( زوج ثاني ) في حياتك وانت عندك (عيال من الاول )... قولي لنا وضعك مرتاحة ولاتعبانة ؟؟

[m9arq3a]

انا تطلقت وعندي بنت ولد صغار في العمر
واحبهم حيل ..
واخاف عليهم كثير..
ولا افكر في يوم من الايام اتخلى عنهم
.
.
تقدم لي شخص للزواج ولكن خفت على عيالي منه..
ورفضت الزواج
وشلت فكرة الزواج اذا عيالي مو معاي ...
.
.
الحين اهلي يلوموني ويقولون لي مصير العيال بروحون للابوهم لما يكبرون
وانتي بتكونين وحدج ما عندج احد

ما ادري هل انا غلطت لما رفضت او انا على صح ؟؟ واللي عندها تجربة من الزواج الثاني ياريت تقولنا ..

وتقولنا شلون وضع الاولاد مع الزوج الثاني ؟

وهل انتي مرتاحة من زواج الثاني بوجود اولادج معاج ؟؟

ياليت الموضوع يتثبت

 

[اشتياق]

والله مادري انا كون ولدي مو عايش معاي فماعرف الوضع شلون بيكون..

بس ولدي يزورني كل مابغى وعادي زوجي يحبه ويطلعه ويلعب معاه ..

اما يعيشون مع ريل امهم والله مو مجربه ..!

موفقه خير

تحياتي ياحياتي

 

[m9arq3a]

والله مادري انا كون ولدي مو عايش معاي فماعرف الوضع شلون بيكون..

بس ولدي يزورني كل مابغى وعادي زوجي يحبه ويطلعه ويلعب معاه ..

اما يعيشون مع ريل امهم والله مو مجربه ..!

موفقه خير

تحياتي ياحياتي

شكرا حبيبتي على الرد ...
اتمنى من اللي تزوجوا برجل ثاني يشاركونا

 

[كويتية بروما]

والله انصحج تتزوجين ل كلام اهلج صح انا بنتي وولدي عند طليقي ولما اروح الكويت يزوروني والحمدلله مرتاحه بحياتي الثانيه مع زوجي الحمدلله ولد حموله معروفه ومركز وشهاده ليش اطوف الفرصة
طبعا قلبي يحترق وينقط دم على فرقاهم بس شسوي ولا شماته الناس واهل طليقي ونظرات المجتمع وحجي الناس وبعدين توني صغيرة ماشفت
ا لدنيا شفت الويل والظلايم مع الاول بعيش حياتي واستانس وعيالي ابصم لج بالامية لاكبرو يردون لي لاني امهم
انصحج بالزواج لانه ستر لج وراحه فسيه

 

[كويتية بروما]

والله انصحج تتزوجين ل كلام اهلج صح انا بنتي وولدي عند طليقي ولما اروح الكويت يزوروني والحمدلله مرتاحه بحياتي الثانيه مع زوجي الحمدلله ولد حموله معروفه ومركز وشهاده ليش اطوف الفرصة
طبعا قلبي يحترق وينقط دم على فرقاهم بس شسوي ولا شماته الناس واهل طليقي ونظرات المجتمع وحجي الناس وبعدين توني صغيرة ماشفت
ا لدنيا شفت الويل والظلايم مع الاول بعيش حياتي واستانس وعيالي ابصم لج بالامية لاكبرو يردون لي لاني امهم
انصحج بالزواج لانه ستر لج وراحه نفسية

 

[secret sauce]

ممادري استخيري الله يوفقج

 

[فديت من يشبهني]

توكلي على الله ولا ترفضين
لان الفرصه قله ..
والشخص لابد ان ينتهزها

وعيالج لابد من يووووم يعرفووون من امهم ..
وتاليتها راحين بيتزووجوون ..

تبقين لحالج

 

[الفدنه]

الله يرزقج على قد نيتج وزوج يداريج ويحط عيالج بعيونه يارب

 

[تعويذه الحب]

والله حبيبتي انا تطلقت وعندي 5 والحمدلله عيالي عندي وريلي يعامل عيالي جنهم عياله واحسن

والحمدلله انا حيييييييل مرتاحه مع زوجي وعيالي

بس حبيبتي انتي لازم تتفاهمين معاه وتقولين له انج تبين عيالج عندج يعني لازم تتفقين معاه من البدايه

 

[frketa1]

الموضوع روعة وجداً مهم ومفيد لأن وايد بنات بهالوضع ويحتاجون اجابة هالأسألة
بس للعلم
القانون الكويتي
المطلقة يكونون عيالها عندها ولما تتزوج مرة ثانية تكون الحضانة لأمها ويتمون العيال عند جدتهم
وما أعتقد أبوهم بيرضى ان عياله يعيشون مع زوج أم إلا في حالات نادرة
شنو تسوي اللي تبي عيالها عندها وبنفس الوقت تبي تتزوج؟ أحس مستحيل

 

[chanel N22]

استخيري ماخب من استخار ربه
والله يكتبلج الخير يارب

 

[um khaled]

اكيد استخيري

بس انا اخوي اخذ مطلقه عندها اثنين

مع العلم ان مو متزوج من قبل وطليقها متزوج

لكن اخوي ذهبه تبارك الرحمن معاها ومع عيالها

 

[*ريما*]

اذا زوجك راضي يعشون معك
وافقي
والله يوفقك

 

[m9arq3a]

شكرا حبيباتي ما قصرتوا في الرد والله اعيش بدوامه من هالموضوع

 

[عهود الحب]

البنت وضعها مختلف عن الولد
الرجال اللي يرضى فيج مع عيالج تزوجيه
اللي ما يبي عيالج لا تاخذينه
نصيحة

يا ما بنات ضاعوا و اطفال تعقدوا والسبب امهم تزوجت و نستهم
واللي بحضنج وتحت عينج مومثل الي يزورج بالسنة حسنة !
صعب وضعج


بس عسى ربي يفرجها عليج

 

[الدلال]

شرطي عليه يكونون عيالج معاج

بصراحه من وجهة نظري عيالي يسوون ريايييل الدنيا كلهم, يكفي انهم من دمي ولحمي

وشي طبيعي باجر لما يكبرون كلٍ بشووف دربه بس يكفي ان نفسيتج مرتاحه انج ما فرطتي فيهم بيووم


مايمنع انج تتزوجين وتعيشين حيااتج ,هذا من حقج وشرع الله ماعليه خلاف, بس يكونون عيالج معاج, ترى ماكو مثل الام بحنيتها على عيالها

آآآآآآآآآه يالام ,ما يعووض حنانها شي

 

[ملح بدويه]

الله يوفقج ويكتبلج اللي فيه الخير

 

[مربربة]

ولله ماعندي خلفية بالموضوع بس استخيييري وشوفي الامور شلون تتعسر ؟ ولا تتيسر؟
وحكمي

يارب يفرج همج ويكتب لج الي في خير لج ولعيالج موفقة

 

[جوري الزبير]

حبيبتي انا اقولج تجربة بنت عمي 00 اهي مطلقه وعندها ولدين ورفضت وااااايد خطاب بسبب خوفها على عيالي وابوهم كان يهددها اول لي تزوجة باخذ عيالي 00 بس يوم تزوج عرف ان زوجته ما راح تستقبل عياله ولا حتى امه نفسها 00وبحكم ان اهي امها ميته الله يرحمها 00
من سنه تقدم لها ريال مطلق بعد وعياله عند زوجته 00 ومن اول كلمه قالتها له ان اهو اذا يبيها وشاريها ويبي سعادتها يراعي عيالها ويحاول يعذرها باي يوم يكون منها تقصير معاه 00 والحين تعالي شوفيهم ماااااااااشاء الله تبارك الرحمن يموت فيها وبعيالها 00 ترى الاباء نفسهم احيانا يتنرفزون من عيالهم مو بعد ريال غريب 00 دوم تقول لنا ان الجهد عليها مضاعف تبي ترضي الطرفين وفي غيره شويه بينهم 00 بس تقول الحمد لله العيشه يسيره ولي يبي شي يضحي اذا ابي الستر والزواج وعيالي لازم اضحي بتعب وما اخلي قاصر على اي احد فيهم 00 واقولج بعد قالت انها دوم تحبب زوجها بعياله يعني تشتري لهم هدايا وتقوله ودهم لعيالك وقول انك الي جبتهم 00 وتذكره باعياد ميلادهم ولو في عندهم مراجعات طبيب وله شي وتكون طليقته تقوله انت ودهم ومن هالسوالف 00 من جذي الريال شايل لها تقدير عشان دامها زينه مع عياله حتى وهم بعيدين 00 اهو بيكون زين مع عيالها اكيد 00
ادري قرقت عليج وايد بس حبيت اقولج التفاصيل 00 وانتي استخيري حبوبه وعسى ربي يحفظلج عيالج ويكتبلج الزوج الصالح الي يسعدج ويراعيهم ويكون لهم مثابة الاب

 

[m9arq3a]

الله يجزاكم خير ... ماقصرتوا بالردود وكثر الله من امثالكم ويوفقكم بحياتكم
وما ابي منكم الا الدعاء لي وللاولادي لانكم خواتي