عملية الربط ... ضروري للأهمية!!!!

[زمزم 2010]

السلام عليكم .... كيف حالكم شلونكم طيبين إن شاء الله ...
بنات حبيت أسأل عن عملية الربط منو سوتها فيكم ياليت تفيدني .
بخصوص .....

هل هي تعتبر عملية وتخدير وبنج ... أو تطلعين بنفس اليوم ؟
هل لها آثار معينة أو أعراض ؟
كم تكلفتها بالضبط إذا مسويتها بمستشفى خاص؟
هل المستشفى الحكومي يسوي هالعملية إذا الوحدة محتاجة ربط؟​

ياليت اللي تعرف ترد ضروري للأهمية .


ويعطيكم العافية؟

 

[زمزم 2010]

رد : عملية الربط ... ضروري للأهمية!!!!

معقولة بنات مافي أحد مسويها أو حتى عنده معلومة ........... لا تبخلون علي بمعلوماتكم.


ناطرة ردودكم؟!!!!!

 

[زمزم 2010]

رد : عملية الربط ... ضروري للأهمية!!!!

اب ... اب .... اب ...اب

 

[منااير]

هلا زمزم هي عمليه بنج كامل وتطلعين بعد العمليه بيوم او يومين وانا سويتها بمستشفى الشركه فماادري بالخاص جم بس اعتقد 200 ويسوون لج بالحكومه اذا كنتي محتاجتها والله يكون بعونج ويسهل عليج

 

[كويتية ورديه]

ماعندي فكره .. وعسى الله يقومج بالسلامه حبيبتي .. ويتمم عليج بصحه وعافيه

 

[روعة خيال]

انا سويتها بدار الشفا خذوا علي بالضبط 259 دينار و العملية بنج كااااااامل ما تحسين بأي شي

و الحكومة يسوونها اذا احتجتي ربط

الله يهونها عليج انا الاسبوع الياي يفجون الربط

 

[جوري85]

حق منو يسوون ربط انا فيني اجهاض سابق احتاج ربط والا لا

 

[GiRLiTa]

انا سويتها بالاسبوع 12 من الحمل بمستشفى هادي ودكتورتي فوزية القطان كلفتني اذا ماني غلطانه 327
دشين الصبح تكونين صايمه والعملية بنج كامل ماتاخذ العملية وقت بس عقب العملية اييج عوار مثل الدورة يحطولج مغذي ووالعصر تطلعين اول يومين ينزل عليج دم خفيف بس عقب يوقف ماتحسين بشي وممنوع الجمااااااااااااع لي الولاده
الحكومة يسوونها
الله يتمم عليييييييييييييييج يارب

 

[ناتشوو]

حق منو يسوون ربط انا فيني اجهاض سابق احتاج ربط والا لا

الدكتورة تحدد
والربط للي عندها قصر في عنق الرحم

 

[بحر الذكريات]

الله يتمم عليج يارب

الربط يسوونه بالاسبوع 13 للي عندها ولادات مبكره او يكون عنق الرحم قصير شوي

انا سويته بخاص وكلفني 310 وطلعت ابنفس اليوم والعمليه بنج كامل بس عقب مايخف البنج اتحسين ابعوار نفس الدوره خفيف وتنزل افرزات بنيه خفيفه ويعطونج مثبت الدوفيستون فتره وتخلينه

ويسوونه الحكومه حق اللي تحتاج بعد

وماتشوفين شر

وروعة خيال الله يسهل عليج يارب

 

[روعة خيال]

تسلمين حبيبتي بحر الذكريات

و عسى ربي يرزقج التوأم الصاحي اللي يرفعون راسج جدام الناس

 

[زمزم 2010]

رد : عملية الربط ... ضروري للأهمية!!!!

مشكورين للي ردوا ........ ويعطيكم العافية ... وعسى الله يتمم عليكم ويرزقكم الذرية الصالحة .

 

[زمزم 2010]

رد : عملية الربط ... ضروري للأهمية!!!!

يالله بنات نبي بعد تجاربكم ... عشان نستفيد كلنا

 

[sweet fashion]

والله ماعندي فكره بس بحدود 200 قبل سنه رفيجتي سوتها عند دكتوره عاليه

 

[بحر الذكريات]

رد: رد : عملية الربط ... ضروري للأهمية!!!!

تسلمين حبيبتي بحر الذكريات

و عسى ربي يرزقج التوأم الصاحي اللي يرفعون راسج جدام الناس

اللهم آآآآمين ماقصرتي ياقلبي

مشكورين للي ردوا ........ ويعطيكم العافية ... وعسى الله يتمم عليكم ويرزقكم الذرية الصالحة .

اللهم آآآمين ويعافيج ربي

واي ترا اتذكر كنت اعرف وحده سوتها بمستشفى الجهرا وتمدحهم

 

[أحلى^حياه]

انا نفس غرليتا
والحكومه ينطرون لمن يفتح عنق الرحم بعدين يربطون !!
مادري شالفايده

 

[جمال دنيتي انت]

رد : عملية الربط ... ضروري للأهمية!!!!

حبيبتي نا مسويتها مرتين في مستشفي خاص لازم دخلين غرفة العمليات وبنج كامل تطلعين في نفس اليوم بعد ما تصحين من البنج سعرها تقريبا 200 الي 300