قنعت ريلي وخالي نحجز حق عرض simon (عرض الـlady-boy) مافيه تفصخ ولاحركات مجرد مسرح واهما يعرضون لبسهم ومواهبهم بالرقص على شكل قصة

كان العرض يظحك بس بصرااحة ،، ندمنا ان قطينا فلوسنا على هالاشكال الشاذة


وهذي بعض الصور لما بعد المسرحية







انا صورت وااااااايد صور بس ماقدر احطهم كلهم لأن في بعض اللبس مايسمح













بناااااات استوعبو .. ترا كلهم رياييل هااا

لووووول شي غريب وعجيب ... بس لما قربت منهم ترا ويوههم دفشة وتخرع

بس اللبس والميك اب وجم عملية مسوين شغل لوول





^
^
هذا شنو كتكووووت .. لووووووول استغفرالله

والله صج حتى من قريب يقطر انووثة









....



ردينا الفندق وحجزنا حق رحلة لثاني يوم


طبعا كنا ناوين كلنا نروح لرحلة البنشيات او اللي يسمونها atv tour بس ماخلوني لأني حامل

فاضطر ريلي حبيبي يقعد معاي وخلينا خالي وزوجته يروحون .. لوول


وانا مجربة هالرحلة قبل ترا حيييييييييييييل ممتعة اللي بتروح لاتطوفها نصيحة

وبالنسبة للهدوم خلي اللبس قطني خفييييييييف لأن بتتبهذلون من الوصاخة ومن الحر


طبعا ماعندي صور لهالرحلة ..

بس هذي اللي اقصدها (خذيتها من النت)

**********




صار اليوم الثاني وراحو اهما رحلتهم الـ atv وتمينا انا وزوجي نتمشى بالمجمع وطلعنا برة نتمشى بالحر بالسوق لوول













ولما وصلو تغدينا مع بعض في سب واي









ولما صار الليل رحنا لسوق الـpatong beach

اللي اهو عبارة عن كشكات على مد البصر في كل البظايع تطل على البحر علطول

ماشرينا وايد اشياء لأن البظاعة مكررة

بس وقفنا عند كشك الفواكه وخذينا مانجا ورقي وانناس ..

وانا خو طحتله انناس بهالسفرة .. لوول وريلي كل شوي زافني
بس الله سترني الحمدلله





ماحبيت هالسوق وايد . . لأن نفس البظاعة موجودة واحلى في بانكوك .. ولأنهم نصابييييييين بالسعر


وانتهى اليوم على خير ..


نكمل الحين اخر يوميـــن لنا في بوكيت>>>>>>

 

[om MaRyooM]

اليوم ماقبل الاخير في بوكيت


...



هاليوم كان ريلي وخالي حاجزين قبلها بفترة حق رحلة التجديف بالشلالات .. rafting

^^^^
هذي صورة من النت




ولأني حامل بعد ماخلوني:bbbiu: لوول فانظلمت معاي مرت خالي وقعدنا نواسي بعض بالسوق واهما راحو


وهالصور من الرحلة .. قلت لريلي يصور جم لقطة






هني بطريجهم للمكان .. كانت تمطر

ويقول الطريج كان طوييييييل .. بحدود الساعتين بس مسافة طريج

عقب ماوصلو وخلصو . .
قعدوهم باستراحة




واااي شوفو المنظر

















ومن ظمن الرحلة كانت fish pedicur








وقبل مايمشون وقفو عند بيت الراحة .. عشان لايتوهقون بالطريج لوول









وبهذه الاثناااء ..

كنا انا ومرت خالي نحووووس بالسوق

فقلنا نسوي تنظيف بشرة بدال المشي البطاال



سوينا عند هذا ..





وكان خووش تنظيف والله .. تلاقونه في نفس المجمع جبال كارفور بالظظظظظظبط


في نوعين . .العادي ب390بات .. يعني 3دنانير ونص ،
والاغلى ب700بات يعني 6دنانير وشي .. احنا هذا اللي اخترناه لأن يحطون فيه مواد اكثر ومدته ساعة وشي








....



وعالمغرب وصلو رياييلنا بالسلامة ..

