استضافة الدكتور نائل الهزيم .. تخصص جراحة الوجه والفكين والاسنان

[xxx]

يسعدنا استضافة الدكتور نائل الهزيم

تخصص جراحة الوجه والفكين والاسنان

السيرة الذاتية :

Dr. Nael Alhazeem​

Bachelor of oral biology- university of Missouri USA 1995​

Doctor of dental surgery- university of Missouri USA 1995​

American board diplomat in dental surgery​

Fellowship of oral surgery University of Missouri​

USA 1996​

Speciality degree in Oral and Maxillofacial surgery University of Missouri USA 2002​

Amiri hospital- department of Oral and Maxillofacial surgery 2002-2005​

Supervisor of Maidan Clinic-hawally 2005-2009​

Chairman of Oral and maxillofacial surgery and dental department at Alseef Hospital 2009-current​

Clinical instructor at Kuwait University-Dental College 2004-current​

الدكتور نائل الهزيم ​

- بكاليورس في بيولوجيا الفم – جامعة ميسوري الولايات المتحدة الأمريكية 1995​

- دكتوراه في جراحة الأسنان - جامعة ميسوري الولايات المتحدة الأمريكية 1995 ​

- حاصل على البورد الأمريكي في جراحه وطب الأسنان​

- حاصل على زمالة جراحه الفم – جامعة ميسوري الولايات المتحدة الأمريكية 1996​

- حاصل على درجة التخصص في جراحه الفم والوجه والفكين - جامعه ميسوري الولايات المتحدة الأمريكية 2002​

- جراح في مستشفى الأميري قسم جراحه الفم والوجه والفكين 2002 - 2005​

- مشرف على عيادة الميدان – حولي 2005 - 2009​

- رئيس قسم جراحه الوجه والفكين والأسنان في مستشفى السيف من 2009 حتى وقتنا الحالي​

- أستاذ في جامعه الكويت – كلية طب الأسنان من 2004 حتى وقتنا الحالي ​

أرجو كتابة الاستفسار بشكل واضح

وسيقوم الدكتور مشكورا بالرد بعد تجميع اكبر عدد من الاستفسارات

 

[هتانة الغيمة]

ما شاء الله سيرة حافله

احب اشكر الدكتور نائل على اعطائنا جزء من وقته فجزاه الله خير

ونشكر المنتدى على استضافة الدكتور نائل

عندي كم سؤال

اول شي استوقفتني كلمة American board diplomat مالمقصود بالظبط بالبورد الامريكي؟
هل هي شهاده معينه او تدريب او ايش بالظبط لان حسب علمي اعرف ان الشهادات العلميه
3 بكالريوس وماستر ودكتوراه لكن ما ادري بالظبط ايش هو البورد ياليت توضح لنا يادكتور

السؤال الثاني : بالخليخ اشوف ان غالبية الي عندهم مشاكل بالفكين يركبون تقويم للاسنان وبعده جراحه للفكين وبعد الجراحه يتم تكميل التقويم كم شهر وتنتهي الحاله بس الغريب ان ببعض الدول العربية مصر وسوريا وانا اخذت استشارات قبل سنوات خلال زياراتي ما يبدأون بالتقويم
بالعكس يبدأون بالعمليه اولاُ وبعده التقويم فلماذا هذا الفرق بالعلاج وما السبب وبراأيك مالطريقه
الصحيحه

السؤال الثالث : خلال العشر سنوات الماضيه ماذا تطور بمجال جراحة الوجه والفكين خصوصا بموضوع جراحة الفكين التصحيحه

السؤال الرابع والاخير : قرأت عندكم جهاز اشعه جديد بمستشفى السيف ما فرق هذا الجهاز عن
جهاز الاشعه العادي والي استغربته وجود اخصائي باشعة الوجه والفكين فهل قراءة اشعه
تحتاج لاخصائي بهذا المجال اليس اي طبيب اسنان يستطيع فراءه الاشعه وفهمها ؟



آسفه للاطاله واكرر شكري لك يادكتور ولادارة المنتدى

 

[غلا الأيام]

اشكر مديرة المنتدى بنت الكويت على استضافه دكتور نائل الهزيم

اللي اعتبره صراحة احسن واشطر دكتور في الكويت

انا ما عندي اي استفسار حق الدكتور بس احب اشكره

على عطائه المتوااصل واخلاقه الراقيه وابارك له على الشهر الفضيل

للامانه سوالي جراحه وسوه حق اختي ماشاءالله ليه يومج هذا وانا ادعيله

والله يكثر من امثاله والله يوفقه يارب ومنها للاعلى

 

[om ragad]

السلام عليكم ورحمة الله وبركاته

مشكوره بنت الكويت يالغاليه على الاستضافه الرائعه لدكتور نائل

ويسعدنا تواجد دكتور من مثل دكتور نائل بيننا

وسؤالي للدكتور :: انا ابي اسوي ابتسامة هوليود ولكن من غير ما ابرد اسناني (( اقصهم)) يصير ويسوونها لي ولالا..؟؟
اذا مابردتهم يجدمون جدام الاسنان .؟؟

وجم تكلفني تقريبا..؟

واكون شاكرتلك دكتورنا

واذ

 

[بنت السلطآإآن]

اول شي مبارك عليك الشهر ومشكووور لانك عطيتنا من وقتك واشكر اداره المنتدى وبنت الكويت

انا بستفسر عن الفراغات الموجوده في الاسنان العلويه مو فراقات كبيره لا بس تبين ابي اعرف شنو الطريقه المناسبه لجعلها متراصه سامعه عن الحشوات وقالو انها تطلع ريحه كريهه مع الوقت


وبس مشكوووووره مقدما

 

[أميـِـِره]

مششكوورة بنت الكويت علئ استضافةة الدكتوور نائل

يعطيكم العآفيه

أنآ سؤآلي

١-أنآ أقكر أقص لثتي شوي بس للتجميل هل في عوآر ؟! و جم يوم يظل العوار !!

٢-وقص اللثة بالليزر أو لأ

٣-وجم تكلف قص اللثه ؟!

٤- وإذآ في مدة للشفآء من قص اللثة جم يوم ؟!

وبس مشكوريين

 

[Føzöø]

السلام عليكم و روحمة الله و بركاته ،،،
مشكوره ع استضافة الدكتور نااائل
يعطيج العافيه بنت الكويت ماتقصرين 

 

[لبى عيؤنكـ]

السلام عليكمم والله وربي يششهد علي ان بنت خالتي اتعاني
انها تعاني من ورم سرطااان برقبتها وبعدين ياا صوب سقف الحلج
وصار فيها خطا طبي وشالو نص لثتها للي فوق ضروسها موجوده كل تقارير والفحوصاتها
للي بنعرفه اكو عمليه زراعه لثه وين عيادتك ويين مكانك وربي يادكتور البنت حالتها نفسسيه حيييل اتخيل بنت عممرها 22 بدون لثه نص حلج حتى ضروسها ثلاث مع لثتها شالوهم دكتور طلبتك انت وبنت لكويت توقفون معاها والله يالعظيم اقرب الناس اتعايرها بصحتها وهذا رقممي بعطيه لج بنت الكويت بلخااص بس بليزز ساعدينا والله مالنا غير الله وانتو دكـــــــتور اتمــــــــــــنى اترد علي ضرروررررري

 

[بسموهـ]

حيااك الله دكتور .. عندي استفسار وياليت تجاوب عليه


عندي مناسبه شهر 9

1) وابي اسوي تبييض لأسناني .. كم من الوقت احتاج قبل المناسبه ؟؟

2) سبق وحاولت .. وقال لي الدكتور .. ان الإصفرار باسناني ..

هو نتيجه .. لتناول امي .. لأدويه خلال الحمل .. بي .. اي .. ان الاصفرار .. منذ تكون الأسنان .. قبل الولاده

هل بالامكان .. ازاله الاصفرار .. هذا ؟؟

 

[هيبة انثى]

السلام عليكم .. يعطيج العافيه بنت الكويت الف شكر لج على استضافة الدكتور نائل ..
حياك الله دكتور وجزاك الله خير ..
عندي اكثر من سؤال :
1- انا اسناني بسبة ضرس العقل قبل ما اسويله جراحه ضاغط عليهم وتحركوا فصاروا مو صفه وحده مو وايد بس مبين نوعا ما !! وودي احط تقويم؟ بس سؤالي!! هل التقويم ان شلته راح يردون مثل ماكانوا!

2-وايد دكاتره ماينصحون بالتبيض اللي بالعيادات ..ينصحون بالقوالب اللي بالصيدليه.. ابي رايك دكتور لو تكرمت؟

3- دكتور برد الاسنان هل يضر الاسنان وهل له اضرار! وايد يقولون لي اذا بردتي اسنانج راح تصير حسااسه ..

ومشكوور ويزاك الله خير

 

[غلاي123]

السلام عليكم و روحمة الله و بركاته

شكرا لك بنت الكويت على استضافة الدكتور نائل الهزيم
وحياك الله دكتور معانا منورنا
عندي سؤالين لو سمحت دكتور:
1_ بالنسبه لعمليات تقويم الفك كم تكلفتها وكم نسبة نجاحها بالمئه وهل العمليه تحتاج لكسر عظام الفكين .
انا عندي الفك العلوي لا ينطبق على الفك السفلي يعني متقدم عنه ومرات عند مضغ الطعام يصدر الفك صوتا مما يسبب لي الاحراج احيانا يعني هل في امل اني اعدل فيه او لأ .

وشكرا لك يا دكتور وجزاك الله خير

 

[LuLiTa]

اشكر المنتدى لـ استضافته للدكتور نائل و اتمنى انه يتقبل اسألتي بـ رحابة صدر ...


سؤالي :
انا محتاجة اسوي زراعة اسنان في الفك العلوي... بس لازم اسوي زراعة عظم في البداية بسبب تراجع مستوى العظم في الفك...


سؤال شنو نسبة نجاح زراعة العظم اجمالا ؟


و هل في احتمال انه العظم المزروع يتحرك او ما يتثبت في مكانه او ما يتماسك مع العظم الاصلي ؟


و شنو اهي مدة الشفاء بعد زراعة العظم ؟






و قواااك الله و يعطيك العافيه

 

[cup-cacke]

مشكوره حياتي مديره المنتدى على الاستضافه الحلوه


يعطيك العافيه دكتور


اناا توني شلت التقويم.وللاسف باقل من اسبوعين ردوا اسناني مثل قبل..واساسا ماكانت عاجبتني النتيجه لما شلته

بس عندي فراغات بين اسناني انا كان احد الاسباب اللي ركبت فيها التقويم ان تتسكر الفراغات..بس ردت فتحت..هل اكو حل ثاني غير التقويم لان مستحيل ارد اركب مره ثانيه

واللي لاحظته ان لثتي كبرت وما قمت احب اضحك وايد

ياليت تفيدني

 

[still there]

السلام عليكم
مبارك عليكم الشهر الكريم و شكرا لاستضافة الدكتور نائل الهزيم
و حابة استفسر من الدكتور عن حالتين عندى ,,

اولا اخوى عنده الاسنان الامامية بالفك العلوى متقدمة و متفرقة شوية , و الفك السفلى متقدم ككل عن الفك العلوى قليلا , و مشكلته انه الاسنان الامامية (علوى و سفلى ) ما ينطبقون على بعض , فراح لدكتور و ركب له اول شى موسع للفك العلوى لان يقول الفك ضيق , و صار له تقريبا شهر و الدكتور قال له بعدين لك الخيار يا اما نحط مقوم للفك العلوى مع جراحة للفك السفلى لارجاعه , او مقوم للفك العلوى و السفلى مع تلبيس الفك العلوى , و هو محتار شيسوى و عنده موعد قريب بعد 10 ايام عشان يركب مقوم للفك السفلى مع انه اسنانه السفليه زينه و هو الصراحة مو عارف ليش او شنو الفايدة , يا ليت تنصحه شنو الافضل له و شنو يسوى لانه بصراحة هو راح على طول للعيادة من غير ما يسال و لا يعرف شى عن موضوع الفك و التقويم .


