ودي ارضع ولدي طبيعي

[english muffin]

قوة بنات
بسألكم
انا كل ماسألت وحدة عن الرضاعة قالت لي انا ارضع صناعي وحليبي بس اول ايام !!
بنات انا ابي ارضع طبيعي شاسوي ؟ انا الي اعرفه اهو طبيعي بيطلع مني حليب لين ولدت ان شاء الله
وهل لازم اعود البيبي عالاثنين ؟ الصرراحة خاطري بس طبيعي بس مايندرى بيطلع مني او لا !! في شي اسويه من الحين قبل الولادة حق ازيد الحليب؟؟
صديقتي ماشاء الله عليها بنتها عمرها سنة ولحين ترضعها طبيعي
وتداوم بعد
تشفط تخلي لها في الثلاجة وتروح الدوام
واذا برضع شلون بعرف البيبي شبع او لا ؟

 

[sosowaty]

ااااااب

 

[PinkLulu]

السلام عليكم

موضوع الرضاعة الطبيعية كنت خايفة منه بس طلع أسهل من ما توقعت

أول شي لازم تبتعدين عن الحليب الصناعي أول فترة

ولا تحطين في بالج إن ممكن ما يكون فيج حليب

الله خلق المرأة إنها تكون قادرة على ارضاع ولدها...ماكو شي اسمه ما فيني حليب أو حليبي مو كافي

أول 3 أيام عقب الولادة الحليب يكون خفيف وايد بس كميته تكون كافية حق الرضيع

وكل ما يمص الطفل...يحفز الغدد إنها تفرز حليب أكثر في وقت الرضاعة القادمة

الطفل معدته صغيرة ويشبع بسرعة...والحليب الطبيعي ينهضم بسرعة

فراح تلاحظين إنه كل ساعتين (من بداية وقت الرضاعة إلى بداية وقت الرضاعة اللي وراها)

هالشي مو يعني الرضيع مو قاعد يشبع...بس ياع مرة ثانية و يا وقت الوجبة

ومرات راح تلاحظين الرضيع يقعد يمص لفترة ساعتين أو أكثر...مو لأنه مو قاعد يطلع له حليب كافي

بس هذا شي تصرف طبيعي من الله سبحانه عشان يكون مثل مساج وتحفيز للصدر إنه يستعد إنه يفرز كميات أكثر من الحليب​

 

[PinkLulu]

والرضيع لما يشبع راح ينام و يفصل فمه عن الصدر....لا تحاولين تفصلينه

ولا تعودينه على الحليب الصناعي

أنا دخلت الحليب الصناعي بعد ما رجعت الدوام...لأن لما أشفط حليب صدري يتشقق ويطلع مع الحليب دم

بس في بنات مرتاحين مع الشفط

أول فترة يبيلها صبر وايد...بس بعدين يسهل الموضوع

وولدي يعتبر الرضاعة الطبيعية مثل المصاصة...متى ما يبي ينام أو يحن أحطه على صدري ويرتاح

وأنا ارتحت من هالشي

الحليب الصناعي ملزومة في كمية معينة باليوم...بس الطبيعي ما تضر زيادته

ما تحتاجين تعقمين مميات...وتجهزين حليب...تقعدين من النوم و تحطينه على صدرج بكل سهولة​

 

[PinkLulu]

أهم شي تهتمين بأكلج...

تشربين سوائل وايد...وراح تحسين بالعطش وقت الرضاعة

السمك يدر الحليب خصوصاً السمك الأبيض مثل الهامور

الحلبة والرهش

وابتعدي عن الثوم والبقوليات والأكل اللي يسبب الغازات لأنه راح يسبب غازات حق الرضيع
​

 

[PinkLulu]

وحبيت أضيف شغلة...حجم الصدر ما يدل إذا كان فيه حليب ولا لأ

وأهم شي لا تحطين في بالج أن ما يطلع حليب

كل ما مص الرضيع...الغدد راح تفرز حليب بوقتها

وإذا عندج أي استفسار ما جاوبت عليه سئليني وإن شاء الله أقدر أفيدج
​

 

[english muffin]

مشكووووووووورة
يعطيج الف عافية وااايد فدتيني بالرد

 

[PinkLulu]

مشكووووووووورة
يعطيج الف عافية وااايد فدتيني بالرد

العفو حبيبتي الله يعافيج :eh_s(17)::eh_s(17)::eh_s(17):

 

[أم علي حبيبي]

بنك لولو يحليلج والله حتي انا استفدت لاني ولدي الاولي ما رضعته طبيعي ومن اول يوم صناعي وودي باللي ياي اجرب الطبيعي
الله يعطيج العافيه ويجعله في ميزان حسناتج يارب ))

 

[ليمونة وزيتونه]

بنك لؤلؤ ما قصرت وهم البنات وأب لعيونج

 