انصدمنا:eh_s(2):

مساكين ريولهم وايدهم كلها شخابيييييييط ومحترقين من الشمس .. أثاري طايحين من البوت ومتزلغين من الصخور لووول

الله حفظهم :yaaaaaarb:





عقب ماريحنا .. تعشينا في بيتزا هت

صاير برة المجمع بس ايضا قريب من فندقنا







هذا طلبنا










مسكين اللي كان يخدمنا .. كل مايروح اييب طبق يلاقينا مخلصين اللي يايبه :eh_s(10):

فكانت نظراته معبرة واحنا ميتين ظحك على شكله شلون منصدم






وقبل لانطلع شفنا هالياهل .. يختي عليييييييييييه كان شكله يونس ويظحك

استاذنت من امه اني اصوره وقالتلي اوكي .. كانت منشكحة مسكينة جنها مو مصدقة احد بيصور ولدها




^^^
امانة مو جنه دعاية تواير ميشلان !!!

لوووووووول مشالله تبارك الرحمن





وقبل لانروح غرفنا .. رحنا نسوي مسااج حق ريولنا

وانا كانت ريلي واااااااارمة من المشي .. كافي تعب الحمال بس صج من بعد مساجهم تحسين انج فرشششش مرة ثانية


من خلال تحربتي بهالشارع جم سنة .. احسن مكاااااان وانظف مكاان للمساج هذا :




اسمه سي اند ان .. ومساجهم فظيع

يوم تطلعون من المجمع اخذو يمين .. تمشون بو خمس دقايق وتلقونه علطول


...



الحين تابعوني باخر يوووووووووووووم في بوكيت مع رحلة جزيرة phi-phi

 

[om MaRyooM]

*اليوم الاخيييييير في بوكيــت :eh_s(9):



...


كنا حاجزين من يومين حق جزيرة بي بي



كنا نبي باليخت السريع speed-boat بس طبعا مارضو لأني حامل :eh_s(2):


قالو مافي غير البوت الكبير لأن خطر عليج الثاني .. وتوكلنا على الله


مع ان كان وديييييييي اليخت السريع لأن احلى واسرع واوونس حيل


وماكنت ابي جزيرة بي بي لأن في احلى وانظف منها ..

اللي بتروح انصحها بجزيرة raya & carol
قمممة بالنظافة



المهم رحلتنا كانت من الصبح 8 الى 6المغرب السعر شامل التوصيل والاكل

**معلومة مهمة: لاتحجزون من مكاتب الرحلات الي تابعة للفندق لأنها اغلى تقريبا بربع او حتى بنص السعر

حجزو اللي يكونون برة عالشارع وممكن تكاسرونهم بعد



نكمل





هذا البوت الكبير اللي حجزنا عليه











الرحلة كانت تتضمن الsnorkling و جزيرة كاو لاك(اللي صورو فيها فلم the beach)حق ليوناردو ديكابريو
وجزيرة القردة .. وجزيرة بي بي

















احلى شي بهالسفينة ان فيها مكان مكيف للي مايحبون الحر نفسي .. وفيها مالذ وطاب من المشروبات وكانت خدمتهم وايد حلوة صراحة











يللا نكمل مشوارنا ..

















وهالانناسة يت بوقتهاااااااااا صراحة .. كانت لذييذة وبااااااااردة


كليتها كاملة . .والله ستر لأن عقبها بجم ساعة حسيت بمغص ببطنيييي وكنت قبلها بيوم همن ماكلة نص انناسة
لووووول





وهنييي وصلنا لجزيرة بي بي









بصراحة الجزيرة مو حلوة .. ووصخة

بس تسلينا لأن كنا مع بعض

وردينا بخير وسلاااااااااااامة والطريج كان طويل ومتعب

من جذي اللي بتروووح اي جزيرة تروح بالبوت السريع احسن




ردينا الفندق وجهزنا اغراظنا لأن ورانا رحلة ثاني يوم الصبح حق شنغ ماااااااي الساحرة

 

[الأميرة كيرارا]

عليج بالعافية
و مشكوووورة عالتقرير

 

[om MaRyooM]

Chiang mai
********




تعتبر ثاني اكبر منطقة في تايلند

كنا مترددين فيها واااااايد . .

