- إنضم
- 18 سبتمبر 2009
- المشاركات
- 13,224
- مستوى التفاعل
- 1
- النقاط
- 0
مشرفة القسم ( snow angel )
قوة بنات شلونكم...؟ :eh_s(21):
اليوم حبيت أقدم للحلوين حلى مثلهم...
طبعا مايحتاج بالكويت حدنا بوهبة وبما ان الكل هاب بال red velvet cake
فحبيت أحطلكم طريقتي المجربة والخطيرة بشهادة كل الي ذاقوها وأحلى من كل الكافيهات الي كليناها فيها وطبعا لأنها على الطريقة الأصلية ..
طبعا أنا كنت مخزنة الوصفة عندي من زمان بس كان ناقصني بالأغراض جبن الماسكربوني ودورته ولقيته بمركز سلطان العلبة بدينار و760 فلس وهي الي بنحتاجها الي تكون 240 غرام...
الكيكة حلوة وخطيرة وكفاية إنها بره تنباع ب18 دينار...وحتى مايحطون الجبن الماسكربوني..فليش مانسوي شي على أصوله والأهم إن من شغل إيدنا...:rerrerek:
طبعا هذي 2 مرة أسويها وحبيت أحطلكم الصور وتشوفون النتيجة...طبعا كل شي تمام والطعم يمي يمي بس التزيين لكم عليه بس عالعموم هي تقريبا جذي طريقة تزيينها..
يالله نبلش..
الصورة آخر الموضوع
مقادير الكيكة :
2 ونص كوب طحين المطاحن
2 ونص ملعقة أكل بيكنغ باودر
2 ملعقة أكل كاكاو بودرة
نص ملعقة وسط من الملح
نص كوب زبدة
1ونص كوب سكر أبيض
بيضتين كبار
1 ملعقة وسط فانيلا
1 كوب لبن ( أنا حطيت كوب روب وذوبت فيه شوية ماي خليته ثقيل حيل مو لبن خفيف )
2 ملعقة أكل لون أحمر سائل ( صبغة الكيك )
1 ملعقة وسط بيكربونات الصوديوم
1 ملعقة وسط خل أبيض
مقادير خلطة الجبن:
220 غرام جبنة ماسكربوني
220 غرام جبن كريمي ( كيري أو فيلادلفيا أو أي نوع متوفر حتى لو جبنه قلاصات بس تكون سميكة مو سائلة مثل كرافت ومالحة )
كوب سكر مطحون
ثلاث أرباع ملعقة وسط فانيلا
كوب ونص كريمة مخفوقة
الطريقة:
بصحن تنخلين الطحين وبعدها تضيفين عليه البيكنغ باودر + الملح + الكاكاو البودرة ..ونخليه على صوب
بالخلاص نحط السكر والزبدة ونخلطهم شوي بو دقيقة ونص بعدها نضيف الببضة الأولى ونخليها تنخلط وبعدها نضيف الثانية وعلى طول نحط الفانيلا فوقهم ونخليهم 3 دقايق لي مايصير الخليط الي عندي كثيف وكريمي..
بعدها نطفي الخلاط ونجيب اللبن ونذوب فيه الصبغة الحمرا لي مايتجانسون ويصير لون اللبن أحمر ..ونجيب عاد خليط الطحين ونبلش نظيفه بالتدريج مع اللبن الأحمر..نبلش بالطحين وننتهي بالطحين ..الطحين نقسمه 3 أجزاء أول مرة طحين بعدين لبن أحمر بعدين طحين بعدين لبن أحمر بعدين طحين..وبس نخليهم يتجانسون عدل بالخلط وبالقفشة نتأكد إن كل الخليط إنخلط عدل ومافي شي لاصق بقاع صحن الخلاط..
بعدها نجيب بيالة جاي فاضية ونحط داخلها بيكربونات الصوديوم ونضيف عليها الخل وبسرعة وهو يفور( راح يصير فوران) نضيف على خليط الكيكة ونرد نشغل الخلاط ونخلطهم عدل لي مايتجانسون..
