أحضر أو لا ... ساعدوني

[أم الفيصل]

بسم الله الرحمن الرحيم ...

السلآم عليكم ورحمة الله وبركاته ..

كنت أتابعكم كزائره وأستفيد منكم كثير خاصه بهذا القسم واليوم أنا سجلت لآني محتاره بأمر وأتمنى تشاركوني فيه ...

الحمدلله حياتي مستقره ودخلت بيت زوجي وأهله على مبدأ أني اكسب الصغير والكبير والحمدلله لقيت منهم كل حب وقابلتهم بالمثل كنت اسكن وياهم بجناح خاص لي ورزقني الله بأولادي ورحنا ببيت مستقل ... الحمدلله انا احب اوزن الأمور بعقل ولا استعجل بأي تصرف علشان ما أندم ... أتزوج أخو زوجي ببنيه أعتبرها أختي وهي لو كان بالبدايه شوية غيره وحركات بس كنت ما ادقق واطنش كثير علشان تستمر الألفه بالبيت الكبير ... والحمدلله رجعت لي اكثر من أخت بهذا الوقت لدرجة اي مشاكل تواجهها تجيني على طول قبل خواتها وكنت اعقل عليها كثير خاصه بينها وبين زوجها اللي يخونها بالخفا ووصار بالعلن واعلنها صريحه انا كذا تبين او مع السلامه قالت المسكينه لا بصبر عليك بس احترمني ولا تكلم حبيباتك قدامي راح بركن او غرفه بالبيت وصارت حياته هناك نت افلام ........... الخ

المهم كنت اصبرها ولو بداخلي اقول ما اقدر اعيش حياتها يوم وكرامتي اوجب علي لكن المسكينه لها ظروفها ومالقيت غيره ..
المهم وهاليومين واللي صدمني كثير انه تعرف على بنيه بشعبان ولحست مخه وقلت لزوجته اصبري مثلها مثل اللي قبلها لكن للأسف قرر يتزوجها الغبي وخطبها ووافقو اهلها .... بصراحه انا انصدمت خاصه انه كيف يرضى هاللون ؟؟؟؟
أهل زوجي معارضين بس اقنعهم وبالاخير رأيه هو اللي بيمشي ...
زوجته قالت ماعليه يمكن يقوم حظي مع الثانيه !!!!!

بنات انا في حيره كبيره ... هذي بحسبة اختي وهذا عرس اخو زوجي ... مو قادره احضر ولا ابي احضر الزواج !
اخاف من زعل أم زوجي واهله ... زوجي يقول على رغبتك بس ما يندري بكره ايش يصير ...


شورو علي ربي يريحكم ​

 

[توليب بنفسجي]

رد : أحضر أو لا ... ساعدوني

ما افضل انج تروحين احتراما لمشاعر رفيجتج اللي اهي الزوجه الاولى
و شرحي سبب عدم حضورج لام زوجج

 

[عقــد منثور]

رد : أحضر أو لا ... ساعدوني

علاقتج معها زينه حسبه اختج .. لاتحضرين

حطى نفسج مكانها شنو شعورج لو اهى حضرت عرس زوجج لاقدر الله .. واهل زوجج اعتذرى منهم ..

الله يكون بعونها..

 

[أم الفيصل]

رد : أحضر أو لا ... ساعدوني

أشكرك وهذا اللي كان براسي بس الخوف من بكره وما ادري لو العروس الجديده تدخل سوؤ الظن في راسهم خاصه دخولها للعائله من الاساس غلط تصوري شاريه رضاه حتى بالفلوس حسبي الله ع بنات اليومين وش لها رجال متزوج ؟؟؟
وحسبي الله في كل زوج ما راعي حق الله في بنت ناس صانتة وعفة نفسها من اجل رفع اسمه !!

مره ثانيه اشكرك ..


,

 

[أم الفيصل]

رد : أحضر أو لا ... ساعدوني

علاقتج معها زينه حسبه اختج .. لاتحضرين

حطى نفسج مكانها شنو شعورج لو اهى حضرت عرس زوجج لاقدر الله .. واهل زوجج اعتذرى منهم ..

الله يكون بعونها..

الله لا يحطني مكانها هذي مسكينه ولها ظروفها ما احد بيوقف معها من اهلها .. ولا أنا ما اقبله زوج من الأساس

ليتهم يقدرون اعتذاري ...

 

[kookiz]

لا حبيبتي لا تروحين نصيحة

 

[semaasem]

ومسوي عرس بعد لاحول ولا قوة الا بالله

ما اتعظوا من حادثة الجهراء الله لا يعيد الشر ان شاء الله

الله ياجرها في مصيبتها ويخلف لها خير منها والله يسخره ويهديه لها عليها بالدعاء وقيام الثلث الاخير من الليل على قولتج بنات هاليومين

يحرون قبل لا دروا انه متزوج خلوه لا الحين عادي عندهم ووحدة تقول احسن علشان ما اجابله 24 ساعه يعني يبون المتزوج لاباركت فيهم

 

[ShoSho_4]

لو انا مكانج ما احضر واطلعلي اي عذر بس ها حزت الحزه يعني مو تعطينهم خبر من قبل العرس بجم يوم انج ما بتروحين لا حزت العرس خليكتشفون انج ماييتي ولما يسإلونج قولي ولدي مريض او انج تعبتي فجأه (بعيد الشر عنكم ان شاء الله)
والله يصبر قلبها ويمسح عليها يارب
خلتستغفر وايد والله يفرجها ان شاء الله

 

[الأميرة جوري]

استشيريها,,,يمكن ترضى علشان تعلمينها ن الاحداث <<وايد حريم جذيه

 

[كسر.قلبي.زماني.]

