خطة شراء بيت بدون تعب لحديثي الزواج

[leolady31]

هلو بنات
انا صارلي فتره كله ادش منتدانا و البنات كله يشتكون من اسعار العاقارات و ان مو قادرين يحصلون بيوت

من بحثي في مواقع العقارات لقيت ان في بالمناطق الداخليه (جنوب السرة و بيان و صباح السالم الى القرين و مبارك الكبير) اسعارهم تنفع حق الخطة
و انا اتكلم عن البيوت مو الاراضي

المهم انا بقسم الخطة جزئين جزء حق اشلون تشترون بيت و جزء اشلون تشترون ارض و تبنون

حق شراء البيت:

لازم تيمعون مبلغ بهالطريقة ( 300 دينار بالشهر لمدة 15 سنة راح يكون الصافي بالنهاية 54000 دينار )
و طبعا تحتاجون الزوج يخذ قرض الاسكان ال 70 و قرض بنك 70
70+70+54 =194 الف
و تتدبر 4 الاف و صار عندكم 200 الف تنفع بيت بس لازم تنقون عدل انا شايفه بهالسعر بالنت حق صباح السالم و بيان و اكيد في بالقرين و مبارك الكبير بهالسعر و اقل بعد (حق القرين و مبارك تلقون زاوية ب 195 فيعني ينفع)

حق شراء ارض (صعبة اشوي) راح تلقون في ابو فطيره 117 شارع واحد احنا نبي الخطه نيمع 120 للارض و نخلي 80 للبناء

نفس اللي فوق بس الفرق ان لازم تشترون الارض بسرعه اول ما تتزوجون يعني تاخذون ال 70 و 70 لان اخاف تزيد اسعارهم هذه 117 ترى نازلين يعني كانو على 125 (نزول طفيف طبعا هالسنة ما يندرى بعدين ) و بنيتها التحتيه مسوينها فمو بعيده تصعد
المهم على ما تيمعون و انتو اتعيشون بالشقه ابنو اشوي اشوي
نصيحه ابنو اساس يتحمل عدد الادوار اللي تبونها و ابنو اول دور و سكنو فيه و شوي شوي باجي الادوار (احسنلكم يصير عندكم مؤجرين)

راي خاص: انا عندي اذا تشترون بيت و تكشخونه على كيفكم وايد احسن على الاقل تقدرون اتمون بشقه و تاجرونه على ما يتسكر جزء من القرض

و الحين انا ليش قلت جنوب السرة ادري بتقولون غالي مافي ب 200 اهو صح بس حطوا في اعتباركم انا حسبت الخطه ان
الزوجة مو ملزومة انها اتيمع شي يعني اذا الزوجه يمعت من راتبها مع الزوج و هم خذت قرض صغيرون راح تصير الميزانية

(300 الزوج لمدة 12 سنة =43200 و الزوجه 250 لمدة 12 سنة =36000 و قروض الزوج =70+70=140000 اهني وصلت الميزانية 219200 يعني اذا اهيا تاخذ قرض بعد نقول 50000 يصير عندهم 270000 تقريبا يعني ينفع جنوب السرة)

راي خاص : ادري ان مو حلو العيشه بالقروض بس انا من رايي ريايل هالايام مو نفس قبل في تحمل المسؤولية و القروض بتعلمهم غصب يتحملونها انا من جذي حبيت الخطة الاولى اكثر بس اذا المره تبي بيت اكثر من 200 الف صعبه بس راتب الريال لازم اهيا تحاول بعد تيمع