ثانيا اختى دايما عندها مشكلة مع نزيف اللثة و خاصة لما تقوم من النوم و هى تستعمل الخيط و احيانا الاعواد بعد التفريش , و هى تسمع عن جهاز ليزر لعلاج نزيف اللثة و تسال هل يوجد فعلا هذا النوع من العلاج و شنو اسم الجهاز او الليزر المستعمل ؟
و شنو اسباب نزيف اللثة بشكل عام و هل التفريش الزايد و استعمال الاعواد تسبب النزيف ؟ و ما هو العلاج للخلاص من هالمشكلة اللى تعانى منها اختى لسنوات ؟
​

 

[..~Goolz]

مشكوره بنت الكويت ع استضافة الدكتور نائلوحابه استفسر عن عملية تجميل الذقن (تطويله)حابه اسال اي نوع افضل .تطويله بقطعة عظام اضافيه او سيلكون او حقن ؟انا سالت جم دكتور وكل واحد قال نوع >بدون ذكر اسماء العيادات ابي رايك دكتور وابي الشي المضمون والي مو مضر مع شرح افضل نوع كيف العمليه ؟؟وشاكره لك مرا ثانيه

 

[M!Ss Un!VerSe]

أشكر إدارة المنتدى على استضافة الدكتور..

ويعطيك العافية دكتور نائل على تلبية الدعوة
والإجابة على اسئلتنا وتخصيص جزء من وقتك لنا..
جزاك الله خير

سؤالي:
انا لاحظت بصوّري لمن ابتسم حييل لثتي اللي عاليسار تبين حيل وعاليمين ماتبين
وهالشي يحرجني مرات تصير ابتسامتي عوية
وقريت ان يسمونها الإبتسامة اللثوية *وانا مو كل لثتي تطلع بس عاليسار

فشنو مشكلتي وشنو حلها؟
قريت ان من الحلول خياطة اللثة او تعبئة الشفه العلوية
وانا شفايفي مافيها عيب..

تعتقد شنو الحل بنظرك؟!؟

وشكرا

 

[MisS *-* BMW]

اول شيء أحب أشكر إداره المنتدى بنت الكويت على استضافه الدكتور نائل الهزيم ..

وشكرا دكتور نائل على تلبيه الدعوه ,,

عندي استفسار بسيط دكتور بخصوص تبييض الأسنان ,,

اسمع وايد ناس يقولون انه تبيييض الاسنان مو زين كثرته .. هل أهوا هل كلام صح ؟؟ وليش دكتور ؟؟

واذا نبي انسوي تبييض لازم من متى لي متى انسوي تبييض ؟ ياليت تتكلم عن هل الموضوع دكتوور

واكون شاكرتلك دكتور ,,

ويعطيكم العااااافيه :eh_s(17):

 

[dana1212]

السلام عليكم
سوالي هو :
انا حاطة تقويم واللحين شلتته بس احط الرتيرنر بس عند النوم ومو بشكل دايم واحس اسناني مو اوكي
بعرف جم ساعة لازم اكون لابسته عشان تضبط الاسنان انا تقريبا صار لي سنتين من حطيت التقويم بس الريتيرنر صار له سنه
السوال الثاني : بعد ماشلت التقويم طلعوا لي ضروس العقل فشلت واحد بس من تحت (اللي تحت طلعوا بشكل مائل اما اللي فوق طلعوا بشكل مستقيم ) متخوفه اشيل الثاني اللي تحت لان الاول حييل عورني بشنو تنصحني بهذي الحالة ؟؟

وشكرا

 

[barbie girl]

السلام عليكم ورحمة الله وبركاته


شكرا للدكتور نائل الهزيم على تلبية الدعوة وانه خصص جزء من وقته للرد على استفساراتنا


انا عندي جراحه بعد رمضان عند الدكتور نائل باذن الله


والله يا بنات انصحكم بالدكتور نائل كافي اسلوبة وتواضعه الشدييييد مع المرضى


( من تواضع لله رفعه ) والله يرفع قدرك يا دكتور نائل ويوفقك وشكرا على كل شي

 

[منوره99]

السلام عليكم ورحمة الله وبركاته

للإدارة جزيل الشكر علي هذي الاستضافة وحياالله الدكتور بينا ومشكور لردك علي اسئلتنا

دكتور سؤالي
أنا اعاني من مفصل الفكين ماأرتاح إلا لما أسمعهم يطقون علما انني خلعت كل اسنان العقل واظن إن الغضاريف عندي في الفكين قاعده تفتت ومرات اعاني من عوار في الفك والصداع القوي هل له علاقة بالفكين مالحل وماهي نصيحتك لي دكتور .

وجزاك الله كل خير