| • | | ~ قصه ولادتي حياكم بالتفصيل ~ | • | |

[ام عفاف الكويت]

الحمدلله علي السلاااااامه
ومبروووووك البطل
ويتربي بعزكم
والله يعينج حسيتي الحين العدان هو اعدام

 

[هذا مزاجي]

هههههههههههههههههههههههههههههههه
ياحلوج وياحلو اسلوبج وكلامج
وحمدلله على سلامتج ويتربى بعزكم المزيون اللي جبتيه
ربي يحفظه

 

[بنت ذآك الأمير!]

الف مبرووووووووووووووووووووووووووووك يا قلبي ويتربى بعزكم..

 

[نور الدنيا 88]

بتبوتا هالمصرية باطة جبدي ام الموزة هههه
ويع

الحلو فيج انج تعرفين تتصرفين لانج مو بجر
صراحة تعلمت منج مابي اصارخ اييي هين هههه

و شكرا لانج ما نسيتينا بالدعاء
و الحمدلله على سلامتج و سلامة البيبي 

 

[فلافل وبطاط]

بتبوتا الحمدلله على السلامه ومبروك ما ياج ربي يجعله من الذريه
الصالحه ويبلغج فيه معرس .. هالقدع البطل اللي مانطر وطلع وبرد
جبدي بالمصريه هي وموزتها .....

سالفتج عورت بطني احس بطلق ): ....

انا ولدت بجري بالفروانيه دخلت 4 سانتي الساعه 8 بالليل والساعه 11 وشي
ولدت نفس اليوم .... ما سوو فيني كل هذا !!!!
وماخذت ابرة ظهر عالكمام ونفسج جذي ماحب اصرخ اقمتها من قلب ... وادفع فيها هههههههههه

وياختي الواسطه تلعب دور ،، انا توصيه من كل صوب ليومج اقول احلى شي الولاده عكس الناس

المهم سلامتج ... والسهاله من الله ... والحمدلله فرحتج بظناج مالي حظنج تسوا الدنيا وكل مافيها ...

 

[Dancing^Queen]

بتوبتااااااااااااااااااااااا
قصه ولاده والا قصه تعذييييييييييييييييييييييييييييييييييب
واي ياعمري خلوج تولدين برووووووحج
وين الكمام وين السسترات وين العنايه
ولاده جهد ذاتي
وتكييف علي رااااااااااااااسج
وماخيطوووووج
وماكو راحه عقب !!!

واي يابعد عمري الله ياجرج
والحمدالله علي سلامه ولدج (حبيبيييييييييييي توه مولود وسيدا السستر عطته كلمه هالكبر!!!)
واستني الكولفز !!!

واي احس اني تحلطمت واااايد بس من صدمتي سمحيلي
ديري بالج علي النفاس عدل عدل عدل ولاتهملين بدويتج وعلاجاتج وشلون الكحه والنشله؟

 

[حرمه المصون]

الحمدالله علي السلامه ومبرووووووك ماجبتي
حيلي الله عليهم ليش هالمعامله والله انا خلاص قررت اولد بخاص مافيني تنحرق اعصابي واتبهدل

 

[Talyan Rose]

الف حمد لله عالسلامة ومبروك ماياج حبيبتي


الله يهداج عاد العدان تروحين,, الخاص واايد ارحم

الله يجعله من الذريه الصالحه يارب

 

[بنت الفوزان]

حكومه لا يحوشك

 

[ruby13]

الف الحمدلله على السلامه ومبروك ماياج ويتربى ابعزكم ويجعله من الذريه الصالحه
ومشكوره على فلم الرعب صروعتيني وانا على ويه ولاده اللللللللله يسسسسسسسسسسسسسستتتتتتتتترررر

بس بغيت اسأل ماخذتي ابره الظهر ؟؟

 

[الحلوة ريا]

السلام عليكم ورحمه الله وبركاته

يوم 13/9/2011 كان عندي مراجعه بطيبه كلينك ورحت وراجعت والحمدلله كانت اموري بالروب تمام ,,

بس كنت اعاني من النشله والبلاعيم ووالخمول وطبعا الحامل ممنوعه من الادويه اللهم فيتامين سي على

حبوب مص وهيك ,,

المهم رديت البيت ودشيت تكرمون الحمام وشفت افرازات مع دم !

قلت ولاده ! طلعت وقلت لريلي وقال امشي الطبيب,,

قلت له لاا بدق عالدكتوره ودقيت ,,

قالت لي : عادي يا بتبوتاا ده عشان الفحص بس لو الدم كتير ومعاكي عوار تعالي فوراا ,,

قلت لها اوكي ,, والحمدلله كان الدم خفيف ,,

ثاني يوم ,

نفس السالفه قلت خل اروح امشي ,,

ورحت مشيت وبعدين قلت امر العدان افحص ,, ورحت فحصت وطلع اني مفتوحه 3 سانتي ,,

سويت تخطيط ومافيني الا العافيه ,, وبس ارد البيت احس بعوار :rgewrg:

ثالث يوم ,,

السداده طاحت ؟ السداده يكون لونها شفاف على شي بني وهذي علامه ولاده ,,

هم رحت مشيت مشي بمجمع وبعدين رحت البيت تعشيت مكدونالدز ونومت اليهال ورحت انا وريلي
مشيت عالتراب ,

بعدين حسيت بعوار يروح ويي يروح ويي ,,

ورحت العدان عال 12 بليل

خذيت رقم وقعدت انطر رقمي وريلي ينطرني بالسياره ,,

دشيت دوري بس شنو ؟!

بغرفه الطوارئ دكتوره ودكتور والدكتور شكله تحت التدريب ,,

سألتني الدكتوره ..

والده قبل كده ؟ وكام بيبي ؟ وكلهم طبيعي ؟ واخر دوره ؟ الخ ..

بتحسي بأيه ؟

قلت لها عن الافرازات والدم وعوار ايي ويروح شوي يتحمل وشوي قوي بس هم يتحمل ,,

قالت :

اصعدي نفحصك ,,

:/

وفحصتني وطلعت روحي واهي وتفحص !

على فكره الفحص ما يعور بس هالفحص عشان توسع الرحم :rgewrg:

يالله يا ستي انتي دخول ولاده 4 سانتي

قلت الحمدلله بس اقول لريلي كلمت ريلي وقلت له بدخل ولاده ..

قال لي صج كاني ياي ,,

ونطرته ويه كلمني وقال لي تبين اوديج خاص ؟؟

قلت له لاا ابي اهني لاني والده من قبل ثلاث مرات عندهم ومرتاحه فعادي ,,

قال لي اكيد ؟ قلت له اي اي السهاله من الله وراح سوالي دخول

ودخلوني غرفه عشان ابدل ,, عطوني لبس الميانين الاخضر وكبوس ونفسه للريول وحطيت اغراضي بجيس ,,

وبعدين قعدوني عالكرسي , اااي ونسيت سألوني اذا نظيفه ولا لاا قلت لهم ايي ,,

قالت اشوف .. وراويتهاا

قالت good

ويا هالويه يعني اجذب عليج مثلاا @@!

المهم .. قعدت عالكرسي وطلعت من غرفه الفحص وكان ريلي وعيالي بويهي بستهم وباسني ريلي على راسي وقال لي الله يسهل عليج ان شاء الله وراحوو


:eh_s(2):

صارت الصجيه :/

يدزوني بالكرسي لي غرفه الولاده ,,

عند رسبشن الولاده سألوني جم سؤال وخذو رقم ريلي على اساس يبلغونهم اول بأول

دخلوني الغرفه الي بولد فيهاا وحطوني عالسرير ,,

دشو ثلاث ممرضات سيلانيات ووحده عند ايدي بتاخذ دم وتحط لي درب ,,

الغرفه بااارده ثلج وصوت المكيف جنه ينقط ماي .. والسسترات يقرقون مع بعض وبعدين سألوني نغس الاسأله الي فوق ,,

الممرضه الي بتاخذ الدم اتخيلها واحد ماسك سجينه وبيطعني من كثر ما انا خوافه من الابره :d

دخلت الابره على جنب ايدي وسحبت دم ,, ولي اليوم ايدي وارمه بنزل الصوره بعدين .

وبعدين شالت الابره عشان تحط لي ابره الدرب :eh_s(14):

اي خلها مكان واحد :/ ,, المهم حطت لي الدرب وطلعو كلهم وطفو الليتات :/

جان انام شوي ,,

مره وحده .. طرااااااااااااااخ @@!