بس اشوا ان زرناها .. لأن فعلا حبيناها حيييل وايد وايد نظيفة وناسها رووعة غير عن بوكت وبانكوك

وين ماتلفون يرحبون فيكم




بسني قرقة بخليكم مع الصور ...






ركبنا الطيارة وتوكلنا ووصلنا بالسلامة ..


واول ماوصلنا كانت تمممممممممممطر حيل مشالله

خذينا تكسي يوصلنا للفندق

وانصدمنا ان الفندق طلب بس 150 بات لووول قلنا اكيد مظيع لأن الفندق بعيد

ولا صج طلع حسابنا 150 يعني دينار ونص خخخخ


وهني صور الشوارع غرقة من المطر









شوفو الرصيف .. كنت يومها صج مخترعة <<<مو متعودين بعد عمري




واخييييرا وصلنا الفندق :







الفندق يعتبر منتجع اسمه siripanna

كان من اختياري طبعا :bbbiu: .. كنت خايفة مايطلع حلو

بس صج ونعم الاختياااااااار لووول .. حده حلو وفخم

وهذا رابطه اللي تحب تشوف تفاصيله :

http://www.booking.com/hotel/th/sir...hiang-mai-centara-boutique-collection.en.html


وعلى فكرة .. الفندق فيه فلل فيها مسبح خاص وجاكوزي .. بس غالي من جذي حجزنا الغرف العادية




اكملكم صور الفندق :


اللـوبي




اول ماتدشون اللوبي تفوح ريحة الورد . . فعلا هالفندق كان مريييييييح وهاااااااادي ماصادفنا الا عائلتين




وهني ودونا غرفنا .. كانو بالدور الثاني





اللي تخاف من الحشرات والاصواات لاتحجزله لوول ..

لأني اول يوم بجيييييييت ابي ارجع .. برة الفندق كله بريعصية وحشرااات وضفادع واصوات طيور ..

لأن صاير منتجع بنص الاشجار والخضار .. فيخرع شوي

بس تأقلمنا عادي لوول

انا سميته فندق السفاري لوووووووووول من كثر ماخفت فيه





هذي الغرفة ..

بس للامانة الفندق واااااااااايد نظيف اللهم البق اللي تأذينا منهم حييييييييل


الفندق عطونا سبراي عشان نرش الغرفة ماقصرو







حاطيلنا هذي بالغرفة:


^^^
اهم شي هوني مووون وانا بطني جدامي لووووول




وهذي حاطينها لنا بنص السرير



يحليلهم كانو وايد مهتمين فينا وذربيييييييين ومحتارين شلون يخدمونا (لأن ماكو غيرنا بالفندق خخخخ)



....




عقب ماحطينا جناطنا شفنا ان في وقت رحنا سوق الليل لأن كان للحين فينا نشاط :eh_s(9):

خصوصا كانت تمطر .. عاد خبركم الكويتيين كلش مايحبون المطر فطلعنا علطول لوول





















بعدين كالعادة شنو كلينا ؟؟؟؟؟؟ :bbbiu:




^^^

بيتزا صححح لوووووول

لأن ماكو غيرها



نطروووووووني اكملكم اليوم الثاني في شيانغ مااااي

 

[FOZQ8]

الله يا ام مريووم حدج مدمنه
احب تايلن وايد
وشنغماي حبيتها اكثر شي حسيت حتى التفصخ هناك مافي واكيد مريتي سوق الليل يهبل نايت بازار
وفيها مطاعم عربيه وايد طقيناها صحبه مع صاحب المطعم المصري جذي اسمه
والله كانت اايام

 

[om MaRyooM]

**اليوم الثاني في شيانغ ماي


اللي سويناه بهاليوم
-تريقنا طبعا
-كنا قبلها بيوم متفقين مع تكسي ياخذنا الصبح يودينا رحلة الشلالات وقرية الحريم اللي رقابهم طويلة
ومكان للرماية
**ملعوومة : نصيحة لاتاخذون الرحلات الجماعية بالنسبة لشيانغ ماي انتو اتفقو مع الفندق يدق على تكسي معين وانتو تختارون المكان اللي تبونه وكاسروهم بعد ... احنا قلناله يودينا هالاماكن بس
لأن السفاري وهالسوالف ملاقة لوول بس تنفع لليهال.

-مجمع سنترال
-سوق الليل

















وريوقهم كان زين وحلييو والله ...



على مانطرنا التكسي خذيت جم صورة للفندق :



^^^

بلكونة غرفتنا












هذا ممر يوديكم للغرف ..
طبعا بالليل هالممر يخرررع لووول مادري يمكن لأني خوافة

لأن تسمعون اصوات حشراات وضفادع





المسبح













...



عقب ،، وصل التكسي ورحنا اول شي للرماية


















^^^

يللا كل وحدة تختارلها واحد




عقب ماخلصنا ورمييينا رحنا حق قرية long-neck women














وصلنااااااااااا :eh_s(9):





نطروووو انزل باجي الصور

 

[FOZQ8]

عاد تصدقين ماحبيت الرمايه كلش


كملييييييييييييييييي

 

[om MaRyooM]

نكمل




long-neck women





اللي عاليسار المرشد مالتنا وسايقنا بنفس الوقت

كان يشرحلنا ان ناس هالقرية شلون يسوون العيش ...


صج عيشة صعبة .. والواحد يحمد الله ويشكره مليووووون مرة






^^^

حمدلله على الاسلام


هذيلة الله يسلمكم معتقدهم ان الحلقات هذي تقربهم من الاله وكل ماطولت رقبة الوحدة يعني ايمانها اقوى ومهرها يزيد بعد

ومن عمر الخمس سنوات يبدون يحطون للبنات الحلقات





كسرت خااااطري هالبنت

عطيتها ككاو خمطته مني كانت خايفة الظاهر







شوفو الياهل .. قطع قلبيييييييييي والذبان حواليه

وبساااابع نومة

واحنا عيالنا ماينامون الا بقمة الهدوء وبالظلمة والمكيف لازم شغال !!!










اما هذي قال عمرها باول الستينات واهيا مشهورة بهالقرية ان عندها اطول رقبة










طبعا ماكو كهربا ولا شي .. من يصير الليل يشبون النار عشان يشوفون بعض ويطبخون






خلصنا ورحنا موقع الشلالات


طبعا في واااااايد شلالات بشيانغ ماي .. بس رحنا الاقرب اللي اسمها may saa







كان الطريج يخرع داخل .. ومايناسب اليهال كله منحدرات والارض تزلق من المطر


































انا ماقدرت اكمل الصعدة لأن تعبت حيييييييل وقلبي قام يرقع وشفت حشرات فقمت اركض رديت وريلي يركظ وراي "بطنج بطنج شوي شووووي " لوووول
وعمك اصمممممخ صرت صاروووخ



يوم وصلت السيارة جان يصير فيني هبوط لووول
تبهذلت بهالرحلة

بس كانت ممتعة حيل:eh_s(15):







يوم خلصنا اقترح علينا التكسي نروح مجمع سنترال

رحنا بس كان سخيف مايسوى كلش




ردينا الفندق ريحنا ..

ورجعنا حق سوق الليل لأن كاملناه امس
اللي اهوا night bazaar
وايد عجبني واسعارهم حللللللللوة

بس لاتنسون (المكااااااااسر) كاسروهم كثر ماتقدرون وهالقاعدة اخذوها بكل مكان وبكل مناطق تايلند


وشريت من هالمحل هالشبابيص العجييييييييييييبة

شوفو شحلاتهم





....


