هالشي من ضمن شغلي ولا مو من ضمن شغلي ؟

[سنـــابل]

قوه ابلات
شخباركم
يلا ما بقى على السنه اليديده ان شاءالله الله يكتب لنا فيها كل خير ونجاح وتوفيق

بنات
عندي سؤال
الحين الدروس النموذجيه وورش العمل تقدر تلزمني الناظره فيهم ؟

والانشطه اللي تسويهم المدرسه تقدر المعلمه تطنش وتقول ماني مشاركه في ولا نشاط , ولا هالشي يعتبر من شروط عملها ؟؟
يعني مثلا احنا بالروضه عندنا انشطه مثلا عندنا نشاط السباحه , فالناظره تكلف ابله تمسك هاليهال وتروح وياهم لروضه ثانيه عشان يتدربون على السباحه ! هل تقدر الابله ترفض هالشي

اخير سؤال انا عندي قناعه ان الابله ملزومه بصفها وبدروسها وبطلبتها وبس , هل في قانون يقول عكس هالشي ؟؟

وضحوا لنا الصوره الله يرضى عليكم

 

[اخت اخوانها]

نفس السؤال وان شاء الله نلقى الاجابه

 

[اغلى دانة]

هلا حبوبة

الحين الدروس النموذجيه وورش العمل تقدر تلزمني الناظره فيهم ؟

لأ هذا من طيبج اذا تبين تسوين وهو اللي يحدد حصولج على شكر وتقديرسنع

والانشطه اللي تسويهم المدرسه تقدر المعلمه تطنش وتقول ماني مشاركه في ولا نشاط , ولا هالشي يعتبر من شروط عملها ؟؟

مو الزامي لكن في بند تقويم الكفاءة يحدد اذا المعلمة متعاونة او ترفض التعاون وطبعا يأثر بالتقرير

يعني مثلا احنا بالروضه عندنا انشطه مثلا عندنا نشاط السباحه , فالناظره تكلف ابله تمسك هاليهال وتروح وياهم لروضه ثانيه عشان يتدربون على السباحه ! هل تقدر الابله ترفض هالشي

اخير سؤال انا عندي قناعه ان الابله ملزومه بصفها وبدروسها وبطلبتها وبس , هل في قانون يقول عكس هالشي ؟؟

تقدر ترفض لان هذي مسؤولية كبيرة
والقانون هو نفسه قانون بند التعاون في تقويم الكفاءة
يعني بند التعاون ينص على ان اي شي ينطلب منج شنو ما كان تنفذينه !!!!
والا يحق للمديرة تخسف بتقريرج

مع ان الاعمال المحددة للمعلمة واضحة مثل الشمس :
عطي حصتج بوجود وسائل - المنهج ماشي - احتياط - تصليح دفاتر - رصد درجات - عمل امتحانات
هذي اسمها اعمال فنية الزامية

ورش عمل - دروس نموذجية - مسابقات طلبة على مستوى المنطقة - عمل مطويات
هذي اعمال فنية غير الزامية وهي من اختيار المعلم محد يجبره عليها

اما الاعمال الادارية وهي مو الزامية لكن تندرج تحت بند الكفاءة :
الاذاعة - الانشطة - اشراف الاجنحة - تدريب الطلبة على رقص ومادري شنو - المقصف - تربية فصل - حجي فاضي - الجودة ------> يعني اشياء تطلبها الناظرة فوق شغلج الاساسي

ويا كثر ما تطلب !!!

والمثل يقول اذا اردت ان تطاع فاطلب المستطاع
​

 

[ام عفاف الكويت]

حبيبتي ان ماسويتي
خفسونا في بند التعاون
فسوي ياعمري

 

[Cool Teacher]

اذا ماسويتي مع انها مو اجباريه بتصيرين (صفر) عند الناظرة ....لان الناظرة تقيم المدرسات فقط بالامور الثانية اللي قلتي عنها وماتتذكر الا هالسوالف حزة التقييم

 

[ترف بابا]

الدرس او الورشه حلو حق تثبتين وجودج عند الناظرة ورئيسةالقسم وتضمنين الامتياز

بس طلعه برا المدرسة ترفضين بحجة ريلج ما يرضى !! وما يقدرون يجبرونج

 

[سنـــابل]

مشكورين خواتي
كلامكم يؤيد وجهه نظري , يعني تفكيرنا واللي نعرفه صح

انزين واذا الناظره مو كفو ولا تقدر وممكن تخفس فيج اذا سويتي ولا ما سويتي شنو الحل؟؟

جم درجه على بند التعاون ؟

 

[اغلى دانة]

والله هو المعروووف ان اللي تسوي ورشة او درس نموذجي مضمون لها الامتياز وان ماعطوج سوي تظلم
ترا اعرف وايد معلمات خوااااارة بالتدريس بس يسوون دروس نموذجية وورش عشان يضمنون الامتياز وطز بالباجي طاف طاف طاف
بس اي شي في طلعة برة المدرسة من حقج ترفضين ومحد يقدر يبطل حلجه ...عادي ابوج ما يرضى ريلج ما يرضى ...تمر السالفة عادي

 

[قاهرتهم 2011]

في معلمات يسوون دروس نموذجيه وما يعطونها امتياز لانه بعض المدارس ما يخافون الله
انتي اذا ما تبين لا تسوين ارفضي اهم شي معاشج ماشي ومحللته بما يرضي الله

 

[randomy]

الدرس او الورشه حلو حق تثبتين وجودج عند الناظرة ورئيسةالقسم وتضمنين الامتياز

بس طلعه برا المدرسة ترفضين بحجة ريلج ما يرضى !! وما يقدرون يجبرونج

نفسها

 

[TIC TOK]

انا مره سويت درس نموذجي وعشان الاجازه الخاصه 12 يوم ماعطوني الامتياز 87 عطوني تخيلي عالاقل خلوها 89

بس ظلم اشكره

 

[Turquoiseya]

^^
اللي اعرفه انه الاجازة الخاصة مالها شغل بالتقييم 00 لان اليومية تنخصم كاملة
حالها نفس حال اجازة الوضع 00 ما تاثر على التقييم

 

[جيتك تعال]

حبيبتي طبعا خواتي ما قصروو وضحوو لك الصورة

وانا حابة بس اضيف شغلة ....

الدروس النموذجية والورش والندوات " الى انتي تسوينها مو تشرفين عليها "

هذا كله يدخل في بند التنمية المهنية وهذا جدا مهم حاليا خاصة بعد الجودة

الانشطة بعد مهمة جدا وتبين نشاطك وتميزك مقارنة مع زميلاتك

وبخصووص انهم يغصبون لا ابدا ما يغصبون بس عندهم بنود بينفصون تقييمك في عدة بنود

وانتبهي الي ما ترضين فيه راح يرضى فيه غيرك وهذا بيبين الفروق في التقييم

 

[om mariam]

نفس ما قالولج البنات
اذا ما سويتي انتي غير متعاونه وبس

 

[درة أهل الطولات]

مفروض انج مو مجبورة بس انتي راح تكونين مجبورة ههههههههههههههههههههههههههه

 

[fri2010]

بنات قولولنا يعني درس ريادي ونموذجي وورشه يعني قولو لنا عنها بالتفصيل

 

[وحيدة المشاعر]

حبيبتي نفس كلام الخوات وفوا وكفوا ...
بس انا اقولج في بند اسمه التعاون وعشان مايلقون عليج شي سوي بالكورس الاول درس والكورس الثاني ندوه ..
وعاد على حسب شخصية الناظره انا العام كنت في الثانويه وكانت رئيسة القسم تجتمع فينا بالاسبوع مره فتفقت انا ومدرستين جدد ان الاسبووع الجاي راح نسوي الاجتماع بعد مانبين لنا الامور المهمه ووحده بدت بخاطره وانا بديت بمسابقه قرآن مع المعلمات بأن كل معلمه تطلع من الايه اللي اقراها حكم تجويدي ووحده من المعلمات تتكلم عن اي موضوع وحنا تكلمنا عن التعاون بالقسم شلون يكون؟
طولت عليكم بس شسوينا عزمنا الناظره والوكيلتين وحضروا الاجتماع جان تقول الناظره انا شفت ادائهم مايحتاج ازورهم بالحصص خلاص اقيمهم هالكورس من الاجتماع مع انا كنا تعييين جدييد ...
واول 3 سنين ادا صرتي مميزه خلاص مايدورون عليج شي ...

