{ سحر الوَرد *
New member
بناااات ماااصدق
تخيلوااا
أكثر من ساااعة ونص قاعدة وأكتب لكم رد عن سلييك
وحاطة الصور وشارحة كل شي رايي والاسعار بضمييير
طقيت اضافة رد وطلعلي ايررور
وانمسسسح كلللل الرد
بصييييييح :"( :"( :"(
بحاول أكتبه من اول وجديد
أوففففف ><" شهالنحاسسسة ياررربي ليش ماكتبته في النوت باد من البداية وعقب سويت كوبي
ولا اتعللم الدرس انصح الناس وانا اغلط نفس الغلط
><
يالله ببتدي من يديد
ولو إني ماتذكر شنو كنت كاتبة!! معلقة شطوولها ***
الشهرين اللي طافوا شريت من سليك في 3 طلبيات
مرة من إيباي
ومرتين من سايتهم
بالترتيب من الأقدم للأحدث:
أول طلبية من إيباي
طلبت 3 بلاشرات اللي كل واحد بروحه
Pixie Pink
هذا تقريباً أكثر لون إستخدمته من وصلوني
لونه في العلبة يخوف تحسونه وايد فاقع ^^
بس في الصج اللون ناعم ويندمج بسهولة ويعطي لوك ناتجرال.. كلللش مب فاقع
وايد أحب أستعمله ويا فاونديشن بورجوا وكونتور خفيف
** نوعيته مات
Life's a Peach
برتقالي فاتح ومنعش
حلووو لاجواء الصيف والربيع
وأحسه يناسب أكثر شي للصبح.. من الليل
خاصة مع روج من نفس التدرجات
** نوعيته مات
Coral
بالصورة حسيته غامج ومايل للماروني!
اهو لونه بالصج طوبي برتقالي غامج
فيه شيمر بسيييط مايبين تقريبا! أنا أعتبره مات
هاللون يناسب كل وقت.. للوكات الخفيفة والناتجرال الصبح تحطينه بشكل خفيف
وللوكات الاثقل والليل تقدرين تكثرين منه
رايي بالبلشرات
10/10
** جودتهم ممتااازة.. يكفيج مسحة صغيرة بالفرشة.. اللون يطلع واضح على الخد ويندمج ويتوزع بسهولة.. وتقدرين تكثرين لين توصلين للكمية المناسبة
** يدوم مدة كافية.. واللون مع الوقت ممكن يخف شوي بس مايختفي بالمرة
** العلبة صغيرونة حدها كيوت.. بالضبط بحجم البلاشر.. وفيها منظرة.. ولانها نتفة سهل تشيلينها وياج بكل شنطة ميكب وشي حلوو إنه ماكبروها وحطوا معاها فرشة بدون فايدة.. محد يستعمل الفرش اللي تيي مع البلشر دايما تكون سيئة.. أنا استخدم ماك 109 أكثر شي وساعات فرشة سيقما المايلةمن الطقم العادي
** سعرهم $6.5 تقريبا دينارين ونص بحريني - 1.800 كويتي! يا بلااش
** رغم السعر الرخيص إلا إنه إضافة للجودة الممتازة.. حتى العلب نفسها ديزانها والكوالتي تووب.. ماتحسينها من البلاستيك الصعيف اللي يتكسر
** كل بلاشر فيه 8 غرام من المنتج.. رغم إنه الحجم صغير بس المنتج أكثر من وايد ماركات.. على سبيل المثال نارس اللي فيه 4.5 غرام تقريباً وماك فيه 6 غرام
<<<< هالمعلومة من النت ماعندي بلاشر نارس وماك الحجم الكامل ^^"
الألوان اللي مخططة أطلبهم مستقبلاً:
- Rose Gold ..شبيه نارس اورقازم المشهور.. وانا طلبته لريجتي وشفته حسيته احلى من اورقازم اللي عندي في باليت.. أقوى اللون ويميل للمشمشي أكثر من نارس
- Suede هذا نزل مع كولكشن الناتجرال.. وحاليا اوت اوف ستوك ومادري بييبون او خلاص قطعوه اذا يابوا باخذ منه
** ملاحظة انا طلبتهم من ايباي فتقريباً دفعت 8 - 9 دولار للواحد بالتوصيل
***
الطلبية الثانية من سايتهم كنت طالبة لي ولربعي في الدوام
وانا كان لي 3 أشياء
باليتين شدو ومرطب شفايف
Au Natural
طبعا كل بنت لازم يكون عندها باليت أو أكثر من هالألوان الناتجرال والنيود للاستخدام العملي واليومي
انا عندي باليتات من ماركات مختلفة..