وثاني يوووووووم الصبح طلعنا من الفندق عشان نروح بانكوك


وفعلا كانت شيانغ ماي منطقة جدا حلوة وراقية ونظيفة .. ارتحنا فيها بس 3ايام كافية عليها لأن مافيها شي

وبالنسبة للفندق انصحكم فيه لأن رووووووووووعة ومستغربة انا ليش ماعليه دعايات قوية نفس باجي الفنادق



والحين خل نتوكل

واحنا بالمطار حصلت مكان للمساج .. دشيت علطووول لأن كان مبجر على طيارتنا

النص ساعة ب200بات يعني بحدود الدينارين .. لوووووووول يابلاش

ومساج شي شي طبعا:rerrerek:






وطرناااااااااااا حق بانكوك

نطرووني يمكن باجر اكمل رحلة بانكوك تعبت وزغللت عيني من كثر الصور لوول

 

[(أم نونو)]

حبيبتي مالومج فيها ادمان صج

انا قاعد احن على زوجي بنروحلها بصيف يقولي انسي الصيف ماتصلح

انا رحتلها قبل سنه ونص

 

[(أم نونو)]

كملي شوقتيني

 

[om MaRyooM]

**بانكــــــــــوك**




قعدنا فيها 4ليــالي وقظينا اغلبها بالسوق :eh_s(22): معشووووق النساء لوول




اول يوم ماسوينا شي ارتحنا بالفندق ونزلنا بالليل 711 خذينا جم شغلة للفندق من عصاير وتوست وهالسوالف

وعبينا تلفوناتنا لأن كانو مصفرين


اي نسيت اقولكم

الفندق كان نوفــوتيل بمنطقة سيام سكوير

وهذا الرابط للفندق اللي حابة تشوف صوره واسعاره

http://www.booking.com/hotel/th/novotelbangkok.en.html






وهذي جم صورة للفندق


اللوبي














ممـر الغرف :






وصلناااا الغرفة












الغرفة كانت اقل من عادية .. حسافة كان ودنا بفندق افخم بس هذا مدحولنا ياه ومايستاهل سعره كلللللللش








***********





* ثاني يوم

- دريم وورلد او مدينة الاحلام
-مجمع ام بي كي



اتفقنا مع تكسي شفناه برة ان بنروح دريم وورلد اول شي قالنا 1200 بات للطريج ... كاسرناه لما وصل الى 700 بات لوول يعني 7دنانير روحة ردة


وصلنا الساعة 10ونص كان انسب وقت لأنها تفتح الساعة 10 الى الساعة 5المغرب

نصيحة اللي بيروح لايروح الظهر لأن شممممممممس ويصير زحمة ..
الصبح احسن شي



الحبن اخليكم مع صور المدينة








المكان حده حلووو للتصوير .. بس حسافة الجو شوية حاار بس استمتعنا بعد


اول ماتوصلون يعطونكم الخريطة شكبرهاااا .. وسعر التذكرة للشخص 700بات يعني تقريبا ست دنانير








اذا تلاحظون شووية غيم .. الحمدلله هذا اللي رحمنا شوية






























نطروووني اكمل

 

[om MaRyooM]

تكملة صور دريم وورلد









ركبنا التلفريك طقنا شوي الهوا الحمدلله







المنظر من فوووق

^^^
هاللعبة كان خااااااااطري اركبها

كلهم ركبوها الا انا .. لأن الحامل ممنوع طبعا:bbbiu: مادري شحقه يايه لوووول بس عشان اصور

بعدين دشينا مدينة الثلج تبووووردنا

عقب ماخلصنا من مدينة الالعاب درينا الفندق ريحنا ..


والمغرب تمشينا في مجمع mbk اشهر مجمع في بانكوك .. ومن كثر البظاعة ماتخلصينه بيوم

والحلو فيه ان مشي خمس دقايق من الفندق

صورة المجمع من النت ماخذتها لأن ماصورته ..




.......



الحين نكمل اليومين المتبقين من بانكــــوك ،،،،،،،،،،

 

[om MaRyooM]

*اليوم التالي في بانكوك





جدولنا كان جذي بهاليوم

- الريوق ثم مجمع سيام بارغون
- مجمع بلاتينيوم
- نانا ستريت (شارع العرب)






عقب ماخلصنا ريوووق رحنا مجمع siam paragon بس نخطر الشارع من فندقنا نلاقي المجمع






المجمع كله ماركات .. وفيه مطاعم

حلو للي تدور الماركات .. لأن اكيد ارخص من هني


والدور الارضي فيه اكوراريوم

رحتله السنة اللي طافت .. واااايد حلو واحلى طبعا من الاكواريوم اللي عندنا وينفع لليهال وايد




