سويت مجبوس الدياي طريقة" الغاليه نونو" طلع عجيب ، وطمعناه ابمجبوس اللحم

[^وجد قلبي^]

امبيييييه حدييي جوعااانه

ماتقصر ماما الغاليه :>

 

[صديقة د. شريفه]

ويه ياااا بعد من قام وقعد يا الغاليه نونو ، مشكوره على الطريقه

والله يالغاليه لما مارديتي سويت طريقه وحده غيرج في مجبوس اللحم خذيتها من منتدى ثاني ، اطلعت الطبخه فاشله ،،، مجبووووسج ووين ومجبوسها وين فرق السما عن الارض

ما شاءالله مجبوسج ريحته خنينه ، وبهاراته امبينه عدل

والأهم من هذا كله انج مو من هاللي يتنيحسون وعطيتينا الطريقه بالتفصيل الممل وفعلا صار مثل ما نبي

الله يخليج لأهلج ولا يحرمهم منج ،، ومشكـــــــــــــــــــــــــوره وايد ،

واللي يعافيج أبي طريقتج في عيش المشخول ومرق الباميه

 

[الغاليه نونو]

من عيوووني الثنتييييييييين غلاتي تامرين امر

يالله دشي المطبخ وزهبي شغلج بالحرف الوااحد

المشخوول يعتمد بعد علي نوع العيش انا ماااطبخ الاااا اكسترا اكس ال

تنقعينه بماي المصفي عادي انا اخليه ساعه تقريبااااا منقووع

واتييبين جدر العيش اللي بتطبخين فيه تحطين الماي وقفشه صغيييييره مالت الجاي تحطين خل بالماي تدرين ليش الخل؟؟؟؟؟؟؟؟ يعطي بيااض ناصع حق حبة العيش ويخلي شكلها يهبل

وتحطين الملح وجم ورقة قار وجم حبة هيل عدل

وتكونين مقصصه البصل جوانح وحامسته وحطي عالبصل شوي كركرم وكمونوخليهم علي كتر

عقب مايغلي الماي تكتين العيش وتخلينه ليما يستوي وتشخلينه اتييبين جدر العيش ترزينه عالجوله حطي بقاعة الجدر شوية من هالبصل اللي حمستيه وكتي العيش فووقه وباجي الحمسه مالت البصل تحطينها علي العيش من فوووق واذا حبيتي تحطين نتيفة ماي ورد وصبغ الزعفران يكون احلا حق منظر العيش وانتي تنجبينه وتالي تقصدرين الجدر وتغطينه وتحطين الحديده وتقصرين عالجوله وتخلين العيش يتسكر ويااخذ حاصله بالطبخ

حق مرقة البامياا تحتاجين بطاط وباميا وبصل وطماط وخمس اعواد كزبر مفرومين اذا مااتبين الكزبر مولزوم ومعجون طماط وكركم وكمون ولومي سحاري وثلاث فصوص ثوم مدقوقين حيل مكعبين ماجي

تاخذين الجدر وتحطين الزيت اللي بتطبخين فيه وتحمسين البصل ليما تشوفينه ذبل ولونه بدا يشووقر شوي تقطين عليه الثوم وتحمسيينه وتالي البطاط وتحمسييينه وتحطين الكركم والكمون والماجي والطماط مفروم والكزبر المفروم وتحمسيييييييينه زين ليييما تشوفين الحمسه فيها ماي من الطماط يعني موناشفه تحطين تااالي معجون الطماط والمرووق وشوية ملح وتخلين الماي يغلي غلوتين ثلاث قطي البامياااا عليهم وقصري عالجووله \
اذا تبين المرقه خاثره طبعااا تزيدين كمية الباميا شوي

في ناس يحبون اللحم مع الباميا والبطاط تسوين نفس الطريقه بس بالحمسه الاولي مع البصل والثوم تقطين اللحمه علشان تتشرب طعم البصل والثوم والبهارات


تقدرين تضيفين فاصوليا بيضااا اذاا ماتبين بامياا بس تبين مرقة بطاط وفاصوليا بيضااا

تقدرين تحطين ورق سلق مع البطاط والفاصوليا واللحم بدون باميا
يعني انتي وذووقج

بس هذااا بشكل عام المشخوول ومرقة البامياا ولماااا يستوي اللومي السحاري بالمرق فقصيهمممم بالجدر وحوسي المرقه علشان يعطي طعم الحموضه واذا ماتبين تقدرين تخلين اللوميه علي عدالها حق اللي يبيها

واي سؤااال من عيوني ياااقلبي

 

[صديقة د. شريفه]

وي يا عسى عمرج طويل والله يا الغاليه نونو ، والله لا يحرمنا منج ،، واحنا تلميذاتج وانتي أستاذتنا ، انا وجبتي المفضله مرق باميه وعيش مشخول ، ومابي أكلف عليج وأتعبج بأسئلتي وايد ، بس انا فعلا فعلا ودي أعرف الطريقه الأصليه حق المموش ، لان مو أي أحد يضبطه ، وأقصد المموش من غير الربيان اليابس

سوالف ناس قبل اللي يقعدون على اليال معاهم جدير مموش (تصغير للجدر) ابوسطه ملة الدقوس ودهن العداني ، و يلحسون الجدر لحاس حتى الحكوكه ما يرحمونها ، بعدين يستلمون الرقي الحمر

 

[الغاليه نونو]

تامرين امر تبين المموش الساده بدون ربيان ولااا شي مال البر واليمعات عالبحر يهبل مع دقوس الصبار والا دقوس الطماط المفلفل الحار والاجار والخضره واللبن


شوفي يالحبيبه

تاخذين الماش تنظفينه وتغسلينه زين وتنقعينه

والعيش مغسوول ومنقع

وعندج بصل مفرووم وفلفل اسود وكاري وكركم ولومي سحاري وطماطتين وملح واذا حبيتي حطي مكعبات ماجي واذاا ماتبين مولزوم

المهم اول شى تسوينه اتيبيييييين الجدر وتحطين فيه سمنه والبصل المفروم وتحمسينه ابي لون البصل يصير اشقراني وتالي قطي عليه اللومي السحاري والكركم والكاري والفلفل الاوسد وشخلي الماش من الماي وقطيه عالسمنه وقطي عليهم اللومي السحاري وفرمي الطماطتين وقطيهم عالماش وقصري الجوله خلي الطماط يتمخمخ شوي وبعدين حطي الماي عالماش وخليه يطبخ يطبخ لين تحسين ان حبة الماش استوت

اتيبين العيش تشخلينه من ماي النقع وتكتينه عالماش وتخلين مستوي الماي فوق العيش بصبع واحد لي شفتي الماي ابتدا ينقص تحطين الحديده وتقصرين عالجوله

عندج علي كتر بصله وحده جوانح محمرتها بشوي سمن وشوي ماي زعفران
لي قصرتي الجوله حركي العيش شوي بالقفشه الخشب الطويله حوسي العيش اشويه وكتي الفرقاعه علي العيش وكتي ماي الزعفران وغطي الجدر بالقصدير وقصري عالجوووله حيل وخلي العيش يتسكر تقريبا نص ساعه وتالي نجبي واكلي وادعيلي

هذا الماش الساده بدوون ربيان ولا لحم ونتي ياااقلبي ماعليج الا تطلبين وانااااا بالشوفه فديتج

 

[صديقة د. شريفه]

مشكوووووووووووووره ويا عسى عمرج طويل ما قصرتي ، الله يخليج لنا ان شاء الله يا لغاليه نونو

 

[الغاليه نونو]

مشكوووووووووووووره ويا عسى عمرج طويل ما قصرتي ، الله يخليج لنا ان شاء الله يا لغاليه نونو

تامريني امر غلاتي ماطلبتي شى واذااااا تبينه يوصلج مطبووخ زاهب من عيوني الثنتين بس علي شرط الجدر عليج وباجي الشغل علي انا هههههههههههههههههههههه

 

[صديقة د. شريفه]

ما اتقصرين من طيبج والله ، ما نستغني عنج

الغاليه نونو : ما فكرتي اتسوين لج كتاب طبخ ؟

ترا كتب الطبخ اتسوي شغل هالايام ، فما بالج وانتي تعطينا الطريقة الصح من غير لف ودوران؟

والله سويلج كتاب طبخ كويتي ، وسميه مثلا : " الخلطه السريه في طبخ المجابيس الكويتيه " هههه لاتضحكين على اقتراحي انا والله من صجي ، وعشان انسويلج دعايه بين الاهل والاصدقاء

 

[د.شريفة]

يوعتوني الله يهداكم
خليتيني اسعبل يا صديقتي الصدوقه
لدرجة ان شميت ريحة المجبووووس
اطالبج كيفج ابي الحين الحين
معروفه يالغاليه كل شغلج حلو ماشاالله عليج

 

[صديقة د. شريفه]

شروووووفه طافج مجبوسي ،، بس البركه في الغاليه نونو ، والله طريقتها اتينن ،، بس حبيبتي العين ما تعلى على الحاجب وانتوا اللي شغلكم كله اينن وعجييييييب الله يسلم ايد خالتي

 

[dana8]

مشكورين وتسلم ايدك على المجبوس انا وايد احبه بس ما اعرف شلون اسوي الدياي لما يكون فوق المجبوس لونه موطبيعي وريحته ما ادري اشلون ايكون شذي شنو بعد السلق اتحطونله بهارات وزعفران علشان يصير اصفر وامبهر واقليه ولا اشويه

 

[صديقة د. شريفه]

دانه سوي طريقة الغاليه نونو في انج تشوين الديايه مو تقلينها أحلى

جربتها طلع الدياي ترف ولونه اينن ، بعدين رديتها فوق العيش بس عشان تاخذ الريحه

 

[أحلى همبه كويتية]

تسلم ايدياتكم
شهيتوني وأحنا بالدوام على لامجابيس

سؤالي وين مطحنة سمرا عدن
بصراحة أذكر أنا شايفتها بس الحين مو ذاكرة العنوان