بعد ما حسيت بكهربه بجسمي وقمت مخترعه اطالع شنو فيه ؟!

ولا فراشه تخم وطقت السرير :rgewrg:

جان اقول لهاا

شوي شوي شنو فيه خرعتيني ؟؟

وتطالعني نظره اخترعت منها بصراحه :/ قلت لها شوي شوي ماما انا كنت نايمه وخرعتيني

جان تقول لي :

ماما يبي ماي ؟

خفت بصراحه تكون متفله فيه ولا شي قلت لها لاا ماما مشكوره حبيبتي بس انا يبي نوم اوكي ..

شوي ولا يدشون ثلاث دكاتره .. وحده كويتيه واثنين مصاروه ..

بطلو اليتات << خقت

ودشو الدكتورين واقفين عند الطاوله

والدكتوره تلبس الدس عشان بتفحص :/

فحصها يطلع الروح :/ ومن كثر ما عورتني تميت ماسكه ايديها بالقوه ..

وطلعت ايدها وشفت دم بالدس :x

ولا تقول للدكاتره 4 سانتي ومادري شنو سي ,,

ولا يقول لي دكتور فيهم يشابه فنان مصري الي بزهره وازواجها الخمسه الشيبه ,,

لسه بدري انتي اربع سانتي جيتي ليه ؟!

قلت له واللهي يا دكتور مدخلتش بمزاجي هما الي دخلوني؟!

جان يقول يعني انتي صاحبت ولادات قبل كده كنتي استنيتي ..

قلت له : معلش هحط نصحتك دي حلقه بودني ولا تزعل ..

تغشمر شوي وقال لي هنسيبك ساعتين لو مفتحتيش هتصعدي الجناح ..

قلت له طيب ,,

طلعوو وطفو الليتات وشوي شوي قمت احس بعوار صجي ,,

صارت الساعه 4 الفير ,,

دشت دكتوره هنديه

وفحصتني :eh_s(16): صرت حقل فحص لهم :x

قلت لها جم ؟؟ ولا تقول بعده اربع سانتي :/

جان تيب عصايه خشبه وبطت الماي ,,

وراحت .. نسيت اقول لكم من دخولي لي طلعتي صرااخ الحريم شايل المكان شي

خصوصا وحده بجر تقطع قلبي عليهاا مسكينه :/

وانا ادعي لهاا ولكم ولكل الي يخطر ابالي وخصوصا الي بتجمعناا ,,

المهم نرجع لقصتي ,,

بعد ربع ساعه قعدت انادي اي احد فيهم

سستر ؟ سســـــــــــــــتر .. اي احد يمر ؟

ماكو مع اني اسمع قرقتهم :/

لما دشت الي توزع ماي قلت لها بليز نادي سستر ..

وراحت وقفت عالباب وبأعلى صوتها تنادي السستر ويات لي

شنو يبي ؟ < وبنفسيه !

قلت لها تعالي مت برد الكنبل والفراش كله ماي سوي نظيف !

شالت الكنبل ومادري شنو قاعده تتحلطم :cxxxp:

وقالت انتي شوي فيه ولاده نطري ؟!!@@

قلت لها بردانه قاعده ارجف ضروسي تسكر على بعض وهذي تقول لي نطري :x

طلعت ويات سستر ثانيه طبعا انا طنقرت وسكت ووكلت امري لله ,,

ولا هالسستر من نفسها شالت الكنبل ولا تقول ليش محد سواه كلين ؟

قلت لها اني ناديت السستر وقالت نطري .. جان تقول والله حرام برد :eh_s(2):

كسرت خاطر روحي ويابت لي كنبل وفرش يديد وساعدتني وحتى ريولي نظفتها جزاها ربي الف خير

والله صج كان ودي ابوسها حست فيني وشربتني ماي بعد ,,

شوي ويت السستر الي عطتني درب وحطت لي طلق صناعي وطلبت منها ابره البيتادين < ابره عجيبه

مثل الكمام تخليج دايخه ومخدره ونعسانه بس مستوعبه وتحسين بكل شي ,, بكل ولاداتي اخذهاا ,,

المهم بس خذيتها حسيت الدنيا تهتز ,, وعيوني تقفل ,, جان انام ,,

كل شوي اقوم على عوار الطلق ! .. اتحمل شوي وانام شوي اتحمل شوي وانام شوي ,,

ليما ياني عوار صج ما قدرت اتحمله ,,, جان انادي سستر ؟!

