اممم شلونكم بنات ؟؟ يمكن نكي يديد عليكم بس حبيت اشاركم قصتي
واتمنى القى عندكم اقبال و تعبجكم قصتي و اسلوبي .. يمكن يكون في اخطاء وايد بس ميخالف عذروني لاني اول مره افكر اكتب ( بدايه حبنا فرحه و نهايه قصتي وياك .. )
البـــــــــارت الاول
بطله القصه اهي أنا قصتي صجيه 100% و ماكو أي تغيير بالاحداث
حور ( امم عيوني بنيه حلووه كبيره و وسيعه خشمي دقيق سله سيف على قولتهم شفايفي صغيره وويهي دائري حنطيه متحجبه .. طولي 163 وزني 65 مو متينه و لا ضعيفه جسمي متناسق مع طولي .. البعض يقول عني جميله و بعضهم حلوه ) عمري 20 سنه
راح ابلش اكتب عن قصتي عند بدايه سنه 2010 و اذا احتجت اني ارد لي قبل هالتاريج راح اردله بوقته ..
في يوم 1\1\2010 كنا بالشاليه بجليعه مع اهلي و لما صار الليل و صارت الساعه 12:00 ليله راس السنه الكل طلع بره الشاليه يحتفل بهالمناسبه و الجراغيات و لوويه و حوسه و شباب و تحرش
كنت انا و ريم بنت خالتي نتمشى عالبحر و كنت لابسه بلوفر نايك كحلي وااسع و جينز جافسته لي فوق شوي عشان ما يتبلل من ماي البحر و ريوم كانت لابسه ترينق فووشي و تحته بلوزه بيضه و نفس الشي رافعه البنطلون شووي عشان لا يحوشه المااي ..
ريم ( عيونها صغيره مسحوبه خشمها صغير و شفايفها ملياانه و اغلبهم عبالهم مسويتهم تجميل بيضه متحجبه طولها 165 وزنها 65 .. جسمها حلوو .. نعوومه ) عمرها 20 سنه امم بنت خالتي و صديقه عمري و كاتمه اسراري و العكس صحيح معاي انا
المهم
ريم و الدمعه بعيونها : حور والله العظيم ماني قادره مشتاقتله لو بس ادق من رقم غريب اسمع صوته ابي اردله مالي شغل بباجر شيصير بس ما استحمل اكثر :eh_s(2):
حور : ريوووم حبيبتي لا يضيق خلقج بعد شتسوين تدرين اهو سووه جذي عشان مصلحتج مو عشان شي تتعبين الحين احسن من بعدين لازم تتعودين من الحين لان هالشي مرده بيصير و انتي تدرين
ريم : ادري والله ادري بيصير بس بكلمه عالاقل على ما يصير خل استغل هالاياام عفيه دقي كلميه قوليله يردلي ( و تدمع عيونها ) :eh_s(16):
حور : امبي ريوم قلبي لا تبجين خلاص الحين ادق عليه اكلمه و احاول فييه واخليج تسمعين صووته بعد شتبين
ريم ( شقت الضحكه ) : صجج يلا يلا الحين :eh_s(9):
حور : نطري ام دوده ثقلي شووي
سالم ( حبيب ريم من 5 سنوات مذهبه يختلف عن مذهب ريم فهذا الشي خلاهم يقررون مع بعض انهم يفجون عن بعض عشان يتعودون على مصيرهم اللي يعرفونه من اول ما تعرفو على بعض لان لا سالم و لا ريم اهلهم راح يوافقون على هالزواج .. حبهم عذري و اثنينهم يموتون ببعض و سالم اول حب له اهي ريم و ريم نفس الشي بطلت عينها على الدنيا على حب سالم .. سالم زوغه و ستايل اللي يحبونه البنات .. فتنس و جسمه مقسم حلوو سماره على برونز .. ملامحه حاده و مرات يصير بريء بيبي فيس باختصااار الصبي عليه طق