[أبكاني ذنبي]

مشكووورة انجلش مافن طرحتي موضوع حتى انا ااحاتيه وافكر فيه

وبنك لولو كفيتي ووفيتي

مااقصرتي

 

[أملي بعد الله]

يزاج الله خير يا بينك لولو إستفدت منج وااااايد الله يرزقد ويبارج لج في وليدج

مشكورة خيتو على طرح السؤال ... فدتينا
والله يسهل ولادتج ويبلغج في وليدج

 

[orange blossom]

صدقيني الرضاعة الطبيعية وااااااايد اريح من الصناعي
انا مجربه الأثنين
و انشالله اذا ولدتي بالسلامة قولي حق السسترات ملوت قسم الأطفال يعلمونج شلون ترضعين
و مشكوورة بينك لولو على الرد استفدنا منج وايد

 

[shy rose]

3 ايام مافيني حليب
وش بيرضع وليدي
انا مايجي فيني حليب الا رابع يوم
والمستشفى من اول يوم يعطونه صناعي ...

 

[kuwaitiya_84]

انا مع كلام بنك لولو لاتعودينه عالصناعي راح يشرب منج وخلي يرضع اول ماتولدين جذي يحفز الغدد واهتمي باكلج كثري سمج ورهش عن تجربه يدرووون الحليييب وكثري سوائل لاتقولين مابي كرش السوائل ماتكرش الا اذا شربتي ماي بارد الماي الدافي يشد الرحم انا يبت اثنين والحمدالله ارضعهم لي سنه ونص والفضل كله لامي ماتدخل الحليب الصناعي البيت وتقولي يلا رضعي واقولها يعور تقول مو تبين تصيرين ام وبالعكس انتي ترتاحين والرضاعه تقري الام من المولود وترد الرحم مكانه اسرع وتطير الكرش اول ايام حليب شوي بس من يشرب منج باليوم ثلاث او اربع مرات اهو يتعود ومايبي الصناعي

 

[^حبيبة الكل^]

انا ولدي يبته باخر الثامن كان وزنه 1800 ودش الحضانة اسبوعين وكله حليب سيميلاك + اني كنت اشفط له من الشفاطه كمية لا يستهان بها
تعود على الصناعي وصار عنده صعوبه بمص صدري اول اسبوعين تازمت لكن لما رديت البيت قام يرضع لكن ما اجذب عليج
اعطيه الصناعي اكثر من الطبيعي لان الطبيعي في فايدة لكن ما يسمن اما سيميلاك نيوشور فيسمنه و يخليه مربرب ويزيد وزنه

وعندي مشكلة بعد بالطبيعي ان حبيبي متعود على الحلمة الكبيرة مالت الممية اما حلمتي فصغيرة عليه

 

[ضحاوي الديره]

الرضاعه الطبيعيه من اروووووووع مايكون سبحان الله احساس غير غير لج ولبيبيج
كنت متصورتها صعبه بس طلعت من اسهل مايكون واحلا
للأسف راح اضطر اقطعها لان راح اكل حبوب مانع وسمعت ان حبوب المانع مالت الرضاعه ضعيفه وممكن احمل عليها
فراح اكل حبوب قويه وبينشف حليبي *

 

[أإلع ـشق دلع ـهـأإ]

مصيرج بترضعين صناعي

احس الزمن هذا البنت صعب ترضع طبيعي

اول الايام بترضعينه صناعي لاازم حتى الطبيب يرضعونه صناعي واذا طبيعي يبيلج كلىشوي تنخشين وترضعينه وبتملين واذا نمتي اهلج بيعطونه صناعي

احس صعب

 

[مسك 3]

حبيت انقل لكم تجربتي ان توني والده من شهر
ولدت قيصري واصريت اني ارضع طبيعي حاولت بالمستشفى ونبهت ان ما يعطون البيبي صناعي الا في اضيق الاحوال وحاولت وطلع شوي ولما رديت البيت الكل قال ما يكفي وحرام وبنتج يوعانه وتبجي ترى مرات البيبي يبجي من الغازات ومرات يبجي يبي ريحه امه عشان ينام ومرات نعسان او يبي غيار الحين دخلت الصناعي لاني حاولت اشفط وعورت نفسي البيبي مهما يعور مو مثل المكينه مالت الشفط
بحاول يومين وبعدها برد وفي حبوب الحلبة تنباع بالصيدلية فيها اعشاب ثانية وتساعد ان الحليب يدر وحبيت اذكركم لا توقفون الفيتامينات
الله يقومكم بالسلامة ويخلي لكم عيالكم
ويحفظكم

 

[PinkLulu]

االله يعافيكم :eh_s(17)::eh_s(17)::eh_s(17): وحلو إنا نشجع بعض عالرضاعة الطبيعية