سســـــــــــــــــــتر ؟ الظاهر حالفين محد يقعد عندي خبري فيهم ما يفارقون الوحده بس مادري شفيهم هالمره !

المهم دشت علي ممرضه مصريه لابسه ابيض بأبيض ..

ولا تقول لي ها يا ست بتبوت ,, نفحصك كده ,, :x

وكانت الساعه 8 الا ربع يوم اليمعه صباحاا بتاريخ 16/9/2011

وفحصت ,, ولا اقول لها ها بشري ؟؟

ولا تقول هتولدي خلاص ماشاء الله 8 سانتي

والعوار ما زال يروح وايي كل 3 او 2 دقايق ,,

واقول لهاا احس بعواار ابي اروح حمااااااااام

وتقول لي استني وحدهاا بروووووووود وتاكل موز وتدندن تغني بينها وبين ورحها !! حسبالها ليش ما اصارخ نفس الحريم قاعده اتدلع ؟!

نوعي اغمت اصراخي على تحت احسن عشان تتسهل الولاده .

السستر قاعده تزهب سرير الي تحط فيه البيبي اول ما يطلع ..


جـــــــــــــان احس بدفعه !


قلت لهاا سستر تعالي؟! هيطـــــــــــــلع ؟!

ولا تقول لاا استني شويه متدفعيش ؟!

كنت نايمه على الجنب جان انام على ظهري ,, وبس نمت على ظهـــــــــري


جان تييلي دفعه قوويـــــــــه واحس فيه بيطلع !!

واقول لهاا طــــــــــــلع طلع الحقـــــــــــــــــــــــــي ,,

وتييلي وتشوف ولا تقول لي لأأأأأأأأ استني استني

بصراحه ما نطرت ما صدقت بيطلع جان اغمت صرختي واشـــد ويطـــــــلع الولد ..

والسستر تقول لي ينـــــــــــفع كده ؟ ينفع كده ؟؟؟؟؟

انا < بعد ماردت فيني الروح وحسيت بطني صار مثل الموجه وارتحت شوي ..

حلمانه على صاحيه على مادري شعور غريب ؟

المهم حطت الولد عالسرير وقاعده تمسح فيه ومعصبه على تتحلطم ..مش قلت لك استني ينفع كده بلوقتي ؟

جان ارد عليهاا ؟ هوه ايه الي ينفع ؟

وتطالعني وتراويني ايدها كلها دم وتقول لي : ولدتوو من غيــــــــــــر كلوووفز ؟!:eh_s(1):

انا وبنص مخ مستوعب ؟

طب والبيبي كويس ؟

ولا تقول لي اهوه زي الفل اهوو الله لا يوفقهاا بعد ما نظفته وبتراويني اياه ولا تقول لي اهوه الكلب اهوه يعني مادحته ورب الكعبه كل ما اذكر قلبي يعورني على كلمتهاا جسبي الله عليها !

ما قلت لها شي لاني ما استوعبت عدل وبعدين راحت ماشفت خلقتهاا ودشو سسترات ثانين وحده يابت لي الولد وحطته على صدري .. وبس شفته بسته وكان لونه بنفســـــــــــجي

حسيت الم الولاده والي صار كله كوم وبس مسكته كوم ثاني سبحان الله ,, :nbvppw:

الي تعبت فيه 9 شهور والحمدلله نتفتي طلع :>

المهم خذو الولد وطلعو المشيمه وبعدها بنص ساعه طلعوني من غرفه الولاده لي غرفه الملاحظه

وكانت الساعه 9 ..

طبعا حدي دايـــــــــــــــــخه من الابره .. مجرد ما اسكر عيني انام

يات لي سستر ولا بصراخ .. مدام مــــــدام قومي حمام سوي بول ( تكرمون )

قمت ومديت ايدي عشان تسندني ولا ترفع لي حديده السرير وتقول لي مسكي اهني !!

شدعوه بعضج اناا :/

المهم عطتني دلاغ بلاستيك مال الريول ولبسته ورحت الحمام ,,

ما ابي الوع جبدكم واقول لكم شنو الحمام بس بهاللحظه انا فاقده الوعي وابي ارد السرير انام ,,

رديت السرير وفصخت الدلاغ وقلت للسستر تدق على ريلي تطمنه ولا تقول لي لا احنا ما ندق

شوي ولا سستر ثانيه يايه ويايبه ولدي ولافينه بكنبل صغير

ويالله ماما قومي رضعيه ؟!

خذيته منهم وحبيبي نام يمي شكله بررريء عور قلبي

وشوي انام وشوي اقوم

وكل شوي اييون رضعيه ورضعيه ماكو راحه ابد غير صوتهم وصراخهم :/

ليما الساعه 12 الظهر ,,

قلت للسستر ابي تلفون اكلم زوجي ؟ ولا تقول لي في بره واحد روحي دقي؟

:eh_s(10):

عمى نفسياتهم مادري شلون مادري مو معطينهم معاش ولا شنو ؟!

راحت السستر وفي وحده يمي توها والده

مسكينه انبح صوتها واهي تنادي فيهم ولا احد معبرهم مع انهم يقرقون ويسمعون بس يطنشون قطيعه

ليما فراشه يت جان اناديها وقلت لها ماما ييبي تلفون ابي اتصل

ومسكينه راحت يابت لي التلفون ,,

ودقيت على ريلي وقال لي مليت وانا ادق ومحد يرد انتو شلونكم والحمدلله والخ ..

قلت له الساعه 4 بيصعدوني الجناح لانه ماكو سرير فاضي !!!!

حاشني اليوع ؟!

ناديتهم ابي اكل شي يوعانه ؟

جان تقول لي انتي ماكو اكل ؟قلت لها من وين ؟

بس امس تعشيت ؟

جان تقول شنو ؟ :080402ask_prv:

انا : ماكدونالدز ؟

ولا تقول اي بس خلاص ليش جوعان الحين ؟! عن ابو ابليس حسبالي عندها سالفه ..

تميت لي الساعه 4 يوعاااااااااانه وعطشانه وهلكانه وفيني نوم وابي اللبس هدومي لحد الحين هدوم الميانين فيني ,,

قبل ما يطلعوني من الملاحظه ولا يلبسوني لبس ميانين ثاني لونه افتح :/

قمت من سرير الملاحظه لي السرير الي بيودوني فيه الجناج وقعدوني بالممر ؟

ساعه وانا منطوعه بالممر ؟ شفت مالت المطبخ جان اناديهاا ,,

قلت لها انا يوعانه ماكو شي اكل ؟ ولا تقول لي ماعطوج اكل ؟ قلت لاا ؟ ولا تقول ليش حرام ون منت ..

راحت ويابت لي كيكه بتفاح وحليب جزاها ربي كل خير , ,

سديت يوعي شوي مع اني ما اذوق من خشمي وبلاعيمي والكحه ,,

صارت 5 وناطرين وحده من الفراشات عشان يودوني فوق :x

وبعد ما شرفت الاندرغاندي قعدت تقرق بو ربع ساعه جان اقول لها يالله ماما وديني فوق هوزبند ناطرني ؟

ولا تهز براسها يعني اوكي ..

دزتني بالسرير ماكو طوفه ولا باب ما رقعتني فيه :/ وكان معاي سستر ماسكه ولدي ..

ودوني الجناج وحطوني بالعمومي ,, ثواني وريلي معاه جنطتي ودش وراي ..

قال لي شفيه بطنج جذي ؟@@

قلت شفينه @@ جان يقول فاضي :krkrkr: ايــــــــــه وقته ينكت ويستضرف :rgewrg:

وانا غبيه بعد اطالع بطني مع انه مغطى بالكنبل ههههههههه ,

المهم باس راسي وتحمد لي بالسلامه وقعد وقال وين الصغير ؟؟

كان مع السستر وشوي وايبونه ,,

قلت لريلي لو موديني الخاص ارحـــــــــــــــــم مع اني اشجع الحكومه مالت توبه من بعد النوبه :/

قال لي : مو قلت لج .. لما قلت له الممرضه يعني تتغشمر وتقول عن الولد شوفي الكلب اهوه ولا يعصب ورايح يبي يشتكي بس مسكته وقلت له يبه ولدي عندهم باجر يسير خير لما اطلع اشتكي لا يسون فينا شي بليل يمعود ..

يابو الصغير وشافه وباسه واذن بأذونه وطبعا مالكم امل يشيله يموت خوف :/ ..

شوي يات حماتي وبعدها اختي وامي ومازلت بلبس الميانين خذتني حماتي وامي الحمام ابدل والحمام جنج داشه مذبحه خرفان عالدم المطشر والحفاظات الي بكل صوب حتى تحت المرحاض !!


تنادينهم ينظفون جنج سابتهاا !! طلعت حماتي دينار وعطته الفراشه نظفت شوي وبعدين بدلت ..

وبعدين كلمتهم يغيرون الفراش وقالو ما يصير بس الصيح @@

الحمدلله يايبه كفري معاي وبدلته اختي وحماتي

انترس المكان هنود على مصاروه زايرين وكل شوي واحد مبطل علينا الستاره يشوف اذا اهله ولا لاا ..

غير الهنود الي يمي كل شوي طاقين كراسيهم على كراسينا او سرير البيبي .. ماكو غرفه خصوصي وما يصير اطلع بليل :/

يا بوووووووووووي كرهت عمري وكرهت اللحظه الي قلت له خل اولد اهني :x

الحين صار الليل والكل راح , تميت انا وولدي وجدامي وحده مصريه ويمها هنديه ويمي هنديه وتوهم والدين وتقولين قاعدين بمنافسه عالتراييع تكرمون !@@ لوعو جبدي


تعشيت وطبعا ولدي عندي بدلت له وقلت ما اخليه عندهم لو شنوو . طلع اصلا اهم ما ياخذونهم بليل يكونون عند امهاتهم !! يبجي ما يبجي تعبانه مو تعبانه تصرفي مع روحج :/

يعني حتى راحه ماكو للأمهات ,,

صارت الساعه 1 بليل ,, بنت الهنديه الي يمي تحن ,,وتحــــــــــــن ,, وتحـــــــــــــن دزيت مسج لريلي اذا تقدر تطلعني الحين احتمال اشنق بنت الهندجه الي يمي

الهنديه تنادي ,, محد معبر ,, المصريه تنادي محد معبر

انا من كثر ما كنت دايخه نمت وولدي اسم الله عليه يمي ونايم وكل شوي ارضعه وينام اسم الله عليه ..

صار الصبح ,,

مــــــــا ماا ؟! فزيت شنو ؟اكل

انزين شوي شوي راعي يعني جم مره صرقعتوني داشه بيت رعب مو مستشفى !

تريقت ورديت نمت ,,

شوي مــــــــاما !

<< دول مستأصدني بأه !

شنو ؟ يبي بدل فراش ؟؟

انا : لاا ثانكيو ,,

شوي ولا بنت الهنديه هم تحــن وتحن وتحن ؟ جان بنت المصريه ترد عليها وتبجي تبجي

والمصريه تكلم بنتها طب فيه ايه ؟ بتعيطي ليه بلوقتي ؟

انا : بتقول لج والله يا ماما عاوزه ارضع ولا غيري لي البامبرز :bbbiu:

وطبعا انا ناطره الساعه 12 نطاره عشان ارد البيت ..

يه دكتور الاطفال الساعه 10 وفحص الولد وقال احنا بنعمل روتين سونار للأطفال وكتب لي على ورقه سونار وفحص البوسفار وراح ,,

الساعه 11 ونص مر دكتور النساا وقال لي فيه مشاكل ؟

قلت له لا بس النشله والكحه والصداع وبلعوني وعوار بطني وحاسه اني بسخن :/

ولا يقول كل ده ومفيش مشاكل وقايسو ظعطي وحرارتي والحمدلله تمام كتب لي على بلستان لعوار البطت ودوا للرشح والزكام ,,

يه ريلي وكتب لي على اوراق الخروج وكل شوي هابه علينا وحده من الفراشات تضحك من بعيد يعني قطيلي ربع ولا نص :/

لبست عباتي وزهبت الأغراض ويابولي كرسي وطلعت من المستشفى وانا اهلل واييبب :/

طبعا ابي اتسبـــــــــــــــــــح وعرقانه حدي والولد يبيله تنظيف محترم ,,

بالسياره قلت لريلي عن سونار للولد ..