عمره 23 سنه )حور تدق على سالم و تطالع ريم اللي حدها متشوقه تسمع صوته و على امل انه حور تقدر تردهم حق بعض مثل كل مره
سالم يشيل التلفون و صوته مخنووق لان حور من طرف الحب ريم : ألو
حور : اهليين شلوونك سالم .. هابي نيو يير اشدعوه كبر راسك ماكو مسج تعايدنا فيه
سالم : بخير الله يسلمج .. لا ماكو مسج اعايدج فيه شتبين
>> على غشمره لان اسلوب حور غشمره و تاخذ و تعطي فسالم يرتاح لها و ياخذ و يعطي معاها بدون حدود كاخت حور : وييع قطييعه كله داقرني انا ما ادري بنت خالتي على شنو تحبك
سالم : بنت خالتج انثى بنيه ناعمه مو مثلج انتي احس جني اكلم واحد من الربع
حور : فديت ربعك اذا جني واحد منهم :wqedqw:
سالم : ههههههههه طيري زيين
حور : بس بذمتك ما اونس و كافي كافي مستحمله ريوووم كل دقيقه تسولف عنك ترا صج حفظت كل سوالفكم
سالم : ههههههههه بعد عمري شتقول
حور : شنو ما تقوووول رااسي صدع .. ولك سلوم حتى سوالف اهلك و ربعك اعرفها ما تشوفني موفره على روحي ما اكلم بس كافي اسمع سوالفكم
سالم ( مشتااق حق ريم ) : حبيبتي اشتقت لها والله بس شسوي حور والله تدرين ضاغط على عمري بس عشانها اهي و لا انا ودي اكلمها طول عمري بس ما ابي توقف نصيبها عشاني تدرين انتي اهي ترفض اللي ايون لها بس لي متى قوليلي
حور : أي والله انا معاك بكل كلمه تقولها بس اهي ترا نفسيتها تعبانه و تقول بسمع صوته .. انزين عشاني و عشان عيدميلادك بعد جم يوم شرايك تدق عليها تونسها
سالم : اهااا دااقه تشيشيني مو عشان تباركين لي السنه اليديده
حور : من زين ويهك اباركلك السنه اليديده هيهيهي
سالم : عيل انا اعلمج ماني مسوي اللي تبينه
حور : غضبا عليك مو طيب منك اصلن انا مو داقه اترجاك داقه اقولك
سالم : ترا انا اتوقع انتي ما تكلمين مو عشان انتي ما تكلمين عشان ماكو احد يستحملج ترا
حور : هههااااااي ترا انا طق علي بس ما اعطي وي .. ماكو واحد كفو ليلحين اني اكلمه معنه تصدق صار ودي
سالم : جبي بروحي مستانس انه ريوم تماشيج وااثق وين ما رحتو ما عندكم حركاات خايسه و ارتاح لما تكون معاج
حور : انزين لا تطيح الميانه وايد الحين دق عليها خل تستانس
سالم : ههههههههههه العن خير لسانج ما ادري من وين اتيبين هالكلمات .. ترا حدي مشتاق ما ادري شقولها
حور : كل اللي بقلبك قوله و اهي بروحها ترا تقرق ماله داعي انت تتحجى اصلن ههههههه >> قرصتها ريوم عشان ما تكمل
سالم : يلا صاار
حور : اووكي ثانك يووو و تامرني على شي قبل ما اصكر
سالم : لا سلامتج .. انزيين اقولج حوور
حور : هلا ؟
سالم : مشكووره والله كنت ابي احد يشيشني
حور : حياكم الله تستاهلون باي وقت و لا انا شنو فايدتي يلا بااي دق عليها خل تستانس
سالم : ههههههه يلا بااي
و صكو الخط
ريم تناااقز و تلم حوور و تبووسها و كانو توهم مارين صوب شباب و مو حاسين فيهم اصلا لان بالهم مو مع الناس
حور : يالهبله وخرررررري و يلا زهبي روحج الحين اكييد بيدق
