هل لديكم طفل يعاني من التوحد- خلونا نتجمع

[ام التوحد]

رد : رد: هل لديكم طفل يعاني من التوحد- خلونا نتجمع

محد فينآآ فيه التوحـد وعسى الله يشاافي كل واحد فيه مرض التوحـد الشديد ..!


امييين


بنآآت الحل انكم تقعدون مع الي فيهم توحد عشآن يروح المرض اقعدو معااه سولفو وضحكوه


وطلعوه عشان يحس انـه حر لازم يختلط الي فيه هالمرض واذاا مسكتوه وعصب عطوه حبوب مهدأ الاعصاب ولا تخلونه


بروحـه ..! وان شاء الله .. الله يشافيهم من هالمرض ترا الطفل من ينولد لازم تقعدون معاه عشان ما يصير فيه التوحد


لانكم انتو الي تجيبون له هالمرض بس تخلونه يقعد بغرفته وما تحجونـه << خطأ


يعطيج الف عافيه اختي ع الموضوـع وعسى الله يشافي كل مريض


>> اللهم لا تدع لنا في مقامنا هذا ذنباً إلا غفرته، ولا هماً إلا فرجته، ولا كرباً إلا نفسته، ولا ديناً إلا قضيته، ولا مريضاً إلا شفيته، ولا مبتلى إلا عافيته، ولا ضالاً إلا هديته.

امين يا رب العالمين ..*

السلام عليكم
اول شي توني سجلت في المنتدى وهذي اول مشاركه بس ابي ارد على الطيبه
التوحد مو مرض ومحد يجيب المرض لعياله
حبيبتي اقري قبل لا تكتبين عن التوحد احنا عايشين معاه وكل يوم نكتشف شي جديد ,وبالنسبه حق اللي يخلون عيالهم بدون تعليم مصيبه وجهل في الام والاب مو الطفل مو ذنبه انه انولد توحدي ,انتي عمرج شفتي طفل توحدي او عندكم بالعايله جان ما كتبتي كلماتج الجارحه
احنا اهل التوحدي مصيبتنا مو في ولدنا هذي عطيه من الله المصيبه في المجتمع الجاهل الناقد ,والنقص في التعليم والبرامج والمراكز المتخصصه لتأهيل المتوحد لازم الام تسوي المستحيل وادور وتسأل بكل مكان لما يتحسن ولدها
لعلمج اغلب العلماء والعباقره فيهم توحد
بنات اللي جديده في التوحد حياها ولدي عمره 9 سنوات خلونا نساعد بعض ونطلع انشتاين او نيوتن كويتي

 

[& الذاهبه &]

وعليكم السلام


هلابج اختي ام التوحد

اكيد راح نستفيد من بعض بتجاربنااا عندي اسئله كثيره

شنوو العلاجات اللي اتبعتيهااا مع ولدج

وشنوو اكثر شي فاده

ونبي تجاربج بتعليم الحماام عزج الله

انا بنتي بترووح حضاانه ومحتاره بالحضاانه

عمرها سنتين وعشر شهووور

واي تجربه مفيده ذكريهاا لنااا

عسى ربي يقر عينج بوليدج وتشوفينه احسن من نيوتن

وحيااااج الله بتجمعنااااoster_av1:

 

[ام التوحد]

رد : هل لديكم طفل يعاني من التوحد- خلونا نتجمع

هلا فيج اختي الذاهبه انا قاعده اقرى جميع مشاركاتكم بس ماشاء الله جم صفحه عيوني تعورني
بنتج صغيرونه وان شاء الله تستفيد انا بديت مع ولدي تقريبا 3سنوات ونص ,الجهل بالعايله كلها كل ما شافه احد قال عادي تأخر في الكلام الحمد لله على كل حال
الحضانه من زمان والله بس ولدي كان في حضانه البستان بالخالديه لضعاف السمع والنطق وهو كان ولا كلمه ومنها تعرفت على الدكتوره عبير وماشين على الحميه والفيتامينات وحاليا هو في هوب سوينا العلاج السمعي مرتين وافكر اعيده بعد
وضعه الحين في لغه بسيطه عربي وانجليزي مع انه جميع المدرسين كانوا يهاوشوني وحدي اللغه بس الولد عنده قابليه ليش ما يتعلم ,ما يسولف بس يطلب اللي يبي
حاليا زوجي مسافر بس يرجع في مخططات ثانيه
الحمام يا اخوات لازم في البيت انتي والخدامه لانج من تطلعين بتلبسه البامبرز مالها خلق
والمدرسه او الحضانه لازم تساعد ,مدرسة ولدي ما قصرت هي في المدرسه واحنا في البيت
كل ما تودينه الحمام لازم في كلمه تقولينها مثل حمام, بي بي , افيه اي كلمه تبينها وتحديد الوقت يعني كل 5 دقايق وزيدي مع الايام كل شي بالتدريج ,كل ما سمع كلامج وسواها بالحمام شجعيه انا كنت اصفق له بالحمام واقوله شاطر ولما يطلع اعطيه شي يحبه بس مو دايما عاد واهم شي الصبر

 

[& الذاهبه &]

هلا بج اختي

ليش ولدج بحضانه لضعاف السمع والنطق اهو عنده مشاكل بالسمع ؟؟

ووين سويتي التكامل السمعي

الله يعني تهقين اعلم بنتي من الحين على الحمااام

اهي حالياا قامت تعرف كلمه لأ وتستجيب لبعض الأوامر برايج انطر عليها لي ثلاث سنين ونص

الله يقر عينج فيه وتشوفينه باعلى المراتب بالدنيا والأخره

 

[ام التوحد]

رد : هل لديكم طفل يعاني من التوحد- خلونا نتجمع

ما شاء الله عليج نشيطه
انا بنفسي اخترت الحضانه وهذا احسن شي سويته
1- قريبه من البيت وانا اللي اودي واجيب
2-ولدي كان ولا كلمه وهم تركيزهم على النطق
3-ابيه يخنلط مع الاطفال الطبيعين
اول شي سوينا مقابله وشافوه وهو كان ومازال نشاط زايد بس والله ما قصروا ,دراستهم كانت عباره عن ملف وانا احط فيه صور مثلا صورتي وتحتها بخط واضح ماما وكل شي بالبيت وبعدين كل صوره في المكتبات حطيتها كل شي
ولما شفت هالطريقه جابت نتيجه قمت اصوره وهو ياكل وهو يلعب وكل اهلي صورتهم حتى امي وابوي واكتب تحتهم اساميهم وحتى لما نطلع مثلا البحر اصوره وبعد جم يوم افتح الملف على صوره البحر واقوله يالله نروح البحر وجذي يفهم وين بروح والحين هو اللي يطلب البحر او الحديقه او حتى الحلاق وهذي طريقه ممتازه مع التوحد لان تفكيرهم يعتمد على الصور في فلم عجيب شفته عن وحده فيها توحد والحين مشهوره قصه حقيقيه اسمها تمبل براندون اذا مو غلطانه شوفيه يشجع ويخليج تفهمين طريقة تفكيرهم وحتى في اليوتيوب اكتبي اسمها وشوفي
التدريب وهي صغيره احسن في كل شي الاكل الحمام والكلام كل ما كبروا صاروا اصعب
التدريب السمعي سويناه في مصر كان ما يتحمل الاصوات العاليه ويصرخ ويحط ايده على اذونه حتى لو صوت عادي بالنسبه لنا يصير مزعج له وتختلف النتايج من طفل لاخر
في وحده بعد اجنبيه نجح علاجها بالتدريب السمعي ولها كتاب اسمه الرقص تحت المطر بالانجليزي طبعا تقول صوت المطر كان مثل الرصاص ومؤلم

 

[& الذاهبه &]

تسلمين ياقلبي

وانشاء الله يتحسنون عيالنا للأفضل

والله يعينا على تربيتهم التربيه الصحيحه اللي تعينهم على هالمجتمع

 

[ام التوحد]

