السلام عليكم ورحمة الله وبركاته
اختي اسراء .. الحمدلله انا مو متشائمه انا انقل كل شي يصير معاي بالتفصيل وبكل مصداقيه ولو شايفه ان مافيه شي يستاهل اني اذكره ما اعتقد بذكره .. وبعدين انا اخذت 4 سنين ادور دكاتره زينين واغلب الدكاتره كانوا بالمستشفيات الخاصه وانا فقيره على قد حالي مالقيت الا الدكتور عماد بالحكومه في هذاك الوقت والدكاتره اللي تتكلمين عنهم ماصاروا بالحكومه الا بهالفتره .. وانتي بنفسج تعرفين تكاليف العمليات هذي مايحتاج اعلمج .. و بخصوص كلمتج انتي متشائمه وغير متفائله قبل جراحة الفكين اكيد بكون متوتره وخايفه واستبعد هالمرحله من نقاشي معاج لان الكل مر فيها بس انتي يمكن قويه وبالج طويل والناس تختلف بمخاوفها وقدرة تحملها بس انا الحمدلله قويه ومتفائله واسعى للافضل .. اخترت الدكتور عماد بعد تعب و كنت صغيره ماعرف الافضل بس انتي ما شاء الله كبيره وفاهمه وتقدرين تفرين على اكثر من دكتور انا كنت ابجي بروح الرياض اسويها هناك محد كان يسمعني وحتى الدكاتره الخاصين ماكنت اقدر اسوي عندهم استشاره حتى فلو سمحتي هالكلام القوي مابيه يتكرر بكلمة متشائمه..
والكل يبي النتيجه بيرفكت مافيه وحده فيكم تبيها بسيطه او عاديه .. وخشمي قبل طويل وحلو العين مع الطول صار عريض بزياده
ولو ترجعين لكلامي بعد عمليتي كنت تعبانه نفسيا لان الانتفاخات بروحها تخرع وكنت انقل تفاصيلها يوميا فلا تجمعين كل شي برد واحد
عقب العمليه ب 3 شهور قلت النتيجه حلوه لان الانتفاخ مازال موجود توقعته خف نهائيا وذكرت ان النتيجه واو والحمدلله وعلقت عالخشم
محد يتمنى يعدل شي ويخرب له شي ثاني وخاصه انه على قد حاله مايقدر على تكاليف عملية انف .. وانا من النوع اللي ما احب امدح واطير الناس للسما ولي حرية التعليق بالسلب والايجاب ... وبخصوص نقل تجربتي للانف وانها مو ناجحه وانا صاجه وماجذبت عن ربي وهذا مو معناته تشائم لا يالغاليه انا اقول شي من واقع ومتعايشه معاه والحمدلله ,, وانا علقت على الخشم و طريقة الاسنان ... ما ذميت الجراحه كلها .. ولو متشائمه يالغاليه بتشوفين نقيض كلامي انا بالعكس متفائله واسعى للافضل والحمدلله مايأست
ودانتيلا انا شايفتها شخصيا ما شاء الله البنت طبيعة جسمها مليان فخدودها حلوه ما شاء الله بس خشمها نفس خشمي فاارش حيل .. بس خدودها مخففه كبر الخشم ..
عموما الله يوفق الجميع .. والتوفيق من ربي والناس قدرات فيه ناس تقدر تروح لدكتور زين وفيه ناس ماتقدر تحكمها الظروف
وانا انقل تجاربي بمصداقيه تامه وبادق التفاصيل وما احب ابالغ لا بالمدح ولا بالذم ولو يصير شي حتى بعد 10 سنين لا سمح بالله بجي واكتب
هذي اللي يسمونها المصداقيه مو التشائم .. ومو من كثركم مع الدكتور عماد بس انا و دانتيلا وتجاربنا نفس الشي البقيه دكاتره ثانيين
وعلى عملية خشمي ربي ما كتب لي التوفيق فيها مازالت المشكله الاساسيه موجوده الخشم فارش خيطه من الجوانب نفس العله
يعني القصه مو قصة يخيطه وخلصت السالفه
مع السلامه
