ابي افضفض متضاايقه ومحتره

[حبيبة زوجي 86]

السلام عليكم ​

انا داشه بهل نك لان مابي احد يعرفني اغلبية اهلي يعرفون نكي وبتحجه على راحتي بفضفض حدي متضاااايقه ومالي غيركم افضفضله ​

يا بنات امس وانا بالدوام العصر طرشت حق ريلي مسج (اووف يله متي اطلعني مليت) ولا يرد على (باجر انشالله) عن اليوم لان اهوا يطلع من دوامه اليوم الصبح ​

وانا قعدت من صبح سبحت ورحت صالون سويت شعري وحفيت وهل سوالف وماداومت علشان بنطلع اهوا رد نام وقعد الظهر ولا يقولي انه بيروح الدوانيه اليوم!!​

اهوا كل يمعه عنده دوانيه زين طلعلي اليوم بعد! زين وانا شكو تقولي بطلعج؟​

قتله اوك عيل انا بروح 360 قالي من معاه قتله بشوف اختي وقالي زين وطلع​

دقيت على اختي بتروح سوق سالميه ماتبي تروح معاي طرشتله مسج انا بروح بروحي 360​

كنت بتمشي ودش جم محل ​

وقعدت البس واحط ميك اب شوي ولا يدق علي ويقولي لاماتروحين بروحج شوفي احد ماكو احد يروح معاي شلون؟ مادري شلحكمه من ان ماطلع بروحي! مادري اللي بتكون معاي مصارعه مثلا!​

ولايقولي خلاص انا اييج و اوديج (طبعا اذا بيطلعني بتكون الطلعه بسرعه بسرعه علشان بيلحق عليهم ويكون متنرفز وبس يتناجر معاي ولا مع الناس لانه طالع غصب بيكون , واذا مالحق عليهم يقعد يلومني شهر انتي ماخليتني اروح دوانيتي وانتي وانتي ويلوع جبدي) قتله لا خلاص مابي بقعد بالبيت ​

طبعا عادي ولاهمه بالطقاق قالي زين انا باجر بطلعج طلعه احلا من هذي بوعضج وسكر فونه وانا الحين منثبره ومحتره واهوا هايت عند ربعه والله قعدت ابجي يوم سكرته منه​

مادري شيعوضني وانا دوامي اخلصه ساعه 8 على ما ارد البيت 8ونص مادري بيطلعني ساعه 9 وين بنروح هل حزه؟؟ كل شي مسكر​

وانا ماداومت اليوم علشانه علشان نطلع من زمان موطالعه معاه ​

وماقدر اغيب بعد لان غياباتي واايد ضيع اليوم على عالفاضي لو مداومه ابركلي , وهل ويك اند اهوا دوام يعني مافي طلعه حتي سبوع الياي المشكله من زمان موطالعين مع بعض​

وكل مايبي يطلعني نطلع ساعه 9 ولا 10 ومرات 12 والله مافي مكان نروحله كل شي مسككر وغلقه نفتر يابمركزسلطان ولا المطار
والمطار صارلي سبوعين احن عليه ابي المطعم اللي هناك كل يوم باجر ولايسحب على ويطلع وليي رد يقولي تعبان ولما اقوله بروح مع خواتي يقولي لا ماحب تروحون المطار!! زين شلحل​

ويقولي يعني انتي ماتدرين انا كل ثلاثه عندي دوانيه!! هذا شي يديد طبعا توني ادري اللي اعرفه كل يمعه طلعلي كل ثلاث بعد​

 

[قلبي عبدالله]

طولي بالج وخديه بالسياسه لايقلبها عليج
وتحمليه خيرته يمشي على الصراط المستقيم

 

[غدووور الكويت]

الله يعينج ترى أغلب الرياييل ما يحبون حريمهم يروحون السوق بروحهم علشان لا يتعرضون لهم الشباب والله يهديه ويسخره لج ويحنن قلبه ويطلعج وما لج إلا الصبر ولا تفكرين تتهاوشين معاه علشان طلعه كل اللي لازم اتسوينه انج تقعدين معاه وتكلمينه بهدوء وتقترحين عليه يخصص يوم لج تطلعون مع بعض وتستانسون

 

[є 3 τ и α q]

يَ حياتي ولله / الله يعينك من جد
الحل تجلسين معه وتحددين لك يوم بالاسبوع
زي مآهو مهتم مره بالديوانيه
انتِ بعد زوجته ولك حق يخصص لك يوم بالاسبوع
يوديك المكآن اللي تبيه ،

_

امآ اذا كآن من النوع اللي يتذمر ويرفض
ويمشي راييه الله يعينك ،
لآ تضيقين صدرك يَ الغاليه

_

صديقاتك ّ!
مآفي امكآنيه تطلعين معاهم بدال خواتك وكذا ؟

/

سؤال / طيب لو حصل و قآل انه بيطلعك !
وش بتسوين بالدوام ؟

 

[جوري 2007]

جان شرحتيله انج اليوم ماخذه اجازة عشان الطلعه !

عالعموم خلاص الحين عرفتي جدوله حاولي تنسقين معاه ،، اتفقي معاه انه يمعه وترك تطلعون

مرة تطلعون ومرة يروح الديوانيه

 

[كويتيه وافتخر]

الله يعينج

شهالدوام اللي لي ثمان الله يعينج

 

[خشف العذارى]

صدقيني خيره
ماتدرين يمكن الله رادج عن شي

 

[بدورة القمورة]

الله يعينج

بس الصبر زين

 

[iLLuMinaTion]

شكرا

 

[ام يزن-2]

والي يقولك يوميا خرجة ويا الشباب

 

[آنا من دونك أندمر]

الله يهديه لج يا رب

 

[ســآرهــ]

حاسه فيك .. انا بعد مااحب أحد يعشمني بشي واتهيأ نفسي له وبالأخير يكنسله ومايتم ..ودك لو ماوعدك من البدايه ولا انه يعشمك ويكنسل ..؟

بس زين حالتك بسيطه صغريها بنظرك وبتصغر الحمدلله ضيقتك على طلعه غيرك هموم الكون بقلبه الله يعين الكل
واذا على الحف والميك اب وانك اتجهزتي عادي خلي هالشي لك انتي أنا أحب كل يوم اكشخ وميك اب (روج بس) وعطور وابخر البيت وأنا لازوج ولا يحزنون بس أنا نفسياً أحب ادلع نفسي صدقيني لاخليتي نفسك اولاً بترتاحين ..
وزي ماقلتلك صغريها بتصغر قولي عادي كلها طلعه لا راحت ولا جات والحمدلله أنا اهون من غيري لاتعطين للشيطان فرصه ينكد عليك وهو وعدك بيعوضك لاتسوين شي وتتنكدين عشان ماتخرب طلعتكم الجايه ..​

 

[امل يائس]

ويييييييه نفس حالتي يا ربعه يا شيشه يا معزوم يا دوام يا ماله خلق يطلع اعذار من تحت الارض

 

[Milk^Shake]

اوووووف حدهم يبطون الجبد بهالحركه
بس عادي طوفي صج سالفه تحر بس ماتسوى تعكرين مزاجج عليها ماطلعتو اليوم باجر تطلعون
فرفشي كلها طلعه واتكنسلت

 

[alzeen- almuteri]

حبيبتي دام تدرين ان كل ثلاثاء ديوانيته​

ليش ماخذيتي اجازتج باجر او امس او اي يوم غير هاليوم​

نظمي وقتج معااه انتي ​

والله يوفقكم​

 

[قاهره عذالي]

