ماجلة البيت .. ذوات الخبره help

[مناير خزنة التاير]

:eh_s(17):السلام عليكم :eh_s(17):


كويتيات شخباركم ؟؟

بصراحة بقولكم مشكلتي اهي يمكن تفشل ويمكن ما تحتاي بس من صج محتاره
عيزت ابي دبره

قلت مالي الا كـــو 911 تيـــات

السالفة يا طويلات العمر

انا ساكنة بيت حمولتي اوكي .. اوكي
يعني غدانا معاهم و مرات نحتاج نطبخ عشا او غدا متاخر فهمتوني

بس ياربي ما اعرف الاشياء الاساسيه اللي لازم تكون موجوده بالمطبخ حق الطوارئ
اعيز اشتري و النعمة تنقط تنتهي مدتها و اقط
واذا ما شريت ساعات اتوهق يعني نبي شي سريع حزة الحزة

شوروا علي شسوي ؟؟

يعني لو بسوي اكله معينيه ولا سلطة

شلون اجيل الثلاجة اسبوعيا ؟؟ ولا يوم بيومه ( بس مو حاله كل شوي بالجمعية )

قولولي علموني

 

[مناير خزنة التاير]

up up

 

[كويتيه رزتها ملكيه]

لووووووووووول انتى جنج اختى مسكينه ماتعرف تشترى للماجله 00شوفى حبيبتى اهيا على المشتهى وشنو ذوقج انتى وزوجج بالاكل
اذا على السريع اشترى المقالى من الجمعيه او مركزسلطان النجتس والشبس والهمبورغر واللازانيا مالت ساديا لذيييييييييذه الكبب بانواعها والسمبوسه بانواعها والفيليه برجر وفى اكلات تبى تسخين بالميكرويف ترى هالشغلات تطول بالسنه بالفريزر وماتخترب

اما الشغلات الفرش مثل الاجبان والمخللات والخضره والفواكه اشتريها بكميه اسبوعيه حق الريوق والعشا 00ولاتنسين البيض والباستا عادى مالها مده صلاحيه 00مع التعود بتعرفين الى الماجله الاسبوعيه والى لها مده صلاحيه قصيره والى تطول اكثر خليها ماجله كل شهر

 

[بحرينيه موووت]

انا مثلج مافهم بالهسوالف وساكنه بروحي


والله لايرويج يمكن كل مده اقط شي من الخضره او المعلبات ساعات تنتهي مدتهم وانا ماستخدمهم

وانا قلبي وايد معروني اقط النعمه بس شاااسوي

بس انتي شتري شي حق اسبوع يعني الخضره مثل الطماط والفلفل والخ...

وانا امي علمتني طريقه ان اخذ البقدونس او الكزبره حتى الثوم ويصير اسهل لج بعد افرهم ناعم واثلجهم يعني كل مابي اخذ شوي منه واكون جي وفرت ولا اخترب علي هههه

وانشاء الله اكون فاديتج

 

[شيــوخه]

السلام عليكم

انا صراحه عندي الخضرواات احب اشتريها اسبوعيه الخيار البقدونس الطماط الثوم والشغلات هذي
ومن ناحيت الهمبرغر والشغلات هذي ماتخرب بلفريزر حطيهاا والخبر حتى اشتري اشوي لانه لا طووووووول يصير يا بس
والصمون الشغلات الي مدتتها اربع ايام وجذيه لا تكثرين منها والخضراء والفواكه حلاتها اسبوعييييه
وان شاءالله البنات فادوج

 

[De3La^85]

واااي جنج انا حالتي حاله مع المااجله !!

بس مثل ما قالوا البنات البيرغر ووو البطاط وهالسوالف اهيا الي تنقذ الموقف حطيلج بالفريزر بيرغر دياي ولحم وو جكن ناقتس وووو اشتري مرتديلا ولبنه وزعتر

وتقدرين تسوين كبب و ورق عنب وبيتزا كبيره او صغار وطبخيهم وفرزنيهم ( حطيهم بالفريزر )

واذا عالفاكهه والخضرا ولله اني اشتري حبتين برتقال وتفاح وفلفل اخضر واحطهم بالثلاجه واذا ما كليتيهم قصيصيهم وسوي سلطه سريعه ونزليهم معاج بيت جمولتج ولا يعفنون وينقطون

عاد انا هالايام هابه اشتري خس بانواعه وجزر وفجل واقطعهم واحطهم بجياس نايلون وبالفريزر ! مادري عاد يصير هالحكه ولا لأ كودتهم وحليتهم مادري اشصار عليهم الحين لول

 

[اطياب طيبه.أم عبدالله]

حبيبتي لازم تكون عندج ماجله منعزله خاصه فيج انتي

ايام اول كان الاكل اييني من بيت اهل زوجي بس مرات تكونين مو مشتهيه اليوم تاكلين هالأكله مثلا طابخين لحم وانتي مو مشتهيته

ضروري تكون الاساسيات موجوده عندج بالبيت على اساس لا تتوهقين

انا حاليا طايحتله بشركه ماجله وطلبات وتوصيل ادق عليهم اييبون لي طلباتي للبيت هذا طبعا اذا كنت مشغوله وما اقدر اطلع بس غالبا انا احب اروح اتشري اللى ابيه

انتي مو خسرانه شي اذا عندج العيش ودياي ولحوم وسمج بالفريزر ترا صلاحيتهم طويله يتمون 6 شهور وسنه وفوق بالفريزر وما يحوشهم شي

بالنسبه للسلطات ترا لو بتفكرين فيها ترا اسعار الخضار رخييييصه وهم الفواكه اول كنت اييب بالكيلو بس الحين ماشاء الله العايله اكبرت وزادت الماجله

 

[<<لمار>>]

مثل ماقالو البنات المثلجات تطول واخذى الاحجام الصغيرة والتوست والخضرة والفاكهة والاجبان خليها اسبوعى

 

[غلاتي الكويت]

uppp

نفس الحاله

 

[لي لي الحلوة]

مرحبااااااااااااااااااااااا

يسعدني ارد على موضوعج

اناااااااااا نفس حالتج


بس ما يأست

قعدت افتر بالمنتديات الين لقيت الحل من وحدة من الخوات

اول شي العصير والشبس والكاكاو والبسكوت موجود على طول

شغلات الثانية شريت للمطبخ قلاسات ماي ودولكة

عدد2مقلى

عدد2قدر
وصينية3
وطقم صحون

قلاسات حليب
استكانات شاي
غوري

وجبت من مركز سلطان اكياس نايلون لحفظ الطعام

وشريت كيلو طماط وفلفل بارد وبصل وثوم

وقطعتهم وحطيتهم باكياس وبعدها بالفريزر

وشريت جميع البهارات وعلب لها
كركم- بهارات دجاج- لومي اسود- فلفل اسود- دارسين- ملح - سكر- ورق شاي

وشريت الاغراض
كرتون بيض

2معكرونة
خمسة كيلو عيش
خبز
نغتس دجاج
دهن
زيت زيتون
زيتون
لبنة
زعتر
بيض
جبنة المراعي قلاس
ماينيز
جبن شرائح
وبسسسسسسسسسسس


اي نسيت 2دجاج وغسليهم ونظفيهم وقطعي كل دجاجة اربع قطع

وحطيم باكياس كل قطعة وبعدها بالفريزر
2شوربة ماجي

واتمنى قدرت افيدج من الالف الى الياء

 

[حروف من ذهب*]

الي لازم يكون بالثلاجه الهبرجر والنقانق والبطاط والدجاج والصمون والخبز والخضره تشترينها اسبوعيه

 

[مستقبل]

نفس الحاله بس انا مشكلتي ماعرف أقلي شي ، اخاف من الدهن يطشر و يحوشني

الاشياء اللي دايما عندي


برجر بالفريزر (اسويه بدون دهن)

اندومي

بيتزا ساديا

دجاج تكا من شركه الكبير تهبل هالشركه عندهم وايد اشياء مثلجه برياني و جذي سوالف اخذ منهم مجرد تحطينه بالفرن و طعمهم حلو


باستا

صلصة الباستا اخذ ماركة العلالي عندهم انواع صلصات شي بالمشروم و شي بالزيتون و غيره ، عاد اسلق الباستا و اصفيها من الماي و اخلطها مع الصلصه عالنار شوي
و اذا ابي بنك باستا ازيد عليهم كريمه و بارميزان


جبن سلايز و جبن قلاص - قيمر صغير- كريمه - مربى - عسل - زبده- موزريلا - احيانا اشتري مرتديلا أو تركي

معلبات مشروم - ذرة- شمندر- حمص- متبل- فول هذولي شنو ينقذونج صج صج ينقذون المشروم ممكن مع البيض أو الباستا ، تقدرين تسوين سلطة شمندر و ذرة و الحمص و المتبل معروفين و الفول ممكن بس تسخنينه أو تقدرين تحطينه بالمقلى و تحطين معاه بيض امبيه لذيذ و مفيد

و في وحده بالمنتدى قالت عن منتجات شاكر معلبات عندهم ورق عنب (ماحب المعلب ماجربته) بس حيل مدحت عندهم شي اسمه باذنجان بالصلصه تقول بس تسخنين يطلع لج مثل حمسة بيديان و صلصة طماط تقول حيل لذيذه

ممكن تونه اذا تحبين


انواع كورن فليكس

التوست أو الصمون اشتري مرتين بالاسبوع لما تنتهي صلاحيته
قبل ما تنتهي صلاحيته بيوم ممكن اسوي عشانا بيتزا توست (توست + كتشب+موزاريلا أو جبن سلايز )
أو اسوي للريوق فرنش توست (توست تغمسينه بخلطة بيض و حليب و سكر أو عسل و هيل و زعفران و بعدين تشوحينه بالزبده)


الفاكهه و الخضار مرتين بالاسبوع أمر الفرع اللي يم بيتنا اخذ لي 3 تفاحات و 3 موزات و خيارتين و طماطتين يعني جذي من كل شي نتفه لآنه حرام يخترب و نقطه بالزباله الله يحاسبنا


طبعا اي شي يزيد على طول نوديه المرينا نقطه للسمج أو نقطه بالبراحه حق الطيور كل عايلتنا و رفيجاتي نسوي هالحركه

 

[مناير خزنة التاير]

بعد عمري كويتيات ما تقصرون
صج لي سميتكم كــو 911 يـتيات

الهمبورجر و البطاط موجوده بس ياربي تملين ودج تغييرين


توني ادري اكو صوصات مالوت المعكرونية شكلي بروح اكود منهم

 

[مناير خزنة التاير]

ترى صح الخضرا المفروض اسبوعيا

بس تبون الصج انا تاذيت من دخلة الجمعية اكثر من 4 مرات بالاسبوع لما ادش لازم اكوود خرابيط
وبصراحه مصرف و تقطين على الفاضي

يعني لما اروح مرة وحده اسيطر على نفسي بس اخلص شغلي و اطلع

بس اذا رحت حق اشياء خفيفة
تلقين اجابل اشياء مالها سالفه واطلع من الجمعية بدون شي مفيد و ناسيه الاشياء المهمه

 

[مستقبل]

عشان جذي ماقمت اروح جمعيه كافي بس حوسه المواقف و لما ادخل ما يبقى شي ما اشتريه
قمت اروح الفرع مافيه وايد اغراض بس الضروريات

 

[مناير خزنة التاير]

اي والله هذي المشكلة

ما ندري شنسوي

 

[الحراير]

مشاءالله البنات كفوا وفوا جزاهم الله خير

 

[مناير خزنة التاير]

اي مشالله عليهم ما يقصرووون

 

[مناير خزنة التاير]

لاني صج يضيق خلقي وانا اقط النعمة حرااام

وهم يضيق خلقي مرات ودي اسوي شي بس ماكو لازم الجمعية الجمعية الجمعية
مليت

بس شكله لازم جذي دخلة تجييل كامل

و دخلات سريعه حق الخضرا و الفاكهه

 

[ام دودو المزيونه]

عشان جذي ماقمت اروح جمعيه كافي بس حوسه المواقف و لما ادخل ما يبقى شي ما اشتريه
قمت اروح الفرع مافيه وايد اغراض بس الضروريات

واي نفس حالي والحمدالله الفرع الي يم عمارتي حتي مشي اقدر اروح له كله 10 امتار بس والله كل شيئ ضروري ابيه القاه فيه فما قمت اروح الجمعيه بس ابو العيال يروح بالشهر مرة للماجله واكون كاتبه له لسته بالضروري واوصيه لا تييب زايد حرام والفرع فعلا ينقذني اذا احتجت شيئ بس ارجع من الدوام ادخله واشتري الي ابيه
وللأمانة الخضر كل تقريبا اسبوعين ريلي اوصيه بالناقص
ومره ريلي اول مره يكتشف ان في بالكويت شبرة خضرة حده استانس علي سالفت ان كل شيئ شريناه بنص دينار و صناديق اصغار والله اول مره اشوف الثلاجه لمدة 3اسابيع متروسه العاده نشتري وكأنه مو شارين شيئ