رد : هل لديكم طفل يعاني من التوحد- خلونا نتجمع

صح كلامج المجتمع
تعالي يالذاهبه انا شفت كلامكم عن الايس كريم انا اسوي بالبيت في علب بلاستك حق الايس كريم حطي حليب الصويا مع الفواكه موز وفراوله او مانجا فرش طبعا في الخلاط وصبيه في العلب وحطيه بالفريزر انا عيالي كلهم ياكلونه ومفيد
في توست ذره مال المطاحن عندج خبر عنه والا لا
حلوه طريقتكم في التجمع والطلعه مع بعض بس جنه البنات لاهيين الحين انا ودي اتعرف عليكم وانسوي شي مفيد حق عيالنا
انا اول ما بديت الحميه الاكل كان بسيط مو مثل الحين كل شي متوفر الحمد لله وكنت اسوي طلبيات بالنت بس مره وصلني اكل منتهي الصلاحيه فرحت مركز سلطان وسويت طلبيات عندهم في خدمة أسال ومره كنت ابي اطلب بودنج مثل الزبادي موجود الحين عندهم ماركه البرو على كاكاو فانيليا كراميل بس قال الموظف مايصير لانه يجي مبرد قلت مو مشكله اطلب كرتون قال لا عصبت وزعلت قلت انتوا عندكم هالماركه وتجيبون الحليب ليش ما تطلبون البودنج بعد أخذ الصوره مني وقال راح اقدم طلبج حق الاداره وفعلا بعد فتره اتصل فيني واحد وقال احنا وافقنا على طلبج وموجود المنتج على الرف تفضلي
كل الاعاقات بصوب والتوحد بصوب
شنو نقدر نسوي عشان نفيد عيالنا , تدرين ان جميع المدارس والحضانات والنوادي حق المعاقين يسوون خصم حق الاجانب انا زعلت شلون انا ادفع وغيري ولده يداوم بلاش بعد ليش انا اشتغل حالي حال امه وعندنا ايجار ومصاريف والا الكويتي عنده كنز وفي دولهم يصير العلاج حق الاجنبي اللي هو احنا بزياده عن المواطن مافي عدل كلش
وبعدين المدرسين اللي ندفع لهم دم قلبنا شنو يسوي ليش احنا ما نسوي دورات حق الامهات وكل وحده تعلم ولدها في واجد شغلات بس لازم نساعد بعض
حتى القانون الجديد للحين ما طبقوا شي وين جمعيه اولياء امور المعاقين ,احنا لازم نسوي جمعيه حق التوحد لانه عالم ثاني محد يدخله الا لما يصير عنده طفل توحدي
سامحوني بس من حر ما في قلبي منقهره على ولدي من بعد عيني حتى ابوه ما يعرف يتعامل معاه

 

[& الذاهبه &]

هلابج اختي

الله يلوم اللي يلومج فعلا طفل التوحد صعب التعامل معاااه لكن لأنا نحب عيالناا قدرناا ندش عالمهم

وبخصووص المطاحن ودي اطلب بس ماحصلت الرقم ياليت تفيديني

والبدنج ماعجب بنتي

اهي تحب المخبوزات اكثر شي وتمووت على الحلوو بس حارمتها منه وحاليا تاكل تمر اخلطه لها مع جوز

ولا مره طلبت اختي فيديني شنو تطلبين من سلطااان انا خاطري اطلب حلوياات لأنها بعد عمري تشتهي الحلوو حيل

والأيس كريم انا اسويه لهاا وشاريه العده من ترو فاليووو اعواد ايس كريم واقماع

وانشاء الله تتحسن بنتي مع الحضاانه

والله ييسرلهااا امورهااا

والله يا اختي ان اليووم بصلاة القيااام بجيت من كل قلبي يووم يدعي الشيخ للمرضى والمبتلى

انشاء الله ربي يرأف بحالهم ويفتح على قلووبهم ويشافيهم وعليه حتى الشكوى مايعرفوون يشتكوون واهم فيهم الف عله

لهم الله خلقهم وماراح ينساااهم

والله يجنب اللي ببطني اي مرض تكفين ادعيلي ...

 

[حوري2004]

رد : رد: هل لديكم طفل يعاني من التوحد- خلونا نتجمع

السلام عليكم ورحمة الله وبركاته
وعيدكم مبارك
والله اشتقتلكم حيييييييييييييييل
فديتكم كلكم
وانا وعدتج يا الذاهبه اني اكتبلج شلون انتصرت على سعودي فديته وعلمته على الحمام
بس قبل لا اسدح لج تجربتي مع حبيب روحي
اقولج ترى ابنيتج توها صغيره ما راح تقدرين معاها تو الناس
والحين اسدح التجربه اللي بلشت فيها من شهر 12 سنه 2009 يعني شوفي طول صبري معاه بس ترى جد تقريبا من شهر 12 الى شهر 4 كان لابس الحفاظه العاديه اللي لزقه مو مثل الشورت المهم سعودي كان تام الثلاث سنوات شهر 11-2009 وانا بلشت معاه بعد شهر يعني كبير كانوا اللي بعمره كلهم قاطين الحفاظات من قبل لا يتمون الثلاث سنوات
المهم كنت كل ما رحت انا الحمام تكرمين اقوله ماما بيب ( والله فشله ) بس هذي السدحه لازم المصداقيه بالتجربه المهم كنت كل ما اروح اقوله بيب واروح الحمام قدامه بس ادش واسكر الباب واهو يقعد عند الباب ساكت مستغرب وكنت لما اطلع ارد امثل له بهدومي واسحب السيفون وكان مو مقتنع وكنت اقطع حفاظته وابطل الماي علشان يبول بس والله جد تعبني ما كان راضي واول مره بال وشاف البول يطلع منه قعد يبكي مخترع فدييييييييته والله قعدت اضحك وبعد عدين لما صار يبول عادي بالجمام بس انا اللي اوديه ولما ما اوديه يبول بالحفاظه شريتله حفاظات شورت وصرت اعلمه بس يطلع البلبول ويبول وشوي وشوي وكانت الحضانه مساعديني وشوي شوي اقتنع يبول بالحمام بس طبعا ساعات لما اقط الحفاظه يبول على نفسه واقول يع سعود مو حلو وكنت اوديه الحمام واقوله بيبيب اهنيه وكنت لما اشوفه يتزحر اقوله حمام كان يبكي ما يبي يبي يسويها بالحفاظه لنه ما يبي يغير جنني كانت اقوله حمام كاكا يع واهو يبجي ويتزحر بمكانه ويقول بصوت واحد لا لا لا جنني مو راضي
ويمكن اللي ساعدني عليه كنت مره اسبحه وتكرمين كان يبي يتزحر قلته يه تعال هني مكان المرحاض وطبعا كان ومازال يسويها واهو واقف
حمامي فيه افرنجي وعربي العربي يسويها فيها واهو واقف والافرنجي يقعد عليه مرات ومرات ما يبي على المشتهى وانا ما احب اضغط عليه علشان ما يعصب لان ايده صايره طوييييييييييييله على الله يهديه يطقني طق والله اني مره شفت الدنيا منقطه من اصبعه اللي دش بعيوني فديته
المهم صار لما يبي يروح الحمام يقط هدومه كلها عند الباب ويدش فديته ل الكاكا (زوجي لما يسمعني اقوله كاكا يقول لاعب برازيلي بالملايين تقطينه انتي وولدج بالحمام والله دنيا )
ولما يكون بيبيب لا يطلع بلبوله لو كان بالصاله يطلع ويقع يمشي لما يوصل الحمام بعدين يبول
مره كان ابوي يلعب معاه جان يطلعه على ابوي لوووووووووووول قعد ابوي يقوله عيب خشه واهو طناش جان يروح الحمام ويلقاه مسكر ويرد لنا بالصاله واهو مطلعه ويروح الحمام الثاني لووووووووووووول مو قادره اغير طبعه ليومنا هذا ما زال طبعه جذيه
وبالنسبه للنوم بالبدايه كنت اقلل الشرب بالليل ما اشربه سوائل وكنت اقعده اوديه الحمام بما ان وامي عصري كنت عادي اسهر واستمريت معاه بالجد تقريبا من شهر 4 وحققت النصر ولله الحمد شهر 7 وتحديدا اخر سبعه ولله الحمد وعقبال ما احقق النصر بقعدته لما يسويها وانه ما يطلعه لا بالحمام
وحاليا يقوم اهو من النوم اسمع صوته بالحمام واسمع صوت الماي والحمد لله على النصر راح تتفجأ ابله بالحضانه لانه عنيييييييييييييييييييييييييييييييييييد اني قدرة انتصر عليه
وبس هذي تجربتي مع سعودي
وبالنسبه للحضانة بسدحها بموضوع اخر بعد ما اشوف الدعاوي الحلوه لسعودي وعيالنا الحلوين

 

[حوري2004]

رد : رد: هل لديكم طفل يعاني من التوحد- خلونا نتجمع

فديتج ام التوحد
اسم الله عيه اولدج كبير علمينا شنو الاخطاء اللي تحسفتي ما سويتها من زمان علشان تكافحين هالمرض عسى الله يشافي عيالنا
بالنسبه لي
انا من اكتشفت هالمرض وانا احس نفسي ضايعه الى شهر 4 اللي طاف بديت استوعب والم نفسي المتشتته جد كنت احس نفسي ضايعه والبنات اهني ماقصرو
وانا حاليا اعطيه اوميجا 3 وبعض الفيتامينات اللي صارفتها لنا الدكتوره عبير عوض
وماشيه معاه على جلستين مع الاستاذ خليل بحضانه كويت دريم اهو مأجرهناك غرفه يعطي فيها جلسات تعديل سلوك
وهذي اهي الحضانه اللي مسجله فيها حبيبي من شهر 4 اللي طاف وحاليا حاجزتله مقعد فيها والله ييسر

 

[& الذاهبه &]

حبيبي سعووود جني عرفته وشفته عند استاااذ ابراهيم

ربي يحفظه ويفتح على قلبه وبصيرته

ويحلل عقدة من لساانه ياارب

وانشاء الله بنتي نهايه عشرة اتم ثلاث اسنين وانا باديه معاهاا بمعلووماات عامه خخخخخخ

 

[& الذاهبه &]

حوري انتي سويتي اوراق المجلس لولدج ؟

 

[ام التوحد]

رد : رد: هل لديكم طفل يعاني من التوحد- خلونا نتجمع

فديتج ام التوحد
اسم الله عيه اولدج كبير علمينا شنو الاخطاء اللي تحسفتي ما سويتها من زمان علشان تكافحين هالمرض عسى الله يشافي عيالنا
بالنسبه لي
انا من اكتشفت هالمرض وانا احس نفسي ضايعه الى شهر 4 اللي طاف بديت استوعب والم نفسي المتشتته جد كنت احس نفسي ضايعه والبنات اهني ماقصرو
وانا حاليا اعطيه اوميجا 3 وبعض الفيتامينات اللي صارفتها لنا الدكتوره عبير عوض
وماشيه معاه على جلستين مع الاستاذ خليل بحضانه كويت دريم اهو مأجرهناك غرفه يعطي فيها جلسات تعديل سلوك
وهذي اهي الحضانه اللي مسجله فيها حبيبي من شهر 4 اللي طاف وحاليا حاجزتله مقعد فيها والله ييسر

