تقرين روايات؟؟ تعالي قولي رايج ..

[تفاخيه مبطوطه]

السلام عليكم .. كيفكن بنات؟

أكيد مرت عليكم فتره بحياتكم كنتو تقرون فيها روايات أو مازلتو تقرون ..

1-شنو نوع الروايات اللي تحبين تقرينها ( رومانسيه - بوليسيه- إجتماعيه.. إلخ )
؟
2-منو (الكاتب/الكاتبه) اللي تحبين تقرين له ؟

3-شنو الروايه اللي مهما تعيدين وتزيدين فيها ماتملين (تقرينها أكثر من مره ) وليش ؟

4- إذا بخطارج نقد على روايه سواء بناء أو هدام قوليه لنا يمكن يكون راينا من رايج

هالموضوع بيكون للروايات بجميع أنواعها .. يالله شاركوني باللي عندكم وراح أرد على أسألتي عقب مايبدي التفاعل إن شاء الله ...

بيدي الحين رواية نساء صغيرات بس لما الحين ماخلصتها .. إذا خلصت بنقدها لكم ولا يهمكم

 

[شمس آخر الليل]

مشاركة: تقرين روايات؟؟ تعالي قولي رايج ..

يــاســـــــلام خوش شي

أنا بستفتح الردود


1- أحب روايات وايد البوليسية و الرومانسية والاجتماعيه .. بس المفضلة الاجتماعية

2- احسان عبدالقدوس

3- في بيتنا رجل .. اجتماعية ورومانسة بنفس الوقت



ماعـــــــنـــــدي انتقادات ..

شكرا تفاخية مفشوشه..عفوا قصدي تفاخية مبطوطه على الموضوع الحلووو

 

[تفاخيه مبطوطه]

مشاركة: تقرين روايات؟؟ تعالي قولي رايج ..

قريتها في بيتنا رجل وكانت أول بدايتي مع الروايات

وايد حلوه .. شريت فلمها أسود وأبيض عمر الشريف وزبيده ثروت بس الروايه أمـــــــتــــــــع بوايد

لج طله ثانيه على الموضوع إن شاء الله وييباي لنا باقي رواياتج معاج

 

[MaYoOoma]

مشاركة: تقرين روايات؟؟ تعالي قولي رايج ..

احب اقرى القصص الرومانسيه
وماكو احد محدد ساعات عبدالقدوس وساعات عبير
اللي يعجبني شكلها اقراها

 

[تفاخيه مبطوطه]

مشاركة: تقرين روايات؟؟ تعالي قولي رايج ..

أوكي ميوم وشنو الروايه اللي تحبينها وتقرينها أكثر من مره عادي !؟؟!

وشنو الروايات اللي قريتيها حق عبدالقدوس وشنو رايج فيها

هالموضوع يبيله قرقه مو كلمتين وإنتي اللي طالعه :d

 

[ام طلال]

مشاركة: تقرين روايات؟؟ تعالي قولي رايج ..

احب القصص البوليسيه والكاتبه المفضله عندي اجاثا كريستي صراحه رواياتها قمه وآخر روايه او قصه قريتها اوليفر تويست وماعندي نقد عليهم بالعكس انا احس ان القصص والروايات البوليسيه تساعد على تشغيل المخ ومااحب الروايات الرومانسيه بصراحه احسها تافهه

 

[MaYoOoma]

مشاركة: تقرين روايات؟؟ تعالي قولي رايج ..

اول شي ما اذكر اللي قريتهم لان وايد
يعني اقرى واتأثر حزتها وانساها عقب يومين ههههههه
وماكو قصه اقراها مرتين امل !!

 

[تفاخيه مبطوطه]

مشاركة: تقرين روايات؟؟ تعالي قولي رايج ..

أم طلال :

شنو عندج حق أجاثا كريستي ؟؟ هبيت فيها فتره تالي فجيت !

كنت لما أقراها أحس كأني أطالع فلم فعلاً حلوه رواياتها

ميومه :

من صجج ماتذكرين؟

خل أذكرج أنا ..

روايات إحسان عبدالقدوس عندي تقريباً نصها! أو أقل

عندج

في بيتنا رجل
النظاره السوداء
الطريق المسدود
البنات والصيف
بنت السلطان
لاشيء يهم
وادي الغلابه
الرصاصه لا تزال في جيبي
زوجة أحمد

هذا اللي أذكره! يالله شنو قريتي منها

في بعضهم يصيرون مجموعة قصص قصيره ميمعهم مع بعض وياما طحت بهالمقلب

أحب الروايات الطويله مو القصص القصيره !!!

 

[MaYoOoma]

مشاركة: تقرين روايات؟؟ تعالي قولي رايج ..

في بيتنا رجل قريتها
وجنى شفتها فلم بعد

البنات والصيف عندي بس ماقريته ليلحين

وعلى طاري اجاثا كريستي كنت اقرى قصصها ايام المتوسط

 

[تفاخيه مبطوطه]

مشاركة: تقرين روايات؟؟ تعالي قولي رايج ..

البنات والصيف قصص قصيره

المفروض يكتبون من بره ( مجموعة قصص ) مو لما أرجع البيت أكتشف هالشي !

أنا إنقرصت صرت أفتح الروايه وأجيك قبل لا أشتريها :d

محد ياب طاري يوسف السباعي !

 

[سنابل]

مشاركة: تقرين روايات؟؟ تعالي قولي رايج ..

1-شنو نوع الروايات اللي تحبين تقرينها ( رومانسيه - بوليسيه- إجتماعيه.. إلخ )

ما صار لي فترة من بديت اقرى روايات .. و الى الآن بس قريت روايات دينية و رواية بوليسية اجنبية
الرواية الدينية ( نور الله ) جزئين عجيبيييييييييين .. تعيشين معاهم جنج تسمعينهم !! تينننننننن ودج تستمر القصة و ماتخلص !!
و البوليسية هم حلوة و مغامرات و تحريات بس المشكلة في كلمات ما افهمها بس افهم السياق مال العبارة و أألف المعنى من عندي


2-منو (الكاتب/الكاتبه) اللي تحبين تقرين له ؟

د.نجيب الكيلاني
نانسي درو

3-شنو الروايه اللي مهما تعيدين وتزيدين فيها ماتملين (تقرينها أكثر من مره ) وليش ؟

اذا خلصت رواية ما اصدق اني خلصتها !!!


4- إذا بخطارج نقد على روايه سواء بناء أو هدام قوليه لنا يمكن يكون راينا من رايج

ماعندي نقد

شكرًا على الموضوع تفاخية مبنجرة اقصد تفاخية مبطوطة

 

[طوق البنفسج]

مشاركة: تقرين روايات؟؟ تعالي قولي رايج ..

انا احب القراءه وفيني طبع اذا مسكت الكتاب او الروايه اخلصها يقعده وحده ( عشان جذي محد يبي ايروح معاي معرض الكتاب ) و ماارد اقراها الا بعد فتره مو اقل من سنه الانه احس وانا اقرا اني توني قاريتها

ايام الثانوي و المتوسط احب اقرا تختخ وربعه كاهم مكودين عندي و بعدين بديت بالقصص الاجنبيه ما احب العربي و ماعندي كاتب معين يعني ادش جرير و اقري السمري الي ورا القصه اا عجبتني اشتريها و احلى قصه قريتها سويت لاير بس صج عجيبه

 

[.]

مشاركة: تقرين روايات؟؟ تعالي قولي رايج ..

-شنو نوع الروايات اللي تحبين تقرينها ( رومانسيه - بوليسيه- إجتماعيه.. إلخ )
؟
بوليسيه والاجتماعيه......

2-منو (الكاتب/الكاتبه) اللي تحبين تقرين له ؟
قماشه العليان والعيناويه >>>>>> تكتب بالانترنت وظنون وشوق ابو ظبي ..... واجاثا كريستي وقصص تختخ....


3-شنو الروايه اللي مهما تعيدين وتزيدين فيها ماتملين (تقرينها أكثر من مره ) وليش ؟

ماحب اقرا القصه اكثر من مره....

4- إذا بخطارج نقد على روايه سواء بناء أو هدام قوليه لنا يمكن يكون راينا من رايج؟

قصه قماشه العليان حلوه بس عيبها نهايتها شقحه يعني النهايه مو مرتبطه بالاحداث....
العدامه قريت جزاء وبقى جزئين دورتهم مالقيتهم....

 

[تفاخيه مبطوطه]

مشاركة: تقرين روايات؟؟ تعالي قولي رايج ..

ماشاء الله عليكم !! ولا وحده تعيد الروايه أكثر من مره!!!!

ويه عيل أنا قصص تختخ أختمهم وأرجع أعيد وأزيد ولا 50 مره!!

من الإبتدائي بلشت فيهم لي الحين يعني شوفو القصه جم مره قريتها !

سنابل :

قريت حق نجيب الكيلاني عندي روايته الربيع العاصف بس من زماااااااااااااااااااااااااان!

ماذكر شنو القصه ولا أذكر رايي فيها أصلن ذكرتيني فيها

منو هذي نانسي درو بعد؟ وشنو رايج فيها ! يعني تنصحينا نقرا لها؟؟

طوق البنفسج :

نفسي أخلصها بقعده وحده بس لازم تكون صغيره يعني من طقة تختخ وربعه

يا حلوه تختخ قبل كنت أندهش لما يجك المجرم!!! بس الحين من أول صفحتين أعرف المجرم وأنطره يكتشفه إهوه بعد شنسوي أنا أكبر وإهو لما الحين واقف عمره على ال15 !!

عيل أنا ماعمري قريت روايه أجنبيه إلا أجاثا كريسيتي! يعني مترجمه بعد

إنتي تقرينهم بالإنجليزي ! وسويت لاير منو الكاتب والقصه عن شنو تتكلم؟؟

رونه :

ولا روايه من اللي قلتي عنهم أعرفها ولا الكاتب! هذيل مو موجودين بالمكتبات يعني بس بالنت؟!

يعني لازم أجابل الجهازعشان أقرا الروايه! حلاته أقعد على فراشي وجدامي القهوه والككاو

<--- صاحبة مزاج

 

[lala2]

مشاركة: تقرين روايات؟؟ تعالي قولي رايج ..

ذكرتينا بالايام الخوالي
ايام الفراغه
انا كنت زمان اموت في روايات عبير وكانت طويله وكنت استمتع لما اقراها وكاني اعيش معاهم واتخيل كل مشهد لاني بطبعي رومانسيه
وقريت خان الخليلي وحبيتها ولما الحين اذكر تفاصيلها وشفتها فيلم بس اللي بالقصه احلى
وكنت طبعا اقرا لتختخ ومغامراتهم مع انها نفس الافلام الهنديه بس بوليسيه
وقريت لاحسان عبدالقدوس النظارة السوداء
وانف وثلاث عيون وغيرهم
بس ولامره قريت الكتاب مرتين.

 

[مُناي]

مشاركة: تقرين روايات؟؟ تعالي قولي رايج ..

ويييييييييييييي عاد أنا إدمان


ماقطعت الروايات إلا من ثلاث سنوات


يعني من تعرفت على حبيبي النت



وبصراحه ماأقرى للعرب وعععع


أقرى للكاتب الفرنسي موريس لبلان


اللي بطل رواياته ارسين لوبين

قريت له كثيييييييييير حتى مذكراته شريتها


وفيكتور هيجو


وأجاثا كريستي



الكسندر ديماس ( وفي بعض التراجم الكسندر توماس )


وفيه روايات عالميه حقيقية تتعدى 500 صفحه

والله ناسيه ألحين



بس كانت عندي مكتبه شكبرها

 

[مُناي]

مشاركة: تقرين روايات؟؟ تعالي قولي رايج ..

وألحين قاعده أعلم اعيالي عالقراءه



وشريت لبنتي روايات مصرية


مالت أطفال


اسمها الشياطين 13


نظيفه وحلوه تصلح لشلة المتوسط خخخخخخخ

 

[jolie_q8]

مشاركة: تقرين روايات؟؟ تعالي قولي رايج ..

بالنسبه لي

اول روايات قريتهم كانت احسان عبدالقدوس

عندي مجموعه كبيره وكلهم قريتهم... وحم وحده رديت عدت قرايتهم
واقريت حق نجيب محفوظ بس مو كلهم (مع ان عندي المجموعه كامله)

يعني يمكن 4- 5 روايات

اللي الروايه اللي حبيتها (اني راحله) ليوسف السباعي < 3 مرات قريتها !!

وآخر روايه قريتها هالسنه (رائحة البحر) لطالب الرفاعي << حلوه..بس نهايتها مو منطقيه

القصص البوليسيه << حاولت اقراهم بس كلش ما شدوني << كانت ايام المراهقه

والروايات المترجمه ... ما ارتاح لهم وايد << لان الترجمه تكون غثيثه ..غير لما تكون باللغه الام

والقراءه .. هوايتي ... اي موضوع يستحق القراءه مو شرط يكون روايه او قصه

وحاليا ... عندي لسته ... ودي اشتريهم .. بس ابي الوقت المناسب

ولي عوده ...

 

[طوق البنفسج]

مشاركة: تقرين روايات؟؟ تعالي قولي رايج ..

تفاخيه انا اقرا بالانجليزي واشتري من جرير و هذي سويت لاير قصتين بقصه يعني اهي عن وحده ابوها يموت و يحط واحد وصي عليها و عشان تاخذ الثروه لازم تلقى يدتها الي انحاشت من جم سنه و هكذا تدور الاحداث

و طبعا قريت القصص العالميه مثل اوليفر توست و كوخ العم توم و قريت اكسبكتيشن و غيرهم ايام الجامعه ولي الحين عندي

 

[.]

مشاركة: تقرين روايات؟؟ تعالي قولي رايج ..

اي تفاخيه موجودين بالنت بس....

اهما يكتبون بمنتدى ولماتخلص القصه يحطونها بمكتبه القصص تقدرين تطبعينها كامله......

وبنات احلى روايات واحسنهم ؟