حالة خاصه ؟؟ وتعالجين بمستشفى الصباح دشي و كوني حريصه

[تبارك الرحمن]

السلام عليكم ورحمة الله وبركاته

يمكن واااايد من بنات المنتدى عارفني و عارف قصتي مع مستشفى الصباح (الصلاخ)
طبعا كنت حامل ودخلت المستشفى قعدت 4 اشهر خربطولي الدنيا يرفعون وينقصون بابر السيولة ( الكلاكسين)
انا طبعا عندي صمام صناعي معدني ومسوية اكثر من عملية في القلب بسبب الصمام لكن رب لك الحمد دكاتنرة لندن قالوا اني امارس حياتي بشكل طبيعي ادرس و اتزوج و اييب عيال حالي حال اي انسان طبيعي
انصدمت يوم تزوجت وحملت ان هالدكاترة و الله العظيم شقول دكتور مستشفى الصدري يقول كلمه و الولاده يقولون كلمه و انا الي ضعت في الطوشة
حسبيالله ونعم الوكيل دكتور الصدري كتب تقرير في حالتي خوف كل دكاترة الولادة قاموا يزيدون السيولة على كيفهم
المهم اني ولدت بتاريخ 13\1\2011 في غرفتي الجناح الخامس اطلق من الساعه 6 وكنت حامل بنص السادس
و الله العظيم يا بنات ولدت من غير دكتورة توني بجر ما اعرف الطلق بس انا الي قتلهم ان راس اليبي نزل
تخيلوا ولدت بغرفتي مانزلوني
المهم طلعت من هالمستشفى الكئيب لان قصتي طويله حييييييييييييييييييييييل طلعت منه و انا حامدة رب على كل شي لان البيبي توفت بلحظتها سحبان الله قضاء الله وقدرة لكن انا صارت معاي اخطاء طبية كثيرة كثيرة

رحت يوم 25\1 عندي مراجعه عند دكتورة الدم اخذ ملفي قاعدة اتصفحه الا الصدمه @@
ملفي مبيوقه منه اوراق و الله العظيم تحاليلي كلها من 7\10\2010 لي يوم 16\1\2011 مافي اي ورقة تحليل
ولا موجودة سونارات البيبي و لا تقاريري الطبية و لا سونار مستشفى الصدري شسالفة ؟؟
رحت الملفات - المخازن- السجلات و الاحصاء
مافي شي الملف مو موجود الا اوراق المرور الي يكتبون فيها الدكاترة وين راحت محد عارف
رحت قدمت شكوى عند مديرة المستشفى قالولي تعالي بعد اسبوع رحت اليوم لان صار اسبوعلى تقديم الشكوى
طبعا عقب ما تهاوشت مع سكرتيرات المديرة يالله طلعوا الرد طبعا رد الكتاب الي متحول ان مافي اوراق بالملف و ان الاوراق ماخوذه طبعا سويت مشكلة ثانية علشان اقابل المديرة وفعلا قابلتها جزاها رب الف خير
مرة محترمة ووقفت معاي وقفة وقعدت تحلل معاي كل نقطه اقولها
وفعلا اخر شي توصلناله ان في شي صاير و يون يغطون عليه لان بشهادة وفاه البيبي كاتبين الوفاه غير معروفة
و الكل قاعد يردد ان انا بسب القلب نزل البيبي و انا و الله العظيم طول هالفترة ماشكيت من سالفة القلب ابدا و اهم عارفين هالشي عدل
تحول الموضوع تحقيق و بيحققون الموضوع مع كل فرد قابلني طول ال 4 اشهر
الحين ليش وصلنا لي هالمستوى قاموا الدكاترة يغلطون ويبوقون و يجذبون
بنات ديروا بالكم على ملفاتكم في اي مستشفى وحرصوا على تصوير كل ورقة و اخذ اكثر من نسخه منها
لان بهالطريقة حقي ضاع

وسؤال اخير : الي عندها خبرة شلون اقدم على السفر للخارج اتفيدني لو برسالة خاصه​

 

[jawaa]

حبيبتي الله يعينج ويصبرج ويرزقج بالذريه وعوض خير انشالله :hjy5jewf:

 

[تبارك الرحمن]

رد : رد: حالة خاصه ؟؟ وتعالجين بمستشفى الصباح دشي و كوني حريصه

حبيبتي الله يعينج ويصبرج ويرزقج بالذريه وعوض خير انشالله :hjy5jewf:

اللهم امين يارب العالمين

 

[KOKO_284I]

رد : حالة خاصه ؟؟ وتعالجين بمستشفى الصباح دشي و كوني حريصه

حبوبه الله يسهل عليج ويرزقج الذريه الصالحه بس ليش رايحه حكومه ليش ما رحتي خاص ؟

انشالله البنات يفيدونج

 

[دو^ري^مي^]

ربي مايضيع حقج وتحسبي عليهم وادعي عليهم ان ربي يراويج يوم فيهم حتى الخاص مامنهم امان انا كنت حامل بسبعة اسابيع ونزل علي شوية دم بني رحت دار الشفا ولا دكتورة نجوى يقولون استشاريه حرمه كبيرة مصريه تلبس نظارات طبيه ماتدري وين الله قاطها سوتلي سونار خارجي جان تقولي اسفه ياحبيبتي ده مفيش حمل انا اهنيه انصدمت طقتني البوهه قلتلها بس احس بلوعه واتنسى ووووو من اعراض حمل جان تقول بقولك مافيش حمل اظاهر كانت متاخرة عليكي فقلتلها متاخرة شهرين اشدعوة المهم جان تقولي روحي سوي سونار داخلي والمفروض ماسويه بس هي ماتفهم وسويته بس عشان اقطع الشك باليقين وشوف منو الصح انا والا اهي وبس سوولي سونار داخلي ولا اشوف كيس الجنين وحجمه زين وسمعوني نبضه وقالولي حتى مافيه دم متجمع صوبه ولا شي لاتخافين ورجعتلها الغرفه تطالع مستغربه السونار والتقرير وعطتني مثبتات مع بيبي اسبرين وبس رحت البيت ولا دم احمر ينزل علي لرحت الصباح ولا يسوولي دخول طبعا الدم ماوقف وثاني يوم الصبح ولا بعد السونار جان يقوللي الدكتور لازم تنظيفات البيبي ميت مافيه نبض بجيت طبعا وربي لك الحمد على كل حال بس اللي فهمته من الاطباءانه غلط واكبر غلط اسو سونار داخلي وانا حامل واحتمال بسبته طاح الجنين
طبعا الصباح عطوني موعد مراجعه وطلب مني الدكتور الدايخ عصام بيومي تحاليل اسويها وقاللي تعالي بكرة اللي اهو يصادف يوم الاربعاء سويهم غبت عن دوامي ورحت الاربعاء وبعد الزحمه والنطرة تقولي مالت المختبر هالتحاليل تسوينهم يوم الثلاثاء بس واصلا غلط هالتحاليل لان كل تحليل بقسم اشلون الطبيب جامعهم بورقه وحده انا اهنيه عصبت وشقيت التحاليل وحرمت اراجع الصباح

 

[تبارك الرحمن]

رد : حالة خاصه ؟؟ وتعالجين بمستشفى الصباح دشي و كوني حريصه

koko_284i: حبيبتي الخاص ما يتسقبلني دام اني حاله خاصه

دو^ري^مي^ : حبيبتي انا شكثر سويت سونار داخلي ابدا ابدا ماله شغل الاجهاض اهو الفحص الداخلي الي الايد يا قلبي اهو الي يسب فتح للرحم اما السونار الداخلي ما منه خوف و هذا الكلام قالي اياه الدكتور ناهض حمادية لاني كنت اراجع عنده من البدايه و حالتي رب لك الحمد مستقرة
وقتله عن هالموضوع قالي لا تخافين ما بياثر ابدا وفعلا ماكان ياثر ​

 

[شيخة الحلوة]

هلا تبوكتي الغاليه
بعد عمر يوالله
عاد اليوم ريلي يسأل عنج يقوللي شلون رفيجتج مافيج خير ماسالتي عنها وعلى ملفها شصار عليه
:O_SHH_:


قلتله اي والله
والله توني بادزلج مسج على تلفونج اسالج

ماادري حياتي بس اناانصحج روحي بره روحي لندن

وعالجي وخليج طول الفترة هناك
عسا ربي يوفقج يارب
دوريلج وااسطه قوية لان الحين للاسف كل شي ترى بالواسطة:denya:

وعسا ربي يرزقج بالتوينز يارب
ويعوضج خير ياقلبي

 

[زمزم 2010]

رد : حالة خاصه ؟؟ وتعالجين بمستشفى الصباح دشي و كوني حريصه

ياحياااااتي ياتبووووووووووكة ....... لاتحاتين ولا تضايقين .... ربي ماراح يضيع تعبج اللي تعبتيه عسى الله مايحرمج الاجر ولايخسرج وان شاء خيرة لان الخيرة باللي يختاره الله

اهم شي بالموضوع كله >>>> سلامتج <<<<. والضنا الله بيعوضج خير وعسى الله يرزقج بالضنا السليم المعافى

وعسى الله يوفقج وين مارحتي

 

[ام لين3]

رد : حالة خاصه ؟؟ وتعالجين بمستشفى الصباح دشي و كوني حريصه

تبوكه
حبيبتي والله اذوج هالمستشفى حسبي الله ونعم الوكيل
وعن العلاج بالخارج سألت ريلي توه لانه كان مودي امه قبل جم سنه
لازم المستشفى الخايس للاسف اهوه الي يعطيج تقرير ان مالج علاج بالكويت وبعدين تروح اوراقج وتقاريرج
لجنه دكاتره في العلاج بالخارج واهمه يقرون الموافقه وتروحين بأذن الله دوري واسطه خل يمشونج
​

 

[زمزم 2010]

رد : حالة خاصه ؟؟ وتعالجين بمستشفى الصباح دشي و كوني حريصه

كلمات أعجبتني : - الزيتون عندما يُضغط: يأتي لنا بالزيت الصافي،، ~ والفواكه عند عصرها: تعطينا ألذ العصائر ،، " فإذا شعرت بمتاعب الحياة تضغطك بهمومها؛ وتعصر قلبك .. فلا تحزن !! إنه » الله « !!!! يريد أن يخرج أحلى ما فيك: (ايمانك) لتنال الأجر، فاستعن بالصبر

 

[ايمان80]

حاسة فيج حبيبتي
جربتهم بولدي الاول بغيت اروح فيها
وللحين ماني قادرة انسا اللي صار
وحلفت اني ما اروحلهم الخمة
صايرين احزاب المصري مع المصاروة والهندي مع الهنود ربعة
واحنا ضايعين بالطوشة
واللي يحر اكثر ان ريلج واهلج يخلونهم برة
صج هالمستشفا الداخل فيها مفقود والطالع منها مولود
حسبي الله عليهم

 

[نشيج الروح]

الله يعووووضج خييييير ........ز ويبدلج بذرية بدل الي مات .... ويقر عينج وعين أهلج فيهم

 

[حبيبي عبووودي]

رد : حالة خاصه ؟؟ وتعالجين بمستشفى الصباح دشي و كوني حريصه

تبوكه حياتي الله يرزقج ان شاء الله
وهالمستشفى هذا كل من يشتكي منه اتوقع حتى لو تلقين اوراقج وترفعين عليهم دعوى او تشتكين ماراح يسوولج شي
وكلي امرج لله سبحانه والعلاج بالخارج انا اللي سامعته مايسفرون الا اللي فيها عقم ولا يكون لها 15 سنه مو يايبه اعيال

 

[bluegg]

حياتي تبوكة الله يأجرج ويصبرج بس امااااااانه عليج لا تخلينهم وخليج معاهم بالتحقيق واهم راح يزهقونج بروحه ورده بس اهم شي تاخذين حقج منهم حسبي الله عليهم

تصبري وانا ماعندي فكرة على العلاج بالخارج واذا ما طالو معاج والله وصليها لي التلفزيون يا سكوب او العداله

شالمسخرة هذي الكويت ديرة قانون حسبي الله عليهم:eh_s(13):

 

[شووقة]

رد : حالة خاصه ؟؟ وتعالجين بمستشفى الصباح دشي و كوني حريصه

الحمدلله على سلامتج بعد عمري ياتبوكة انشالله الله يعوضج بتوائم
والله مااقول الا حسبي الله والنعم الوكيل في مستشفى الصباح

 

[NODA 2]

والله يا تبارك اول امس رحت حق بنت خالتي توها والده هناك و حطينها عمومي لما دشيت الجناح وااااااااااااااااااااااااااااي
قلت الحمدالله علي النعمه والحمدالله انه في مستشفيات خاصه بالكويت شنو رطوبه في المستشفي الصبغ مقشر وماكو نظافه
واااااااااااااااااااي صج صج اخترعت شنو هالمستوي ربي سترك و حطين البيبي يمها واهي توها والده يعني اخذوه لما تطلبه يبوه اووووووف والله تضايقة الحمدالله علي كل شي مادري شلون تحملتي 4 شهور صج مأجوره
عالعموم الحين ماكو علاج بالخارج إلا بعد فتره معينه تقدرين تتعالجين بس بالديره واتني صغيره إن شاء الله ما فيج إلا العافيه
يا عمري

 

[ملكه الحطب]

الله ياجرج ان شاء الله ويعوضج خير يااااااااااااااااااااااااارب

وانا ولدتي بالصباح توني والولاده زينه ولاني كنت حاله خاصه بعد بس للاسف مااهتموا بولدي كلشششش كلشششششش كانوا مو منظفينه عدل تخيلوا وكان فيه صوت يطلعه من صدره لاني مو منظفينه بعد من داخل وكانوا كل مايجيبونه كله وصخ يرجع يقلبون الفراش ويحطونه وملابسهم كلها ترجيع وانا اشوفه جذي وانقهرت عليه ولاني بجر واول مره اولد وكنت تعبانه وقعدت 3 تيام وحسيتهم طويييييييله والله لايحدني لهم لانه اقهروني على ولدي اللي الحين صار عمره 3 شهور توه يتحسن

 

[c a t w o m a n]

عسى ربي يعوضج عن كل لحظة صبرتيها

والله ما عندي فكرة أتمنى البنات يفيدونج


وانشالله ما تمر هالسنة إلا إنتي تارسة البيت بالبركة واليهال

 

[تبارك الرحمن]

رد : حالة خاصه ؟؟ وتعالجين بمستشفى الصباح دشي و كوني حريصه

حبايبي ما قصرتوا و الله على ردودكم
الطيبة و انا ابي سفر للخارج ابي اروح اخذ تقرير
من برة عن حالتي غير هالتقرير الي عافس الدنيا
عل العموم انا ناطرة شيصير مع مديرة المستشفى

 

[~*~الملكة~*~]

الله يعوضج يارب خير

ويرزقج بالذريه الصالحه

وان شاءالله يطلعون اوراق ملفج كلها

ماعندي خلفيه عن العلاج بالخارج بس انتي روحي هناك وساليهم

يفيدونج اكثر