❝❝۞ وأخيرا،،ولأول مرة سفرتي للعُمــرة ۞

[om MaRyooM]

الســـــــــلام عليكم


وأخيرا الحمدلله حققت حلمي ورحت العمرة ..

آخر مرة رحتلها كان عمري 8 سنوات .. يعني ماذكر شي

وحدي مستااانسة لأن كل ماننوي نروح ماتظبط سبحان الله ،، بس هالسنة الحمدلله الله حققلي اللي ابيه


وحبيت اعرظلكم صور السفرة وانشالله تعجبكم او أفيدكم بشي ..
وأوعدكم انه بيكون ممتع :ggdw: :ggdw:

...




أول شي


التاريخ كان: 14-10 على الطيران السعودي
**أول وآخر مرة اروح على السعودية .. مووو شي صراحة الكراسي مو مريحة ومزززعجة الطيارة
بس أكلهم مشالله حلو والstaff وايد بشوشين وخدومين يحليلهم



رحنا أول شي مطار جدة .. ومن جدة رحنا الى المدينة

التذكرة : 136 للشخص مع الطيران الداخلي (اللي اهو من مدينة الى جدة)





وصلنا المدينة الحمدلله ..

شوارعها نظيفة وصغيرة وحسيتها منطقة هادية ومريحة سبحان الله


ولاحظت شغلة بالشوارع تحسررررت ليش احنا ع الاقل مانسوي هالحركة .. شوفوها شلون حلوة :




شرايكم !!

مو خوش تطور والله ،،، اصلا هالشي يخلي الواحد منتبه وتخف الزحمة
انشالله يسولنا نفسهم :dddds: (احسها نكتة لووول) المهم




حجزنا في فندق "دار الايمان" الليلة على 45 تقريبا
وبصراحة الفندق حلوو ومريح وهدوووء ماكان فيه احد عموما بحزتها

وصلنا 10بالليل تقريبا .. وعلى ماوصلنا الفندق الا كانت بحدود ال11 وشي . .
نمنا علطووووول من التعب لأن ترانزيت جدة 5ساعات










والحييين وصلنا الغرفة :








وهذا اكرمكم الله الحمام :





وثاني يوم الصبح قعدنا عشان أروح زيارة لقبر الرسول الكريم كانت من 9الصبح الى 12تريقنا ورحنا

وهذا المطعم اللي كانو حاطين فيه بوفيه الريوق .. وكان لابأس فيه






والحييين المسجد النبوي




أحلى شي بالفندق انه كان علطول ع الحرم .. يعني صوت الاذان قريب حيل والمطل حلو وايد

المكان مريح جدا سبحان الله .. والشعور عند قبر الرسول أحلى وأحلى



،،،،


نطـــروني في صـور "مكــــة المكــرمة"​

 

[om MaRyooM]

"مكــة المكرمـــة"


ثاني يوم رايحين لمطار المدينة عشان نروح جدة ونعمر ..

صعدنا الطيارة وكان الطيران الداخلي أحلى وأنظف بواايد من الطيارة الدولية ..

وهذا المنظر للكعبة من الطيارة :



المنظر بالطبيعة حلوو بس شوي الاظاءة بالكميرا مو شي



وعقب ماوصلنا خذينا تاكسي من مطار جدة عشان يودينا مكة .. خذا منا 120 ريال ومشالله عليه مااسكت طول الطريج لووول

وصلنا الفندق وحجزنا على "بــرج زمـــزم" وكانت ليلته على 40 تقريبا بس مو الغرفة المطلة على الحرم


وهني مدخل الفندق من مركز ابراج البيت:





وهني ممر الغرف .. كنا في الدور 17 وظغط الاصنصير مزززعج ماحب الظغط عاد






دشينا الغرفة وأخيييييييييرا" :ggdw:






حطينا الجناط وعلطووول نزلنا نعمَـر .. وكان منظر الكعبة شي خيااال

مادري شلون صاير هالشعور حده قوي

ظليت دقايق وانا واقفة مصدومة !!!! متنحة !!! مو قادرة أسوي أو أقول شي !! مو قادرة حتى أفكر و ربي !!


فماقدرت أمسك نفسي .... بجيت من قلب
منظرها روعة يسوي رهبة بالقلب وبنفس الوقت راحة نفسية والله





والحين ،، ثاني يوم قعدنا متأخرين ونزلنا علطول عشان نصلي معاهم الجمعة وعقب تمشينا بالسوق واشترينا جم شغلة ..

صار بالليل صلينا خلصنا فقلنا نتعشى

قررت انا نتعشى نفس الناس .. نبسط بالارض وناكل :gathering: ،،، بس كان وناسة والله

بسطنا هني :



وأول مرة اقعد بمكان جذي على الارض وآكل لوووول .. تخيلت لو بالكويت نسويها ،، يا سلاام يحطونا بالوطن أصلا لووول



وطلبنا من مطعم kudu اللي تحت فندق دار التوحيد يعني قبال الحرم




أكلهم حلو والله ونظيف حسيته...


وثالث يوم نفس الروتين تقريبا صلينا بالحرم ونرجع للسوق نتسوق وناكل


بالنسبة للمجعات والسوق في مجمع داخل الفندق اسمه ابراج البيت . . قريب بعد على باجي الفنادق نفس دار التوحيد وريتاج و ابراج الصفوة وهلتون ..

عبارة عن 5طوابق وايد حلو وفيه كلللل المحلات .. وآخر دور يديد حاطين في بيتزا هت وبرجر كنج وكنتاكي وهالسوالف

ومن هالمحلات: الشرقية، الحلوة، بدي شوب، صيدلية، القرشي، اصغر علي، جنيد، مذركير، نكست، ألدو، ماك، دبنهامز، الرصاصي، قزاز، ناعومي

ولاحظت شغلة بناعومي : أول مادخلت جان الاقي رياييل يبيعون !!! انصدمت

شدعوااا يعني الحين متشددين على كل شي ومخلين رياييل يبعون بمحل قمصان نوم؟؟؟ مو منطق!
حتى لو ممنوع المرة تشتغل بس ع الاقل اييبون من الجناسي الاسيوية تشتغل بجذي محلات !!

عاد دشيت وانا ادور جان واحد يقولي هذولي مسوين عليهم عرض قميصين بالسعر الفلاني..يعني ميني شورت مع بلوزته والثاني يكون قميص!!!! @@@ أمبي واا فشلاااتهجان انحاش،، ماحب صراحة ريال يقعد يطالع ويتكلم بهالاشيا

وووو بس .. هذا الشي اللي خلاني انصدم




والحين هذا المجمع :




وهني لما تغدينا آخر يوم في برجر :





والحين خلاااص عمَـرنا وخلصنا واستانسنا وتسوقنا وبنرد الديرة

وهذا العامل شايل اغراظنا يوديهم التكسي:





ووصلنا الكويت بخير وسلامة ..


ووووو نطروني .. بوريكم مشترواتي .. ​

 

[غــ q6r ـلا]

الحمدلله على سلامتج حبيبتي

وعمره مقبوله

وان شاء الله تكون لج عاده كل سنه تسوينها

 

[om MaRyooM]

" مشتــرواتي "





الحين بوريكم مشترواتي .. يمكن تستفادون منهم بشي وتقلدووون :eh_s(6):

اول شي لما وصلنا المطار وبنروح المدينة شفت هذيلي وعجبوني :



كتاب اسمه لاتقع فريشة لزلة لسانك للحين قريت نصه .. مفيد شوية
سيديات القرآن الكريم .. حييل حلو ومقسيمن فيه الاجزاء..كل جزء بسيدي خذيته ب50 ريال تثريبا يعني 4دنانير
زهورات ونعناع .. صج رهيبين اليوم بطلت النعناع مشالله ريحته قووووووية .. العلبة على 20 ريال



ومن مركز ابراج البيت شريت من جنيد دهن عود "الحضارة" ايننننن وايد حلو
على 100ريال يعنييي 9دنانير جنه .. ويستاهل اكثر والله






ورحت قــــزاز شريت منه جم شغلة


خذيت البخور اللي البنات تكلمو عنه . . الكيس ب120 ريال
وخذيت الكحل لون اسود واخضر وازرق.. حلوييين ورخاص.. خذيتهم الثلاثة ب40ريال يعني بحدود ال3دنانير ونص !



^
^
وهالكريم اللي شايفينه ع اليمين هذا مدحولي ياه للبقع اللي بالايد .. الكريم امريكي وكان بحدود الـ 18 ريال وقلت اجربه لأن ايدي عجزت مالقيت لها حل من يوم ماولدت بنتي وهالبقع فيهم !!!


هني عن قريب:






وووو شريت هذا من أصغــر علي ..

بخور حلووو .. ينفع للاستخدام الخفيف واليومي على 50 ريال





وهذي المجموعة من "الســرتي" والعلواني



اللي ع اليمين مرشوش حلوووووو وايد وايد من العلواني اسمه أنانيـــا
واللي على اليسار من الســرتي .. عطر معالي وحده مدحته لي هني وعاد صج عجبني ريحته حلللوة ورخيص على 38 ريال ..
وبخور الورد الطائفي .. ودهن عود "الخلطة السعودية" حيل خفيف وحلو .. ينفع للبيت يعني



وبالنسبة للشيلات ماخذيت وايد غير واحد من الشرقية وواحد من رداء الفخامة:




وأنا مارة بالسوق جان أشوف عباية صغيروووونة .. قلت لا لازم اييبها لمريومة ..
امبي هالعباية شكلها يظحححك تلبس بو 5اشهر جذي .. شوفو شحلاتها بس الصور ظالمتها والله :



تينن .. لوووول اول مرة اشوف عباية جذي حجمها !!





وووو بالنسبة للتمور وهالسوالف يبت من "العلــواني" لأن أحلى شي معمولهم مشالله ترف ولذييذ..والتمر عنده ماإييب الحارج :eh_s(1):



يبت من عنده القهوة العربية اللي مع زعفران .. اليوم جربتها مشالله لذيييذة
ويبت معمول بالتمر .. وتمر العجوة

وبالنسبة للصوايغ يبت لكل واحد من الاهل معمول بالتمر من نفس المكان و ماي زمزم طبعا ووووبس





وسلامتكم ..
انشالله أكون أمتعتكم بتقريري الممل :eh_s(6):​

 

[بحر هادي]

عمره مقبوله اختي..

وتقرير حلوو

وبالنسبه لانه رجال يبيعون بمحلات الملابس اللانجري..احنا متعذبين منها..وخصوصا لاجاك واحد وقح وقال اجيبلك مقاسك..
اليوم اللي الوحده تدخل هالمحل لازم تكون ماخذه جرعة شجاعه فهاليوم عشان تتشجع تروح تشتري منهم..يقطع ام الحاجه

 

[om MaRyooM]

ما ومنكم حبايبي . .


*بحر هادي*

اي والله لازم جرعة شجاعة .. اصلا شي مقرف والله

مشكورة ع المرور اختي

 

[Hambka Q8]

ماشاء الله

عمره مقبوله ان شاء الله و تقبل الله طاعتكم

اخر مره رحت العمره قبل سنه

و حدي مشتهيه اروح العمره السنه بس امي و خواتي مو راضيين خايفين من انفلونزا الخنازير-_-

و عليج بالعافيه المشتروات
كل اللي يروحون العمره يشترون هالاشياء ههههه (ملافع من الشرقيه و ماي زمزم و بخور و دهن عود من جنيد او اصغر علي و تمر و معمول)

 

[دلوعة روحي]

عليج بالف عافية

انا اخر مرة رحت العمرة كان عمري 5 سنين بعد

الله يكتبها ان شاء الله لكل مشتاق لبيته الكريم

مشكورة على التقرير و الصور

 

[جننها السعودي ]]

عمرة مقبوولة ان شاء الله ..
مشتروآتك حلووة وذووق بالعآفيية عليك
اما ع الطيرآن صـآدقة الطيرآن السعودي الدولي مب مرييح ابداً
بس الحين الطيآرات الجديدة صرآحة شيء ثانية مرآ مرآ مريحة
والصوور مرآ واضحة وحلووآ
يسسلمو حبيبتي ع التقرير

 

[& ام سلمى &]

عمره مقبوله وتقبل الله طاعتج ياقلبي

 

[ام فجور 2008]

عمرة مقبولة عاد انا ميته وانا اروح لها

 

[آلمغرورة]

عمره مقبووله والله يرزق كل بنات المنتدى عمره وحجه كمان

وعجبتني مشترواتك تتهني فيها ياارب

 

[om mishaal]

عمرة مقبولة إن شاء الله الصور حلوة جدا
شوقتيني كثير أرد للعمره مرة ثانية باذن الله
يعطيك العافية

 

[aengineera]

تقبل الله ^_^


الله يرزقنا عمرة ان شاء الله

 

[شارابوفا]

مشكورة اختي والله شوقتيني للعمره
ان شاء الله السنه اليايه اروح

 

[مشرومه]

الله يتقبل اعمالج
والحمدلله على سلامتج
شوقتيني وااااااااااااااايد اني اروح بعد .. لانه صج راحه نفسيه مو طبيعيه لمه تشوفين الكعبه شرفها الله ومسجد الرسول صلى الله عليه وعلى اله وسلم ..
عليج بالعافيه

 

[miss-one]

تقبل الله طاعتج

 

[Forever & Ever]

تقبل الله طاعتج

وعليج بالعافيه اغراضج حلوه

الكحل اللي من قزاز ماركته قزاز ولا شي ثاني

وجربتيه زين

ان شاء الله بروح الاسبوع الياي

 

[om MaRyooM]

مشكورين حبايبي .. منا ومنكم انشالله

و الله يرزق كل وحدة ودها تروح

 

[om MaRyooM]

تقبل الله طاعتج

وعليج بالعافيه اغراضج حلوه

الكحل اللي من قزاز ماركته قزاز ولا شي ثاني

وجربتيه زين

ان شاء الله بروح الاسبوع الياي

هلا ياعمري ... الله يعافيج مشكورة

وبالنسبة للكحل ماركته قزاز و جرته حلو والله .. خصوصا الملونين وايد حلوين ولونهم وااظح

و عسى الله يتقبل منج مقدما