السلام عليكم ورحمة الله وبركاته
انا مشتركة جديدة وبصراحة كنت زائرة منتظمة على هذا المنتدى لكن بعد ما صار عندي موضوع حابة اشاركم فيه و افيدكم و استفيد سويت لي اشتراك اليوم وان شا الله نستمتع مع بعض.
اليوم الثلاثاء الموافق 13/3/2012 هو اليوم الثاني لي بعد عملية تكبير الصدر
بس انا ابي اسولف بالترتيب
دقيت على رويال حياة و سألتهم عن الدكتورة الالمانية الزائرة متى بتيي و قالولي يومين من كل شهر و موعد زيارتها الاسبوع الياي و خذيت موعد 19/2 و رحت لهم و الا الدكتورة وايد سمحه و مريحة نفسيا فحصت و سالت ليش تبين تسوين العملية و يابت لي السيليكون مقاسين مختلفين و انا نقيت الاصغر 275 قلت لان ابيه ناعم و طبيعي اكثر
سالتها وايد اساله و سالتني وايد اساله بعد و اتفقنا على ان اذا ابي اسوي العملية اتفق مع مركز كوزموسيرج يحددون العملية على زيارتها الياية
وقالولي بعد 3 اسابيع تقدرين تسوين عملية اذا التحاليل و كل شي تمام
قلت اوكي
خذيت موعد التحاليل (دم) وسونار على الثدي و دفعة اولى 50٪ من المبلغ و توقيع على الاوراق كلها
خلصنا دقو علي يأكدون الموعد يوم الاحد 11/3 الساعة 9 و لازم اكون موجودة الساعة 7
قعدت من النوم خذيت اغراضي و رحت المستشفى و اتفقت مع زوجي انه ايي المستشفى بعد العملية لان ما ابيه يقعد بنتي و الوقت وايد مبجر خل ينامون و يريحون و ماكو الا العافية
دشيت و تزهبت للعملية مرتني الدكتورة و سالتها عن المقاس للمرة الاخيرة لان انا لما قريت موضوع هيكارو في هالمنتدى قريت ان حشوتها 325 و مقاسها صار بين البي و السي فحطيت في بالي جنه انا وايد صغيرة حشوتي سالت الدكتورة و قالت خل اشوف صدرج مع ال 275 راح يصير شبه سي وسط قلت لها ابي فل سي قالت تبين اكبر عيل قلت لها خلاص ناخذ 300 قالت اكيد مو مشكلة الحين انزل المركز اييب منه المقاس اللي تبينه
8:15 دخلوني العمليات و انا حمدلله ريلاكس و فيني النوم من الابرة اللي عطوني اياها يت دكتورة البنج و سولفت معاي شوية بعدين قالت لي سمي بالرحمن و اخذي نفس عميق
و ما وعيت الا و اهم يلبسوني الكورسيه و يقولون لي بليز رفعي جسمج عشان نحطج بالسرير الثاني
نقلوني الافاقة كنت انام شوية و اقعد شوية و ما يدخلون علي الا شخص واحد كانوا يتناوبون زوجي و خواتي
خلصت العملية 9:30 لكن قعدت بالافاقة لي 11:30 لاني طلبت مسكن و اهم قالو اذا بنعطيج المسكن القوي لازم تقعدين عندنا تحت الملاحظة خذيته مرة وحدة و بعدين سالوني تبين بعد و الا انزلج الغرفة قلت لهم نزلوني
كنت بين الالم و الدوخة و الادوية بس حمدالله مر اليوم بسرعة و بالليل مرتني الدكتورة تتطمن علي و تعطيني التعليمات و انا طلعت نوته كنت كاتبة فيها اساله سريعة و الحمدلله طاح حمل العملية و الحين بقى حمل مرحلة العلاج ان شا الله
ادعولي و للمسلمين ان الله يمدنا بالصحة و العافية
انا ما خضت بالتفاصيل حابة ارد على اسألتكم