رد : أحضر أو لا ... ساعدوني

لااااااا تروحييييييييين

 

[أم الفيصل]

رد : أحضر أو لا ... ساعدوني

الله يسعدكم اخواتي ماقصرتو

وبإنتظآر البقيه ...


دمتم ..





,

 

[ريمـا]

انتي وش تبين تسوين سوووويه
شكلج ودج تحضرينه
بس خايفه على مشاااعرها

الله يسخرلها زوجهاا

 

[أم الفيصل]

رد : أحضر أو لا ... ساعدوني

لا يا اختي ما ابي احضره بس اللي شايله همه أم زوجي مره احبها وتحبني
ايش تكون ردة فعلها وهي متوقعتني افرح معهم .... هذا اللي محيرني بس
يعني تخيلي بفرحة ولدها وزواج كبير على ما سمعت والعروس من عائله معروفه ومايسوون اي زواج
وأم زوجي تستشيرني بكل امورها لحبها فيني صعبه انه اقول لها ولدك غلطان وانا ادري انها ما تصدق فيه
وبنفس الوقت صعبه انسى حزن اختي ؟؟؟؟

 

[لوازم العائلة]

رد : أحضر أو لا ... ساعدوني

سوي الشي الي يمليه عليه ضميرج
انا اقول لاتحضرين
وحطي نفسج مكانها
وان زوجج مثل ماراح تحضر هالعرس سهل عليها تحضر عرس زوجج عليج
وديري بالج ترى الدنيا دواره
وبعدين العرس ماراح يوقف على حضورج او عدم حضورج

 

[أم الفيصل]

رد : أحضر أو لا ... ساعدوني

مع اني ما احضره ومقتنعه بذا الشئ اختي

بس العذر ؟؟؟

 

[هدولى]

رد: رد : أحضر أو لا ... ساعدوني

سوي الشي الي يمليه عليه ضميرج
انا اقول لاتحضرين
وحطي نفسج مكانها
وان زوجج مثل ماراح تحضر هالعرس سهل عليها تحضر عرس زوجج عليج
وديري بالج ترى الدنيا دواره
وبعدين العرس ماراح يوقف على حضورج او عدم حضورج

كلامج صح .

 

[لوازم العائلة]

رد : أحضر أو لا ... ساعدوني

انا بفهم ام زوجج ليش فرحانه
بزواج ولدها؟
ولا بقهر بنت الناس؟
للعلم اليوم عندي عرس وحده فريبه حيل من اهلي وماراح اروح مع انهم يستاهلون الواحد يروحلهم وقراب حيل علي
بس ماراح اروح لانه ام زوجي بالعنايه وتحت رحمة الله وللعلم علاقتي بحمولتي موزينه لي اخر لحظه وهمه يحرضون زوجي انه يطلقني
انا اقدر اروح العرس واعطي النيا طاف واتحجج انها ماماتت لكن مراعاة لزوجي مارح اروح مع انه يحن علي يقول روحي
انتي مسكي العصايه من النص
قوليلهم انا بروح وشاريه نفنوف
ووقت العرس طلعيلهم اي حجه حتى لو تتفقين مع اهلج على بو انه صار لكم ظرف مع اهلج منعج انج اتيين
وياليت بهاليوم تكونين مع مرت حماج تواسينها وتاخدين اجر (من نقس عن مؤمن كربه)
وحاولي تبينين لاهل زوجج شخصيتج وانه محد يسييرج
لاتبينين لهم انج طيبه وكل شي يبونه تسوينه لهم حتى لو موعاجبج

 

[الاميره وبس]

انتى قولى للبنت عادى احضره ولالا
اذا عادى عندها احضريه
عشان توقفين مع ام زوجك اهيا الاهم مو المره الاولى

 

[بدويه قمر]

رد : أحضر أو لا ... ساعدوني

حبيبتي لاتحتارين ولاتفكرين هذه حماتج وهم هذه حماتج بسنة الله ورسوله انتي شاوري الاولى قوليلها انا بحضر العرس مو حب فيهم بس عشان اشوفها واشوف اهلها وماراح اكون فرحانه وحضوري عشان الناس تشوفني خاصه اعتقد انج مرت الكبير يعني واجب انج توقفين مع خالتج وانتي الي عليج تفهمين هم رجلج عشان لاسمح الله لايفكر انج فرحانه بلي صار ولاتسوين عداوات مع الثنتين خليج عادله بينهم وفهمي الاولى كثر ماتقدرين انها تحاول تكسب زوجها لان صدقيني الرجال مايتزوج الثانيه والثالثه الا لانه شايف قصور من مرته الله يوفقهم ويجمعهم على الخير

 

[مدام زيزو]

رد : أحضر أو لا ... ساعدوني

صراحه موقف يحير اخاف ماتروحين واهل زوجج يزعلون؟
انتي شوفي خالتج وحمواتج عادي عندهم؟ والا اخاف يزعلون منج ويشيشوون زوجج عليج؟