ريم : وااااااااي ونااسه والله يعني صج الحين بكلمه
حور : أي أي صج والله صج الله يشاافيج يارب
ريم : هههههههههههههه
دق سالم على ريم و شالت التلفون فاضطريت اني اوخر من نفسي عشان ياخذون راحتهم بالسوالف و ما اصك عليهم
كنت امشي راده لي الشاليه بشووف اهلي شيسون و اسلي روحي معاهم و انا رااده كنت سرحاانه و افكر ودي اني احب و افكر باللي احبه و اعيش قصه حب حلوه مثل باجي البنات اللي يحبون و يتكلمون و يسولفون عن روحهم .. و لا عمري كلمت و لا فكرت اني اكلم ما ادري شفيني جذي فجأه حسيت ابي صوت خشن يسال عني و يهتم فيني و يسال عني و يتغزل فيني و انا ابي احبه و اهتم فيه و اسال و ... و قطع حبل افكاري مجموعه شباب مرو يمي كانو ثلاث شباب طولهم حلو اعتقد 180 و فوق و الاجسام مقسمه و بس الملامح ما شفتهم صراحه
كنت امشي بروحي و منزله راسي اشوف ريلي شلون تغوص بالرمل و انا امشي و فجاه
واحد منهم : الحلوه بشنو تفكر
رفعت راسي متفاجأه بس ما رديت
نفسه و كان يمشي يمهاا من بعيد شوي اهو و ربعه عشان يسولف الحبيب : شوفي عشان اكون صريح شفت بنات حلوين بس مثلج ما دش خاطري في مجال
حور : عفيه وخر لا تسويلي show مني اهلي موجودين
نفسه : والله بوخر و ما ابيلج المشاكل مع اهلج بس سجلي بخاطري فيج
حور قامت تمشي سريع و ما تبي ترد عليه
طبعا خطوات سريعه من شخص طوله 163 نفس خطوات بطيئه من شخص فيه 180 و فوق
نفسه : والله ابيج سجلي انزين بسرعه و روحي ما اقرب منج بعد
حور : وخرر لا تمشي يمي شالحركااات و معصبه حدهاا عطته نظره و طالعت سيده
نفسه : احححح شحلات هالعيون والله
حور حقرته و راحت صووب الشاليه و مشت و راح عنها الصبي
دشت حور الشاليه و كان في غرفه مخصصه حق البنات بس و فيهم السراير دشت حور على بنات خالتها الدار و اختها ( رتاخ اختي - ريان اخت ريم – و بنت خالتنا الثالثه شوق )
ريان 16 سنه .. رتاج 15 سنه .. شوق 17 سنه
شوق ( عيونها كبيره و خشمها سله سيف و شفايفها دقيقه مو متحجبه شعرها قصير مدرج بطريقه حلوه قصيره و ضعيفه بس شكلها كلها على بعضها يطلع حلو )
شوق عندها خط خربوطي حق الشباب و كانت تتكلم فيه وقت ما دشت حور الدار و كانو ريوون و رتوج مجابلين اللاب توب و يتعبثون و يضحكون بينهم بين بعض
انسدحت حور عالفراش تفكر باللي كانت تفكر فيه و انها تبي تحس بشعوور اللي يحبون و تبي تسهر مع واحد تحبه و تتكلم معاه تلفون لي الصبح حالها حال باجي البنات .. و بنفس الوقت تفكر و تكلم نفسها حور انتي مو مال هالسوالف انتي مسكتي روحج 20 سنه ما يت على الحين تخربينها و تكلمين و انتي الكل واثق فيج و يضرب فيج المثل خلج مركزه على دراستج و انتي بسن زواج اذا مفكره تحبين حبي ريلج بعدين و مع هالافكاار
نــــــــــــامت حور ..
انتهى البارت الاول
قولولي شرايكم و ابي اشووف تفااعل و تشجيع و اذا في أي اخطاء او تعاليق حياكم الله
التعديل الأخير:
