طريقتج مع حريم خوانج !!!

[لالاا]

بنات شلون طريقتكم مع حريم خوانكم يعني اذا كنتي بنت مو متزوجة وحريم خوانج يسيرون عليكم شتسوين يعني تعاملينها رسمي وتضيفينها مثل الغريبة!!! انا جذي اضيفهم مثل الغريبات اقدم واصب فنيال رايح وفنيال جاي رسمييية حيييل انا الوحيدة بالبيت خواتي متزوجات رفيجاتي يطنزون علي يقولوو حشى خدامة لهم انا عارفة اني لو ماسوي جذي راح يحقدون علي يكرهوني مرة سويتها شفت ويوهم تغيرت شالو علي بسرعة عاد هم خلقة مايهضموني مع اني مدللتهم ويقطون كلام احيانا احس انهم معامليني كاني وحدة متزوجة في بيتها يحاسبوني لازم اصير بالوجة ولازم اقهوي مع انهم اصغر مني وفية وحدة اكبر انا عمري 29وجالسة بطالية منسحبة من الدراسة من زماان رفيجاتي يقولون احنا ماتصير علينا مسؤلية مثلج بالعكس حريم خوانهم هم اللي يشتغلون

 

[نوراء الحلوة]

هلا حبيبتي
ما عليج من رفيجاتج
بالعكس باين عليج ذربة
يعني شي طبيعي الي تسوينه شنقايل خدامة!!!
وربي يوفقج ويرزقج الزوج الصالح

 

[{هتًان}]

عادي

وهذا من الذوق والأدب

وبحكم انهم مومعاكم بالبيت من الطبيعي اجابلهم واضيفهم واقهويهم

انتي اللي على الحق مورفيجاتج الرفلات

وبعدين ليش قاعده بالبيت

:eh_s(7):



​

 

[يارب احفظ عيالي]

اختي مسكي العصى من الوسط معا حريم اخوانج خلج عاديه

 

[حب الرّمان]

بالعكس انا اخت ريلي تضيفني وتصبلي وتقدملي بس مع الايام خذيت عليهم صرت وحده منهم اصب واقدم وكلشي
وانتي تقديلهم قوليلهم البيت بيتكم وانتو موغرب عرفتي هذي كلمت خالتي واخت ريلي اتينن والله احبها لان انا تزوجت وهي صغيروونه وتخيلي كانت باولى متوسط تشقل هالجاي وتسوي القهوه وتسوي هالحلوحبيبتي ’’’’’’

 

[Miss McDonald]

• اللي تسوينه اهو الصح

 

[مريومه النزغه]

انا طاف اصلا ناسين شكلي امه تجابلهم انا ما اطلعلهم نهائيا ولا اشوفهم بس اطلع حق مرت اخوي الكبير لانه مدينه وحبوبه وسوالفها من ذهب الله يوفقها اما الباجي ماعطيهم وجه يمكن بس يشوفني بالمناسبات ما احاجيهم ولا يحاجون كله رسمي برسمي

 

[غداً القاك]

ليش ياقلبي هم ضيوف عندك
وانا مثلك عادي اقهويهم وعادي هم ضيوووفي شلون اتركهم اساساً عيب اتركهم ولااضيفهم..

 

[ريشه كشخه]

ماشاء الله عليك هذا من اخلاقك وذوقك الرفيع

ماعليك من كلام صحباتك . عامليهم على اخلاقك انتي .

قال - عليه الصلاة والسلام - :" إن خياركم أحاسنكم أخلاقا ً"

 

[كتكات احمر]

اكبر طاف

انا اخدمهم هذا الي ناقص

كله وحدة عارفة شنو تبي تقوم تخدم نفسها بنفسهاا

شكوو اغث عمري على ناس مو كفوو حشيمة

واخرتها يا يحشون فيج يا ينقلون قلب اخوج عليج

اخذيها قاعدة لا تخدمين احد الا اذا بدا هو بالحب والسنع من نفسه

غير جذي كلش ماله لزووووووووم

 

[مــ_ــا مــ_ــي]

يا زين حريم خواني ويا زين ملفاهن علي .. اصلا لما اجي لاهلي ومالقاهن انا انغث .. انا اعامل حريم خواني وخوات زوجي وحريم حمواني كأنهن خواتي .. وما احط اي حواجز او رسميات بيني وبينهن واحب اخدمهن باللي اقدر عليه.. لاننا اهل .. والحمد لله الاوضاع تمام التمام ..