بالنهاية ابي اقولكم نصايح
1- تفسفس الفلوس على خرابيط و مو قادرين تيمعون 250 من رواتبكم هذا ما ينفعكم صدقوني و سئلو اي احد كبير و راح يقولكم حسافه على اللي راح و ما يمعت منه شي
2- اللي يبي بيت بسرعه و منطقه قريبه لازم يتعب و اللي ما يبي ترى الحكومة توزع بيوت و مناطقها حلوه بس يبيلها طولة بال لانهم بطيئين
3- هذه الخطط ما تنفع مع زوج بخيل او غير متعاون او يحط عينه على فلوسكم او معتمد كليا عليكم او جزئيا معتمد بعد اذا زوجج واحد من هالانواع انا اقول اتبعي الخطة الاولى (يعني انتي مالج شغل) او نطري بيت حكومه لا تاذين نفسج بشي ماله داعي
4- صباح السالم الى القرين و مبارك الكبير مو بعاد حيل عن الديرة و ارخاص يعني تحت ال 200 تلقون زاوية و مساحه كبيره يعني 500 م جذي
5- الخطة من بداية الزواج اذا بتفتكون من القروض بسرعه


و اي سؤال انا حاظرة طبعا انتو لعبو بالميزانيه على كيفكم ف ناس عليهم التزامات بس انا حاطتها يعني كاساس حق اللي مو مرتب اموره

 

[mmloo7a]

لوووووووول اخاف صج


نادر مايسووونها

الحين اهمه اجارات موملحقين


منو له او لها خلق ايمعون

حبيبتي طقوا قروض لوتحسيبنها نفس الشي

لان الكويتيين ييمعون جم شهر او جم سنه ويطيرون الفلوس

كويتيين يتمون كويتييين
ولاتقصين على الاوادم منو يقدر يمسك نفسه 15 سنه ؟

قروض وموقادرين

لان عيشتنا غاليه وصعبه

والبيوت غاليه

ف محد يقدر

 

[leolady31]

اي حبيبتي ادري انا فاهمة قصدج انا حاطه الخطه على اساس اللي بكالاريوس و مافي التزامات وايد و صج الناس اذا يمعت تبي اتسافر ولا تبي شنو احث تلفون بس انا قصدت بالموضوع اللي حاسه ان مستحيييل بيت بهالاماكن

و انا مو قاصه على احد لمن اقول 15 سنة بس 300 دينار من الزوج ليش اتقولين قاصه عليهم اتصير و اتصير اقل بعد لان انا حاسبه الميزانية 200 في اقل من 200 بصباح السالم و مبارك الكبير و القرين لو سمحتي هالكلمة ما عجبتني (تقصين على منو)
اذا البنك يسحب من الناس 15 سنة من اول ما ياخذون قرض مو الاحسن ان الواحد يجمعهم من راتبه

و انا مو حاطة الموضوع للتمصخر حاطته حق التشجيع اللي يائسة من سالفة البيت

و رجاءا انا كاتبه بالعنوان لحديثي الزواج يعني من البداية مو اللي طاف 5 او 10 سنين عليها و توها بتبدي ميزانية هذه اكيد ماراح تقدر

 

[برميتا]

واتهقين أسعار البيوت بعد 15 سنة راح اتم نفسها؟
يعني انا حاطة خطة عشان ايمع 200 ألف
عقب 10 وإلا 15 سنة وإلا البيوت واصلة 300 ويمكن 400 ألف :/

وبالنسبة للأرض
ترى القرض مال الاسكان مايصير تشترين فيه أرض
يعني من الشروط انج تاخذين القرض حق بيت
وإلا جان سهالات
أول ما الواحد يتزوج ياخذ الـ 70 ألف
وفوقها من البنك 70 وتشترين أحسن أرض


الحكومة بيدها تسهل الأمور بس ما بدها
أبسط شي يسوون بيوت ذات تكلفة منخفضة
ماتصير كبيرة مثل شقة دورين
وتكون بأسعار معقولة
والله فيه ناس وايد يبون بيوت صغيرة مجكنمة مو كل الناس تبي قصور

الله يعين

 

[leolady31]

واتهقين أسعار البيوت بعد 15 سنة راح اتم نفسها؟
يعني انا حاطة خطة عشان ايمع 200 ألف
عقب 10 وإلا 15 سنة وإلا البيوت واصلة 300 ويمكن 400 ألف :/

وبالنسبة للأرض
ترى القرض مال الاسكان مايصير تشترين فيه أرض
يعني من الشروط انج تاخذين القرض حق بيت
وإلا جان سهالات
أول ما الواحد يتزوج ياخذ الـ 70 ألف
وفوقها من البنك 70 وتشترين أحسن أرض


الحكومة بيدها تسهل الأمور بس ما بدها
أبسط شي يسوون بيوت ذات تكلفة منخفضة
ماتصير كبيرة مثل شقة دورين
وتكون بأسعار معقولة
والله فيه ناس وايد يبون بيوت صغيرة مجكنمة مو كل الناس تبي قصور

الله يعين

ما كنت ادري عن سالفة القرض ما يصير حق ارض بس انا قلت تشترون بيت احسن

بس على طاري الاسعار ترتفع لأ يا تنزل خفيف او ان تثبت انا اقولج ليش
لان المناطق اليديه الناس اللي ما يحبون التيمع قاعدين ياخذون فيها
و جنه في قانونين ملوت 2008 و 2009 تطبقوا من شهر 3 هذا انا الشركات اللي شاريه بلوكات مثل بالصديق و ابو فطيره لازم يسيلونها و ان ضريبه على اللي عندهم اكثر من 5000 م
طبعا القوانين ليلحني لج عليها ما يبونها لانها بتنزل اسعار الاراضي (الاسعار الجنونية يعني) و الخيران البنيه التحتيه قاعده اتخلص يعني الزبده العرض واييييييد راح يكون و الطلب قليل يعني يا تقل الاسعار او تثبت تزيد مستحيييييييييييييييل

بس اتعرفين قوانينا لازم 5 الى 10 سنوات عشان يقرونها

اي صج و بيوزعون اراضي خيطان اللي يم 360 يعني في خطوات بس يبيلها وقت ما تدرين يمكن الله كاتبلج تصبرين عشان يصير ارخص

و هم لا تنسين ايام قبل البنوك كانت تسحب من الناس اشكثر الحين في قانون حادها
طبعا طول علما طبقوه
و هم الاعانه ما كانت للكل و الحين تنعطى للكل يعني لا تيأسين من المستقبل حبيبتي القوانين تطبق بس يبيلها وقت مو اقل من 5 سنين (من رايي طبعا) بس انتي هذا اللي تبينه وقت زياده

بس انا صارلي فتره كل اشوف منتدى نسيت اسمه الريايل يتكلمون عن الاسار و دلالين بعد
صعود مستحيل
نزول يمكن
ثبات الاسعار اكيييييد

و هم في ناس مصورين الخيران السكنيه عجيييييييييييييييبه يعني اللي بياخذ اهناك بياخذ ف ما راح يزيدون الاسعار لان بتطيح بجبودهم

بس هم اذا انتي موظفه تقدرين شوفي (بس هذه تعور اذا مصاريفكم وايد) 70 زوجج و 70 انتي = 140 + 70 القرض بدون فوايد = 210 فيه بهالسعر بصباح السالم انا مجيكه و بالقرين و القصور (بيت طبعا)

بس ان من رايي صبري اشوي لا الشركات ليلحين ماسكين عمرهم ما يبون يبيعون لانهم خسرانين (يعني القانون فرش شهر 3 هالسنه اشوي اشوي بتشوفين تأثيره)

 

[مزيـانه]

الله كريم

على اسعار البيوت بالكويت .. عزة الله محد شرى

حشى نيس مو كويت .. حتى نيس أرخص !!!!!!!!

اللي يشوف اسعار البيوت عندنا يقول اسكت الحين البيت يطل على النهر .. و على المروج الخضراء و لا الشلالات

ما يدري انها أراضي جلحه ملحة .. و الغبار ما يعتقها لا صيف ولا شتا

يلا الحمدلله على كل حال .. هم نحبج يا كويت .. بغبارج و جلحتج

و نصبر .. ان الله مع الصابرين -------------- (( أدري خربطت وايد .. عذريني يا صاحبة الموضوع .. بقلبي غصة حالي حال كل اللي مو قادرين ياخذون بيوت بديرتهم !!! ))

 

[leolady31]

الله كريم

على اسعار البيوت بالكويت .. عزة الله محد شرى

حشى نيس مو كويت .. حتى نيس أرخص !!!!!!!!

اللي يشوف اسعار البيوت عندنا يقول اسكت الحين البيت يطل على النهر .. و على المروج الخضراء و لا الشلالات

ما يدري انها أراضي جلحه ملحة .. و الغبار ما يعتقها لا صيف ولا شتا

يلا الحمدلله على كل حال .. هم نحبج يا كويت .. بغبارج و جلحتج

و نصبر .. ان الله مع الصابرين -------------- (( أدري خربطت وايد .. عذريني يا صاحبة الموضوع .. بقلبي غصة حالي حال كل اللي مو قادرين ياخذون بيوت بديرتهم !!! ))

هذه يسمونها طفرة لان الشركات يت و شرت و رفعت الاسعار بجنون و الطفرة طفرة ما اتم وايد انا منجذي اقول مافي صعود اكثر يمكن يصير ثبات او نزول طفيف
لا عادي انا بطلت المموضوع عشان الناس تقول رايها و انا ما اقولكم هالكلام الا بعد ما جيكت على الاسعار من 2008 لي 2010 و اعلانات هالسنة بعد
من هالشهر اللي لاحظته اراضي ابو فطيره شوي رخصت (شوي ها لان توه البداية) كانت الشارع الواحد على 125 و الزاوية على 150 و جذي
الحين شارع واحد اكو على 115 و 117 و الزاوية 125 يعني اكو تغيير

بس مو تتصورون ان بيصير على 70 ولا 60 هذه قويه اهوي فيه نزول بس ليلحين طفيف
و في قوانين يايه بس حدهم بطيئين راح يقللون اشوي الاسعار فحطي امل يا مزيانه لا تحاتين
و يمعيلج مبلغ خليه احتياط لان اذا حصلتوا فرصه حق مكان زين لازم بسرعه تعطون فلوس ولا احد غيركم بيشتريها لان الفرص صعبه عرفتي

 

[H & S]

فديتج ياصاحبه الموضوع الله يكثر من امثالج يكفي انج تعطين تفائل لنا

وبعدين اللي يقول تقصين على الاوادم ليش تقص على الاوادم ؟؟؟؟؟؟؟؟ كلامها عين العقل العاقله اهي اللي تعرف تضبط امورها وتحقق هدفها ليش ما نقدر نجمع الحمدالله نقدر ومن ناحيه اللبس نلبس احلى لبس ومن ناحيه الاكل الله منعم علينا بخيره ومع هذا كله في عقل اللي عندها مخ تعرف تتصرف خصوصا بالاراده

leolady31 ادعيلي يكون بيتي بالمستقبل بصباح السالم هالمنطقه من زمان امفكره فيها وسبحان الله يوم طريتيها مع هالسعر ارتحت يااااااااااااارب انك تحقق حلمي وترزقني اللي في بالي ويحققلج امين كل اللي تتمنينه ما قصرتي على الشرح الوافي

 

[leolady31]

فديتج ياصاحبه الموضوع الله يكثر من امثالج يكفي انج تعطين تفائل لنا

وبعدين اللي يقول تقصين على الاوادم ليش تقص على الاوادم ؟؟؟؟؟؟؟؟ كلامها عين العقل العاقله اهي اللي تعرف تضبط امورها وتحقق هدفها ليش ما نقدر نجمع الحمدالله نقدر ومن ناحيه اللبس نلبس احلى لبس ومن ناحيه الاكل الله منعم علينا بخيره ومع هذا كله في عقل اللي عندها مخ تعرف تتصرف خصوصا بالاراده

leolady31 ادعيلي يكون بيتي بالمستقبل بصباح السالم هالمنطقه من زمان امفكره فيها وسبحان الله يوم طريتيها مع هالسعر ارتحت يااااااااااااارب انك تحقق حلمي وترزقني اللي في بالي ويحققلج امين كل اللي تتمنينه ما قصرتي على الشرح الوافي

حبيبتي والله تستاهلين بيت بصباح السالم ليش لأ شوفي هذا توني شفته بالموقع اللي اقرا فيه كل يوم يعني شوفو اكو بيوت بس الواحد يدور عدل عدل و يكون ميمع مبلغ مو كل يوم ستاربكس و كل ما دشت السوق التلفون بينفجر باذنها و مطاعم الدنيا و معتكفه بالكوفي شوب تقولج متنت يبيلي نادي و ملابسي ضيجه بشتري غيرهم مو حرام هذه ثقافة اسراف الله ما يحبها انا ابيكم تصرفون الله سبحانه يحب يشوف النعمة على العبد بس مو باسراف عرفتوا كل اللي ودي اوصله الاعتدال و عدم تبذير كل ما جنيتموه هذا تعب دوام كل يوم تره ما يصير يروح بدقيقه حسافه حقكم

شوفي هذا توه اليوم شفته حجمه زين و فيه حديقه
للبيع بيت بضاحيه صباح السالم دخل متوسط 500م راس 3شوارع مجد د تكيف مركزى حديقه
حد:220الف
من موقع اسمه indexsignal
كله كويتين يتكلمون عن العقارات واللي صاير بالسوق

بنات في سالفة الادخار و الاستثمار لازم تحطون هالشغلات ببالكم
1- احط هدف
2- احدد الميزانية مرنة
3-التزم بالميزانية لازم تكون مثل ما قلت مرنه
4- حققت الهدف

حصول البيت مو بيوم ولا سنة يبيله وقت و اجتهاد والله يعطي كل واحد على اكثر ما يدعي و يجتهد

و انشالله انشالله يوزعون الاراضي و يطبقون القوانين اليديه و يزيد العرض بالسوق عشان الاسعار الجنونيه تنزل و اتحصلين بيت بصباح السالم باقل من الاسعار :yaaaaaarb:

 

[!الجادل الصعب!]

الخطه حلوه .. بس الزمن يخوف ..
والعقار كل مآله يطييير ..

 

[H & S]

جزاااااااااااااااااج الله الف خير احب هالبنات اللي عندهم عقل يفكرون بمستقبلهم صح الحياه فانيه بس ما ندري الزمن شنو خاش لنا صدقتي بكل كلمه قلتيها :eh_s(7):

عجيب السعر وان شاءالله مايتغير مع الزمن لانه فرصه للي يمعو من زمان :eh_s(15):

حصول البيت مو بيوم ولا سنة يبيله وقت و اجتهاد والله يعطي كل واحد على اكثر ما يدعي و يجتهد

:rerrerek::rerrerek::rerrerek:

قووووووووووووووولي امين عسى ربي يعطيج على قد نيتج الطيبه لانه اللي يفكر بهالتفكير نادرين ويوفقج بالدنيا والاخره:yaaaaaarb:​

 

[leolady31]

الخطه حلوه .. بس الزمن يخوف ..
والعقار كل مآله يطييير ..

لا حبيبتي جيكي المواقع نازل اشوي بس البياعين مو راضيين ينزلون يعني تلقين واحد اسعاره رخيصه و واحد يقول لا لا ليحين غالي غصب ما يبي السعر ينزل
اهم مثل ما قلت لو يعدلون المناطق اليديه و يطبقون القوانين عدل المفروض ينزل اشوي

بس جذي ولا جذي الخطه تنفع حتى لو تنطرين بيت من الحكومه عشان تاثثين بالفلوس يعني بالنهاية فايده لج

انا بس ودي اشوف اللي توهم متزوجين ما يلعبون بفلوسهم و يحطون هدفهم بيت العمر حسافه تعب الدوام يروح على المجمعات خشوهم حق بيت احسن

 

[leolady31]

جزاااااااااااااااااج الله الف خير احب هالبنات اللي عندهم عقل يفكرون بمستقبلهم صح الحياه فانيه بس ما ندري الزمن شنو خاش لنا صدقتي بكل كلمه قلتيها :eh_s(7):​

عجيب السعر وان شاءالله مايتغير مع الزمن لانه فرصه للي يمعو من زمان :eh_s(15):​

حصول البيت مو بيوم ولا سنة يبيله وقت و اجتهاد والله يعطي كل واحد على اكثر ما يدعي و يجتهد ​

:rerrerek::rerrerek::rerrerek:​

قووووووووووووووولي امين عسى ربي يعطيج على قد نيتج الطيبه لانه اللي يفكر بهالتفكير نادرين ويوفقج بالدنيا والاخره:yaaaaaarb:​

اي والله انا ودي ثقافة الصرف هذه تروح اشوي حسافه ناس قاعده تتقاعد و مو ميمعة ولا فلس علبو التكشخ الزايد او سيارة اخر موديل و ستاربكس كل يوم

انا ما ودي اشوف البنات متحسفين ابيهم يستانسون و بنفس الوقت يحققون هدفهم

و هم ياريت يطبقون المثل
اعمل لدنياك كأنك تعيش ابدا و اعمل لدينك كأنك تموت غدا

و انشالله يا H&S تحصلين احسن بيت و قريب من أهلج و دوامج :eh_s(7):good luck

 

[كماشه]

الخطه حلوه بس مو للكويتيين للمصريين الي يفكرون بالمستقبل

 

[om MaRyooM]

اذا سويناها انا وريلي بتكون من عجائب الدنيا السبع لوول

يبيلها معاشات قوووووية .. ودخل ثاني غير المعاش

 

[Winter Q8]

ماحسيت بقيمة البيت إلا لما تزوجت صج صارلي سنه و ما عندي عيال بس و الله البيت عزيز و لا الايجار اللي يكسر الظهر و بالاخير محكر ..
و يارب يرزقني بيت حلو و مجكنم ( ربي أنزلني منزلاً مباركاً و أنت خير المنزلـــين ) ..
طبعاً فكرة اني اشتري بيت طلعت بثاني اسبوع زواج لول .. بس المشكلة بيوت القرين و القصور و صباح السالم قديمة يبيلها ترميم شلون ارمم و اعدل فيها و انا حطيت الوراي و اللي دوني ع البيت .. على الاقل احتاج 60 إلى 70 ألف ثانية علشان ارمم و اقدر أأثث على قدي ..
جذي وكلت أمري لله و الله يفرجها و يرزقني عنده بيت بالجنة

 

[sheraZia_Q8]

مشكوووووووووووورة
بس في مشكله
الحين الزوج قاعد يدفع 400 ولا 500 من معاشه على شقه
من وين بعد بيجمع 300 لمده 15 سنه حق بيت
الحاله كسيييييييييييييفه

 

[MN.collection]

يعطيك العافيه بس صعبه شوي

 

[leolady31]

بنات اشفيكم انا اول خطة حاطتها الزوج بس يجمع 300
يعني تقدرون اذا تتساعدون و انتوا موظفين اتحطون 150 و اهو يحط 150 (150 زينه مو وايد)
بس الخطة ترى حق اللي عندهم اصرااااااار قوي و ما عندهم عيال وايد

 

[نور83]

يعطيج العافية والله يوفقجً ويرزقجً باحلىً قصر على هالموضوع المفيد يعني صراحة هذي المواضيع الحلوة اللي في منها فايدةً و كافي انج حبيتي تفيدينً الكل بالهموضوع صراحة تفكيرجً عين العقل ونصيحة بمحلها وتخطيط حلو لكن صعب التطبيق بس هم يزاجً الله كل خير على طرحج المفيد و نيتجً الطيبة واضحة الله يوفقجً