مدخل المجمع






خلصنا منه بسرعة لأن ماشرينا شي ورحنا حق platinium






من ناحيتي استااانست فيه حيل لأن فيه وايد هدوم وسوالف لليهال حلوة

بس ريلي زهق لأن كله ملابس حريم

واللي قياسها s او m بتستانس لأن هدومهم حلوة ورخيييصة









عقبها ردينا الفندق تغدينا والشباب سبحو بالمسبح واحنا خذينا راااحة على ماصار الليل


وهذي صورة من الدور 9 على المسبح







بالليل رحنا شارع العرب nana street

انا ماواطن هالشارع لأن قمة بالوصاخة والرذالة .. بس رحناله عشان محل فريدة علي

لأن ساعاتها روووعة واكسسواراتها تهبل .. مشالله عندي اكسسوارات منها صارلها 3سنوات لونهم ماتغير وطبق الاصل
ونص السعر اللي يبيعونه هني

مثل اساور كارتيير وهالسوالف .


واللي معاها يهال او مراهقين ماانصحها تروح لهالشارع لأن غير مناسب


*******



*اليوم التالي :


قزرناه بمجمع ام بي كي وخمطنا شكثررررررررررررر سوالف





وثاني يوم ردينا الدييييرة بخير وسلامة:eh_s(9):


وانشالله يكون التقرير عجبكم

واللي تاخذ الصور تنسبهم لها ياويييييلها ويلاه ... لأني تعتب فيهم
وصارت معاي هالحركة البايخة من وحدة الله يهديها
:eh_s(10):

 

[FOZQ8]

يامحاسن الصدف

هذي انا مصوره يمها ههههههههههههههه ماتغيرت اقصد لبسها نفسه انا مسافره لي سنه ونص تقريبا

 

[قطوة@@]

الحمد لله عالسلاامه

تقريرج روووعه

كل شي فيه يونس

 

[مجنونة قطر]

مشكوره حبيبتي والله يقومج بالسلامه
انا توني راده منها ماصار لي اسبوعين واد استانست
بس ليش تاكلون بيتزا .. ترى دهنهم خنزير ..
جان رحتوا مطاعم عربيه و كلتوا سي فود اذا تاكلونها
ربيانهم فظيع انا زين ما ارتفع كلسترولي غدا وعشا ربيان هههههه

 

[om MaRyooM]

**نصائح ومعلومات ممكن تفيدج اذا رحتي تايلند**

بنات حابة افيدكم بجم شغلة حق اللي اول مرة بتروح

او رايحة قبل بس للتذكير


* اول شي بالنسبة للحجوزات .. لاتروحين وتاخذين كل شي من السفريات
حاولو تعتمدون على نفسكم صدقوني بتطلع الميزانية اوفر

يعني الفنادق ممكن تحجزون من موقع بوكنغ .. والطيران الداخلي حجزيه من النت
ومثل ماقتلكم ارخص طيرانair-asia






* اذا حجزتو طيران داخلي من النت لاتنسين تختارين الكيلوات الاكثر (متوفر هالخيار بموقعهم) لأن عادة هالطيران لج بس 15كيلو ... يعتبر شوية طبعا
زيديهم عالشخص 20كيلو يعني بيزيد جنه بس دينارين شي جذي
احسن ماتوصلون هناك وتتوهقون حرام تدفعون زيادة






* بالنسبة للاغراظ
اخف شي اخذيه .. ولاتاخذين جنز لأن هناك رطوبة والجنز ثقيل
اخذي بنطلونين او ثلاث قطن
واذا متحجبة اخذي جم شيلة قطن وبسسس
كثر ماتقدرون خففو هدووووم .. واكسسوارات لاتاخذين طبعا
اخذيلج ساعة وحدة كافي
ولاتنسين المايو الاسلامي من النصر .. بتحتاجينه
وهللا هللا بالثقة لووول :bbbiu:







*بالنسبة للميزانية
مايكسر الميزانية غير السوق
يعني مثلا انا وزوجي حطينا ميزانية 1000دينار حق 11يوم
ولو كانو زيادة بعد احسن .. لازم تاخذون زيادة فلوس للاحتياط
وكروت البنك اخذوها ماتدرون شيصير !