 

[الدلـــع كله]

اللي تسوينه ياقلبي صح
وانا جذي نفسج بالضبط ..
اذا سيروا علينا اضيفهم عادي لا وساعات اطلبلهم حلا ..
فكري ببعدين لما تتزوجين راح يحترمونج ويقدرونج نفس ما سويتي معاهم بالضبط ..
ونصيحة لا تخلينهم يحقدون عليج كلش انتي مو متزوجه .. وباجر لا سمح الله ماعطيتيهم وجه ولا طنشتيهم يطلعون حجي هذي نفسيه ومو اجتماعيه ومن هالحجي ...
موفقه

 

[غرق بالماي]

لا حبيبتي عادي ماعليج من كلام رفيجاتج اذا اجو لازم تضيفينهم وتجيبين وتحطين جدامهم عادي

 

[غرني احساسك]

يقطون كلام ؟؟ هذول يستاهلون احد يحشمهم ؟ شوفي قلبي لا تخدمين احد باين انهم مايستاهلون وخذها مني خليكي رسميه معاهم وربي حتى وانتي رسميه مابتسلمين من شرهم كيف لو طيحتي الميانه ؟ عادي اول مايجون استقبليهم وضيفيهم وبعدين روحي غرفتك وخلاص الله لا يهينهم كل وحده تقهوي نفسها مو خدامه عندهم

 

[kuwait_queen82]

والله انا كنت حاشمتهم مثلج اخر شي كل مايو قمت اكبر المخده والا امسكلي كتاب اقرا ابدراي ابركلي من امجابل اويهم و كلامهم الي يقرف و متروس حسد

 

[هــنــوف]

يالسنعه ويا ام الاخلاق انا حريم اخواني عندنا بالبيت اذا انزلو عندنا اصب لهم جاي وقهوه واذا طلبنا حلوو وفذاير دقينا عليهم واصب لهم قهوه عادي وسوالف رسميه وعاديه واهم احياناًً يطرشون حلوهم وقهوتهم قبل لاينزلون بس لاصار عندنا عزيمه ولا شي تلقينا مقسمين الشغل بينا يعني حتا اهم يصبون جاي وقهوه ويسوون حلوو ويساعدون بالسفره


ماعليج من رفيجاتج خلج على الي انتي فيه

 

[ام جوري22]

عتبرينهم نفس خواتج ولا يهمتج من ليقاعدة تقول خمادمة ما عليج من رفيجاتج الرفيجة ما راح تدوم لج بس عمات عيالج اولى انا عن نفسي اخدمهم من عيوني احبهم

 

[ام غمازهـ]

صح الي تسوينه ماشوف فيه شي

بس يمكن هم تعودوا عليج دايم تضيفيهم بس حاولي تخليهم يتعودون يسون اي شي عندكم كانهم في بيتهم
لان اذا يوم من الاياام شافوك ماعطيتهم وجه بيقلون تغيررت ومن هالكلااااااام

 

[رحيل المرافيء]

حبوبة لاتسوين لهم شي زاروكم الخدامة اتييب لهم شاي وقهوة
ترى حريم الاخوان مو كفووووو
وياترى لو رحتي لهم يسووون لج نفس الشي
اذا حبوبات كوني حبوبة معاهم رسميات وحقودات خلج رسمية معاهم

 

[معكرونه أسبكتى يم يم]

ياحلو السنع انا احب البنت السنعه المسنعه بسم الله عليج وماعليج من احد هالفتره صايرين هالناس يقدمون النصيحه القشره والشينه ياكافي