مآشآء الله عليج يا حرومه انسانه مثاليه ملاآآآآآآك تتكلمين بكل نواحي الحياه الدينيه والاجتماعيه والنفسيه والاخلاقيه والعائليه والزوجيه والاقتصاديه والسياسيه وغيرها وغيرها فعلا حسستيني ان معانا ملآك بالمنتدى كل شي صح انتي تسوينه وتصححين للناس اخطائهم ووقتج كله لزوجج وبنتج وبيتج وللناس ولرفيجاتج ممكن تعلميني شلون مقسمه وقتج يعني كل شي تسوينه بيوم واحد ؟؟ مآشآء الله ودي اصير نفسج 
... واصلي ومنها للاعلى ان شاءالله ~
بالعكس انا انسانه مومثاليه
والدليل اني مره اتنرفز وانقهر واحط موضوع اتحلطم
ومره اتضايق من شغله بحياتي فاطلب النصيحه
ومره اغلط واذا احد بين لي غلطي احاول اني اتوب واستقيم
فانا انسانه مو مثاليه انا انسانه عاديه
اما بموضوع شلون مقسمه وقتي وهو ببساطه
اليوم فيه 24 ساعه لو كل يوم خذيت لي ساعتين لنفسي ونمت 6 ساعات هذي 8 ساعات اجابل فيهم روحي
واذا يهمج وايد تعرفين جدولي
فجدولي كالتالي :
اقعد الفير اصلي وازهب ريوق ريلي وملابسه للدوام وبعدين اقعده ونقعد نتريق مع بعض
- بعدين اقعد بنتي واسبحها واوكلها والعب معاها شويه وانومها مره ثانيه
واقوم اسوي شغل بيتي اول شي ابلش بالصاله وبعدين غرفتي وبعدين تكرمين الحمام وبعدين المطبخ ومواعين الريوق
- بعد ما اخلص ادش النت وانزل درس ديني واقعد اتمعن فيه وادرسه عدل
- بعدها اطبخ الغدا
- اتسبح والبس هدومي واكشخ واقعدانطر ريلي تكون بنتي قعدت بهالفتره فاقعد معاها وفي هالاثناء اشبك اسولف مع صديقاتي بالمنتدى او القروب
وبعد ما يي ريلي من الدوام نحط الغدا ونتغدا وهو يدش ينام له ساعتين وانا اقوم اغسل المواعين والمطبخ بعد الطباخ
وارد اقعد مع بنتي لين يقعد ريلي ولما يقعد يكون الشاي زاهب واذا فيه حلو ونقعد نطالع التلفزيون ونسولف
عالمغربيات اذا بسير على احد يوديني ريلي وهو يروح عند ربعه قبل الساعه 9 نكون بالبيت نتعشا ونقعد نطالع التلفزيون وعالساعه 11 ننام
اما اذا كنت بطلع مع رفيجاتي اشوف الوقت اللي يناسبهم واشاور زوجي
والبنات الي بالمنتدى يعرفوني وطالعين معاي يدرون اني مرنه واي طلعه اكون مرتزه اول وحده
هذا جدولي اتمنا تكونين استفدتي منه
اما بالنسبه اني ما سوي اشياء غلط لا حبيبتي اسوي بس مايصير يعني اذا سويت شي غلط احطه بالمنتدى شنو راح تستفيدون منه ؟
ولا حبيت اصحح حق احد بالعكس هذا موضوع انا قريته وكان ودي ارد عليه ولكن انحذف فحطيته بموضوع بروحه يعني موضوعي هذا مجرد وجهة نظر
وتسلمين حبيبتي ونورتي مووضوعي