وحاليا هذا في المرتبة الأولى المفضل عندي.. سبق نيكد اللي كان مفضل عندي قبله
والسبب إنه يجمع بين الألوان المات والشيمر.. وبين الفواتح والغوامج
بينما نيكد على إنه كوالتي ممتاز والوانه حلووة.. بس أغلبها شيمر
باليت سليك تقدرين تعتمدين عليه بروحه للوك كامل
الالوان واضحة وقوية.. وسهلة في الدمج.. وماحسيتها تتناثر "رفيجتي تقول تتناثر"
وحجمه حلوو وعملي لشنطة الميكب وللسفر
أنا أفكر آخذلي باك آب منه! لأنه مفروض نازل بكولكشن الناتجرال ومادري لمتد او بيخلونه على طول!
* شي واحد ماعجبني! إنه الشدوات مسطحين.. قبل كانوا باليتات سليك منقشين بمربعات مايلة نفس الوافل.. بس من الدفعات اليديدة خلوهم عاديين مسطحين.. الجودة ماتغيرت طبعا.. بس كان عاجبني الشكل القديم احلى مخلنهم مميزين عن باجي الماركات
**
Bad Girl
طبعا يبين من الصورة.. هالباليت يميل للغوامج والشيمر أكثر
اهو بشكل عام يصلح للمناسبات ولليل..
انا صالي فترة هابة عالكحلي.. والحين موضته بعد
الوانه حلوة وقوووية وايد.. يبيلج مسحة خفيفة ويد خفييفة!
ومن الالوان المميزة فيه الثاني من اليسار فوق.. وردي شامبين شيمري
حلوو تحطينه على الجفن المتحرك والمدمع وفي الكسرة والزاوية تحطين لون غامج ومات..
وأحب الالوان الكحلي الغامج والبنفسجي اثنينهم شيمر لتحت الرموش السفلية.. واايد حلوييين
** في هالباليت شوي حسيت الشدوات اللي وايد شيمري يتناثرون "لاحظوا اللون الرمادي بالصورة"
يعني يبيلج تنفضين الفرشة شوي قبل ماتحطينه بعينج
ولاحظوا هالباليت عطوني اياه بالنقشة القديمة اللي قلتلكم
+++
تقييمي لباليتات الشدوو
10/10
الكوالتي، قوة الألوان، تنوع الشدوات ونوعيتهم، حجم العلبة كل شي ممتااز
** سعرهم 10 أو 10.5 دولار.. مادري ليش النص ساعات هههههه
يعادل 4 بحريني / 3 كويتي
** كل باليت فيه 12 لون شدو.. غالبا يكونون متنوعين بين المات والقلير ومكس درجات مختلفة
ناوية أطلب:
- Storm.. شفته عند رفيجتي ألوانه حلووة وعملي.. تقريبا يجمع بين الناتجرال والباد قيرل! فيه فواتح وغوامج وتدرجات مختلفة
- ويمكن Oh So Special
- واذا نزلوا باليتات مستقبلية وعجبتني
+++
Pout Polish - Pink Cadillac
لا تتخرعون ترى في الصج مو فاقع جذي.. بس لأنه بفلاش ^^"
هذا مرطب ملون للشفايف لونه فوشي
حبيته لأنه يعطي لون زين.. وبنفس الوقت كثيف شوي ويتم الترطيب واللون
اذا كنت مستعيلة اخذ مسحة بصبعي على السريع
بس شي واحد مو عاجبني فيه.. فيه طعم وريحة غريبة Chemical! لما احطه احسها تدش لحلجي وتزعجني فترة عقب تروح
تقييمي له
8.5/10
العلبة راهية وسعره نفس البلاش
++++