ريلي : ليش ؟ شفيه @@

قلت يقولون روتين ؟

اهو : لا يبه وانا شينطرني الحين اروح طبيب خاص واسويله سونار !

بدون سابق انذار من العدان لي السلام !؟

وانا داخله السلام حسيت اني كنت بدوله فقيره ورديت دوله غنيه لووول

سوينا السونار والحمدلله مافيه الا العافيه ..

وبجذي خلصت سالفت ولادتي الي كرهت عمري اني رجت الاعدام مو العدان بصراحه

طولت عليكم وانا قفلت وولدي بحظني يتنهوص شوي ارضعه وشوي اكتب وبالاخير

الف الحمدلله على سلامتي وسلامت الولد والله يسهل على كل حامل ياارب وتقوم بالسلامه اهي وظناها ولا تفكر تروح العدان عندي تولد بالبيت احسن من هناك خو كله واحد كاني ولدت بروحي وتالي يات لي المحروصه ولا تتحلطم بعد وتسب حسبي الله عليها ,,

وتوته توته خلصت الحدوته اي استفسار او ملاحظه او شي كتبو وبنتظار رايكم .. :eh_s(7):

الحمدلله على السلامه ومبروك ما ياج
أنا كل ولاداتى بمستشفى الولادة وريلى قبل ما اولد يضبطنى بغرفه خاصه
والمستشفى الخاص مو شرط يعنى زين ساعات يبون ياخذون الفلوس وبس ​

 

[engnera]

الحمد لله عالسلامه

 

[ma3boocha]

بتبوووووووتااااااااااااا


ينفع كده يا بت بت

الحمدالله على سلامتج ...


و اذا على الخياط عااادي ان شاء الله .. انا بولادتي الثانيه ما انشقيت ولا تخيطت لان الدكتوره فوزيه القطان كانت متأخره علي... على ما اليست القلووووفز الا البيبي طالع ...


بس البيبي الثالث لا تحسفت الظاهر و خيطت تجميلي عجيييييييييييب خياااطها



و انصحج اذا بتسوين تجميلي تروحين لها خياااطها اينن





و يتربى بعزج المسكين اللي انسب . ههههههه احسه يقووول انا شكووووو تسبيني هههههههههه

 

[ابدا يالغالي مانساك]

مبروك ويتربي بعزكم ولا هذي لووووول االسستر اللي تقووول ستني ستني ههههه هذي بروحها نكته علي كيفها ياله بتكبري وتنسي

 

[مظلومه ياناس]

انا مابط جبدي بالقصه الا بنت الهنديه ،،،،،،، لووووووووول
الف الحمدلله على السلامه ومبروك البيبي

 

[nadoo]

الحمد الله على سلامتج ويتربى بعزكم

 

[miss_whitemocha]

ألف الحمدلله على سلامتج يا حبيبتي و يتربى بعزج شيخ الشباب..

​

 

[دايم على البال]

الله يقطع الحكوووومه ووووووييييع ااارررف

الله يعينج

والحمدالله ع سلامتج وسلاامة البيبي
انا ويااااج

ولدنا قبل بنااات تجمعنا

 

[فـدوه]

الحمدلله على السلامة و مبروك ماياكم :eh_s(17):

 

[فاقده ابوهاااا]

حمدالله على سلامتج يا بعد عمري اهم شي ولدتي بالسلامه وقصتج ذكرتني بعمري يوم ولادتي الاولى بالصباح الله يلعن ابليسهم عذبوني والسستر طقتني لاني كنت ابجي واصارخ حسبي الله عليهم وتلومونا لي رحنا خاص ودفعنا الي ورانا وجدامنا اهم شي الراحه والاهتمام ولا ازيدج من الشعر بيت يوم ولدت خلوني جريب الساعتين مكشوفه بغرفه الخياط علشان الدكتوره دوامها الصبح وانا ولدت الفير تخيلي نطرتها والبرد ذابحني وامعلقين ريولي لي ما الاخت تتكرم واتيي تخيطني ابي تعذيب زياده يخرب بيتهم مستشفياتنا مو لنا حبيبتي حق هالاجانب شوف عيني المصريه والهنديه يعاملونها احسن منا لان السسترات اغلبهم مصريات وهنديات حسبي الله عليهم كلونا بديرتنا