وقرقرت عليييكم واااجد بس حبيت افيدكم .....
*

 

[fri2010]

مشكورة وحيدة المشاعر على الافاده والمعلومات

 

[meshmeshaa]

السلام عليكم
أختى اذا تبين الامتياز وتبين تتميزين اتوقع المفروض ما ترفضين اى شيء الا اذا يخالف
قناعاتج الشخصيه مثلا ما ترضين تطلعين بره المدرسة هذي محد يقدر يتحجى معاج فيها
بس مو معناته تطلعين برحله ولا تطلعين تتشرين شيء للمدرسه ولما يكلفونج بشيء مالج خلقه
تقولين ما يرضون اهلى وما اقدر
اما اذا ما يهمج الامتياز تقدرين ترفضين كل اللى قلتي عنه ما راح يكون مستواك. دون المستوى
الا اذا ما كنتى تدرسين عدل وعليج شكاوي
ولا شالفرق بين اللى تاخذ امتياز واللى مستواها عادي طبعا بهالشغل الثاني الغير التدريس


واسمحولي بنات شنو يعنى تسوين نموذج درس وتبين امتياز
ساعات هالدرس يكون فاشل ويبين مستوى المعلمه
ومو معقوله وحده نائمه طول السنه وتجي تسوي نموذج درس وتبي امتياز
عيل المعلمه اللى تشارك وتسوي برامج إذاعيه مميزه وتتعاون بكل شيء وهم تسوي نموذج درس شنو تاخذ

أنا اشوف خلى أولوياتنا شلون نرتقي بالتعليم. وتخلين قسمج واسمج يفرضون نفسهم من خلال شغلج
وخلى خوفج من ربح بين عيونج تكسبين اجر بكل يوم يروحون فيه اليهال بيتهم وهم مكتسبين منج شيء
ينغرس معاهم لما يكبرون ويذكرونج بالخير ويكتبلج ربج عليه ثواب ان شاء الله
اما سالفه الناظرة مو شيء انا اشوف تسوين شغلج باللى يرضيه عليج ضميرج و لما تلاقين انه ما كو اى
مردود او تقدير تقدرين ساعتها تناقشينها وانتى كلج ثقه ومعاج شهود

ونصيحه اهم شيء يبرزج بالمدرسة برامج الاذاعة المميزة المطويات عشان الكل يحفظ اسمج
ورش عمل وأسهل منها ماكو تشتركين مع جم معلمه ويتوزع المجهود وما تحسين بالتعب لا المادي ولا الجسدي
انا بالنسبه لا الاقي بالعمل متعه وأتوقع التدريس هو المجال الوحيد اللى اذا ما حبيتيه غيريه لانج تأثرين على
اليهال وانتى ما تحسين
واهم شيء سوي شغلج كله بالمدرسة لا تخلين شغلج ياثر على بيتج

 

[meshmeshaa]

وعلى فكره تقدرين تطنشين وتكشتين وتقولين ما اشترك بالأنشطة وما اروح مكان
وماني مسويه نموذج درس وبس بدرس اليهال ومالا شغل بشئ واكو معلمات جذيه



بس ها مو تزعلين من يكون تقديرج مو شيء ولا تطلبين امتياز لانه تقدير الكفاءة مو بس
تدريس الصف والالتزام بالمنهج اكو وايد نقاط غير التدريس يقيمونج فيها
واذا على الراتب ماراح ينقص ولا يتاثر حالج من حال الوافدات اللى ما يسوؤن والكل يعذرهم
لانه معاشهم يادوب يكفيهم بس هم يشاركون بالأنشطة اللى ما تكلفهم فلوس ويأخذون منها
تقدير

ودمتم سالمين