* انصحج تاخذين كرت الفيزا والماستر اذا عندج
موشرط تستخدمينهم .. بس الاحتياط واجب
انا خذيتهم ويوم طلبو الفندق تأمين عطيتهم كرتي أحسن ماندفع كاش والمبلغ يتم عندهم ليما نطلع يعطونج ياه .. شالفايدة !:eh_s(10):






* حق الطلعات والرحلات

كنا اذا بنطلع اي مكان نسال الاستقبال جم المفروظ التكسي ياخذ لهالمكان !!!
عشان لاننغش
واذا قالنا التكسي سعر معين نكاسره لأن نكون عارفين السعر الاصلي

يعني مثلا يوم كنا بنروح السوق في بانكوك التكسي قالنا 300بات يعني 3دنانير ..
ويوم سالت الفندق قالولي لازم مايتعدى 50بات !!!!!!!!!! شفتو النصب :rgewrg:







* اذا كنتو بالسوق
واحد وقفكم لاتوقفون كلللللللش
لأن النشالين وايد خصوصا بشارع العرب في بانكوك
واذا كنتو باي مكان واحد يبي يعطيكم اي ورقة او يقول السلاااام عليكم .. طنشو مالكم شغل باحد



واذا كنتو بالتكسي وقالكم بوديكم مكان just look بس شوفو .. قولوله لأ مانبي
لأنهم مليقيييييين لازم يوقفون عند محل مجوهرات ولا البسة ولا اي شي .. ليش؟
لأن المحل يعطونه عمولة كل ماييب زباين

فاحنا كنا نعاند نقوله ودينا دايركت للمكان اللي نبيه






*بالنسبة للسوق

اذا بتروحون جم منطقة خلو بانكوك اخر محطة
لأنها اهي مركز التسوق .. وعشان لايصير عليكم وزن ووتتوهقون بالاغراظ اليديدة
ولاتشترون وايد من بوكت لأنها اغلى واغراظها مو متنوعة كثر بانكوك







*لاتنسين اخذي هاند باغ او 2 بعد احسن حطوهم في الجنطة الرئيسية عشان اذا صار معاكم وايد اغراظ تبطلين الهاندباغ وتقسمين الاغراظ لأن يحقلج 7كيلوات في الهاندباغ داخل الطيارة .. وهذي حيلة وااايد تنفع ترا




* اول ماتوصلون
روحي لأقرب جمعية او اذا يمكم كارفور اخذو عصاير وماي وتوست وجبن وبطاط
لأن بتتوهقون بالاكل
واكل الفنادق عادة واايد غالي .. والمطاعم ماينوكل منها !

احنا حتى المطاعم العربية هناك ماناكل منها لأنها (الله يزيد النعمة) وثانيا صراحة مااقتنع ان ذبحهم اسلامي :bbbiu:
لأن ماتوقع ان هناك في ناس عندها ظمير وتذبح ذبح اسلامي
اهما جم يوم تحملوهم






*اذا بتتسوقين
لاتنسين المكااااااااااسر
كاسري كثر ماتقدرين
واذا وريتي البياع انج ماتبين البظاعة رح يناديج علطووول وينزلج بالسعر

فانا صرراحة اذا عجبتني شغلة اقوله السعر الي ابيه (نص اللي اهوا قايله او اقل بعد) لأن اعرفهم نصابين .. واذا عصب او ماعجبه ألف ويهي
ألاقيه علطول ياي وينزل ينزل بالسعر ليييييييما يوصل للي انتي تبينه



بس عاد في اشياء مايستاهل تكاسرين وايد لأنها اساسا رخيصة



وهذا مافي جعبتي

انشالله يعجبكم ويفيدكم في يوم من الايااام:eh_s(7):

 

[om MaRyooM]

مشكوريييييييين على تفاعلكم بنات



*مجنونة قطر*

لا لا !!!!!! جد والله دهن خنزير الله يقطعهم ؟؟

اذا صج والله الله يسامحنا ماندري صراحة

واحنا كنا ناخذ من برجر كنج صمونة جبن بس مع بطاط وببسي لوول ..


ومشكورة على المرور حبوبة