الحين يكون الخليط جاهز ..أنا جبت 3 قوالب وحطيت عليهم ورق زبدة المشمع وقسمت الخليط ل3 أجزاء وصبيته بكل قالب شوي يعني بالنظر مو شرط بالتساوي حيل ..وطبعا الناس بالروفيشنال يقصون الكيكة 3 أجزاء بس صراحه راح تتفتت لأنها حيل أسفنجية..أنا حيييل درت بالي وأنا أقلب الكيكة من القالب وأشيل الورق المشمع لأن بأي لحظة ممكن تتفتت وتنكسر من فوق فخليكم حيل حريصين...
طبعا الفرن يكون مشتغل وحامي من ربع ساعة والأهم النار مو عالية على 180 درجة لي 200 وطبعا أول ربع ساعة لاحد يفكر يقتح الفرن عشان الهوا لايدخل وماتنتفخ الكيكة وتخرب..وهي بسرعة راح تستوي يعني بو 20 دقيقة أو أكثر شوي لأن الكمية متوزعة على 3 قوالب مو بقالب واحد..
وبعد ماتستوي نطلعها ونخليها لي ماتبرد بره على الراحة بو ربع ساعة..
نجي الحين لخلطة الجبن :
أول شي عشان تضبط الكريمة المخفوقة نخلي صحن الخلاط الي بنخلط فيه الكريمة بارد..أنا أحطه بالفريزر وبعدها أحط اكريمة السائلة فيه وطبعا نخلطه بسرعة عالية لمدة 4 دقايق..
( هالمرة ماكان عندي كريمة سائلة فجبت ظرف دريم ويب وبعد ماطلعت الصحن من الفريزر جبت نص كوب حليب بارد وحطيت عليه ظرف البودرة وشوية فانيلا وخلطتهم وطبعا طلع نفسه قمت ودخلت الخليط الثلاجة عشان يتم بارد ومتماسك)
بالخلاط الثاني كنت خالطة الجبن مع بعض والسكر المطحون والفانيلا ونصيحة لما تحطون الجبن طلعوه من الثلاجه وسيده على الخلاط لاتخلونه يحتر عشان الخليط لايخرب ويصير سائل وهالمشكلة واجهتها بأول مرة وعلى طول أول مايمتزج الجبن مع بعض يعني بو نص دقيقة طفو الخلاط وحطوه بالثلاجه عشان يظل بارد...
..نجي لطريقة التزيين
جيبو خليط الجبن وضيفو عليه تقريبا 4 لي 5 ملاعق من الكريمة وأخلطوه بصحنه لي مايتجانس ويظل ثقيل نوعا ما ويثبت على الكيكة مايسيل..
نجيب أول طبقة ونحطها بالصحن ونوزع عليها جزء من خليط الجبن..وبالتدريج لي مانخلص الثانية ونظيف الطبقة الثالثة بعدها راح ينقص خليط الجبن فنظيف عليه من الكريما شوي لي مايسويلنا كمية حلوة نقدر ندهن فيها القالب من بره على كل جوانبه ونزينها بجوز الهند المبشور..أو أي نوع زينة..ممكن لوز مبشور الجاهز..
ونظف الصحن على طول وندخله الفريزر ( نص ساعة أو أكثر لوكنتو بتاخذونه حق أحد بره البيت)لو كنتو مستعجلين أو بالثلاجة لو كان فوق الساعة ونص ..
وبس ياحلوين بالهنا والشفا وبالعافية وأتمنى تعجبكم..
وهذي صورة الكيكة طبعا الصحن مآساة بس لأنه يتسكر من فوق كنت ماخذتها بيت أختي فعادي..
وهذا رابط you tube فيه طريقة تزيين الكيكة ولاحظو إن الكيكة عندهم حيل متماسكة مو إسفنجية نفس الي بوصفتي..
http://www.youtube.com/watch?v=nqIGIXN972M
وبس عاد الله يعينكم على خبصة المطبخ وغسيل المواعين طبعا أنا كل شوي مطلعة قفشة..:dfgl:
وبس أتمنى تسوونها وتظيفون تجبرتكم بالموضوع..وأنا حاولت أستخدم أسلوب مبسط حيل وشرحت أشيا كثير منكم يعرفها بس قلت للبنات العليمية الي مايدشون المطبخ كل 10 سنين مرة وودها تسويها فحطيتلها كل التفاصيل ..
وأتمنى مجهودي يعجبكم...:aha:
التعديل الأخير:
