تجمع اولياء امور مدرسة الخليج الانجليزية في السالمية

[mr000]

سلام أمهات اشلونكم.. باونتي الله يوفق وليدج ولاتحاتينه ان شاءالله ماكو ألا العافيه!

 

[باونتى]

ولدي بالريسبشن صار له شهر يرجع بالباص ماودي بس مضطره عشان ظروف دوامي تغيرت بس الحمدلله الوضع عادي الله الحافظ وفيه ناني معاهم بالباص وتنزله لين باب البيت بس الافضل وايد ان انتي او ابوه تروحون تاخذونه عشان تقدرين كل يوم تسئلين التيشر عنه وهيا إذا عندها أي ملاحظه عنه تقول لج نفس اليوم إذا مستانسه منه او بالعكس متشاغب وترا لو اضطريتوا انه تخلونه بالباص عادي لان اي شي صار أو بيصير عندهم دفتر يكتبون فيه ملاحظاتهم وانت كذلك إذا تبين شي كتبيه وبعد يوزعون اوراق تنحط بالفولدر ماله عن اي نشاط بالمدرسة ولاتحاتين ترا الأمور منظمه ومساعدات التيشرز بنفسهم يوصلون من الصف لين الباص ويطلعون قبل زحمة الشارع

مشكووووره حبيبتى وما تقصرين .. وأنا بخليه بالباص لان مدرستى بجنوب السره وبعيده عن السالميه ..

 

[الفرسان الثلاثة]

إذا تنزلين من جنوب السره على الدائري الخامس وتدشين السالميه من دوار الجوازات حده سهالات طريج مفتوح وماياخذ وقت جربي على يوم وانتي وراحتج

 

[ملكة بيتها]

سلام أمهات شلونكم
اليوم وزعوا أوراق حجز المقعد بيبدون من باجر
وأمس وزعوا البروشور للكتب والقصص فيه شغلات حلوه لعيالكم

 

[الفرسان الثلاثة]

احب آخذ القصص اللي ايي معاها سي دي عشان احطه بالسيارة حق عيالي وانا جني مستانسة اكثر منهم وعلى التسجيل باجر ما عطوننا ورقة زين ان قلتيلي مشكووورة ملكة

 

[ملكة بيتها]

الفرسان أن أسوي جذي وأحرص أشتريلها سيديات قصص عشان تسمع القصه وتتعود على السماع باللغه الإنجليزيه عشان تستوعب في المدرسه من التيشر وهم تكتسب الأكسنت

 

[روحي تحب]

امهات شلونكم وشخباركم ....والله اشتقلكم وايد وولهت على التجمع وعلى التواصل معاكم

ملكه بيتها .... مروو....الفرسانال3 ...ام مشعل ....عزيزتي ....زوزو بشروني عنكم انشاء الله كلكم وكل الامهات بخير يارب
والشر ما اييكم ياالغاليات والحمد الله على كل حال

باونتي ....حياج الله ويانا

وامهات year1 شالاخبار والله بنتي مسكينه آنا كلش هالفتره هاملتها ( الشكوى لله ) غصبن علي والله بالنسبه للشخصيه بنتي قالتلي كلهم يبون يلبسون أيس كوين ما ادري ليش مافي افكار ثانيه يمكن كل الامهات نفسي مايعرفون اي شخصيات ثانيه وللاسف آنا بنتي ماوزعت التيشر اي ورقه علشان تحدد الشخصيات مثلا ولاني عارفه مثل شنو اي قصص علشان يمديني اجهز ومايصير الكلاس يصير كله آيس كوين ما ادري اذا عندكم افكار مثلا اي قصص او اي شخصيات يقصدون واللي يعافيكم تراني حدي متوهجه

وبصراحه التيشر كلش ماتتحاجى قبل اسبوعين بنتي ضاعت منها ورقة السبلنج وقلتلها قولي حق التيشر تعطيج كوبي قام ولدي وقال حق التيشر قالت اوكي اشوف لها كوبي بعدين بالكلاس بنتي تقول قالت لها

its not my bisniss its your spelling not mine وبعدين قلتلها ماعليه المدرسه تبي تعلمج انج تصيرين حريصه وبالفعل ماعطتها كوبي.... وقمت خذيت الكلمات من رفيجتها بس تضايقت وقلت بروح اكلمها المفروض ماتكلمها بهالطريقه بس للاسف زوجي مارضى يقولي لاتحط عليها ...آنا موهامني بصراحه آنا الحمدالله عارفه مستوى بنتي قوي بس بنتي كانت مصفوقه من ردة فعل المدرسه وبصراحه ماخلصنا من سالفة اللي تحط عليها دايما اسمعها عن مدارس الحكومه وهذيل اجانب وبالذات البريطانيين لانهم وايد صارمين وناشفين فعندهم عادي يكلمون الطلبه بهالطريقه بس مرات الياهل يصير حساس آنا شفتها يومتها كسرت خاطرتي لما قاعده تقولي شلون كلمتها بعصبيه

عدت السالفه على خير بس صار نفسيا ماني خلق آخذ واعطي وياها وايد حتى بسالفة الشخصيات قلت اسالكم انتوا بالاول تالي اسالها

قرقت عليكم وايد تحملوني يالغاليات ومشكورين مقدما

 

[زوزو الحلوه]

حياج الله روحي تحب عسى ماشر طولتي الغيبه حبيبتي ولا يضيق خلقج صج انه انا عندي ولد بس كاتب كل لستت الشخصيات البنات والاولاد ماقصر حبيبي شفتي فادتج الgsji اللحين ....
حبيبتي شوفي اول شي عندج ice queen ماتبين والله صاجه اذا الكل بيسويها لاتسوينها انتي اوكي
عندج snow fairy حلوه ترى فكرتها على بنوته :rerrerek:
عندج الي يصير شراكه بنات وصبيان ...... على قولت ولدي..
snow flake....penguin
يمكن يصير الskier والله مادري انتي وحركاتج والباجي ماينفع بس بحطهم كافكار seal>polar bear<whale
والله المستعان انتي شوفي شنو تقررين واحنا نساعدج انشالله وسامحينا على القرقه واذا فيه بدليات

 

[روحي تحب]

حبيبتي زوزو مشكوره ياقلبي ...الشر ما اييج يالغاليه والله غبت عنكم غصبن علي لاسبابي الصحيه بعيد الشر عنج وعن الكل
وماقصرتي يالغاليه وانشاء الله بخليها تقرر وتشوف اي شخصيه تبي وتالي يتمم التنفيذ والله يعينا وحبيبتي ماقصرتي كفيتي ووفيتي
ماتقصرون كلكم هذا العشم فيكم والله ...واذا على القرقه مو كثر قرقتي ههههه بس والله سوالفكم وقرقتكم احلى قرقه والبدليات احلى بدليات

وانشاء الله بنتواصل على طول الله يقدرني ويشافيني ويخليني اتواصل معاكم دوم ويشافي كل مريض يارب

 

[ملكة بيتها]

هلا روحي تحب شلونج يالغاليه بالنسبه للشخصيات ترى التيشر كاتبتهم على البورد واليهال ناقلين في ورقه أنا لما طلعت بنتي من الصف اليهال كل واحد بإيده ورقه واللي كاتب وتارس الصفحه واللي نصحها والله حسبت كاتبين ستوري ولا شي وبنتي كاتبه عشر شخصيات بس لما سويت سيرج في النت وطلعتلها الشخصيات عجبها الice queen وخبرج البنات بعدهم صغار ويحبون هالسوالف ..إنتي سوي سيرج وإختاري بتلاقين سوالف حلوه وأفكار والله يسهل لج
وما تشوفين شر يالغاليه

 

[mr000]

سلام أمهات اشلونكم...روحي تحب الحمدلله على سلامتج وماتشوفين شر!!

 

[باونتى]

بنات شلونكم .. انا رحت قدمت الاوراق ودفعت رسوم حجز المقعد وكانت معاى ولية امر بتقدم اوراق ولدها وكانت معترضه على دفع الرسوم قبل المقابله بس قالوا لها هذه سياسة المدرسة عاد انا سألت السكرتيرة غاده قلت لها مدام دفعت الرسوم اكيد ان شاء الله تقبلون ولدى .. قالت لا تحاتين واحتمال نتصل هالشهر ونحدد لج موعد المقابله والله يسهل ان شاء الله .

 

[mr000]

باونتي حبيبتي لاتحاتين ان شاءالله ينقبل ولدج..أقولج بنت أختي انقبلت بالريسيبشن وهي يايه من روضة حكومه ماكو مشكله ان شاءالله!!

 

[باونتى]

باونتي حبيبتي لاتحاتين ان شاءالله ينقبل ولدج..أقولج بنت أختي انقبلت بالريسيبشن وهي يايه من روضة حكومه ماكو مشكله ان شاءالله!!

ربى يريح بالج مثل ما ريحتينى

 

[mr000]

ملكه وينج..العاده آنا وأنتي وليالي اللي مهمتنا نطفي الليتات ونسكر البيبان بالتجمعات كل ليله...

 

[الفرسان الثلاثة]

مرو شخبارج شكله دوري اطفي الليبتات وياج

 

[ملكة بيتها]

لا لا وألف لا أنا اللي راح أطفي الليتات تخصص ههههه
شلونكم مروو والفرسان وباجي الأمهات

 

[ملكة بيتها]

اليوم حده المنتدى مصخها وايد بطيييييييييييء

 

[الفرسان الثلاثة]

الحمدلله انا بخير صج وايد بطيء من أمس مادري شالسالفه

 

[lyale]

هههه صدتكم شلي مقعدكم يلااا نووم وانا بطفي الليتات اليوم