يبه عادي
ليش زعلانه
هذي شغلات تافهه
ترا زين منه تبرع وقال اطلعج دام اختج ماتبي تروح
وترا من حقه
مرات زوجي يمنعني اروح لحالي
والود وده يكون معاي احد
هم يخاف عليج زوجج عادي
كلهم دوانيه وربع
والله ان بغيت اطلع مع رفيجتي وخواتي وامي
لان زوجي ما ينوخذ للسوق والجمعيه كله بسرعه بسرعه
ترا كل الشباب جذيه
ترا انا يقولي اذا طلعني
ما اعرف ما ادل مدري وين نروح
وانا اصلا طبعي وانا ببيت اهلي ماكنت اطلع سوقه واماكن الا للزوم وللحاجه او مع اهلي مرافق

عادي ما اشوف موضوعج يزعل
عاااااااااادي جدا

 

[قاهره عذالي]

انا بالطلعات الضروريه طبيب او جمعيه
مايوديني
يعني اشره على طلعه ترفيهيه
والله اروح مع رفيجاتي ومع اهلي وخواتي اريح واحسن

انتي قولي له اتفقي على يوم مثلا عازمته بمطعم او مكان حلو وعلى حسابج

انا افكر اسوي جذيه بس مو فاضيه هالوقت بعدين ان شاء الله

 

[قــل مـا تـشـاء]

هدي هدي
وطوووولي باااالج ,, أدري انج محتره بس مايستاااهل اللي جالسه تسوينه
أدري انج مضغوطه من الدوام وودج تطلعين تغيرين جو بس ماعليه ماحصلت لج الليلة طلعة تحصل لج باجر ,,
جان رحتي مع اختج السالمية مافيها شي والا حاولتي فيها تروحون 360 ,,
اذا محتره عالكشخه بالعكس المفروض نفسيتج تتغير بالكشخه مو تضيقين خلقج
بتتمين أحسن من غيرج وقولي الحمد لله غيرج اللي فاقده ريلها بكبره مو بس الطلعه معاه
هدي بالج وضبطي الميك اب ولبسي وجلسي انطري ريلج واذا قال لج بتطلعون باجر لا تقولين لأ قولي اوكي وطلعي ووسعي صدرج وياه واذا مو مشتهيه تطلعين باجر طلعي بالويك اند عاااتي ,,
ولا تبالغين ترا اكو محلات فااتحه الساعه 9 لووول
الله يهدي بالج

 

[ام شووووق]

لازم تصير عندج مناعه من خلف الوعود

لاتضايقين كل الرياييل جذي

 

[حبيبة زوجي 86]

يَ حياتي ولله / الله يعينك من جد
الحل تجلسين معه وتحددين لك يوم بالاسبوع
زي مآهو مهتم مره بالديوانيه
انتِ بعد زوجته ولك حق يخصص لك يوم بالاسبوع
يوديك المكآن اللي تبيه ،

_

امآ اذا كآن من النوع اللي يتذمر ويرفض
ويمشي راييه الله يعينك ،
لآ تضيقين صدرك يَ الغاليه

_

صديقاتك ّ!
مآفي امكآنيه تطلعين معاهم بدال خواتك وكذا ؟

/

سؤال / طيب لو حصل و قآل انه بيطلعك !
وش بتسوين بالدوام ؟

ماراح اطلع معاه لان ماراح اكنسل دوامي علشانه
اهوا ماعرف يكنسل ربعه علشاني

جان شرحتيله انج اليوم ماخذه اجازة عشان الطلعه !

عالعموم خلاص الحين عرفتي جدوله حاولي تنسقين معاه ،، اتفقي معاه انه يمعه وترك تطلعون

مرة تطلعون ومرة يروح الديوانيه

ماحبيت اقوله لانه اهوا براسه الدوانيه بيطنقر على جذي ولا جذي

الله يعينج

شهالدوام اللي لي ثمان الله يعينج

تطبيقي من ال4 لي ال8

حبيبتي دام تدرين ان كل ثلاثاء ديوانيته​

ليش ماخذيتي اجازتج باجر او امس او اي يوم غير هاليوم​

نظمي وقتج معااه انتي ​

والله يوفقكم​

والله ما ادري اللي اعرفه كل يمعه بروحه توه يطلعلي كل ثلاثه بعد