هلا فيج يا حوري ,شلونج يالذاهبه
اهم شي مع التوحد الصبر ,حبيباتي قبل 5 سنوات مافي مثل الحين انا لما قالت لي الدكتوره توحد ما فهمت اول مره اسمع فيه لا اعلام لا نت , الحمد لله على كل حال
كله مجهود شخصي انا ادور واسأل وكنت اشتري كتب بس كانت تعقدني زياده لان مهما شرحت لج حاله ولدي يمكن ولدج العكس تماما التوحد درجات وكل حاله مختلف عن الثانيه
ولدي مستمر على الفيتامينات مع الدكتوره عبير ,وبعد النادي الصيفي في نفس الحضانه اللي بالخالديه احنا معاهم من زمان نفس الاداره كانت في التربيه النموذجيه والحين بدا دوامه في هوب
اهم شي اذا تبون تسافرون علاج او جلسات او اي شي الحين قبل لا يكبرون عيالكم كل ما كبروا صاروا اعند وترى يفهمون
حاولت قبل نسوي له جلسات تخاطب في الهادي بس مرتين الثالثه فضحنا صراخ ومو راضي ينزل من السياره عرف المكان وبس معتمده على اللي بالمدرسه والنادي ولدي كلش ما يقعد في البيت في العطل لازم دوام
الحضانات والنوادي اللي راح لها ولدي هي كالاتي
قبل لا اكتشف التوحد اللي فيه كان في حضانه عاديه وبعدين حضانه الدلال العائليه في حولي,حضانه البستان , مدرسه الصباح كانت في مشرف نادي صيفي , طبعا الخرافي ومن اول ما افتحوا المركز, مرسه التربيه النموذجيه في شرق فتره الصيف , حضانه دريم بس هو نادي في الصيف , مدرسه هوب وقبل لا اسجله في هوب خذيت جوله على المدارس القريبه وطبعا ما عجبني اللي شفته :O_SHH_:
رحت مره حق مركز التوحد الجديد بس الدخول ممنوع والسؤال ممنوع :eh_s(13):
الحمد لله يتكلم بس مو سوالف والحين احاول اعلمه الوقت والساعه بعد قلبي انطر الساعه لما تصير 1 بالضبط وأسأله ويعرف يجاوب بس اذا كانت ونص يخزها ومايعرف جم وربع وثلث ما افتكر راح يفهم بس نعمه يعرف الوقت عموما ومعنى الساعه
ماشاء الله عليكم انتوا شاطرين علموني اذا عندكم شي وبعدين ليش ما سويتوا العلاج السمعي

 

[& الذاهبه &]

هلا فيج ام التوحد

انا زوجي بيقدم دكتوراه وفرصه اودي بنتي تاخذ العلاج السمعي باذن الله على الصيف الجااااي

هووب فيها حضاااانه والا بس روضه؟؟

ماشاء الله عليه الله يحفظه لج ان شاء الله

اناا الحين مع الحماال حاسه اني شوي تكيسلت معى بنتي واهي بس تبيني العب معاهاا وانقزهااا اسم الله عليهاااا

اعطيهاا القرع بكثره حتى اخلطه مع العصير

هالياام اعطيهاا عجوه بس ما ادري ليش كل ما اعطيها تمر تعسر علي بالنووومه ؟؟

والقراءه اليوميه احسها تحب تسمع قرآن

الله يفتح على قلووب عيالنااااا

 

[Emanova]

السلام عليكم لكم ولهه يا بطلات

انا متابعتكم بصمت لاني حدي لاهيه بس ما شاء الله المعلومات حلوه و تفيد الجميع عساكم على القوه كلكم يا رب و يشافي عيالنا

زوجي كان رايح الاردن و هناك شاف مكان اسمه المدينه العربيه للاحتياجات الخاصه انا طلبت من صديقتي اتييب لي البروشور و ان شاء الله قريب انزل فيه موضوع

في احد منكم راح حق علاج الاكسجين؟

 

[& الذاهبه &]

هلا فيج ايمانوفااا والله مشتاقيلج

ماا ادري فكرة السفر تراودني بس مو للأردن لمصر عشاان التكامل السمعي والاكسجين

 

[ام التوحد]

رد : رد: هل لديكم طفل يعاني من التوحد- خلونا نتجمع

هلا فيج ايمانوفااا والله مشتاقيلج

ماا ادري فكرة السفر تراودني بس مو للأردن لمصر عشاان التكامل السمعي والاكسجين

مرحبا بنات
انا أفضل مصر أرخص من الاردن وبعد وناسه
وفي بالبحرين جهاز اسمه النيرو فيد باك تعرفونه
بالنسبه حق هوب مادري بس انا اشوف اطفال صغار بالفصول اللي تحت دقي عليهم وسأليهم 22496600

 

[shadona]

رد : هل لديكم طفل يعاني من التوحد- خلونا نتجمع

السلام عليكم ..

نصيحة حق خواتي اللي يعطون وصف حق حالة عيالهم و يبون تشخيص !!!

حبيت اقولكم خواتي الامهات ترى هالمنتدى بكبره ما في دكتور او دكتورة متخصص بطب الاطفال التطوري !

واللي موجودين كلهم امهات نفسي يحبون يعرضون تجاربهم و خبراتهم للاستفادة من بعضنا لا اكثر و لا اقل !

و اللي موجودين اهني اخصائيييين يمارسون تعديل سلوك فقط و ليس دكاترة و يعطون تشخيص و وصف ادوية حق عيالكم !

اصلا حتى عبير عوض و فاطمة العوضي اللي اهم الوحيدين بالكويت اللي مهنتهم اطباء اطفال - طب تطوري !

ياخذون ساعة و نص .. يقعدون مع الياهل عشان يتاكدون من التشخيص الصحيح و بالتالي يعطون و يحددون العلاج المناسب لحالتهم

لانه الصفات متشابهة سواء طيف التوحد او توحد او بس نشاط زايد مع قلة تركيز او تخلف دراسي او عقلي

الاعاقات كثيرة و احيانا صفاتها متشابهه و متداخلة و مشتركة وااايد و لكن الدكتور الدارس و المتخصص اهوا للي يقدر يفرق

فنصيحة خواتي راجعوا الدكاترة المختصين احسن ما احد يفتي عليج و يطمنج و الولد فعلا محتاج مساعدة و تحسفين انج ما بكرتي بالعلاج عشان يستفيد اكثر

او العكس يطلع ولدج صاحي ما فيه شي وهما يخرعونج و تدخلينا مدرسة الخطا مثلا .. انتبهوا يا خواتي الامهات اليدد عيالكم امانه

و رجااااء لحد يفتي وهو مو دكتور مختص و لا مارس مهنة دكتوراه بالطب التطوري .. الموضوع مو هين

 

[& الذاهبه &]

هلا بج شدوونه

اختي شفيج داشه بقوووه

تجمعناا للاستفاده من تجارب وخبرات بعض

والا اطفالنا كلهم تحت اشراف دكاتره واساتذة تعديل سلوك وتخااطب

وحبيبتي حتى المنتدياات الأجنبيه قااعدين يتبادلوون الخبرات

وهالمعلومااات اذا كانت صالح عيالناا فحياها الله

والي عاجبته التجاارب والخبرات يستفيد منهاا ويشووف الصالح منها لحاله ولده ويسأل الدكتور عنهاا واللي مو عااجبته
اهلا وسهلا بعد

اعذريني اختي بس الظاهر انتي مو متابعه التجمع من البدااايه اغلبناا يراجعون عند عبير وفاطمه

 

[shadona]

رد : رد: هل لديكم طفل يعاني من التوحد- خلونا نتجمع

هلا بج شدوونه

اختي شفيج داشه بقوووه

تجمعناا للاستفاده من تجارب وخبرات بعض

والا اطفالنا كلهم تحت اشراف دكاتره واساتذة تعديل سلوك وتخااطب

وحبيبتي حتى المنتدياات الأجنبيه قااعدين يتبادلوون الخبرات

وهالمعلومااات اذا كانت صالح عيالناا فحياها الله

والي عاجبته التجاارب والخبرات يستفيد منهاا ويشووف الصالح منها لحاله ولده ويسأل الدكتور عنهاا واللي مو عااجبته
اهلا وسهلا بعد

اعذريني اختي بس الظاهر انتي مو متابعه التجمع من البدااايه اغلبناا يراجعون عند عبير وفاطمه

لا اختي انا من حرصي قلته الكلام موجه حق الامهات اليدد اللي يدورون تشخيص حلاتهم اهنيي !! و اللي مو عارفين وين يروحون ، و صج ترى في ناس قاعدة تفتي و تشخص مرض عيالهم !!

و انا ذكرت اصلا هالمنتدى لتبادل الخبرات للامهات مثلنا .. والله حبيبتي الظاهر انتي اللي ما قريتي كلامي عدل.. شكرا