تجربتي بمطعم سالاد بوتيك الفاااشل

[لولو الكويتيه]

السلام عليكم خواتي
اليوم رحت مطعم سالاد بوتيك بالافنيو لاني قريت تقرير الاخت اللي بالمنتدى وانها مدحته ورحت مع بنتي وزوجي ويااليت مارحنا
اول شئ الحق ينقاال الديكوور عجييب وحلو بس الخدمه فاشله جدا جدا تنادينهم مايردون عليج وكان ورانا عايلتين حريم ينادون الموظفين والله مايردون عليهم وقلنا مو مشكله شكل المطعم كان عاجبني وماحبيت اطلع الا لما اجربه وعقب تكرمت وحده تشتغل ويابتلنا المنيو الاي باد وطلبنا تقريبا نفس طلب الاخت اللي كتبت الموضوع ومدحت الاكل طبعا طولو على مايابو الاكل وريلي عصب لانه نطر اكثر من ربع ساعه ينطر طلبه عباره عن همبرغر ولما وصل الاكل طبعا ريحته خايسه والله العظيم بنااات ان ريحته خايسه بس ماادري ليش جازفنا وكلينا ولما كلينا الاكل كان ماصخ وفيه حموضه طبقي وطبق ريلي وبنتي حبيبتي كلت بس بطاط ولاعت جبدها وتفلته ...المهم ماكملنا اكلنا وطلبنا الفاتوره والا حريم ثنتين مايعرفون بعض يعني كل وحده قاعده بطاوله مع عايلتها نادو المدير واشتكو على الاكل لانه بايت وزفر وعلى الخدمه الفاشلهوبصراحه للاسف المدير مااهتم للشكوى... المهم بعد ماطلعنا بطونا عورتنا ووالله ان حاشني اسهاال تكرمون وانا اصلا حاامل
والله يابنات هذي تجربتي وانا اليوم رحت وجربت المطعم تاريخ 13/11 ووالله العظيم مو قصدي اقطع رزق احد قصدي بس انبهكم وحسافه على شكل وديكور المطعم واتمني يغيرون الموظفين ويهتمون بالنظافه وصلاحية الاكل لان صج قعدته حلوه واللي تجربه خل تكتب تجربتها
هذي تجربتي بكل صدق واانه والله شاهد على

 

[afaf]

الله يستر من هبشر

 

[Judy . abbot]

عيل اشوه ماجربته
ههههه يعطيج العافيه عمري

 

[f-a-r-m-l]



 

[الأميرة جوري]

الله يستر زين ماحاشكم تسمم ....

 

[طيوبه89]

مشكوره عالتجربه عاد شكله والله يخدع

 

[el lulu]

هالمطاعم محد يرفع فيهم ويوصلهم السما الا اصحاب ال blogs المطاعم يعزمون صاحب البلوغ عشان يسويلهم دعايه ويقعدون يصورووون ويلعبون بألوان الاكل ويحطون هالتقارير حق العالم يشوقونهم ولي رحنا ننصدم بمستوى الخدمه والاكل
وايد صارت هالحركه بالناس نشوف التقارير على نياتنا ولي رحنا ننصدم باللي نشوفه
معوضين خير ان شاء الله والحمدلله انه ما صابكم شر

 

[q8 knosha]

عاد قايله بجربه لووول

 

[جديده 1]

سهال بوتيك هذي اخرتها

 

[Q8Ya GiRL]

امبي اي شي عاد حسيت شكله حلو اللي بالافنيو
انا مره جربت اللي بالجابريه طلبات
كان حلو حتى اذكر طلبت سلطة سيزر وبطاط مع جبن
بس يمكن اخترب الله اعلم

 

[sara82]

انا جربت اللي بالافنيوز قبل جم يوم كان حلو بس مو واااااو مثل ما قالت الاخت بالبلوق مممم و اسعاره مرتفعه , الديكور كان يشوق

 

[قفشـه]

حسافه عاد كنت بجربه الحمدالله اني قريت التقرير

 

[<<المها>>]

معوضين خير .. واهم شي ماحاشكم تسمم
وبالعكس اختي لاقطع ارزاق ولا شي هذي صحه مو لعبه .. والمفروض يبلغ عنهم البلديه
عشان يعرفون وراهم حسيب ورقيب.. خصوصا ان نوغيته سلطات والسلطات ماتدش نار يعني التسمم على الباب

 

[لولو الكويتيه]

اي والله بنات صاجين الصحه مو لعبه
والحين ماشاءالله المطاعم بكل مكان بالكويت ومن كثرها خلاص ماعاد يهتمون بالنظافه وبالاكل وبالخدمه
الله يهديهم ويحميناا لان المطاعم الحين مو نفس اول بنظافتها والحين تاكلين بالمطعم تحسين الاكل ماله طعم نفس اول واخرتها تشوفين الفاتوره تنصدمين من المبلغ المبالغ فيه

 

[ام سعود ديكسون]

هالمطاعم محد يرفع فيهم ويوصلهم السما الا اصحاب ال blogs المطاعم يعزمون صاحب البلوغ عشان يسويلهم دعايه ويقعدون يصورووون ويلعبون بألوان الاكل ويحطون هالتقارير حق العالم يشوقونهم ولي رحنا ننصدم بمستوى الخدمه والاكل
وايد صارت هالحركه بالناس نشوف التقارير على نياتنا ولي رحنا ننصدم باللي نشوفه
معوضين خير ان شاء الله والحمدلله انه ما صابكم شر

اي صاجة لاعبينها عدل يعرفون لعبة التسويق عدل
لكن بعد فترة يهملون الانتقاد أتمني اصحاب المطعم يشوفون الموضوع

 

[سمسمة كويتية]

غريبة الي بالجابرية اينن ما طلبت شي و طلع مو حلو
بس يمكن الافنيو غبر مادري ما جربته

 

[محلله ماليــه]

اذا على كلامج

حده مطعم فاشل

 

[الدلال]

عاد قبل جم يوم كنت بروح واجربه

اشوه مارحت

 

[بوكية ورد]

أنا ودي اكتب تجربتي بصراحه أنا قريت التقرير وشفت الصور انهبلت عليه شكله يشوق بس والله ياليتني ما رحتله أنا رحت فرع الجابريه طبعا محكر اقرب له من مطعم والاكل الله يزيد النعمه وطلبنا تبوله طبعا كلينا وشبعنا وما جابو التبوله وقعدنا ننطر طلع ما عندهم بقدونس شفت الهندي داش وبايده جيس بقدونس وقصصوها لنا بسرعه يعني حلينا بتبوله هههههه وما ودي اقول كلشي صراحه بس توبه اروحله*

 

[kndora]

الناس اذواق سبحان الله.

أنا جرته وكان الاكل لذيذ والأسعار مناااسبه وأحسن من وايد مطاعم

وكان نظيف ماكو ريحه بالأكل يمكن على حظكم صار جذي

والحمدلله تجربتكم عدت على خير