الطلبية الثالثة والاحدث.. طلبتها شهر 3 ووصلتني الاسبوع اللي طاف تقريباً
باليتات البلاشر اللي صارلنا فترة ننتظرهم
سليك منزلين 5 باليتات بلاشر ليمتد إدشن
كل باليت فيه 3 ألوان
يعني المجموع 15 لون لكل الباليتات
والالوان اللي في الباليتات كلها لمتد وماتتحصل بالعلب المفردة
اللون الواحد حجمه 6.6 غرام تقريباً.. أصغر بشوي من اللي بروحهم "8 غرام"
أنا طلبت 3
Lace
فيه 3 ألوان 2 مات وواحد شيمري
من اليمين لليسار
- Crochet مات بين الوردي والبرتقالي.. الدرجة يونيك ماتحصلينها بسهولة.. وحسيته حلوو للصيف والصبح
- Guipure من النظرة الأولى حسيته وااايد يشبه روز قولد ونارس اورقازم.. من نفس النوعية وردي مشمشي بشيمر ذهبي ويعكس ذهبي.. حبييته اللون يوم جربته على يدي
- Chantilly برتقالي متوسط.. يشبه Life's a Peach بس لونه ودرجته أقوى.. مات
*
Sugar
أول ماشفت الصور من السايت حبيت ليس أكثر.. بس يوم وصلوني حسيت شوق رهو الأحلى والعملي أكثر بينهم كلهم
فيه 3 ألوان 2 مات وواحد شيمري
من اليمين لليسار
- Turbinado برتقالي مات كورالي يميل للغامج.. حسيته وااايد حلوو وصيفي ويناسب للي يحبون التان
- Muscovado بعد هاللون من نفس فشة اورقازم نارس وروز قولد.. بس هذا كرزي بني بانعكاس ذهبي.. واايد حلووو
- Demerara كرزي مات.. يبين بالعلبة جنه ماروني بس في الحط اللون يطلع ناتجرال.. حلوو وماعندي درجة تشبهه من قبل
*
Pumpkin
هالباليت بسميه الفرايحي! ألوانه مشعة وفرايحية وصيفية بإمتياز
فيه 3 ألوان واحد مات وواحد شيمري وواحد ساتن
- Lantern برتقاالي فاقع كركمي.. بالضبط نفس لون البرتقال هههههه مات.. اتوقع يطلع حلووو بيد خفيفة ومع دمج مضبوط
- Squash وردي باربي.. أغمج من بيكسي بينك بس للحينه هادئ مب فاقع.. هذا الساتن اتوقع.. مادري شلون اوصف الخامة بس انه مب مات ولا شيمري ^^" لووول
- P Pie برتقالي شيمري.. واحس شووي فيه لمحة وردي حبات الشيمري فيه ناااعمة ذهبية.. بعد لون يونيك ومو موجود وايد
وبسس هذا الريفيو للثلاث الوان اللي عندي
أحس شوي خبصت بوصف الألوان هههههه رغم اني يبت الباليتات صوبي وكل لون اطالعه واجربه بصبعي قبل ما اوصفه! إكتشفت إنه وصف الالوان صعب الصراحة خخخخ
** سعرهم $16 دولار.. يعادل 6 بحريني و 4.500 كويتي
** ماقدر أعطيكم تقيميي لأني للحين ماجربتهم عدل.. ماعدا شوقر كنت بروح عرس وجربت الثلاث الوان تقريباً دمجتهم.. ولين مارديت كان اللون موجود يعني الثبات أوكي
** السمووحة ماصورت سواتشز لاني للحين ماضبط طريقة تصويرهم
** وبعد السمووحة ماصورتهم صوب اللي بروحهم خاصة المقارنة.. وانا اكتب الرد يا على بالي.. لكن الميموري ريدر انكسر منساعة ولازم اشتري يديد علشان اقدر اصور
** امممم حسيت البلاشرات المات شووي باودري.. يمكن لاني مسحتهم بصبعي علشان اشوف اللون.. بس مب باودري لدرجة انهم يتناثرون بكل مكان.. بس على سطح البلاش شووي, لكن لونهم واضح ويبين بسرعة.. يبيلهم يد خفيفة حتى أخف من الالوان المفردة في بعض الالوان
ناوية أشتري
- Flame بالصور مال السايت لونه يخرغ احمر فاقع! بس شفت تصوير طبيعي له حسيته حلوو وناتجرال
- ويمكن أصير لوسة وأشتري Pink Spirit علشان ايمع المجموعة كامل بما انهم لمتد! بس لغرض اللواسة لا غير ولا هالباليت ماجذبني كلش
+++
*** شريت مرطب مدور مشمي فاتنح بس نسيت أصوره! أصلا للحين مابطلته
*** وويا الاوردرين اللي من السايت عطوني غلوسين صار يتعلقون بالموبايل واحد وردي وواحد شفاف.. ماصورتهم بعد
+++
معلومات عامة عن الموقع
www.sleekmakeup.com
** موقعهم يشحن مباشرة.. الشحن الدولي قيمته ثابته لكل طلب $15 وكانوا مسوين عرض الشحن بنص السعر $7.5 بس مادري للحين او لا
** اللي تبي اوردرها يوصل بسرعة تقدر تشحنه على ارامكس بريطانيا.. وبتدفع على حسب الوزن طبعا مب ثابت نفس الدولي.. يوصلها باسبوع تقريباً بس ساعات يتأخرون سليك نفسهم
** في كل اوردر لج لمت تطلبين من كل قطعة 4 حبات بس
** بعد ماتسوين الاورد يطرشون لج عقب يوم تقريباً إنه الاوردر انقبل.. وعقب 3 أيام يطرشون لج ايميل إنه انشحن Dispatched
** الشحنة تنشحن بدون تراكنغ.. غالباً توصل في أسبوعين - ثلاثة
** تغليفهم ممتاز وآمن.. والباليتات يحطونهم في بوكس ابيض بحجمهم بالضبط نفس اللي صورته فيه باليت البلاشرات
** أحيانا يطرشون لج اوردر غلط >< والتواصل معاهم عبر الايميل بس للاسف مايردون بسرعة.. تواصلي معاهم على تويتر أسرع @SleekMakeUp
** موقعهم شوي بدائي.. طبعا لازم تسجلين أول.. ولو حطيتي اشياء بالسلة وصكيتي الموقع وعقب رديتي له.. بتشوفين صار تسجيل خروج والسلة فاضية.. واذا بتسوين اوردر اول مرة شوي الدفع معقد لازم تكتبين تفاصيل عن البنك.. ولو غلطتي بشي بسيط يتكنسل الاوردر وتعيدين من البداية!.. يعني لو ناوية تسوين اوردر.. اول شي سجلي بنوت باد كل شي تبينه.. جهزي بطاقتج بالفلوس وبعدين حطي الاشياء مرة وحدة وسوي الاوردر بنفس الوقت
وبسسس
رديت كتبت الرد من اول ويديد
حاولت أتذكر كل شي كتبته في الرد القبلي
أتوقع تذكرت 95% بالمية من المعلومات اللي كتبتها
طبعا الرد اليديد أخذ مني وقت طوييل
فإن شاء الله باجر بشتغل في مجموعة يديدة من الصور -.-
اللي عندها أي سؤال حياها ^.^
الحين برقد تصبحوون على خيير
باجر براجع الردود اللي طافتني
التعديل الأخير:
