خريجة يديدة و سجلت بالديوان و مو عارفه شالموضوع ،، ياليت تعلموني شسوي ..

[بنات حواء2]

اي عشان بيكودونه بمكان واحد

يدرون وايد مقبولين من امه بيصير زحمه

 

[بنات حواء2]

وينكم
الملاك وينج شصار وياج

 

[( المـلاك )]

بنات انا رديت البيت

و ابشركم لووووول طالبين منا احنا ( تخصص علوم الاسره و المستهلك )
مثل ما طلبوا من ام زنوب ( تخصص الاقتصاد المنزلي )

انا كتبت لكم عالسريع
اخلص غداي واقولكم التفاصيل

بس هذا اهم شي
لاني كنت احاتيه
انا العن منج ام زنوب هههههههههههههه

 

[بنات حواء2]

امبي حلفي
جان قلتي لها انا علوم اسره مو اقتصاد منزلي
امبي حدي انصدمت
الله يعين انا راح اعطيج حل بما اني خلصت التحاليل كحل سريع لج بدال العباله الي صارتلي
عمومن يالله كلنه بلهوا سوا
خلهم يزرعون منه لين يقولون بس
بس على فكره راح تلوع جبدج زهبي جيس حق الترجيع بالحمام

 

[( المـلاك )]

يلا سمعوا الاخبار ..

طلعت من البيت 9 بالضبط
وصلت الصباح 10 الاربع تقريبا

ابي المجلس الطبي ماكو
شنو هذاااا
لافتات كل مكان
لافته للولاده لافته للصدري لافته لكل شي لكل شي
الا المجلس الطبي ماكو لافتات تدليني عليه
صراحه من غير مبالغه لي قلت
ضيعنا وقت بالفراره هذي
اكثر من وقت المستشفى والتحليل والدور وغيره

وانا نسيت اطبع مخطط ام زنوب بس محفوظ بمخي يعني
وانا اقول روح بوابه الصباح
يقولي اي بوابه فيهم ترى في اكثر من بوابه
واحنا ندخل ونطلع من بوابه لي بوابه
اخر شي قلت ماكو الا معهد التمريض خلنا نشوف وينه واهو يمه
و افترينا افترينا ما لقيناه
جان ننزل الصيدليه اللي بره بالمبنى بروحه
قلتله وين المجلس الطبي ؟ قالي مادري !!!!
اذا انت ما تدري عيل انا ادري !
ولا الفراش اللي يمه وصفلنا
قلت المهم معهد التمريض وين
وهم الفراش وصفلنا
ومشينا عالوصف و شفنا معهد التمريض
ولا يمه بالضبط قباله المجلس الطبي العام
نزلت وانا خااااايفه ام زنوب خرعتني امس لوووول

المهم شنووو هذااااا وييييع
ممر اضيج من ممر الشقه شدعووه و ضيييييج و عفيييسه و جميع الجنسيات و جميع الروائح
حدي لاعت جبدي لدرجه غطيت خشمي بشيلتي لاني حسيت اني برجع واااي
المهم لقيت جدامي شباكين للنساء
واحد فيه 3 فليبينات و 3 هنديات صافين دور يعني 6 و لو بروح وراهم بكون السابعه
و الثاني فيه تقريبا 8 كويتيات و لو بصف وراهم بكون التاسعه
قاعده افكر وين اوقف وين وين وين
بعدين طرى ببالي سؤال ليش هني كويتيات و هني جنسيات ثانيه ؟
جان ارز ويهي عند شباك الجنسيات الثانيه قلتلها هني مايصير كويتيات ؟ قالت لا كلنا نفس الشي عادي
المهم وقفت ورا الجنسيات الاخرى و صرت السابعه بس الدور ما يمشييييييي كلللش ليلحيني رقم 7 !!
و الشباك الثاني خلصوا بقى بس بنت وحده ، جان اغير و اروح وراها
توني رحت وراها ولا الموظفة قامت من مكانها حظرتها
و مسكت التلفون و طاحتله سوااااالف و تكركر و عقبها صكته و مسكت البي بي مالها و مجابلتها رفيجتها
و يا فلانه استقبلي و شوفي و حطي وووو
امبيه امبيه صج صج صج صج ناس ما تستحي مابي اقول اكبر من هالكلمة
والله عيب والله فشله اللي تسوونه
الناس طوابير و عفيسه وانتو جذي تسوون
تأخرونا عشان تكركرون و تسوون هالحركات
المهم الوحده اللي جدامي لاعت جبدها مسكينه
جان تطلع تتل ريلها وترد تدش تخليه يوقف يمها
فهمت قصدها تبي واحد يصارخ يعلمهم السنع
بغيت اقلدها بس انثبرت بمكاني
المهم من غير مبالغه حركات هالموظفات تمت ربع ساعه
عقبها جان يقعدون بالكرسي
عطيتها اوراقي والله ثانيتين ما خذت !!! يعني لو اهي منثبره مثل الاوادم ومخلصه الشغل
جان كل شي تمام
بس خذت اوراقي ، وعطتني ورقه تحليل بول ، و ورقه اشعه صدر ، و سجلت ورا ورقتي انه موعدي تاريخ 31 / 7 اروحلهم عشان فحص الدم عقب ما اكون خالصه فحوصاتي و يايبتلهم النتيجه
وعقبها قالتلي شنو تخصصج ؟ قلتلها علوم الاسره والمستهلك
جان تزيدني ورقه !!! انا هني قلبي نغزني قلت لا يكوووون .......
سألتها قلتلها اختي شنو هذي الورقه بعد ؟ قالتلي تحليل ستول
تبلعمت ومشيت عرفت انه تحليل براز
وانا طالعه جان اتذكر سؤال ام زنوب و ارز ويهي بالشباك الثاني
اقولها اختي ليش تخصصنا الوحيد سواء قديم ولا يديد تبون هالتحليل شمعنه ؟
قالت بالتربيه بس انتو اما في تخصصات ثانيه و مضيفات و مشرفات تغذية و مادري شنو اسنان
يبون منهم هالتحليل لانه هالتحليل اهو اللي يحدد اذا في جرثومة بمعدتج او لا
وهالشي ضروري نعرفه حق كل اللي يتعاملون بالتغذيه وانتو عندكم طبخ وتغذيه
قلت مشكورة و مشيت وانا زعلانه نفسيتي انقلبت فوق تحت
احاتي على قولة ام زنوب الحيثية و الكيفية لوووول
اي صج قالتلي لما تيين بموعدج ييبي معاج صورة وحده 4ب6
و روحي المستشفى التابعه لمحافظتج وسوي تحاليلج واشعتج هذي

وطبعا وانا بهالموقف
صار وراي طااااااابوووور يمكن 20 بنيه
لفيت ويهي اخترعت قلت بسمالله متى صاروا هالكثر
وحتى الشباك الثاني صار عفيسه مو طابور جذي كوده

و ايييي اقولكم طول فترة وجودي بهالمكان
لووووعوووووا جبدي موظفين البنوك
كل شي واحد راز ويهه عندي
سلام عليكم ويعطيج العافيه اختي سويتي تحويل راتب ؟ اقوله اي
و يردلي واحد ثاني انا البنك الفلاني افتحلج حساب ؟ بالله يا قوطي شلون متخرجه انا اعانتي كانت وين تنزل يعني
و يطلعلي واحد غيرهم ، انتي اي بنك اطلعلج تحويل راتب
و يطلعلي بعد واحد احنا البنك الفلاني شرايج تحولين عندنا
وانا ارد من طرف خشمي واااي مللوني
كل شوي واحد يطلع بويهي ويدش بنص الطابور عشان يقولي قصته
خو وخر الطابور اللي فيه مكفيه و الموظفات مو مقصرين لا تزيدونها انتو
يعني صراحه منو هذا صاحب هالاقتراح الفاشل
انه يحط موظفين البنوك بالمستشفى الضيج هذا
يعني شي بديهي ما سوينا تحليل ودشينا المجلس الطبي
الا واحنا مسلمين اوراقنا و من ضمنهم شهاده تحويل راتب شهالغباء !

وبس عقبها طلعت دايركت رحت مستشفى مبارك لانه اهو اللي تابع بمحافظتي
رحت هناك وااي المستشفى يضيع شكبره لوويه
يكفي انه ماكو مصافط
اما الطريج و الحر بعد شنقول الله كريم
المهم اول شي رحت المختبر
سلمتها اوراق التحاليل
وعطتني ورقه و عطتني علبتين
و رحت الحمام تكرمون و خلصت الموضوع
مع اني كنت حيييييييييييييييييييييييييييييييييييييل احاااااااااااااااااااااااتي هالموضوع
بس الحمدلله سهالات و ارتحت حييل يوم خلصت وااي صج هم وانزاح
و سلمتهم لهم و خذيت ورقتي
قالت تحليل البول يخلص باجر الصبح
اما تحليل الزراعه مال البراز يخلص بعد 3 ايام
قلتلها بعد 3 ايام يعني اليمعه يعني لازم امركم الاحد صح
وانا موعدي بالصباح الاحد مايصير قبلها
طبعا مصريه تتكلم من طرف خشمها ودج تفلعينها
وانا لاعت جببدي منها ارد عليها بالعن من طريقتها
هذا اللي ناقص صراحه

و رحت قسم الاشعه
طبعا ماكو عامل هناك ما خذا منا ربع عشان يدلينا الطريج هههه
وداني قسم الاشعه و عطيتهم ورقتي و نطرت دور
كانوا جدامي بس 4 الحمدلله مو وايد
المهم وصل دوري و دخلت
قالتلي فصخي كل شي فوق داخل الغرفه هذي و حطي اغراضج ولبسي هاللبس
عطوني لبس برتقالي
المهم لبست و سويت الاشعه وخلصت ورديت غرفه التبديل بدلت ولبست وطلعت
قبل لا اطلع من الغرفه
نادتني الفليبينية وعطتني اشعتي
قلتلها شنو خلصت ؟ قالت اي خلاص
قلتلها يعني بس ؟ قالت اي خلاص
وبس طلعت من مستشفى مبارك

و رحت الصالون ورديت البيت وسويت غدا وتغديت وكاني اقولكم الاحداث كلها
بس ام زنوب يوم شفت ردج تقولين انه تقرير الاشعه مافيه شي
طرى ببالي سؤال
وشكلي انا عفست الدنيا والله :/
شنو هذا تقرير الاشعه ؟؟
يعني الحين الاشعه ما استلمها فاضيه بس اهي الاشعه داخل ملفها الابيض ؟
لازم يكون معاها تقرير ؟
يعني لاازم عقب ما اخذ الاشعه اوديها مكان عشان يشوفها دكتور ويطرش تقرير واستلمها مثلا ثاني يوم ؟
امبييه لا تقولين اي
اي صح جنه اشعتي فاضيه ولازم تقرير
واااي بديت انصدم
صدميني اكثر

 

[بنات حواء2]

الملاك حبيبتي سبحان الله لو تقرين ردي عقب مارجعت من اللويه مالت المجلس الطبي تلقين نفس العبارات سبحان الله
بس ضاق خلقي عليكم لمن دريت ان عندكم رزاعه
بس الكيفيه و الحيثيه على قولتي اليوم لعبت فيني لعب سكتي بس ترجيع رجعت من اللوعه و قعدت بالحمام نص ساعه الله وكيلج اليوم لا غذا و لاا ريوق تريقت من الي صار شي يلوع الجبد قسم بالله اي لازم علبتين و ياخذ 3 ايام لا و انا قالولي 4 ايام و موعدي 28 بس اذا ماخلص تاريخ 28 راح اروح وياج يوم الاحد و لا زم قبل الساعه 11
و اشوى انج قلتيلي عن الصوره لانه محد قالي عنها دليل ان الموضوع هناك كله خرابيط بخرابيط
لا حبيبتي الاشعه مالتج جذي جاهزه بس احنه بالعدان يرفقون وي الاشعه تقرير اسرع حق المجلس الطبي بدال مايحط الاشعه و يشوفهم سيده يقرا التقرير و يقيم عليه بس اذا ما معاج تقرير عادي يطالعم و يكتب الي يشوفه فلا تحاتين حبيبتي جذي و لا جذي ماشيه السالفه بس بالعدان لانه مركز الي يسويلجياهم فيسويلج شغل كشخه يعني عشتو وايد عليهم
بس بصراحه اخلاق الموضفين بالعدان حلوه و هو الشي الي يهون عليج ظيم المكان و المراجعين و الله يكثر من امثال هلموظفين مانبي منكم شي ابتسامه و اسلوب بس

بنسبه للوقت الي ضاع قتلج اخذي المخطط كلش كلش رسمي بورقه و الله يوفر عليج انا لو كان هلمخطط عندي جان من امس انا خالصه فحوصاتي بس الفراره هي الي اخرتني ساعه كامله

اما بنسبه للمجلس الطبي و الموظفات بصراحه الله يعين حدث و لا حرج معني انا مصار وياي هشي بالعكس العرقله كانت من المراجعين نفسهم الي مايحترمون الدور و النظام و الموظفه ماكان هامها هشي تاخذ اي ورقه جدامها يعني المشكله بنظان و الترتيب
عمومن الحمدلله خلصتي اوراقج و ارتحتي الحين بس عليج تاخذين النتايج
وقولي الف الحمدلله ترا ماتغربلتي مثل ما انا تغربلت انا من مستشفى لي مستشفى من مستوصف لي مستوصف

 

[أنـوآر الـكويـت]

الملاك

انا مثل ام زنوب عطوني تقرير مع الاشعه
وانا مو العدان

فمادري اتوقع ضروريه تكون معاج
سألي بهالنقطه احسن من لا تروحين للمجلس الطبي ويردونج وتصير حوسه

 

[بنات حواء2]

اهلين انوار لاعادي صدقيني لاني سألت رفيجتي قالتلي عادي هي ماكانوا معطينها تقرير و خذوا منها المجلس

 

[jen2n]

الملاك بالمجلس الطبي لما تدشين على الدكتوره حق الفحص السريري اهيا اللي راح تشوف الاشعه وتكتب النتيجه بالورقه الطويله اللي عطتنا اياها الوزاره

 

[بنات حواء2]

مثل ماقالت جنان بالضبط
بس بنات ماعندكم معلومات عن الخطوه الي ورا المجلس الطبي
يعني اوكي احنه راح ناخذ الاوراق و نردهم علمنطقه و بعدين ؟؟؟
متى يتم تحديد المرحله و المدرسه ؟؟؟؟؟
منو تعرف الاجراءات الي وراها
عشان ابي اسئل عن المدارس الزينه يمكن يخيروني و اختار او يخلوني اكت رغبات

 

[jen2n]

احنا حددو لنا المرحله قبل ما نروح المجلس الطبي!

بس للحين ما رحنا المنطقه التعليميه!!

منو عنده فكره متى نروح لووول وسمعت ان الدوره حق الكل مو بس الغير تربويات! بس ما قالو لنا متى للحين ناطره مسج من الوزاره عشان اراجعهم

 

[بنات حواء2]

اها يعني اجراءات الجامعه غير عنه
زين قلتي لنه
انتو خلاص حددتوا المرحله
بس احنه لا عقب الفحوصات الطبيه
و الله جنان انا ماعرف حق اجراءاتكم كلش اخاف اقولج و يطلع غلط و تضيعين وياي اتمنى البنات يفيدونج سألي ذكريات عشاق هي خريجة جامعة الكويت

 

[miele]

مسااء الخيير بنات

ام زنوب وملاك...تضايقت لما دريت ان هم احنا عندنا هالتحليل الزاايد..
بس العمووم زين افتكيتوا وخلصتوا.. هم وانزاح حمدالله.

 

[miele]

احنا حددو لنا المرحله قبل ما نروح المجلس الطبي!

بس للحين ما رحنا المنطقه التعليميه!!

منو عنده فكره متى نروح لووول وسمعت ان الدوره حق الكل مو بس الغير تربويات! بس ما قالو لنا متى للحين ناطره مسج من الوزاره عشان اراجعهم

جنان عفيه بسألج : منو المسؤول عن تحديد المرحله ؟؟ يعني اي قسم بالضبط بالمنطقة؟؟؟؟

 

[( المـلاك )]

ام زنوب ،،
اي والله قريت ردج وشفت شصار معاج بس شنسوي بعد ، و طمنتيني على سالفه الاشعه
توقعت اني خرتها و خذيت اشعتي وطلعت بدون باجي الاجراءات

jen2n ،،
يعطيج العافيه حبيبتي طمنتيني ،، وبالنسبة للدورة قالوا تبلش 5 / 9 و تشمل التربويات وغير التربويات
والكل مجبور فيها و غيابج فيها ينخصم من راتبج مال اول الشهر ، وقالوا انه بيحسبون الغياب من اول يوم دوام بالدورة

miele ،،
ايي والله شفتي التحليل الزايد ، صدمني انا بعد
اصلا اهم يدرون انه تخصصنا اهو المطور ، لانه مجرد انها سألت شنو تخصصج ؟ قلت علوم الاسره والمستهلك
علطووول شخطت الورقة مافكرت
عيل وين هذيل اللي 4 سنين واحنا ماكو احد مافهمناه شنو يعني علوم اسره ومستهلك
من الكبير لي الصغير يسأل ، الحين على حظنا هذي صارت عندها دكتوراه بهالامور وصارت تعرف شنو التخصص
اصلا لو اهم يفهمون صح بعيد عن هالموضوع يعني
ترى تخصصنا مافيه اي شي من الطبخ و التعامل مع الاغذيه نهاااائياااا واحنا بنات علوم الاسره ادرى بهالشي
بس شنسوي عالوزاره اللي خلتنا ندرس اقتصاد منزلي غصب فاكيد راح ندرسه بالتوظيف بعد وهالشي اهو اللي خلاهم يعاملونا معاملة الاقتصاد



وسوري ام زنوب ، مو قصدي انقص من تخصصج ،
بس صج صج صج لو تشوفين تخصصنا وااااايد احلى و مافيه اي شي يخص طبخ او خياطه
و يوم رحنا الميداني صدمووونااا من اول اسبوع نطبخ و نخيط
وحظرتهم يعطونا دورات غصب عن الخياطه و الميكرويف و شكل الاغذيه وغيره
احنا مصدومين لانه 4 سنين ما طبينا مطبخ ولا مسكنا حتى طماطه ولا شكينا خيط بابره اصلا
فهذا الوضع حيل منرفزنا يعني مو حلو تدرسين شي طول هالسنين واخر شي تدرسين الطلبه شي انتي مادرستيه
مجرد تقرينه بالكتاب و تحضرينه و تشرحينه بدون اي خلفيه عن الموضوع للاسف الشديد

 

[miele]

اي شفتي شلوون ملااك .. واحنا الحين يعني يكوون بنقص علييهم عشاان ماايعطووونا... ههههههه

 

[beauty rose]

يعطيكم العافية بنااااات الله يصبركم ان شاء الله تخلصون قبل رمضان و ترتاااااحون

 

[( المـلاك )]

اي شفتي شلوون ملااك .. واحنا الحين يعني يكوون بنقص علييهم عشاان ماايعطووونا... ههههههه

ايي لووول اثاري يدرون شالطبخه
واحنا هني نسوي خطط و افلام
اخاف وحده منهم داشه هالتجمع وبايقه معلومات هههههههههههه

يعطيكم العافية بنااااات الله يصبركم ان شاء الله تخلصون قبل رمضان و ترتاااااحون

الله يعافيج حبيبتي
اي والله انشالله نخلص مبجر
طلعه الصبح والمراكض لويه مو طبيعيه
فمابالج اذا كانت برمضان
انشالله يارب نخلص مبجر و باجي بنات المحافظات الثانيه يخلصون بعد

 

[( المـلاك )]

تدرون بشنو افكر الحين ؟؟
تعالوا فكروا معاي هههه

الكورس اللي طاف اول ما قطونا بالميداني
رحت حق مكتب التربية العملية اقولها تغيرلي مدرستي لانه قطوني بمكان حيل بعيد
وخليتها تتأكد اذا في مجال أو لا
والحمدلله طلع في مجال ونقلت مدرسه ابيها وكنت نوعا ما مرتاحه فيها
المهم ما علينا مو هذا الموضوع

الموضوع انها واهي تصفح اوراق المحافظات وتوزيع البنات ( طبعا انا اتكلم عن بنات تخصصي بس )
جان تقول محافظة حولي ( البنات نص صفحه )
و محافظة العاصمة ( ربع صفحه )
و محافظة الاحمدي ( ثلاث ارباع الصفحه )
و محافظة الجهرا ( صفحه ونص )
و محافظة الفروانية ( صفحه ونص )
و محافظة مبارك الكبير ( وصلوا صفحتين ونص )
طبعا انا اقصد انه عدد البنات بالصفحه الوحده ،
وانا اصلا بالميداني كنت بمدارس محافظة حولي على بطاقتي المدنية يعني مو صوب مبارك الكبير
بس كانت تقولي مالت التربيه العمليه انه اغلب بنات تخصصكم من محافظة مبارك الكبير
!!

حتى كنت اتصفح معاها الاوراق
يعني معناته اغلب بنات تخصصنا من محافظة مبارك الكبير
فـ يعني شنو العفيسه اللي بتكون وشلون عالتوزيع وخاصه اني سمعت وقتها انه وااايد مدارس بمبارك الكبير
عندهم اكتفاااااااء و في مدارس بمبارك الكبير بعد رفيجاتي كانوا فيها ميداني يقولون اكتفاء و بنهايه الكورس وبنص الكورس يو عندنا ابلات تعيين يديد بعد للتخصص .

يعني الحين احنا يا معشر الاقتصاد المنزلي وعلوم الاسره والمستهلك
اللي مسجلين بمحافظة مبارك الكبير
شنووو وضعناااااا

وااااي خلاص هونت برد محافظة حولي احسنلي
وانا بس قاعده اخرع نفسي ههههههه

اخترعوا معاي وفكروا
بما انه احنا تقريبا 4 او 5 بهالتجمع من بنات هالتخصص

 

[miele]

وييي احنا الفروانيه صفحة ونص ...!!!! يعني لااا طبنا ولا غدا الشر....

وبعديين تدرين شنو افكر فييه.... انا خذيت الميداني كوورس اول ... والحين حااسه اني نااسية شلوون احضر .. ابي اقعد اراجع دفاتر تحضييري چوود اتذكرر