بزوركم في الكويت بس قبلها ردوا على استفساراتي

[العروس الحلوة]

السلام عليكم ورحمة الله وبركاته ..

ان شاء الله اذا الله قدر لنا نبغي نزور الكويت في شهر رمضان ..

انا اول مرة ازورها لكن زوجي له اهل هناااك واقارب ..

وانا من احلامي القديمة زيارة الكويت ..

زوجي يقول بنسكن عند اهله ..وانا اقول نسكن في شقه مفروشة او شقه فندقية ..

المشكلة زوجي تعود يروح لهم يسكن معاهم وبالنسبة لي صعبة ..

مو علشان شيء اكيد هم ناس طيبين وزيارتهم بتكون حلوة ..

لكن هو يقول لي انتي روحي مع البنات وانا مع الشباب حتى في الطلعااات ؟؟!!

وانا خاطري اربط ذكرياتي مع زوجي ..

وخصوصا ان صعبة نروح بيت ناس في رمضان .. يعني بيسهرون ؟ بيروحون التراويح
وبيرقدون الصبح ؟

امممم وبعد اقناااع وافق ..

طبعا اكيد كل يوم بنمر بيت حد منهم ..

المهم أسالتي كالتالي ..

شو آخذ هدايا ؟ شو اللي يحبونه اهل الكويت اكثر شيء من الامارات ؟

عندي عنوان شقة فندقية دانة بلازا .. واتصلنا وطلعت الليلة 35 دينار ..

هل السعر زين ؟ وهل المكان نظيف ؟
ويا ترى وين موقعه ؟ ليكون آخر الدنيا ؟؟

بالنسبة للسيارات ؟

كيف احصل ارقام تكسي موثوق .. لن زوجي ضد تاجير السيارات .. ما يحب يسوق سيارات احد ..

وابغي اسير مكتبة جرير .. ابغي عنوانه ورقم تلفونه ..

ابغي اعرف المولات الزينة ووالمحلات الحلوة وخصوصا لملابس الاطفال ..

وين اقدر احصل ملابس شعبية لليهال ؟

وين اقدر احصل اواني مطبخ وحركااات ؟

بشو بعد تنصحوني ؟؟؟

هيه صح المولات تفتح بالنهاار ولا لا ؟؟

ولي عودة للموضوع ان شاء الله

 

[:: Diva ::]

السلام عليكم ورحمة الله وبركاته ..

ان شاء الله اذا الله قدر لنا نبغي نزور الكويت في شهر رمضان ..

انا اول مرة ازورها لكن زوجي له اهل هناااك واقارب ..

وانا من احلامي القديمة زيارة الكويت ..

الف حياج الله تنورينا حبي

زوجي يقول بنسكن عند اهله ..وانا اقول نسكن في شقه مفروشة او شقه فندقية ..

المشكلة زوجي تعود يروح لهم يسكن معاهم وبالنسبة لي صعبة ..

عاد حلاة السفر باللمه
و يمكن يحلفون عليه اهني تتوهقين
بس جربوا الشقق الفندقيه
لا صج اهم وين ساكنين علشان اشوف لج شقق فندقيه قريبه عليهم
لاني ما سمعت بالدانه يمكن لو دورتي بالنت تلاقين معلومات

مو علشان شيء اكيد هم ناس طيبين وزيارتهم بتكون حلوة ..

لكن هو يقول لي انتي روحي مع البنات وانا مع الشباب حتى في الطلعااات ؟؟!!

أحلى شي
لوووووووووووووووووول
أموت على اهلنا لا زارونا الكويت
نفصل الشباب عن البنات
و نطلع البنات كلنا ونااااااااااااااااسه
اصلا طلعات البنات غير و اهتماماتهم غير
يعني لاااااا تشيلين هم
و اذا صار حاولي تستمتعين

وانا خاطري اربط ذكرياتي مع زوجي ..

يا عمري انتي ما ادري شكثر بتطول قعدتكم
بس والله لو طلعه وحده و انتي ايدج بايده هذي أحلى ذكرى

عاد كثرة المجابل تملل :d

وخصوصا ان صعبة نروح بيت ناس في رمضان .. يعني بيسهرون ؟ بيروحون التراويح
وبيرقدون الصبح ؟

احلى مافي بيوتنا برمضان
عقب الفطور
التراويح و الغبقه تالي الجيام
حاولي تروحين معاهم مره و لا مرتين
و يارب يودونج المسجد الكبير شوفي الخشوع و الله بتستمعين بالصلاة

امممم وبعد اقناااع وافق ..
طبعا اكيد كل يوم بنمر بيت حد منهم ..

حلووو

المهم أسالتي كالتالي ..

شو آخذ هدايا ؟ شو اللي يحبونه اهل الكويت اكثر شيء من الامارات ؟

البخور الاماراتي و المعمول

عندي عنوان شقة فندقية دانة بلازا .. واتصلنا وطلعت الليلة 35 دينار ..
هل السعر زين ؟ وهل المكان نظيف ؟
ويا ترى وين موقعه ؟ ليكون آخر الدنيا ؟؟

السعر مناسب و ممكن تلاقين على 30
و في بالسالميه على 20 بس اعتقد يأجرون حق شباب بعد
أو غرفه وحده
و أغلب الشقق الفندقيه نظيفه و مواقعها مميزه
الا اذا كانت بالفراونيه بتكون زحمه و كلها وافدين

بالنسبة للسيارات ؟
كيف احصل ارقام تكسي موثوق .. لن زوجي ضد تاجير السيارات .. ما يحب يسوق سيارات احد ..

امممممم
ما عندنا تكاسي مو شي
عندج التاكسي الجوال هو الارخص سعراً و تلاقينه بالشوارع
لونه ابيض و بيج
ممكن تاخذين رقمه و تتفقين معاه قبل كل طلعه

و عندج الاجره تحت الطلب
بس اسعارهم غاليه

وابغي اسير مكتبة جرير .. ابغي عنوانه ورقم تلفونه ..

حولي
اما رقم التلفون ما عندي
لكن ان رحتي حولي خصوصاً بالقرب من المهلب
لو تسألين اي شخص وين ( حولي بارك ) راح يدلونج و اهي اساسا
في ملاهي
من تشوفين الالعاب و مطعم شريمبي و قيصر تدرين انج وصلتي


عندج بعد ذات السلاسل و موجوده بالافينيوز
و عندج فيرجن في المارينا مول بالسالميه

ابغي اعرف المولات الزينة ووالمحلات الحلوة وخصوصا لملابس الاطفال ..

انتي مري الافينيوز بس
اعتقد لا طقيتي فره فيه تقضين شغلج كله و ما تحتاجين محلات بعد


امممممممم تبينه ماركات و لا عادي ؟
عندج الرايه + الصالحيه + 360 = ماركات و بوتيكات عالميه

سوق شرق + الفنار + المهلب + المارينا + الكوت + كويت ماجيك + سيتي سنتر + البيرق + المنشر = سوق عادي و تتفاوت فيه الاسعار

وين اقدر احصل ملابس شعبية لليهال ؟

بالمباركيه ( حررر )
او تلاقينه ببعض مجمعات الفروانيه + الفحيحيل
و اعتقد داخل السيتي سنتر


و في داخل بروي بالافينيوز الدراريع و الدشاديش
بس مبالغين باسعارهم حبتين

وين اقدر احصل اواني مطبخ وحركااات ؟

الفياصل
و عندج سوق شعبي موجود في حولي + الفنطاس و أماكن ثانيه
اسمه طيور الجنه و في بفحيحيل سوق اسمه الوافي و الشاهبندر فيه سوالف مطبخ و اسعار معقوله

بشو بعد تنصحوني ؟؟؟

اخذي فره بساحة السياحه بالكويت و اي سؤال انا بالخدمه
و عندج بعد منتديات سياحيه تقدرين تطلين على التقارير

هيه صح المولات تفتح بالنهاار ولا لا ؟؟

حسب المول
بس عموما تكون فاتحه كلها بالنهار الى قبل الفطور
تغلق وقت الافطار و تفتح عقبها الى نص الليل

ولي عودة للموضوع ان شاء الله

بانتظارج حبي

 

[كلنا نحب الكويت]

حياج الله حبيبتي تنورين الكويت
شهر رمضان بالكويت من احلى الشهور
وإن شاء الله راح تقضين اوقات حلوه

 

[msl 1881]

حياج الله حبيبتي في الكويت
والكويت حلوه وموعشان اني كويتيه لا والله
الكويت كل شي فيها شنو تبين تلاقين من الالف ل الياء
بس انتي سئلي
وشهر رمضان من اجمل الشهور ماقدر اقولج لاجيتي ان شاء الله بتشوفين له طعم ثاني سبحان الله

 

[ReDLOve]

حياااج الله يقلبي و اختناا ديفا كفت و وفت
عندي عنوان شقة فندقية دانة بلازا .. واتصلنا وطلعت الليلة 35 دينار ..
هل السعر زين ؟ وهل المكان نظيف ؟
ويا ترى وين موقعه ؟ ليكون آخر الدنيا ؟؟

 

[العروس الحلوة]

الف حياج الله تنورينا حبي

لله ينور عليج مشكورة حبيبتي على التوضيح الكامل ..

عاد حلاة السفر باللمه
أحلى شي
لوووووووووووووووووول
أموت على اهلنا لا زارونا الكويت
نفصل الشباب عن البنات
و نطلع البنات كلنا ونااااااااااااااااسه
اصلا طلعات البنات غير و اهتماماتهم غير
يعني لاااااا تشيلين هم
و اذا صار حاولي تستمتعين

خلاص حمستيني اسكن مع الناس .. بس اشوي متردده لني اول مرة اشوفهم ولا عمري شفتهم .. وثانيا اول مرة اسافر مع ريلي حابة نكون مع بعض ..

السعر مناسب و ممكن تلاقين على 30
و في بالسالميه على 20 بس اعتقد يأجرون حق شباب بعد
أو غرفه وحده
و أغلب الشقق الفندقيه نظيفه و مواقعها مميزه
الا اذا كانت بالفراونيه بتكون زحمه و كلها وافدين

زوجي لقى واتصل لسارة بلازا الفندقية .. في السالمية وقال ان مكانها مناسب وقريب لاهله ..
وبقعد فيها خمس اياام ان شاء الله .. بس للحين ما حجز لن باقي اكثر من شهر ..
مشكووورة وايد ..

حولي
اما رقم التلفون ما عندي
لكن ان رحتي حولي خصوصاً بالقرب من المهلب
لو تسألين اي شخص وين ( حولي بارك ) راح يدلونج و اهي اساسا
في ملاهي
من تشوفين الالعاب و مطعم شريمبي و قيصر تدرين انج وصلتي

يعني بعيدة من السالمية ولا قريبة ؟ ما أبغي اكلف على الناس .. وممكن اروح لها بالتاكسي ؟

سوق شرق + الفنار + المهلب + المارينا + الكوت + كويت ماجيك + سيتي سنتر + البيرق + المنشر = سوق عادي و تتفاوت فيه الاسعار

ما أبغي ماركات .. الماركات موجودة في كل بلد ..
بس أبغي العادي لن فيه اشياء يديدة وغريبة من بلد لبلد .. صح ؟




هيه . ابغيه الاستكانات القديمة .. نفس اللي بالصورة هذي ..
ونفس الغوري وين احصلهم ؟؟


ولي عودة لباقي استفساراتي

 

[العروس الحلوة]

حياج الله حبيبتي تنورين الكويت
شهر رمضان بالكويت من احلى الشهور
وإن شاء الله راح تقضين اوقات حلوه

تسلمين يا الغالية

مشكورة

 

[العروس الحلوة]

حياج الله حبيبتي في الكويت
والكويت حلوه وموعشان اني كويتيه لا والله
الكويت كل شي فيها شنو تبين تلاقين من الالف ل الياء
بس انتي سئلي
وشهر رمضان من اجمل الشهور ماقدر اقولج لاجيتي ان شاء الله بتشوفين له طعم ثاني سبحان الله

مشكووورة وايد حمستوني ..

وخصوصا على رمضااان ..

 

[عبير-الشرق]

ياهلا باهل الامارات حياج الله بديرتج الثانيه الكويت واهل الكويت يحبون ملافعكم وعباياتكم احسهم مميزين وبالنسبه للمولات عندج 360 والافنيوز مارينا هذا اكبرهم واهمهم واذا تبين الماركات بالصالحيه و360

 

[ابتسمامه]

ياهلا ومرحبا
الاستكانات والغوري بتحصلينهم بالاسواق الشعبيه ومحلات مستلزمات البر انتي سالي اهل زوجج اقرب سوق شعبي لهم شنو
والسالميه قريبه من حولي مو بعيدة
وانصحج تروين كويت ماجيك بابو حليفه بعيد شوي تقريبا 20 دقيقه بدون زحمه بتحصلين فيه شغلات مو موجوده عندكم
والله يعينج على الزحمه بعد الفطور
وبالنسبه للصوغه جيبي زعفران

 

[Zen&7ala]

اهليين و سهليين


1-اول شي ان شاء الله السكن ما عليها اشكال بتروحين عندهم ولا بشقه مفروشه ما تفرق و هذا شي راجع لج و لراحتج


2-شنو تيبين لهم من هدايا : معمول اماراتي - خام اماراتي - دراريع اماراتيه - و اشياء متميزه فيها الامارات


3-وين تروحين؟؟؟: انصحج تروحين الافنيوز , و تروحين سوق المباركيه , و للأواني تروحين رامز- سوق لندن (السعر حلو رخيص و المواعين حلوه و موجوده بكل مكان في بحولي و السالميه بس ب رامز و سوق لندن ارخص)

4- انصحج تروحين مجمع 360 حلو و خفيف و تروحين الأفنيوز هذيل المجمعات الي تسوى ولا تروحين غيرهم لان

راح تضيعين وقتج , و اذا تبين عبي حلوه روحي الفروانية (مجمع العربيد أو مبارك الصيفي ) تاخذيلج جم عبايه من الكويت شي حلو

و انصحج تروحين مجمع ستي سنتر السالميه كل الخليجيين يروحون له لان اسعاره رخيصه تحصلين بجامات و ملابس و عبايات و كل شي اذا حابه حق هدايا او حقج وايد راح تستانسين منه انا اشوف كل الخليجيين ايووله و يحبونه

و بعد انصحج تروحين الابراج تتعشين على يوم و تروحين الاكوابارك يوم الثلاثاء للنساء فقط تغيرين جو مع البنات و تتسبحين


و انا لي اهل بقطر ما عمري شفتهم (صديق ابوي من اكثر من 30 سنه ) جا الكويت و معه اهله اول مره اشوفهم انا و اهلي

مشاءا لله بسرعه عرفنا بعض و طلعنا مع بعض حييل استانسنا و كانوا يايبين لنا خام من قطر و عطور و خام و استانسنا عليهم

 

[جوري 2007]

حياج الله الغاليه

مكتيبة جرير بحولي بارك <<< داخل الملاهي