العيب منه ويقولون مني!!!

[Mosha]

السلام عليكم ورحمة الله وبركاته

كتبت مشكلتي هني لانه محد بيحس فيها غيركم!
انا متزوجة من فترة والله ماكتب يكون عندنا عيال لي اليوم والله كريم
فحصنا وطلعت انا سليمة ولله الحمد وطلع زوجي عنده ضعف شديد ولازم نسوي انابيب

من يومها وعمي ابو ريلي مو مصدق الخبر وتصورو يا بنات يقول حق ريلي انت تجذب !! يلمح انه العيب مني ؟؟؟ مع انه شاف الاثبات بعينه !!!!!!! ليش جذي مادري

انا مو هامني لكن مع الايام قمت احس حتا زوجي بدا يتحسس وايد خصوصا كل ما مر الوقت واللي تزوجوا بعدنا صار عندهم 1 و2 الله يرزقنا وانا راضية بقضا الله بس اهو بدا يشكي ويحاتي

فاتمنى من الللي مرت بحالتي تنصحني شلون تعاملت مع زوجها واهله من الناحية النفسية:bbbiu:

ربي لا تذر ني فردا وانت خير الوارثين

ادعولي بنات انا وكل محرومة:eh_s(17):
​

 

[شيخه_البيض]

الله يرزقج بالذريه الصالحه يارب ويفرح قلبج بشوفة البيبي

 

[عيون ملكيه]

انتي على الاقل عرفتي ان السبب منه

انا الدكتوره كذا مره تلمح لي ان ممكن ريلي يكون فيه ضعف و انه الحيوانات المنويه تكون ضعيفه
وحاولت فيه اكثر من مره انه يسوي فحص و يقول اشفيج ما فيني شي
ويعتبر ان المني اللي يطلع منه اهو الحيوانات المنويه و يعصب

و الدكتوره تقولي وضعي و تبويضي و كل شي فيني ما فيه اي شي يمنع الحمل
سويت كل التحاليل للدم و كل شي
بس انا ما فيني اي عله و ريلي الدكتوره مشتبهه فيه

يعني حاسه ان السبب منه


شوفي
المفروض محد يعرف نتيجة التحاليل
وكان الزم عليج تخلين هالشي بينج و بين ريلج


لكن مدام الوضع انتشر
او في احد عرف

حاولي تفهمين زوجج ان مع العلاج راح يتحسن وضعه
و انج تحبينه و تبين تستمرين معاه

والله يرزقج و يرزقني بالذريه الصالحه يارب

 

[كويتية222]

الله كريم وقوليله المؤمن مبتلى وماتدري الخيرة وين وهونيها عليه وقوليله التلقيح الاصطناعي بيحل مشكلتكم من بعد توفيق رب العالمين

 

[ملكه الحطب]

الله يعينج ياااااااااااارب

ويرزقج يااااااااااااااااااااااااااارب وسوي الانابيب وحاولوا

 

[عبق الخزامى]

الله يعينك والصبر دايم مفتاح الفرج الله يرزقك الى يفرح قلبك يااااارب

 

[برنسيسة2007]

حبيبتي انتي لا تضيقين صدرج
اولا:خليج مبسوطه واستانسي انتي وزوجج طلعوا وتمشوا
ثانيا:بما ان زوجج تعبان الاطباء ومراجعاتهم راح يزيدونكم احباط ففي هلفتره لاتروحون اطباء التجئوا للطب الرباني صدقه-دعاء-كفروا ذنوبكم بالاستغفار والصدقه لان المسلم مبتلى بذنوبه وتبين الصدق كل شي بيد الله سبحانه
وبقولج حاجه سمعتها من احد المشايخ:
نصح رجلين اثنين ماعندهم عيال انهم يقومين اخر الليل يصلون ركعتين غير الفريضه وفي سجودهم يقولون:ربي لاتذرني فردا وانت خير الوارثين٤٠ مره واستمروا عليها اربعين ليله ورزقهم الله سبحانه وتعالى وقال الشيخ ان الله صال في القرآن بما في معناه وواعدناه اربعين ليله واذا ماني غلطانه الشيخ هذا هو الغامسي
ثالثا:باللحظات اللي تجتمعين فيها مع زوجج لاتطرسن سالفة الحمل والضعف ترا بعدين ترتبطين عنده بهلموضوع ويصير يتضايق منج لاشعوريا واذا اهو اللي جاب طاري الموضوع ابتسمي وتفائلي وقولي انا واثقه من الله وابدا مو متضايقه ولامتكدره ولاخايفه لانه باذن الله راح اصير ام لاطفال انت ابوهم
رابعا:اهله تحمليهم عشانه ولاتشكين منهم عنده ماعليج الا من زوجج انت دامه عارف الوضع خلااااااص لاتشيلين بخاطرج

وصدقيني باذن الله الواحد الاحد اذا التجئتوله وكفرتوا ذنوبكم وسجدتوله ودعيتوا ان شاء الله باذنه الواحد الاحد بيرزقكم

واذا زوجج يبي يعالج مايبي يقعد بعد ماتقنعينه بس اخذي عسل من معجزة الشفاء لعلاج الضعف مبدئيا مع اني واثقه تماما انكم اذا توجهتم لله بقلب صادق راح يرزقكم رحمن رزاق كريم جواد
واسال الله العلي القدير الواحد الاحد ان يرزقكم لذة الدعاء والعباده الخالصه لوجهه وان يرزقكم الذريه الصالحه العابده الشاكره ويفرح قلوبكم وبدال الطفل عشره يارب بنين وبنات ويبلغكم برهم

 

[&هند&]

حبيبتي خل يعالج انا قالو لي لازم انابيب معني حملت من اول شهر طبيعي بس ما كمل ما عليج من الدكاتره غيري دكتور زوجج واذا تبين اسم دكتور زوجي راسليني على الخاص بعطيج اسم الدكتور والحمدلله زوجي حالته تحسنت والله يرزقنا الذريه الصالحه

وليش ما تسوين طفل انابيب عادي تلاحقو عمركم لان كل ما كبرتو صارت اصعب والله يرزقج الحمل السليم ،،،،،

 

[Maha2012]

المفروض محد يعرف بنتيحة التحاليل الى انتي وزووجج وتخلونها بينكم.

مب لازم النااس تعرف ان العييب منه ولا منج

ومدام عنده ضعف سوو تلقيح صناااعي مره ومرتين و ثلاث ووعقب الجاو لاطفال الانابيب

والله يرزقني ويرزقج ان شاء الله

 

[ام دليار]

أنتو ليش تقولو أنو العيب من زوجك قولي منك لأنو زوجك عارف
كان حبك أكتر وتعلق فيكي
الله يرزقكم يارب

 

[Mosha]

انتي على الاقل عرفتي ان السبب منه

انا الدكتوره كذا مره تلمح لي ان ممكن ريلي يكون فيه ضعف و انه الحيوانات المنويه تكون ضعيفه
وحاولت فيه اكثر من مره انه يسوي فحص و يقول اشفيج ما فيني شي
ويعتبر ان المني اللي يطلع منه اهو الحيوانات المنويه و يعصب

و الدكتوره تقولي وضعي و تبويضي و كل شي فيني ما فيه اي شي يمنع الحمل
سويت كل التحاليل للدم و كل شي
بس انا ما فيني اي عله و ريلي الدكتوره مشتبهه فيه

يعني حاسه ان السبب منه


شوفي
المفروض محد يعرف نتيجة التحاليل
وكان الزم عليج تخلين هالشي بينج و بين ريلج


لكن مدام الوضع انتشر
او في احد عرف

حاولي تفهمين زوجج ان مع العلاج راح يتحسن وضعه
و انج تحبينه و تبين تستمرين معاه

والله يرزقج و يرزقني بالذريه الصالحه يارب

هلا ياقلبي صدقيني ماانتشر شي بس تدرين الاهل من الطرفين يحبونا ولازم يعرفون خصوصا اذا تاخرت المدة
واحنا قلنا برضانا لكن عمي عرف من زوجي
امين يارب ويرزقج:eh_s(7):

 

[Mosha]

حبيبتي انتي لا تضيقين صدرج
اولا:خليج مبسوطه واستانسي انتي وزوجج طلعوا وتمشوا
ثانيا:بما ان زوجج تعبان الاطباء ومراجعاتهم راح يزيدونكم احباط ففي هلفتره لاتروحون اطباء التجئوا للطب الرباني صدقه-دعاء-كفروا ذنوبكم بالاستغفار والصدقه لان المسلم مبتلى بذنوبه وتبين الصدق كل شي بيد الله سبحانه
وبقولج حاجه سمعتها من احد المشايخ:
نصح رجلين اثنين ماعندهم عيال انهم يقومين اخر الليل يصلون ركعتين غير الفريضه وفي سجودهم يقولون:ربي لاتذرني فردا وانت خير الوارثين٤٠ مره واستمروا عليها اربعين ليله ورزقهم الله سبحانه وتعالى وقال الشيخ ان الله صال في القرآن بما في معناه وواعدناه اربعين ليله واذا ماني غلطانه الشيخ هذا هو الغامسي
ثالثا:باللحظات اللي تجتمعين فيها مع زوجج لاتطرسن سالفة الحمل والضعف ترا بعدين ترتبطين عنده بهلموضوع ويصير يتضايق منج لاشعوريا واذا اهو اللي جاب طاري الموضوع ابتسمي وتفائلي وقولي انا واثقه من الله وابدا مو متضايقه ولامتكدره ولاخايفه لانه باذن الله راح اصير ام لاطفال انت ابوهم
رابعا:اهله تحمليهم عشانه ولاتشكين منهم عنده ماعليج الا من زوجج انت دامه عارف الوضع خلااااااص لاتشيلين بخاطرج

وصدقيني باذن الله الواحد الاحد اذا التجئتوله وكفرتوا ذنوبكم وسجدتوله ودعيتوا ان شاء الله باذنه الواحد الاحد بيرزقكم

واذا زوجج يبي يعالج مايبي يقعد بعد ماتقنعينه بس اخذي عسل من معجزة الشفاء لعلاج الضعف مبدئيا مع اني واثقه تماما انكم اذا توجهتم لله بقلب صادق راح يرزقكم رحمن رزاق كريم جواد
واسال الله العلي القدير الواحد الاحد ان يرزقكم لذة الدعاء والعباده الخالصه لوجهه وان يرزقكم الذريه الصالحه العابده الشاكره ويفرح قلوبكم وبدال الطفل عشره يارب بنين وبنات ويبلغكم برهم

ماتدرين شكثر حبيت ردج احتاج هالكلام ماتدرين شكثر مشكوررررة من كل قلبي :eh_s(7):

 

[Mosha]

أنتو ليش تقولو أنو العيب من زوجك قولي منك لأنو زوجك عارف
كان حبك أكتر وتعلق فيكي
الله يرزقكم يارب

حبيبتي لانه طبيا السبب مو مني !!! ليش اجذب ؟؟؟ انا احب زوجي واموت عليه لكن هذا امر الله وترا مافهمت قصدج امانة

 

[Mosha]

المفروض محد يعرف بنتيحة التحاليل الى انتي وزووجج وتخلونها بينكم.

مب لازم النااس تعرف ان العييب منه ولا منج

ومدام عنده ضعف سوو تلقيح صناااعي مره ومرتين و ثلاث ووعقب الجاو لاطفال الانابيب

والله يرزقني ويرزقج ان شاء الله

حبيبتي انا تحاليلي محد شافها لكن زوجي اهوا بلغ اهله عن وضعه الصحي كنوع من المصارحة يظلون اهله مو اغراب

 

[Mosha]

مشكورين باجي البنات الله يرزقني ويرزق كل محرومة ومحروم علي فكرة الموضوع حساس مو هين علي اني كتبته الا لاني حسيت انكم قراب وبتتفهمون

 

[ليان200]

حبيبتي الله يرزقج بالذرية الصالحة وان شاء الله تشيلي مولودج بيبدنج كثري دعاء وصلوات واقري البقرة انتي وياة وثقي ان دعائط راح يستجاب وان شاء الله ربي مابخيبك


وانتبهي انج تقولين حق احد ان العيب منج بكرة ماتدرين شيصير في زوجج اسم الله عليه اسم الله علية ان شاء الله مايصير فية شي بعدين يقولون العيب منك ومادري ايش بعد صابرة علية وفوق هالشي تقولين انج انتي الي ماتجبين كان تحملين بدل الهم همين
والله يوفقج ويسعدج ياربي

 

[الزيـــــ^^ـــــن]

مالج شغل طنشي // ونصيحه بلشي بالانابيب لان العمر يمشي بسرعه

 

[جديده 1]

انا سمعت ان عسل الرجل من الفايز المرشد ممتاز للرجل .. و سمعت عن وحده بالمنتدى ريلها كان عنده ضعف و سوى حجامه عند البناي جنه و حملت و تحسنت حالته وايد

 

[ام دليار]

حبيبتي لانه طبيا السبب مو مني !!! ليش اجذب ؟؟؟ انا احب زوجي واموت عليه لكن هذا امر الله وترا مافهمت قصدج امانة

حبيبتي حتى لو مش منك السبب
بس أحنا مجتمع الناس مابتتقبل أنو الرجل يكون فيه عيب
كنتي كسبتي هذا الشي لصفك وقدام الناس قلتي العيب منك
كان زوجك شافها منك تقدير واحترام له
خلي بس أمه تعرف أنه من أبنها تأخير الحمل حتى مايصير ضغط عليكي
أنا مابحب أضايقك
أنا هذا رأيي

 

[منيرة خالد]

الله يرزقج الذريه الصالحه


واهم شي الحاله النفسيه ، واذا كان على اهله اذا تكلموا قولي الله كريم ، او الحمد لله ما شين بالعلاج

والافضل انكم تسرعون بحمل عن طريق الانابيب